Chakutwalekahu Kwikala Ashinshika Kudi Yehova Neyi Tudi muKukala Kukweseka Chikuhwelelu Chetu

1-2. Yumanyi yamwekeni hampinji yatañishileñayi Yesu muKaperinamu?

YESU wahosheli nindi: “Neyi enu kuda mujimba waMwana kamuntu hela kunwa mashi indi nehi, himwakekala nawumiku.” Nawa wabombelelihu nindi: “Muntu wejima wadaña mujimba wami nikunwa mashi ami wukweti wumi wahaya nyaaka, nawa nakamusañula hefuku dakukumishaku.” (Yow. 6:​53, 54) Atumbanji twaYesu ahayamini chikupu chatiyiliwu awa mazu hampinji yatañishileñayi muKaperinamu. Dihafumini ahoshi nawu: “Awa mazu akala nankashi; hinyi wukuyitiya?”—Yow. 6:60.

² Ana atumbanji aneñeli chikupu muloña wamazu ahosheliyi Yesu, alekeli kumulondela. Komana elili mwenimu muloña wakwila hiyamukuhweleli hela hantiku? Kafwampi, henohu ichi chuma kanda chimwekani, antu amakwawu kushilahu niatumbanji twaYesu, atiyili kuwaha nankashi hachuma cheliliyi chakwila ahosheli nawu: “Chalala iwu diyi Kaprofwetu ashimwiniwu nawu wakenza mukaayi.” (Yow. 6:14) Dichi chumichi chinakumwekesha nawu ana atumbanji amukuhweleleli Yesu. Ilaña chelili chikuhwelelu chawu chiikali mukweseka, alekeli kwikala ashinshika kudi yena.

3. Apostolu elili chumanyi, nawa muloñadi? (Talenu nimwevulu.)

³ Ilaña apostolu atwalekelihu kwikala ashinshika kudi Yesu. Chelili Yesu yayihuli kulonda yeluki neyi chakwila niwena akeñeleña kumushiya, Petulu waakwili nindi: “Mwanta, tukuya kudinyi? Eyi yeyi wukweti mazu awumi wahaya nyaaka. Tunakuhweleli nawa tuneluki netu yeyi Wajila Wambala waNzambi.” (Yow. 6:​68, 69) Petulu niakwawu apostolu atiyishishili wanyi mwatalishiliyi Yesu chayilejeliyi nindi atela kuda mujimba windi nikunwa mashi indi. Hela chochu, atwalekelihu kwikala ashinshika kudi Yesu. Muloñadi? Muloña yuma yakuhweleleliwu yashindameneni hachalala chakwila nawu Yesu wadiña “Kristu waNzambi.”—Luka 9:​20, 35.

4. Yumanyi yinateli kusha kashinshi ketu mukweseka?

⁴ Kudi yuma yayivulu yikutuletesha twiikali mukweseka kwakubula kwikala ashinshika kudi Yehova. Chakutalilahu, neyi kwikala kuhimpika kwantiyishishilu yavasi yamuBayibolu hela neyi anatuleji njila yayiha yakuzatilamu mudimu wakushimwina, indi kwiji tunakañanyi kutiyishisha chinaleteshi Yehova yeteji yuma yatama yitwalekihu kutumwekena. Kashinshi ketu kanateli cheñi kwikala mukweseka neyi manakwetu hela muhela indi kwiji muntu itwalemesha natwili chuma chatama.

5. Muloñadi chitwatela kukoleshela chikuhwelelu chetu? Shimunenu chakutalilahu. (AKolosi 1:23)

⁵ Hakwila tutwalekihu kwikala ashinshika kudi Yehova hampinji yitunakumona kukala, twatela kwikala nachikuhwelelu chakola. Toñojokenu hachumichi, hakwila nawu itala dakabuli kuhumuka hela chakwila kudi nvula yeneni yampepela, datela kwikala nachikuku chakola. Munjila yoyimu, ninetu twatela kwikala nachikuhwelelu chakola hakwila nawu tutwalekihu kwikala ashinshika kudi Yehova hampinji yitunakumona kukala kudi neyi kwashimunawu muparagilafu yinafumihu. Dichi twatela kutwalekahu kukolesha chikuhwelelu chetu kulonda tutwalekihu kumukalakela Yehova hichikweti muloña nakukala kunateli kutumwekenaku.—1 Kor. 15:58; tañenu AKolosi 1:23.

