Yuma Yitwatela Kwila Hakwila Tuhembi Wubwambu Wetu Nawamanakwetu niAhela

1. Kudihi kutunateli kuwana amabwambu alala?

MUNANU mafuku akukuminina, chihandilu chinakukalilaku nankashi, sweje-e neyi tudana amabwambu alala. Yehova weluka chumichi, dichi watukwashaña kwikala nawamabwambu alala hakachi kawantu jindi. (Mas. 119:63) Twekala muchisaka chawakakudifukula anuñañana muloña wakukeña kwadimwekeshelañawu.

2. Wubwambu wamuchidinyi wutwafwilaña kwikala nawu nawamanakwetu niahela?

² Twafwilaña kwikala nawubwambu walala chikupu nawamanakwetu niahela. Twekala muchisaka chawakakudifukula amukeña Yehova niYesu, nawa iku kukeña dikwatunuñañeshaña. (Yow. 13:35) Hela chochu, iwu wubwambu hiwadinjilaña hohu neyi chamenaña mazewu mukanwaku. Twatela kuzata nañovu hakwila twiikali naniwu wubwambu. Nawa chineli wejima wetu twawanina wanyi, mpinji jikwawu kunateli kumwekana kukala kukuluwañesha wubwambu wetu.

3. Yumanyi yikuletesha chitukalili kuhemba wubwambu wetu?

³ Kuhosha hohu chalala, twakeñaña kudikunda nankashi nawantu amu kubadika amakwawu. Hadaha chuma chaleteshaña tudikundeña nankashi nawantu amu, muloña twakeña yuma yakeñawu, indi kwiji twatoñojokaña nikwila yuma munjila yoyimu. Hela chochu, chinateli kutukalila kutwalekahu kwikala amabwambu nawamanakwetu niahela amakwawu. Mpinji jikwawu kunateli kumwekana yuma yikutuletesha tuleki kutiyañana, nawa chumichi chinateli kuluwañesha wubwambu wetu. Hadaha twatoñojokaña nikwila yuma munjila yambuka chikupu chakwila hitwekalaña nampinji yakwikala hamuku. Nawa neyi manakwetu hela muhela nakati nankashi kumujimba indi kwiji muyitoñojoka, hadaha chikutukalila kutwalekahu kudikunda nindi. Muchinu chibaaba, tukuhanjeka kulonda tumoni yuma yeliliyi Yesu chiyinateli kutukwasha kuhemba wubwambu wetu hampinji yitunakumona kukala. Hela chochu, tusambilenu kuhanjeka hayilwilu yakumwakama Nzambi chiyinateli kutukwasha kuhemba wubwambu wetu nawamanakwetu niahela.

YILWILU YAKUMWAKAMA NZAMBI YATUKWASHAÑA KUHEMBA WUBWAMBU WETU

4. Yumanyi yitwatela kwila hakwila tukoleshi wubwambu wetu?

⁴ Hakwila tuhembi wubwambu wutukweti nawamanakwetu niahela, twatela kumonañamu yuma yayiwahi mudi wena. Neyi twikalaña nampinji yakwikala hamu, tukumonaña yilwilu yayiwahi yikwetiwu. Kapostolu Pawulu wafwilileña chikupu kwikala hamu nawamanakwindi niahela. Dihafumini yasonekeli aTesalonika nindi: “Twazatili nañovu kulonda tuyimoni.” (1 Tes. 2:17) Amanakwetu niahela amavulu amonaña nawu kuhanjeka mesu-namesu kwayikwashaña kukolesha wubwambu wawu nankashi. Twelaña mwenimu neyi tunayi hamu nakushimwina, tunayi kukupompa kwachipompelu, kukupompa kwanyanya nikukupompa kwamaneni. Ilaña twatela kwanukaña netu kudikunda hohu nawakwetu akaKristu hikunateli kukañesha kukala kunateli kuluwañesha wubwambu wetuku.

