Johana Hnêna Thu Puan Chhuah
8 Berâm No chuan lehkha zial chârna pasarihna a han phelh chuan, vân chu dârkâr chanve vêl a reh ṭhuap a. 2 Tin, vântirhkoh pasarih Pathian hmaa ding ka hmu a, anni chu tawtawrâwt pêk an ni.
3 Vântirhkoh dang, rimtui hâlna rangkachak bâwm keng a lo kal a, maichâm bulah chuan a ding a, mi thianghlim zawng zawngte ṭawngṭai ruala lalṭhutthlêng hmaa rangkachak maichâma hlan tûrin rimtui tam tak pêk a ni. 4 Vântirhkoh kuta rimtui khû chu mi thianghlimte ṭawngṭaina rualin Pathian hmaah a chho va. 5 Chu veleh, vântirhkoh chuan rimtui dahna bâwm chu lain, maichâma mei ṭhenkhat chuan a ti khat a, chu chu leiah a leih bua a. Tichuan, khawpui rite leh aw rite a lo chhuak a, kâwlte lo phein lîr a nghîng bawk a. 6 Tin, vântirhkoh pasarihte chu an tawtawrâwt kente hâm tûrin an inpeih ta a.
7 Vântirhkoh pakhatnain a tawtawrâwt a han ham chuan, thisen nêna inchawhpawlh rial leh mei a lo awm a, chu chu leiah leih buak a ni a; tichuan, lei hmun thuma ṭhena hmun khat a kâng ral a, thingkûng pawh hmun thuma ṭhena hmun khat a kâng ral a, thlai hring zawng zawng a kâng ral bawk a.
8 Vântirhkoh pahnihnain a tawtawrâwt a han ham chuan, thil eng emaw tlâng lian tak kâng ang mai hi tuifinriatah paih thlâk a ni a. Tichuan, tuifinriat hmun thuma ṭhena hmun khat chu thisenah a lo chang ta a; 9 tuifinriat chhûnga chêng nunna nei thil siam hmun thuma ṭhena hmun khat an thi a, lawng hmun thuma ṭhena hmun khat a keh chhe bawk a.
10 Vântirhkoh pathumnain a tawtawrâwt a han ham chuan, arsi lian tak mei alh ang vân aṭangin a lo tla a, lui hmun thuma ṭhena hmun khat leh tuikhur hmun thuma ṭhena hmun khat chungah a tla a. 11 Chu arsi hming chu Khâkna* a ni a. Tichuan, tui hmun thuma ṭhena hmun khat chu a lo kha ta vek a, tui a lo khâk tâk avâng chuan mi tam tak an thi a.
12 Vântirhkoh palinain a tawtawrâwt a han ham chuan, nî hmun thuma ṭhena hmun khat, thla hmun thuma ṭhena hmun khat leh arsi hmun thuma ṭhena hmun khat chu tih chhiat a ni a, chûng hmun thuma ṭhena hmun khat chu a thim theihna tûr leh, chhûn pawh hmun thuma ṭhena hmun khat a thim a, zân pawh chutiang bawk chu a nih theihna tûrin.
13 Tin, mupui vânlaizâwla thlâwk ka hmu a, aw ring taka: “Vântirhkoh dang pathumte’n an ham mai tawh tûr tawtawrâwt ri avâng chuan, leia awmte chunga thil thleng tûr chu a va râpthlâk dâwn êm! A va râpthlâk dâwn êm! A va râpthlâk dâwn êm!” tia a au ka hria a.