6. Yumanyi yayikwashili apostolu kutwalekahu kwikala ashinshika kudi Yesu?

⁶ Yumanyi yayikwashili apostolu kutwalekahu kwikala ashinshika kudi Yesu hampinji atumbanji amavulu yalekeliwu kumulondela? Apostolu akuhweleleli nawu antu atela kudifukula kudi Yehova hohu muloña diyi Nleñi wayuma yejima, nawa nawu Yesu hiMwana kaNzambi “wukweti mazu awumi wahaya nyaaka.” Akuhweleleli cheñi nawu Yesu amukwashaña kudi Yehova chikupu. Chatela tuhanjeki hayuma yayivulu yinateli kweseka chikuhwelelu chetu, tuhanjekenu hohu hayuma yisatu yinateli kutukwasha kutwalekahu kwikala ashinshika neyi tudi mukweseka. Iyi diyuma yitukuhanjekahu: (1) Yehova diyi Nleñi wayuma yejima. (2) Yehova diyi woneneni Bayibolu. (3) Yehova nakukwasha antu jindi makonu. Neyi tukuhwelela chikupu netu iyi yuma yisatu yalala, tukutwalekahu kwikala ashinshika hampinji yitudi mukukala kukweseka chikuhwelelu chetu.

YEHOVA DIYI NLEÑI

7. Chimwekeshu 4:11 yatwanukishaña nawudi, ilaña chumanyi chinateli kumwekana hampinji yitudi mukukala kukweseka chikuhwelelu chetu?

⁷ Tañenu Chimwekeshu 4:11. Iyi nsona yatwanukishaña nawu Yehova diyi Nleñi wayuma yejima. Muloña wachumichi, twatela kudifukula kudi yena hohu. Nawa neyi tutoñojokaña chikupu hañovu jindi jabadika, tukukuhwelela netu wukutukwashaña mukukala kwejima kutukumonaña. Hela chochu, Satana nenzeshi akanu kaayi nansañu yakutwamba kulonda yaleteshi antu atachiki kujinoka neyi chakwila Nzambi wekala kwoku. Asayantisiti amakwawu ahoshaña nawu yuma yejima yikweti wumi yadinjililiku hohu yayeni. Dichi neyi tubula kumukuhwelela Yehova chikupu netu diyi Nleñi nawa watukeña, tukutachika kujinoka neyi chakwila wekala kwoku nawa neyi nateli kutukwasha hampinji yitudi mukukala kukweseka chikuhwelelu chetu.—Heb. 11:6.

8-9. Yumanyi yimwatela kwila neyi mutachika kujinoka neyi chakwila Yehova diyi Nleñi? (Talenu nimwevulu.)

⁸ Neyi mutachika kujinoka neyi chakwila Yehova diyi Nleñi, bayi mushintajala kwilahu chumaku. Sandujolenu chikupu munyikanda yetu kulonda muwani nsañu yikuyikwasha kukuhwelela nenu Yehova diyi waleñeli yuma yejima. Munateli kuwana nsañu yayivulu yikuyikwasha kukuhwelela chikupu nenu diyi Nleñi ha jw.org. Jessica, muhela wakansi wakuUnited States, wahosheli nindi: “Hanyima yakusandujola nankashi munyikanda yetu, nawanini wunsahu wamwekesheli hatooka nawu kudi waleñeli antu. Nadiña neluka dehi chumichi, ilaña chinatañililihu nsañu yikwawu nelukililihu wunsahu wawuvulu.” Nawa nsañu yekala mumukanda waMunateli Kwikala naMuzañalu Haya Nyaaka! kudiza 6 ni 7 yinakwashi antu amavulu. Tunakuhweleli ninenu mwatañahu dehi iyi nsañu. Komana kwila muyitaña cheñi nehi?

