Tañenu Nsañu Yekala muMukanda waIsaya Kulonda Yiyikundeji

1-2. Yehova welaña ñahi neyi amona tunakuhita mukukala kunakutuneñesha?

FWIKIJENU mwana wanyana naneñi nawa nakudila chakadi kuleka. Hadaha, chisaka chawu chinakubuukila kwiluña dacheñi nawa chumichi chikuletesha yashiyi amabwambu jindi. Indi kwiji natiyi kutama muloña wachiluwa chinakoñiyi. Hampinji yamuchidiwu, chumanyi chinateli kwilayi mama yawantu wukweti kukeña? Wukumudimbeka chiwahi mwanindi, kutiyilila kuyuma yinakumwakamisha nikumuleja nindi wamukeña.

² MuBayibolu, Yehova wadesekejaña namama yawantu wakamenaña, wukweti kukeña nawa wakundejaña mwanindi. Wahosha nindi: “Neyi chakundejañayi mama yawantu mwanindi, dichi nukutwalekahu kuyikundeja.” (Isa. 66:13) Kukeña kwatukeñayi Yehova kwabadika chikupu kukeña kwamwekeshañayi nvwali wudi wejima. (Isa. 49:15) Yehova wazatishaña Izu dindi, Bayibolu, hakutukundeja nikutukolesha neyi tunaneñi hela tunakumona yihuñu.—Rom. 15:4.

3. Yumanyi yitukuhanjekahu muchinu chibaaba?

³ Mukanda waIsaya wenzala namazu akukundeja afuma kudi Yehova. (Isa. 40:1) Tata yetu wukweti kukeña wamoneneni Isaya kusoneka iwu mukanda kulonda yakundeji antu jindi ashakamineña muYuda hamweneñawu kukala kwakuvulu. Ninetu tunakushakama ‘mumpinji jakala,’ dichi twakeñaña kutukundeja. (2 Tim. 3:1) Tuhanjekenu hamavasi amu ekala mumukanda waIsaya anateli kutukundeja nikutukolesha (1) neyi yuma yihimpika muchihandilu chetu mukukasumwisha, (2) neyi tunatwalekihu kudinkamu nyiloña hayiluwa yitwakoñeli kunyima, hela (3) neyi tunakuneña muloña wakufwisha muntu itwakeña.

NEYI YUMA YIHIMPIKA MUCHIHANDILU CHETU MUKUKASUMWISHA

4. Chumanyi chinateli kumwekana neyi kudi yuma yinahimpiki muchihandilu chetu mukukasumwisha?

⁴ Yuma yinateli kuhimpika muchihandilu chetu mukukasumwisha. (Mukwa. 9:11; 1 Kor. 7:31) Yumiyi munabombeli yikatu, kukala kwamali, mapumba muloña wansañu jamapolitiki hela kutuhimpa mudimu mukuloñesha kwaYehova. Neyi yuma yihimpika muniyi njila, tunateli kutachika kwakama nankashi hela kuluwankana. Chidi hohu chiwahi kudihula netu: ‘Nukwila ñahi?’ Manakwetu Joseph alejeliwu nawu ayi nakuzata wupayiniya hanyima yakuzatila haBeteli kwakwihi nayaaka 17, wahosheli nindi: “Naluwankeni. Chankalilili nankashi hakutachikila chihandilu chineli nashakamini yaaka yayivulu haBeteli. Mutu wanyeñumukili.” Yehova watukundejaña ñahi kuzatisha mukanda waIsaya neyi kudi yuma yinahimpiki muchihandilu chetu mukukasumwisha?

