Johana Hnêna Thu Puan Chhuah
10 Tin, vântirhkoh chak tak dang chhûma inthuam vân aṭanga lo chhuk ka hmu a, a lûah chuan chhimbâl a zâm a, a hmêl chu nî ang a ni a, a kête chu ban nghet tak ang a ni a, a lan dân chu mei alh ang a ni, 2 lehkha zial te tak tê inphelh sa a keng a. A ke ding lamin tuifinriat a rap a, a ke vei lamin khawmual a rap thung a, 3 sakeibaknei hâhum angin ring takin a au va. A han au chuan khawpui ri pasarihte aw ka hria a.
4 Khawpui ri pasarihte’n thu an han sawi chuan ziah ka tum a; nimahsela, vân aṭanga âwin: “Khawpui ri pasarihte thusawi kha thup tlat la,* ziak suh,” tia a sawi ka hria a. 5 Tuifinriat leh khawmuala ding vântirhkoh ka hmuh khân, a kut ding lam chu vân lamah a phar a, 6 vân leh a chhûnga thil awm te, lei leh a chhûnga thil awm te leh, tuifinriat leh a chhûnga thil awmte siamtu chatuana Nung Renga hminga chhia chhamin: “Nghah a ngai tawh lo vang. 7 Vântirhkoh pasarihnain a tawtawrâwt a ham dâwn nîahte chuan, Pathianin a bâwih zâwlneite hnêna chanchin ṭha anga a puan chhuah thurûk thianghlim chu tih famkim a ni tawh ang,” a ti a.
8 Tin, vân aṭanga aw ka hriat khân min be leh a: “Kal la, tuifinriat leh khawmuala ding vântirhkoh kuta lehkha zial inphelh sa kha la rawh,” a ti a. 9 Vântirhkoh hnênah chuan kalin, lehkha zial te tak tê chu min pe tûrin ka hrilh a. Ani chuan ka hnênah: “La la, ei rawh, i pum a ti khâ ang a, i kâah erawh chuan khawizu angin a thlum ang,” a ti a. 10 Vântirhkoh kut aṭang chuan lehkha zial te tak tê chu lain ka ei a, ka kâah chuan khawizu ang maiin a thlum a, ka pum erawh chu a ti kha ta vek a. 11 Tin: “Mi te, hnam te, ṭawng te leh, lal tam takte chungchânga Pathian thuchah chu i sawi leh tûr a ni,” tia hrilh ka ni a.