Komana Munatwalekihu Kumwiluka Yehova Chiwahi?

1. Twatiyaña ñahi neyi tutoñojoka hayuma yelukayi Yehova, hachabadika maanindi nihayuma yakuhayamisha yaleñayi?

NZAMBI yetu Yehova weluka yuma yejima, wekala namaana kubadika ejima nawa waleña yuma yayivulu yakuhayamisha. Twahayamaña nankashi neyi tutoñojoka hadi Nleñi yetu. Munateli kutiya neyi chatiyiliyi kapostolu Pawulu, wasonekeli nindi: “Ochavula maheta aNzambi! Maana indi niyuma yelukayi ochiyakunama! Wunsompeshi windi ochiwakala kuwiluka nawa njila jindi ochijakala kujilondela!”—Rom. 11:​33, 34.

2. Wunsahwinyi wunakumwekesha nawu ninetu tunateli kumwiluka Yehova?

² Hela chakwila hitukutwesha kwiluka yuma yejima hachekalayi Yehovaku, ilaña tukutwesha kwiluka yuma yantesha hachekalayi. Mwanta Davidi wamulejeli mwanindi Solomoni nindi: “Mwiluki Nzambi yanami tata yeyi nawa wumukalakeleña namuchima wejima. . . Neyi wakamukeñakeña niyena wakadisolola kudi eyi.” (1 Kushi. 28:9) Neyi chayanukishiliyi kapostolu Yowanu akwawu akaKristu chimwahitili yaaka yayivulu, ninetu tukweti “kashinshi kulonda twiikali nakwiluka kwakumwiluka owu walala.” (1 Yow. 5:20) Yesu niyena wahosheli nindi antu anateli kumwiluka Yehova ilaña chiña ana hohu “akukeña kulumbulwilayi Mwana chekalayi Tata.”—Mat. 11:27.

3. Yumanyi yitukuhanjekahu muchinu chibaaba?

³ Etu adihana dehi kudi Yehova, tweluka yuma yayivulu yahosha hadi yena. Hela chochu, twakaleka wanyi ‘kumwiluka’ Yehova. (Yow. 17:3) Chakutalilahu, mpinji yejima twatela kudizaña yuma yamuzañaleshaña niyuma yikutukwashaña kumukuhwelela chikupu. Hakwila wejima wetu tumwiluki Yehova chiwahi hichikweti muloña nayaaka yitunamukalakeliku, tuhanjekenu hanawa malwihu asatu akutukwasha: Kumwiluka Yehova kwatalisha mudihi? Muloñadi chitwatela kutwalekelahu kumwiluka chiwahi? Nawa yumanyi yitwatela kwila hakwila tumwiluki chiwahi?

KUMWILUKA YEHOVA KWATALISHA MUDIHI?

4. Yumanyi yitwatela kwila hakwila tumwiluki Yehova chiwahi?

⁴ Neyi tutoñojokaña hamazu ahosheliyi Yehova hadi aYudeya afuntili kufuma muwunkoli, tukwiluka yuma yitwatela kwila hakwila tumwiluki chiwahi. Yehova wakanini nindi: “Nakayinka muchima wakuñiluka nawu yami Yehova.” (Yere. 24:7) Chakadi nikujina, antu afuntili kufuma kuBabiloni adiña eluka dehi yuma yayivulu hachekalayi Yehova. Hela chochu hakwila amwiluki chiwahi, ateleli kumukeña namuchima wawu wejima ninayitoñojoka yawu. Mukanda wumu wahosha hansañu yamuBayibolu walumbulula chumichi nawu: “Hadi chaambu cheneni hakachi kakwiluka hohu nsañu yahosha hadi Nzambi nakumwiluka chiwahi chekalayi. Chumichi anateli kuchesekeja nachaambu chekala hakachi kamuntu wunakutaña hohu nsañu yahosha hakukeña namuntu wunakudiluka chiwahi namuntu wakudisumbula nindi.” Hitwatela hohu kwiluka netu Yehova wukweti ijina nawa netu diyi Nzambiku, ilaña twatela kumwiluka chiwahi chekalayi.