5. Yilwilwinyi yikutukwasha kuhemba wubwambu wetu neyi wunakukeña kuluwankana? Shimunenu chakutalilahu. (AKolosi 3:12)

⁵ Yilwilu yakumwakama Nzambi yikutukwasha kuhemba wubwambu wetu neyi wunakukeña kuluwankana. Yilwilu yeniyi hikudizoza, kudiwunjika, luwi niwushona. (Tañenu AKolosi 3:12.) Kwikala naniyi yilwilu kukutukwasha kushinda kukala kunateli kuluwañesha wubwambu wetu. Toñojokenu hanichi chakutalilahu, neyi manji chakwashañawu injini yamotoka kuzatika chiwahi, yilwilu yakumwakama Nzambi niyena yatukwashaña kumanisha kukala kunateli kuluwañesha wubwambu wetu. Tuhanjekenu ntahi hakukala kusatu kunateli kuluwañesha wubwambu wutukweti nawakwetu akakwitiya. Chitukuhanjekaña hakukala-hikukala, tukumona chitunateli kuhemba wubwambu wetu nawakwetu neyi twimbujolaña yilwilu yamwekesheliyi Yesu, chidi neyi kudizoza, kudiwunjika, luwi niwushona.

CHIMWATELA KWILA NEYI YITOÑOJOKA YENU YAMBOKELAMU

6. Kwambokelamu muyitoñojoka kunateli kuluwañesha ñahi wubwambu wetu?

⁶ Yuma yikuletesha chitukalili kutwalekahu kwikala amabwambu. Neyi antu ayedi anambokelimu muyitoñojoka, wumu wukutoñojokaña nindi yitoñojoka yindi diyaloña, mukwawu niyena nindi yindi diyaloña. Fwikijenu awa amanakwetu ayedi anakañanyi kuditeja hakuwana njila yayiwahi yakuzatilamu mudimu wakushimwina mwizanvu dawu. Iwu nakukokwela kwindi, iwu nakukokwela kwindi. Chumichi chikuletesha wubwambu wawu kuluwankana muloña wejima wawu anakumwekesha chilwilu chakudivwimba. Neyi abula kuhanjekahu swayi haniku kukala nakukumanisha, akutachika kudihembela ndulu. Mukuhita kwampinji, akutachika kuditondolwela nawa nkumininaku, wubwambu wunateli kumana, muloña hohu wakachuma kanyanya.

7. Chumanyi cheliliyi Yesu hakwila ayidizishi atumbanji twindi kwiluka nawu atela kwikala adizoza hakwila amanishi kukala kwadiñawu naku?

⁷ Ikalenu adizoza neyi Yesu. Wayidizishili atumbanji twindi nindi atela kwikala adizoza hakwila amanishi kukala kwadiñawu naku kwakubula kutiyañana. Atumbanji aditaadikishili hadi mpinji yayilehi kulonda eluki wadiña mukulumpi. Hakwila ayikwashi kubwita ichi chilwilu chadiña munyichima yawu, Yesu wayilejeli nindi atela kumonaña akwawu nawu ayibadika. (Mat. 20:​25-28) Welili mwenimu kulonda ayidizishi kwikala adizoza. Nihawufuku wakukumishaku henohu kanda afwi, Yesu ‘wayilejeli chakutalilahu’ kuhitila mukuwelesha nyendu yawu, mudimu wazatileña anduñu. (Yow. 13:​3-5, 12-16) Welili mwenimu kulonda yayikwashi kwiluka chatela kuhembawu wubwambu wawu. Wayanukishili nindi neyi amonaña akwawu nawu ayibadika, chikuyikwasha kulemesha yitoñojoka yawakwawu. Nawa chikuyipelela kutwalekahu kwikala nawubwambu wezala kambuki namunu hela chakwila yitoñojoka yawu yinambokelimu.

8. Kudizoza kunateli kuyikwasha ñahi kuhemba wubwambu wumukweti nawamanakwenu niahela hampinji yikunamwekani kukala kunayileteshi mwambokelimu? (AKolosi 3:13) (Talenu ninyevulu.)

⁸ Munateli kuhemba ñahi wubwambu wenu? Neyi mwikala adizoza chikuyipelela kudiwula yiluwa yanyanya yinaleteshi mwambokelimu nawakwenu nawa mukuyanakena chakufuma hamuchima. (Tañenu AKolosi 3:13.) Kudizoza kunateli cheñi kuyikwasha kuhemba wubwambu wumukweti nawakwenu kuhitila mukutondolwela kwila chuma chatama. (Mas. 4:4) Hela chakwila anatuhoshi mazu atama, twatela kwanuka netu wejima wetu twahoshaña yuma yatama yitwaditoñeshaña mukuhita kwampinji. (Mukwa. 7:​21, 22) Dihulenu nenu, ‘Komana iyi yitoñojoka yami yinnakumona nami yaloña yalema kubadika wubwambu wutukweti?’ Mukwila chiwahi neyi mutondahu kulemesha yitoñojoka yamukwenu. Munateli kwikala nakuwunda kwamuyitoñojoka neyi muvulamenaku kunoyu nsañu nawa mubula kuyihoshahu cheñi kumbidi.