5. Neyi chasonekawu haIsaya 42:​16, Yehova watushiika nindi wukutwililaña yumanyi? (Talenu nimwevulu.)

⁵ Tañenu Isaya 42:16. Yehova wayishiika amputamesu muchifwikija nindi wukuyilombolaña mujinjila mwabulawu dehi kwenda nawa nindi wukubalumuna mwidima kwikala chejeji. Mazu akwila nawu “amputamesu,” “mujinjila mwabulawu dehi kwenda,” “mwidima” “niiluña damankulokela,” anakutukwasha kwiluka chiwahi chitwamonaña yuma neyi kudi kuhimpika kunamwekani muchihandilu chetu mukukasumwisha. Tunateli kutiya neyi tunakuhita mwiswamu dadijika chikupu, chakwila tunakukañanya nikumona kutunakuya. Hela chochu, Yehova watushiika nindi wukutulombolaña nawa hakatuumba chisayikilaku hela chakwila tunakuhita mukukala kwamuchidinyi. Wukutukwataña kuchikasa nakutukwasha kuhita mumwidima nawa wukutumunyikilaña munjila nikufumishamu mankulokela hakwila twendi chiwahi. Yehova welaña ñahi mwenimu? Watwinkaña kufumba kwakuwahi kuhitila Mwizu dindi nikuloñesha kwindi. (Mas. 119:105; Isa. 30:21) Wazatishaña cheñi akwetu akakwitiya niantu amakwawu hakwila yatukwashi muyuma yakumujimba. Hela chakwila tuneluki wanyi yuma yakatumwekena kumbidi, twatela kumukuhwelela Yehova netu wukutukwashaña mpinji yejima muloña watukeña nawa weluka chitwatiyaña.—Isa. 41:10; 1 Pet. 5:​6, 7.

6. Neyi yuma yihimpika muchihandilu chetu mukukasumwisha, twatela kukuhwelela netudi?

⁶ Joseph ashimunawu dehi, walumbulwili yena nañodindi chayikwashiliwu chikupu kudi Yehova hanyima yakufuma haBeteli. Wahosheli nindi: “Twamweni chikasa chaYehova chichatukwashileña haniyi mpinji yitwatambwilili iku kuhimpika. Watukwashileña kwikala nayuma yakumujimba nikutukundeja hampinji yatelela kuzatisha amanakwetu niahela, nawa natwalekihu kwila mwenimu.” Manakwetu Joseph wabombelelihu nindi: “Mazu ekala mukamina kamu kadimena ashimuna chiwahi nawu, ‘Nukumulomba Yehova Nzambi yankwashi, chineli jakumbidi kwami najiluki nihantiku.’a Mwamweni, hela chakwila yuma hiyinateli kwikala kwesekeja nachitunakukeñaku, tweluka netu Yehova wukutukwashaña mpinji yejima.” Neyi yuma muchihandilu chenu yihimpika mukukasumwisha, ninenu kuhwelelenu nenu Yehova wukuyikoleshaña nikuyilombola hela chakwila oku kuhimpika kunakuyakamisha chikupu.—Isa. 54:10; 58:11.

NEYI TUNATWALEKIHU KUDINKAMU NYILOÑA HAYILUWA YITWAKOÑELI KUNYIMA

7. Kukalanyi kwalwishaña nawantu amakwawu muloña wayiluwa yakoñeliwu kunyima?

⁷ Neyi tushimuna nshidi yeneni yitunakoñi, akulumpi akutukwasha munjila yakukeña. Nawa neyi anatukwashi dehi, etu aweni tukuzataña nañovu kulonda tubuli kukoña cheñi oyu nshidi. (Yish. 28:13; Yak. 5:​14-16; 1 Yow. 1:9) Hela chochu, nihanyima yakututiyila luwi hadaha tukutwalekahu kudinkamu nyiloña hayiluwa yitwakoñeli kunyima. Munateli kutoñojoka nenu, ‘Yehova kwila yañanakena chiluwa chinakoñeli nehi.’ (2 Kor. 2:7) Chatama wanyi kutoñojoka muniyi njila muloña chinateli kutukalila kuvulamena yiluwa yitwakoñeli kunyima nawa chumichi chikutuletesha kutwalekahu kutiya kutama. Mwanta Davidi wasonekeli nindi: “Mumafwaha ami mwosi kuwunda muloña wanshidi jami.” Wasonekeli cheñi nindi: “Natiyi wujinji nawa nachikeki chikupu.” (Mas. 38:​3, 8) Neyi ninenu dichimwatiyaña mpinji jikwawu muloña wayiluwa yimwakoñeli kunyima, nsañu yekala mumukanda waIsaya yikuyikundeja.

8-9. Kwesekeja nachalumbululawu haIsaya 1:​18, Yehova watwanakenaña kushika hadihi?