5. Yumanyi yitunakudizila kudi Mwanta Yosiya mwatalisha kumwiluka Yehova?

⁵ Chitunakumwiluka Yehova, tukwilukaña yuma yamuzañaleshaña niyamutiyishaña kutama. Talenu yuma yeliliyi Mwanta Yosiya. Bayibolu yahosha nawu: “Muchaaka chamu 8 chachiyuulu chindi, henohu wuchidi kansi, watachikili kukeñakeña Nzambi yankakulula yindi Davidi.” (2 Kushi. 34:3) Hela chochu, Yosiya hakuminineña hohu dakudizaku. Wazatishileña yuma yadizileñayi. Kuhitila mudi kaprofwetu Yeremiya, Yehova wahosheli kutalisha hadi Yosiya nindi “walondeleleña wuñanji nikuloña,” nawa nindi wahakwilileñaku antu akabakeneña niatuzweñi. Kuhiñahu, Yehova wabombelelihu nindi: “Komana chumichi hidimwatalisha kuñiluka amiku?”—Yere. 22:​15, 16.

6. Neyi chinashimuniwu haIsamu 9:​10, kumwiluka Yehova chiwahi kukutukwasha kwiladi?

⁶ Tañenu Isamu 9:10. Neyi tumwiluka Yehova chiwahi chekalayi, tukumukuhwelela chikupu. Ichi dicheliliyi kapostolu Pawulu. Hampinji yamukasiliwu kakumishaku mukaleya nawa chikwashalili mpinji yantesha nakufwa, wasonekeli nindi: “Hinnakutiya nsonyiku. Muloña neluka Owu wunetiya.” (2 Tim. 1:12) Yuma yadiziliyi Pawulu niyelukiliyi muchihandilu chindi, yamukwashili kumukuhwelela Nzambi yindi chikupu. Wakuhweleleli nindi Yehova wakamuvulamena wanyi nimudimu wazatiliyi nakashinshi, nawa nindi wakamusañula.

MULOÑADI CHITWATELA KUTWALEKELAHU KUMWILUKA YEHOVA CHIWAHI?

7. Neyi tunamukalakeli Yehova hadi yaaka yayivulu, chumanyi chinateli kumwekana?

⁷ Chitwamwilukili Yehova katachi, twashileñaku muchima nankashi kudiza yuma yatukwashileña kumwiluka chiwahi. Ilaña mukuhita kwayaaka, hadaha tunekali nakaneñawudi kakudiza hadi yena. Muloñadi? Muloña neyi tunakutaña Bayibolu nkawetu indi kwiji nawakwetu hakupompa, tunateli kutachika kusha hohu muchima hachinateli kutukwasha oyu nsañu halwetu, hela chitunateli kuyizatisha hakukwasha akwetu. Chatama wanyi kwila mwenimu, muloña niNsona dichiyatukoleshaña nawu twileña. (2 Tim. 3:​16, 17) Ilaña Bayibolu yashimuna cheñi yuma yalema yitwatela kwiluka hadi yomweni wayisonekeli. (Mas. 25:​8-10) Twatela wanyi kusha hohu muchima kunoyu nsañu chiyinakutukwasha etu hela akwetu chakwila tukañanya nikudihula netu, ‘Indi iyi nsañu yinakunkwasha kwiluka yumanyi hachekalayi Yehova Nzambi?’a