9. Kudizoza kunateli kuyikwasha ñahi kumanisha kukala kunakumwekana neyi kwila mutwesha kukumanisha nehi? (Yishimu 17:9)

⁹ Kudizoza kunateli cheñi kuyikwasha kumanisha kukala namukwenu kunakumwekana neyi kwila mutwesha kukumanisha nehi. Bayi mutachika kuleta mataadi nakumona yitoñojoka yenu nenu yaloña nawa yamukwenu yaheñaku. (Tañenu Yishimu 17:9; 1 Kor. 6:7) Mukwila chiwahi neyi muzatila hakuhemba wubwambu wenu. Amanakwetu niahela amavulu elaña mwenimu kuhitila mukuya nakuwana mukwawu anakubula kutiyañanawu nindi kulonda amanishi kukala. (Mas. 34:14) Munateli kuhosha nenu: ‘Wubwambu wetu wunafumi hahalehi. Kwila tuhosha hanichi chuma chamwekeni nehi? Hampinji yimunakuhanjeka, itejenu nenu ninenu mwaluwañesha nawa lombenu kwanakena. Dichi neyi manakwenu indi kwiji muhela niyena alomba kwanakena, dizozenu nakumwanakena. (Luka 17:​3, 4) Anukenu nenu chuma chimunakufwila hikuleta kuwunda nikuhemba wubwambu wenu, bayi kudiyiñisha hela kudifwisha nanyiloñaku.—Yish. 18:24.

CHITWATELA KWILA NEYI YILWILU NIYAAKU YETU YINAAMBUKI NAYIDI NAWAKWETU

10. Yumanyi yinateli kuletesha chitukalili kutwalekahu kwikala amabwambu?

¹⁰ Yuma yikuletesha chitukalili kutwalekahu kwikala amabwambu. Chinateli kutukalila kutwalekahu kwikala amabwambu nawamanakwetu niahela atoñojoka nikwila yuma munjila yaambukaku nanetu. Amakwawu ekala nayilwilu hela yaaku yatutiyishaña kutama. Amakwawu niwena elaña yuma yitwamonaña netu yidi chiwahi wanyi muloña wakwila ayikabishili kunyima, indi kwiji ahoshaña nankashi hela ekala amwena muloña wachisemwa mwakulilawu. Nawa etu amakwawu hadaha twakeña kwikala hadi antu amavulu, ilaña etu amakwawu nehi.

11. Yesu watwalekelihu ñahi kwikala nawubwambu nawantu adiña nayilwilu yaambukiliku nayadiñayi nayu?

¹¹ Ikalenu adiwunjika neyi Yesu. Watwalekelihu kwikala ibwambu nawantu adiña nayilwilu yaambukiliku nayindi. Chakutalilahu, toñojokenu hadi kapostolu Yakoba nikapostolu Yowanu akeñeleña nawu ayimoni kulema kudi akwawu nanochu chalombeliwu nawu ayinki yifulu yamaneni muWanta. (Maku 10:​35-37) Ilaña Yesu wadizozeli nakushiya chifulu cheneni nankashi mwiwulu ninyidimu yadiñayi nayu nakwinza hanu hamaseki. (Fwili. 2:​5-8) Chilwilu chamwekesheli awa apostolu ayedi chambukiliku chikupu nachamwekesheliyi Yesu. Hela chochu, Yesu wadiwunjikili naYakoba niYowanu, kushilahu niapostolu amakwawu.