⁹ Hakudiza kwankawenu kwakalondelahu, munateli kusandujola hawunsahu wawuvulu wamwekeshaña nawu Nzambi wekala kwoku. Kusandujola muniyi njila kukuyikwasha kukuhwelela chikupu nenu Yehova wekala kwoku nawa mukwiluka chiwahi yilwilu yindi. (Rom. 1:20) Kubombelahu, chikuyipelela kuzatisha nsañu yimunadizi kukwasha antu ajinokaña neyi chakwila Nzambi wekala kwoku. Chuma chalema chitwatela kwanukaña chidi chakwila nawu Yehova watwinka wunsahu wawuvulu watukwashaña kukuhwelela netu diyi Nleñi yetu.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

YEHOVA DIYI WONENENI BAYIBOLU

10. Muloñadi Bayibolu chiyekalila mukanda walema nankashi muchihandilu chetu? (2 Timotewu 3:​16, 17)

¹⁰ Tañenu 2 Timotewu 3:​16, 17. MuBayibolu mwekala mazu afuma kudi Yehova alejañayi antu. Twakuhwelela netu Yehova diyi Nsoneki yaBayibolu. Nawa chumichi chaleteshaña Bayibolu kwikala mukanda walema nankashi muchihandilu chetu. Bayibolu yakula malwihu alema itwadihulaña nawa yatulejaña chekala nkeñelu yaYehova niyuma yakeñañayi nindi twileña. Dichi twatela kuzata nañovu kwiluka chahosha Izu dindi nikuzatisha yuma yitwadizañamu.

11. Yumanyi yayileteshaña mukuhweleli chikupu nenu Bayibolu ayonena kudi Nzambi?

¹¹ Muloñadi chitwakuhwelela netu Yehova diyi woneneni Bayibolu? Kudi yuma yayivulu yaletesha tukuhweleli muniyi njila. Chakutalilahu, yuma yahosha Bayibolu kutalisha hayuma yamwekeni kunyima yalala. (Luka 3:​1, 2) Nawa yahosha chaloña hayileñaleña. (Yoba 26:7) Bayibolu dimukanda wahanañawu nankashi kubadika nyikanda yejima, hela chakwila Satana nakuzata nañovu nindi yayijiyishi. Bayibolu ayisonekeli kudi antu 40 nawa mwahitili yaaka kwakwihi na 1,600 hakwila ayimanishi, hela chochu nsañu yekalamu yanuñañana chikupu. Dichi kufumba kwekalamu kunakwashi antu amavulu nankashi makonu. (Yish. 13:20; 15:21; Mat. 7:12) Nawa wuprofwetu wawuvulu wamuBayibolu wunashikijewi, iwu diwunsahu wukwawu watuleteshaña tukuhweleli Bayibolu. (Yosh. 23:14) Chakadi nikujina, Bayibolu himukanda wonenawu kudi Nzambi!

12. Yumanyi yitwatela kwila neyi tutachika kujinoka neyi chakwila Bayibolu ayonena kudi Nzambi?

¹² Yumanyi yitwatela kwila neyi tutachika kujinoka neyi chakwila Bayibolu ayonena kudi Nzambi? Twatela kulomba kudi Yehova nikwila kwesekeja nachitunalombi. Talenu chahosheliyi manakwetu wakansi Jordan, akulishiliwu kudi anvwali aYinsahu. Wahosheli nindi: “Neyi muntu anleja chuma, nashikenaña kwiteja wanyi. Nasambilaña kutoñojokahu chikupu. Mpinji jikwawu, najinokaña neyi kudi chuma chinnatiyi hela kutaña. Dichi neyi chuma chamuchidiwu chimwekana, nazataña nañovu kusandujola munyikanda yetu kulonda niwani ñakwilu yamalwihu inikweti nikuleka kujinoka.” Neyi tutwalekahu kwila yuma yikutukwasha kukuhwelela chikupu netu Yehova diyi woneneni Bayibolu, tukwikala nachikuhwelelu chakola.—1 Kor. 3:​12, 13.

YEHOVA NAKUKWASHA ANTU JINDI MAKONU

13. Chumanyi chitwatela kwila neyi tutachika kujinoka neyi chakwila aYinsahu jaYehova diwu hohu antu anakukwashayi Nzambi makonu?

¹³ Neyi tunatachiki kujinoka neyi chakwila aYinsahu jaYehova diwu hohu antu anakukwashayi Nzambi makonu, twatela kuzatilahu swayi-swayi kukañesha yitoñojoka yamuchidiwu. Hela chochu, tukuleka kujinoka neyi tudihula awa malwihu: ‘Anyi hohu azataña nañovu kwovwahila nshimbi jamuBayibolu? Anyi azatishaña Bayibolu nankashi muyuma yejima yelañawu?’ (2 Tim. 4:​3, 4) Anyi anakwila nkeñelu yaYehova makonu?’—Mat. 7:​20, 21.