8. Kumwiluka Yehova chiwahi kunateli kutukwasha kwikala nawubwambu wamuchidinyi nayena? (Isamu 73:​24-28)

⁸ Neyi tumwiluka Yehova chiwahi, wubwambu wetu nayena wukukolelaku. Chakutalilahu, wubwambu wenu naYehova wekalaña ñahi neyi mutaña Bayibolu, mutala JW Broadcasting yahakakweji, indi kwiji muya kukupompa kwanyanya hela kweneni? Chakadi nikujina, awa maprogilamu atukwashaña kuswina kwakwihi naTata yetu wamwiwulu. Muloñadi? Muloña atukwashaña kwilukilahu yuma yayivulu hadi yena. Chafumañamu, twamushimekaña nikumusakilila. Twatiyaña neyi chatiyiliyi ñimbi yaMasamu watoñojokeli chikupu hachamwakameneniwu kudi Yehova. Wahosheli nindi: “Nzambi diyi ilola damuchima wami nawa iseka dami haya nyaaka.” (Tañenu Isamu 73:​24-28.) Mpinji yejima yitunakuzata nañovu kumwiluka Yehova chiwahi, tukwikala namuchima wakumusakilila chikupu hakwikala Ibwambu detu wabadika.

9. Neyi ‘tutoñojokaña hadi’ Yehova, chumichi chikutukwasha kwiladi? Shimunenu chakutalilahu.

⁹ Bayibolu yatulejaña nawu ‘tutoñojokeña hadi’ Yehova. (Yish. 3:​5, 6) Ichi chinatalishi mukwila nawu twatela kutoñojokaña hayuma yitunadizi hadi yena nikwiluka chatiyañayi nayuma yitwelaña niyitwabulaña kwila. Chitwela mwenimu, tukufuukulaña yuma chiwahi. Toñojokenu hanichi chakutalilahu, amanakwetu niahela amavulu ashaña mwevulu wamwinikwawu haswayi kumona, chidi neyi mukasanji mwazatilañawu, muchikwama chamali hela hafoni yawu. Chumichi chayikwashaña kwanuka nikutoñojoka nankashi hadi mwinikwawu, kufuukula yuma yinelukiwu nawu yikumutiyisha kuwaha nikutondolwela kwila chuma chidi chejima chikumuneñesha. Munjila yoyimu, neyi tutoñojokaña nankashi hadi Yehova, tukufuukulaña yuma yikumutiyishaña kuwaha.—Mas. 19:​13, 14.

10. Kudiza kulonda tumwiluki Yehova chiwahi, kukutukwasha kwila yumanyi?

¹⁰ Yehova watuleña muchifwanisha chindi, nawa muloña wachumichi twembujolaña yilwilu yindi. (Kutach. 1:26) Nawa neyi twiluka chiwahi chekala yilwilu yaYehova, chikutupelela kumwimbujola. Yesu wayifwishili namuloña ansoneki niaFwarisi muloña akañenyeña kumwekesha yilwilu yakumwakama Nzambi. Hela chakwila ashileña nankashi maana kutuyuma twanyanya twamuNshimbi, ilaña “[adiwileña] yuma yalema yamuNshimbi, dikwila nawu, wuñanji, luwi nikashinshi.” (Mat. 23:23) Kwambukaku nanana anlomboli jakudifukula, tuzateña hakumina ñovu jetu kwiluka Yehova chamwekeshañayi yilwilu yindi munshimbi jindi nimuyishina. Neyi twilaña mwenimu, chikutukwasha kwimbujola yilwilu yindi.—1 Yow. 4:​8, 11.

YUMANYI YITWATELA KWILA HAKWILA TUMWILUKI YEHOVA CHIWAHI?

11. Mwatachikili ñahi kudiza hakwila mumwiluki Yehova?

¹¹ Anyi atachikili kuyidizisha hakwila mumwiluki Yehova? Hadaha ayidizishileña kudi anvwali jenu. Hekwawu ayilejeleña mpanji jamuBayibolu nikuyidizisha hayuma yaleñayi Nzambi kulonda ayikwashi kwiluka yilwilu yindi. Indi kwiji mwetejeli kudiza Bayibolu naChinsahu chaYehova. Hadaha muntu wayidizishileña wazatishileña mukanda waMunateli Kwikala naMuzañalu Haya Nyaaka!, kulonda yayikwashi kutoñojoka chikupu hansañu yamuBayibolu nikuyikwasha kwiluka yilwilu yaYehova yayiwahi kuhitila mukudiza hayuma yaleñayi.b (Nehe. 8:8; Yilw. 14:17) Ichi tuhanjekenu hachitunateli kutwalekahu kudiza kulonda tumwiluki Yehova chiwahi.