12. Chumanyi chamukwashili Yesu kwikala wadiwunjika nawamabwambu jindi?

¹² Yesu welukili nindi mpinji jikwawu amabwambu jindi akumwekeshaña yilwilu yabula kutelela. Welukili cheñi nindi atumbanji amavulu niwena afwilileña yifulu nankashi neyi chelili aYakoba naYowanu. (Maku 9:34) Yesu wakulilili mwiluña mwakulilili atumbanji twindi. Antu munidi iluña alemesheli nankashi kutuumbakana nikwikala nayifulu yahewulu, dichi Yesu welukili chaletesheli atumbanji atoñojokeña muniyi njila. Hela chochu, wadiwunjikili nawena kuhitila mukuyinka mpinji kulonda aleki chilwilu chakudivwimba niyitoñojoka yakufwila yifulu yahewulu yashimatili mudi wena hadi yaaka yayivulu.—Maku 10:​42-45.

13. Kudiwunjika kunateli kutukwasha ñahi kuhemba wubwambu wetu? (AEfwesesa 4:2)

¹³ Munateli kuhemba ñahi wubwambu wenu? Twalekenuhu kwikala adiwunjika nawakwenu kuhitila mukudiwula yilwilu niyaaku yawu yayitiyishaña kutama. (Yish. 14:29) Wejima wetu tukweti yaaku niyilwilu yaambuka, nawa bayi neyi yejima yatamaku, ilaña yakusemuka hohu nayu. Dichi twasakililaña nankashi neyi akwetu atwiluka nawu dichitwekala. (Tañenu AEfwesesa 4:2.) Nawa chalema nankashi ninetu kuyiluka akwetu netu dichekalawu. Chakutalilahu, toñojokenu chazatañayi nañovu muntu wamwena nawa wukweti nsonyi hakwila yatachiki kudikunda nikuhanjeka nawakwawu. Ilaña twatela cheñi kwikala adiwunjika namuntu wakeña kwikala hadi antu nawa wahoshaña nankashi. Hela chakwila tunateli kwikala amabwambu chikupu nawantu amu kubadika amakwawu, twatela kwanukaña netu niakaKristu akweti yilwilu yaambuka chikupu anateli kuzatila hamu chiwahi.

14. Neyi twikala nachilwilu chakudiwunjika, tukushaña muchima hayumanyi?

¹⁴ Neyi twikala nachilwilu chakudiwunjika, tukushaña muchima hayilwilu yayiwahi yikwetiwu amakwetu niahela. Neyi twilaña mwenimu, hitukuleka yaaku niyilwilu yikwetiwu yitukañeshi kwikala amabwambu jawuku. Chakutalilahu, hela chakwila aYakoba naYowanu afwilileña yifulu yahewulu, chuma cheliliwu chamwekeshaña hatooka nawu akuhweleleli nawu Wanta wakekala kwoku. Yesu wamweni chumichi nawa wayisakililili hachikuhwelelu chawu. Neyi tumonañamu yuma yayiwahi mudi amabwambu jetu, tukumwimbujolaña Yesu niTata yindi, Yehova.

15. Hinyi wunateli kutukwasha kuhemba wubwambu wutukweti nawantu akweti yilwilu niyaaku yaambuka nayitukweti?

¹⁵ Chuma chasweja kulema chikutukwasha kuhemba wubwambu wetu nawantu akweti yilwilu niyaaku yaambuka nayitukweti, hikumulomba Yehova netu atukwashi. Toñojokenu hakukala kweneni kunateli kumwekana nawa lombelenuhu kulonda mwiluki chimwatela kudiwunjika. Anukenuña nenu Yehova, chineli hiNleñi yetu, weluka nindi wejima wetu hamuntu-hamuntu twekala ambuka. Dichi neyi mulomba, kuhwelelenu nenu Yehova neluki chuma chimunakukeña hakwila nawu mutwalekihu kuumika. Nawa neyi mumona nenu chinakuyikalila kudiwunjika, mulombenu Yehova ayinki spiritu yindi yajila kulonda yiyikwashi kudiyuula.—Luka 11:13; Ñal. 5:​22, 23.

CHITWATELA KWILA NEYI AMANAKWETU NIAHELA ANAKUKABAKANA

16. Yumanyi yinateli kumwekana neyi amanakwetu niahela anakukabakana indi kwiji anakumona kukala?

¹⁶ Yuma yikuletesha chitukalili kutwalekahu kwikala amabwambu. Neyi amanakwetu niahela anakukabakana kumujimba indi kwiji anakumona kukala kunakuyineñesha, anateli kuhosha hela kwila chuma chikututiyisha kutama. (Yoba 6:​2, 3) Chakutalilahu, hekwawu anakukeña hohu kwikala nkawawu, anakuhilashana, indi kwiji anakwila yuma yinakutuhayamisha. Hadaha anakumona kukala kutunabuli kwiluka. Muloña wachumichi, chikuyikalila kwila yuma yitunakutoñojoka netu diyatela kwilawu.