14. AYinsahu jaYehova anakuyizatisha ñahi chayinu mpinji kushikija wuprofwetu wekala haMatewu 24:14?

¹⁴ Chakutalilahu, Nzambi nakukeña antu atiyi nsañu yayiwahi kwejima kwadiwu henohu akanu kaayi katama kanda yakifumishihu. Dichi twatela kudihula netu: ‘Anyi anakushimwina nsañu yayiwahi makonu, yashimwineñahu dehi Yesu nindi akayishimwina mumafuku akukuminina?’ (Mat. 24:14) Ñakwilu yanilu lwihu yakuyamba wanyi. Nzambi nakuzatisha antu jindi, aYinsahu jaYehova, kuzata iwu mudimu wakushimwina. Etu hohu iyetu anakushimwina nsañu yayiwahi yaWanta waNzambi mumatuña kubadika ha 240. Tunazati iwu mudimu hadi yaaka kubadika 100 hampinji yinakuyuula Wanta Nzambi. Mwamweni, tunatwalekihu kuzata iwu mudimu walema nankashi wakushimwina nikudizisha.—Mat. 28:​19, 20.

15. AYinsahu jaYehova makonu amwekeshaña ñahi nawu alemesha ijina daNzambi? (Matewu 6:9; Isaya 43:10)

¹⁵ Tañenu Matewu 6:9 niIsaya 43:10. Antu atwilukilaña kwijina daNzambi, daYehova, nawa twatiyaña kuwaha kututena nawu aYinsahu jaYehova. Antu amavulu mukaayi eluka wanyi kulema kwanidi ijina, ilaña etu tunadifuntishi muBayibolu hamaluña hidatela kwikala. Dawanikaña muBayibolu yetu yaNsona jaKaayi Kakaha mapampa kubadika ha 7,000.

16. Muloñadi chitukuhoshela netu aYinsahu jaYehova ovwahilaña lushimbi lwekala haYowanu 13:​34, 35? (Talenu nimwevulu.)

¹⁶ Tañenu Yowanu 13:​34, 35. Makonu, antu amavulu mukaayi atiyañanaña wanyi nawa adihela. Ilaña aYinsahu jaYehova adimwekeshelaña kukeña nikwikala anuñañana chikupu. Hela chakwila twafuma kumatuña ashiyashana nawa tukweti nkulilu niyitachi yashiyashana, twazataña nañovu kwikala anuñañana nikudimwekeshela kukeña nawamanakwetu niahela. Neyi mwayahu dehi kwiluña dacheñi, komana mwapompahu dehi nachipompelu chacheñi? Neyi mwapompahu dehi, chakadi nikujina muneluki kukeña nikunuñañana kwadimwekeshelaña amanakwetu niahela kwejima kwekalawu. Chumichi chamwekeshaña hatooka nawu mwamweni Yehova nakuzatisha aYinsahu jindi kwila nkeñelu yindi makonu. Neyi twanukaña chumichi chikutukwasha kutwalekahu kwikala ashinshika kudi Yehova hampinji yitunakuhita mukukala.

BAYI MUMUSHIYA YEHOVAKU

17-18. Kukalanyi kutunateli kumona, ilaña tunateli kuhosha netudi?

¹⁷ Tunakushakama mumpinji jakala, dichi munanu mafuku akukuminina wejima wetu tukumonaña kukala. (2 Tim. 3:​1, 13) Nawa hadaha kudi yuma yinateli kumwekana yikutukojeja kusweja kwakama. Chakutalilahu, kuloñesha kwaNzambi kunateli kufuukula yuma yitunateli kubula kutiyishisha. Indi kwiji manakwetu hela muhela nateli kwila chuma chinateli kutuneñesha. Nawa mpinji jikwawu tunateli kwiluka wanyi chakumanisha kukala kutunakuhitamu hela kwiluka chinaleteshi kukala kutumwekeni.

¹⁸ Hela chakwila tunateli kuneña nikwakama muloña waniyi yuma yatama yinakutumwekena, tukutwalekahu kwikala ashinshika kudi Yehova mpinji yejima neyi tukuhwelela chikupu netu diyi Nleñi, Bayibolu hiIzu dindi nawa netu aYinsahu jaYehova diwu antu jindi. Neyi Petulu chamulejeliyi Yesu, ninetu tunateli kumuleja Yehova netu: “Tukuya kudinyi? Eyi yeyi wukweti mazu awumi wahaya nyaaka.”