12-13. Yumanyi yitunateli kwiluka hachekalayi Yehova neyi tutañaña Bayibolu? Shimunenu chakutalilahu. (Yeremiya 39:​15-18) (Talenu nimwevulu wudi .)

¹² Chuma chatachi chinateli kutukwasha kumwiluka Yehova chiwahi hikutaña nikudiza Izu dindi. Mpinji jikwawu, Bayibolu yashimunaña jiika yilwilu yikwetiyi Nzambi. (Kwid. 34:​6, 7) Hela chochu, kakavulu yahoshaña hadi antu niyuma yafuukwileñawu. Neyi mutaña nsañu yamuchidiwu, toñojokenu chiyinakuyikwasha kumwiluka Yehova chiwahi chekalayi.

¹³ Toñojokenu hanichi chakutalilahu. Hampinji yimunakutaña Yeremiya 38:​6-13, muwana nsañu yinakuhosha hadi Ebedi Meleki mwini Etiyopiya, wamupulwishili kaprofwetu Yeremiya. Chakadi nikujina, chikuyipelela kwimbujola yilwilu yamwekesheliyi Ebedi Meleki, chidi neyi kudihana, kuhamuka nikukeña kwamwekesheleleñayi akwawu akakudifukula. Hela chochu, kudihu yilwilu yaYehova yimunadizili kuniyi nsañu? (Tañenu Yeremiya 39:​15-18.) Chakutalilahu, vasi yimu yidihi yinakumwekesha nawu Yehova wasakililaña, wahakulaña mwaloña, nawa wekala nachaambu wanyi? Yilwilwinyi yikwawu yikwetiyi Yehova yimunamoni? Mpinji yejima yimunatañi nsañu Mwizu daNzambi, monenumu yilwilu yaYehova nawa musakililenu nikumushimeka hanoyu yilwilu.

14. Muloñadi chitwatela kutoñojokela chikupu hayuma yaleñayi Yehova?

¹⁴ Chuma chamuchiyedi chinateli kutukwasha kumwiluka Yehova chiwahi hikutoñojoka chikupu hayuma yaleñayi. (Mas. 145:​9, 10) Hela chochu, kudi yuma yikwawu yitwatela kwila kubombela hakushinshika nakanañachima hayileñaleña. Muloñadi? Muloña antu amakwawu adizaña hayileñaleña muchihandilu chawu chejima, ilaña akañanyaña kwiluka yilwilu yaNzambi hela kukuhwelela nawu wekala kwoku! Kapostolu Pawulu wasonekeli nindi “yilwilu [yaNzambi] yabulaña kumwekana, yekala hatooka kufuma tuhu mpinji yaleñeliyi iseki kuya nikumbidi, muloña yamwekenaña muyuma yaleñayi.” (Rom. 1:20) Bayibolu yimu yabalumuna iyi vasi nawu “muntu watoñojokaña chiwahi, diyi wunateli kumona yilwilu yaNzambi.” Dichi twatela kutoñojoka chikupu hayuma yitwamonaña hakwila tumonimu yilwilu yekala naNleñi yetu.