⁸ Tañenu Isaya 1:18. Yehova wazatishaña yakutalilahu yalumbululaña chiwahi chanakenañayi nshidi jetu. Wahosha nindi hela chakwila nshidi jetu “jichinana nge-e,” ‘wakajitookesha neyi sino.’ Neyi hachakuvwala chetu hadi ikeñeji dichinana nge-e, chekalaña chaswayi wanyi kudifumishahu. Hela chochu, Yehova watushiika nindi neyi yatwanakena nshidi, twakekalaña wanyi nekeñeji danoju nshidi muchihandilu chetu chejima.

⁹ Talenu yuma yamumwekeneni Mwanta Davidi. Hela chakwila wadiña namuloña wawujila nikujahañana, Yehova wamwanakeneni nawa mukuhita kwampinji wamuteneni nindi muntu wakashinshi. (2 Sam. 11:​3, 4, 14, 15; 12:13; 1 Anya. 9:​4, 5) Yehova wamulumbulwili Davidi kuhitila mukuhosha hanyidimu yayiwahi yazatiliyi nakashinshi, bayi hayiluwa yindiku. Ninetu Yehova watwanakenaña chikupu neyi tubalumuka mumuchima nawa watukwashaña kutwalekahu kumukalakela nachinleji chamuchima chitooka. Yumanyi yikwawu yekala mumukanda waIsaya yinateli kutukwasha neyi tunatwalekihu kudinkamu nyiloña hanshidi yitwakoñeli kunyima?

10. Mazwinyi akukundeja atushiikayi Yehova haIsaya 38:17?

¹⁰ Tañenu Isaya 38:17 nitumazu twaheshina. Mazu akwila nawu “wunanatili nshidi jami jejima kunyima yeyi” anateli cheñi kuyibalumuna nawu “wunafumishi nshidi jami jejima kumesu eyi.” Yehova anha anamufwikiji neyi nanoni nshidi jamuntu wunabalumuki mumuchima nakujinatila kunyima yindi, kwakwila hakutwalekahu kujimona hela kujitoñojokahu cheñiku. Mukanda wumu wahosha hansañu yamuBayibolu walumbulula iyi nsona muniyi njila: “Wunelishi nshidi jami kwikala neyi kwiji hijamwekenihuku.” Dichi neyi Yehova atwanakena nshidi jetu, watumonaña hohu neyi hitwakoñelihu ninshidiku. Nawa wakajizatishahu wanyi kutwinkelahu muloña hela kutubabeshelahu cheñi. Wajimaña nsañu yejima yinakundami kunshidi jitwakoñeli. Washiika nindi: “Nshidi jeyi nakajanuka cheñi wanyi.” (Isa. 43:25) Yeniyi nsañu okuwaha! Neyi Yehova, Nsompeshi Wabadika, wanukaña wanyi nshidi jetu, dikwila nawu ninetu aweni twatela wanyi kujanukaña hela kutwalekahu kutiya kutama muloña waniji nshidiku.

11. Hela chakwila twakoñeli yiluwa yamuchidinyi kunyima, Yehova washaña nankashi muchima hayumanyi? (Talenu nimwevulu.)

¹¹ Neyi tutachika kudinkamu nyiloña nankashi hayiluwa yitwakoñeli kunyima, twatela kwanuka mazu amawahi atushiikayi Yehova. Watwanakenaña chikupu. Twamutiyishaña nsonyi wanyi muloña wayiluwa yitwakoñeli kunyima, nawa hekala neyi akwetu antu atuhembelaña nduluku. (Isa. 57:16) Yuma yitunakwila chayinu mpinji niyitwakela kumbidi diyalema nankashi kudi Yehova, bayi yuma yatama yitwakoñeli kunyimaku. (Isa. 55:7) Nzambi yetu itwakalakelaña watukeña nawa watwanakenaña chikupu. Dichi bayi twiteja yiluwa yitwakoñeli kunyima yitukañeshi kwikala namuzañalu chayinu mpinji hela wumi wahaya nyaaka kumbidiku.