17. Yumanyi yimunakudizila kudi Yesu cheliliyi hakumuuka Baratimewu, iyala mputamesu?

¹⁷ Mwekeshenuña luwi niwushona neyi Yesu. Wamwekesheleleña luwi niwushona antu akabakeneña, kushilahu niantu abulili kwilukayi. Chakutalilahu, talenu chamuukiliyi Baratimewu, iyala wadiña mputamesu. Chatiyiliyi nawu Yesu nakuhita wabidikili nezu datiyakana kulonda amumoni kudi Yesu. Antu amakwawu atachikili kumuleja Baratimewu nawu amweniwu. Ilaña wafwilileña nindi amuuki kudi Yesu, dichi watwalekelihu kubilela. Chakadi nikujina, antu amakwawu adiña hezaza atiyili kutama muloña wanichi chuma chelileñayi. Hela chochu, Yesu “[wamutiyilili] wushona,” dikwila nawu wamutiyilili luwi chikupu. (Mat. 20:34; Maku 10:​46-52) Wahosheli naBaratimewu munjila yayiwahi nawa wamuhamekeli muloña wachikuhwelelu chamwekesheliyi. Nkumininaku Yesu wamuukili muchihayamisha nawa watachikili kumona.

18. Munateli kukwashaña ñahi amabwambu jenu anakukabakana? (1 ATesalonika 5:14)

¹⁸ Munateli kuhemba ñahi wubwambu wenu? Mwekeshenuña luwi niwushona. Iyi yilwilu yayiwahi yikuyikwasha ‘kukundeja’ amanakwenu niahela anakukabakana kumujimba nimuyitoñojoka. (Tañenu 1 ATesalonika 5:14.) Anukenuña nenu ibwambu walala wakwashanaña mpinji yejima, sweje-e “mumpinji yayihuñu.” (Yish. 17:17) Ibwambu wamuchidiwu watiyaña kutama neyi amona antu anakukabakana nawa wazataña nañovu kulonda ayikundeji, kuyikolesha nikuyikwasha kumujimba muyuma yinakaankiliwu.

19. Tunateli kumwekesha ñahi luwi niwushona? (Talenu ninyevulu.)

¹⁹ Njilanyi jikwawu jalema mumwatela kumwekeshela luwi niwushona? Mutiyililenu ibwambu denu nakanañachima hampinji yinakulumbululayi kukala kukwetiyi. Neyi chinatwesheki, hoshenu nindi mazu antesha akumukundeja. (Yish. 12:25) Hela chochu, anukenu nenu himunateli kumanisha kukala kunakuhitamu mukwenu mukakwitiyaku. Ilaña munateli kwiluka chinakutiyayi nikukala kunakumukabisha. (Mat. 7:12; 1 Pet. 3:8) Bayi mukunkulula nenu muneluki kukala kwejima kunakumonayiku. (Yish. 18:13) Ikalenu adiwunjika nayena nawa bayi mukeña nenu eli yuma yikubula kutweshayiku.—Efwe. 4:32.

20. Yilwilu yamuchidinyi yimwatela kwikala nayu hakwila mwiikali ibwambu walala?

²⁰ Wejima wetu twalemesha wubwambu wutwekalaña nawu nawamanakwetu niahela mukuloñesha kwaYehova. Hela chochu, wejima wetu twawanina wanyi nawa etu amavulu kudi yuma yatama yatumwekenahu dehi muchihandilu chetu. Iyi diyuma yaleteshaña mpinji jikwawu tuhosheña hela kwila yuma yaneñeshaña akwetu. Muloña wachumichi, twasakililaña nankashi neyi amanakwetu niahela ekala adizoza, adiwunjika nanetu, atutiyila luwi niwushona nawa atwalekahu kwikala amabwambu jetu. Dichi tutwalekihu kuzata nañovu kwikala amabwambu akweti yilwilu yamuchidiwu!