15. Chumanyi chelañayi Patrick hakwila yamwiluki Yehova chiwahi, nawa ninenu munateli kwila ñahi neyi chelañayi?

¹⁵ Etu amavulu twashakamaña mumatawuni mwabula kwikala yileñaleña yayivulu. Neyi mwashakamaña mumatawuni amuchidiwu, komana ninenu kudihu yuma yimunateli kudizila kuyileñaleña? Talenu chahosheli Patrick, washakamaña muBrazzaville, musumba weneni mwituña daRepublic of the Congo. Wahosheli nindi: “Hefuku-hefuku nashinshikaña nakanañachima kulonda nimonihu yileñaleña. Kakavulu namonaña tukabubu twanyanya nankashi hela tukada tunakukeñakeña yakuda hela hakushakama. Ifuku dimu, namweni tuda tunakutuña yisakala kuzatisha tunyitondu twasendeleñawu mumusumba kulonda twakakulishilimu chiwahi nyana.” Hela chochu, kudi chuma chikwawu cheliliyi Patrick. Watoñojokelihu chikupu hadi Nleñi. Wahosheli nindi: “Nadizili nami Yehova wakamenaña yileñaleña yindi yejima kuhitila mukuyinka yuma yakeñañawu, kushilahu niyileñaleña yanyanya nankashi. Chumichi chankwashaña kukuhwelela nami wukuñakamenaña ninami nawa wukunyinkaña yuma yejima yinukukaankilaña.”

16. Chumanyi chamukwashili Mariya, mama yaYesu, kumwiluka Yehova chiwahi, nawa tunateli kwila ñahi neyi cheliliyi? (Talenu nimwevulu.)

¹⁶ Chuma chamuchisatu chinateli kutukwasha kumwiluka Yehova chiwahi hikutoñojoka chikupu hayuma yejima yatwililayi muchihandilu chetu. Dichuma cheliliyi Mariya, mama yaYesu. Wadiña wamwiluka dehi Yehova chiwahi, nawa ‘amutiyileña kuwaha kudi yena.’ (Luka 1:30) Hela chochu, amwinkeli mudimu walema wakwikala mama yaMwana kaNzambi. Yehova wazatishili kañelu Gabireli nintaña yaMariya Elizabeta, kulonda yamukoleshi Mariya nawa yeluki nindi wukumukwashaña. Mukuhita kwampinji, watoñojokelihu chikupu hayuma yamumwekeneni yamukwashili kumwiluka Yehova chiwahi nawu wukweti ñovu, luwi, wekala nachaambu wanyi nawa wakamenaña niantu amonañawu nawu alema wanyi. (Luka 1:​46-55) Neyi chasakililiyi Mariya hamukwashiliwu kudi Nzambi, ninetu twasakililaña neyi Yehova atukwasha “hampinji yatelela.” (Heb. 4:16) Neyi mutambwila wukwashu wamuchidiwu, dihulenu nenu: ‘Ichi chuma chinandizishi yumanyi hachekalayi Yehova? Chinankwashi kwiluka yilwilwinyi yikwetiyi?’

TWAKALEKA WANYI KUDIZA HADI YEHOVA

17-18. Muloñadi chitukuhoshela netu twakaleka wanyi kudiza hadi Yehova?

¹⁷ Toñojokenu hohu hayuma yitwakeluka hadi Yehova mukaayi kakaha. Twakatambwila nyivuñilu yayiha mwakekalaña yuma yakakeñañayi nindi twileña. (Chim. 20:12) Twakekala nakukooleka kwakwikala hakamwihi chikupu nayileñaleña yejima. (Isa. 11:​6-9) Nawa twakamwiluka chiwahi nankashi Tata yetu wamwiwulu neyi tutachika kumona yuma yayiha, hampinji yakasañulañayi antaña niamabwambu jetu itwakeña nihakatukwashañayi hefuku-hefuku kwikala awanina.

¹⁸ Twakaleka wanyi kudiza hadi Yehova. Neyi chitweluka, weluka yuma yayivulu nankashi kutubadika, dichi “maana indi asweja chikupu.” (Mas. 90:2; 147:5) Muloña wachumichi, “[hitwakatwesha] kwiluka nyidimu yakoñayi Nzambi walalaku, kufuma kukutachika kushika nikukukumisha.” (Mukwa. 3:11) Dichi hela chakwila tunashimbuli muchalala hela nehi, wejima wetu tutwalekihu kuzata nañovu kudizilahu yuma yikwawu kulonda tumwiluki chiwahi Tata yetu wukweti kukeña.