NEYI TUNAKUNEÑA MULOÑA WAKUFWISHA MUNTU ITWAKEÑA

12. Twatiyaña ñahi neyi tufwisha muntu itwakeña?

¹² Neyi muntu itwakeña nafwi, twaneñaña chikupu nawa chineñi chamanaña swayi wanyi. Mpinji jikwawu, twadihulaña chuma chacheni chinaleteshi Yehova eteji muntu itwakeña yafwi. Ichi dichatiyiliyi manakwetu Michael wafwishili anvwali jindi ejima ayedi nakesi mwitala. Wahosheli nindi: “Naneñeli chikupu nawa namuhililili Yehova hakwiteja kulonda afwi. Nelukili nami hidiyi wakojejeli nawu afwiku ilaña wakañesheli wanyi chumichi kumwekana.” Hadaha ninenu mwatiyahu dehi muniyi njila. Yehova watukundejaña ñahi nikutukwasha kwikala nakuchiñeja hampinji yitunaneñi chikupu?

13. Yehova watukana nindidi haIsaya 25:8?

¹³ Tañenu Isaya 25:8. Yehova wakana nindi “wakaminya kufwa chahaya nyaaka.” Fwikijenu chichakekala neyi kufwa anakufumishihu dehi. Himwakaneñaña cheñi muloña wakufwisha muntu imwakeñaku. (Isa. 35:10) Himwakamonaña cheñi majamu awamabwambu niantaña jenuku. Ilaña mpinji yejima mwakekalaña hamu nawantu imwakeña, amomi nawa akola kumujimba. Ichi chikaninu chashindamena hawunsahu walala bayi wakulumbishaku, muloña achikana kudi Nzambi yomweni nawa yena hohu diyi washikijaña yikaninu.—Chim. 21:​4, 5.

14. Mwatiyaña ñahi neyi mutoñojoka hakuchiñeja kwakusañuka? (Isaya 26:19) (Talenu nimwevulu.)

¹⁴ Tañenu Isaya 26:19. Yehova wakafumishahu kufwa nawa wakasañula antaña niamabwambu jetu itwakeña. Washiika kutalisha hadi wena nindi: “Yibimbi yami yakahinduka.” Chumichi chinakumwekesha nawu ekalaña ambala aYehova nawa wayanukaña. Mpinji yindi yatoñolayi neyi yinashiki dehi, wakayisañula. Neyi wuumi wantetemena chiwameneshaña cheñi matahu anoomi, Yehova niyena, Nsulu yamawumi ejima, wakahindwisha antaña niamabwambu jetu anakaami tulu twakufwa. Wenowu muzañalu wutwakatiya hakuyitambwila!—Esekejenu Maku 5:42.

15. Kukuhwelela muchikaninu chakusañuka kwatukwashaña ñahi kukeheshaku chineñi?

¹⁵ Hela chakwila twakuhwelela muchikaninu chakusañula antu afwa chakanayi Nzambi, twaneñaña nankashi neyi tufwisha muntu itwakeña. Iku kuchiñeja kwamukundejeli Michael itwahanjekahu dehi. Wahosheli nindi: “Isaya 26:19 yankwashili kwiluka nami Yehova wayikeña anvwali jami nankashi. Natwalekihu kuyanuka sampu nichakayisañulayi hampinji yindi yatelela. Chumichi chankundejaña nikunkolesha.” Dichi ninetu tutwalekihu kukuhwelela muchikaninu chakudimona cheñi nawantaña niamabwambu jetu afwa dehi. Kwila mwenimu kukutukwasha kukeheshaku chineñi chitunakutiya.

16. Nsonanyi yayikundejaña hampinji yimunakumona kukala kunakuyineñesha?

¹⁶ Tunahanjeki hamavasi antesha amumukanda waIsaya akutukundeja neyi yuma yihimpika muchihandilu chetu mukukasumwisha, neyi tutwalekahu kudinkamu nyiloña hayiluwa yitwakoñeli kunyima, nawa neyi tunakuneña muloña wakufwisha. Twamusakililaña Yehova chikupu chatukundejañayi nikutuwundisha kuhitila Mwizu dindi. (Mas. 94:19) Kudihu nsona yayikundejaña hampinji yimunakumona kukala kunakuyineñesha? Neyi yidi kwoku, yihembelenu kumutu, yisonekenu mukamukanda hela yishenu haswayi kuyimona. Mwani itejenu mazu afumaña kudi Yehova, Tata yetu wamwiwulu nawa wukweti kukeña, ayikundejeña mpinji yejima.