Yuma Yikuletesha Mwiikali naMuzañalu Neyi Anayiheli

1. Yesu wahosheli nindidi, nawa muloñadi mazu ahosheliyi chiyanateli kutuhayamishila?

MUMPANJI yindi yahaMpidi, Yesu wahosheli nindi: “Mudi namuzañalu neyi antu ayihela.” (Luka 6:22) Awa mazu atela ayihayamishili nankashi antiyilili jindi. Kafwampi, kwosi muntu niwumu watiyaña kuwaha neyi anamuheli. Muloñadi Yesu chahosheleliyi muniyi njila? Ilu hilwihu lwaluwahi lutwatela kutoñojokahu, muloña akakumulondela Yesu makonu ayihela kudi antu amavulu. Tukuhanjeka yuma yaleteshaña atuheleña niyuma yikuletesha twiikali namuzañalu neyi anatuheli.

YUMA YALETESHAÑA ATUHELEÑA

2-3. Chumanyi chimu chaleteshaña akaKristu alala ayikabisheña, nawa chumichi chinateli kutuletesha kuyimona ñahi antu atukabishaña? (Yowanu 16:​2, 3)

² Atuhelaña muloña twadifukulaña kudi Yehova. Yesu wahosheli hadi antu akakabishaña nikujaha akakumulondela amakwawu, nindi: “Hiyanamwiluki Tata hela amiku.” (Tañenu Yowanu 16:​2, 3.) Hinyi yomweni wunakuletesha antu jaNzambi ayikabisheña? Satana diyi. Diyi “nzambi wanshakaminu yamakonu.” (2 Kor. 4:​3, 4) Waputishaña antu kulonda akañanyeña kwiluka chalala chahosha hadi Yehova nawa wayiluwañeshaña hakwila akabisheña antu amwiluka Nzambi nikumukeña. (Yow. 8:​42-44) Kwiluka chumichi kukutuletesha kuyimona ñahi antu atukabishaña? Kafwampi, kwiluka netu ayiluwañeshaña kudi Satana chikutukwasha kubula kuyihela neyi wena anatuheli.

³ Talenu chuma chamumwekeneni Pavel,a washakamaña mwituña mwalekeshawu mudimu wetu. Chineli watwalekelihu kudifukula kudi Yehova nakashinshi, amukasili, amweteli chatama nawa amushili mukaleya kankawindi hadi tukweji. Pavel ichi wahoshaña nindi: “Neluki chakadi kuhita mumbadi nami anakutukabisha muloña wawandemoni anakukañesha kudifukula kwalala. Chinamwekani neyi antu amavulu azatilaña mutuleya hiyatuhelaku. Hela anakutukabisha, anakwila hohu mwenimu muloña wamudimu wayinkawu.” Manakwetu wumu wakuCroatia akabishiliwu nankashi kudi anvwali jindi abula kwitiya, wahosheli nindi: “Ichi neluki nami Satana diyi chilumbu chami, bayi anvwali jamiku.”—Efwe. 6:12.

4. Yumanyi yitunateli kudizila kuchuma cheliliyi Yesu nikambanji Stefwanu? (Talenu nimwevulu.)

⁴ Antu atukabishaña twayihela wanyi. Kafwampi, muloña wachumichi tunateli kuyilombelaku. (Mat. 5:44) Kutalisha haniyi nsañu, tunateli kudizila kuchuma cheliliyi Yesu nikambanji Stefwanu. Iku anamupompeli hamutondu wakuyandishila kudi amashidika awaRoma, Yesu walombeli nindi: “Tata, yanakeni.” (Luka 23:34) Yesu walombeli kudi Yehova nindi ayanakeni awa amashidika enkeliwu mudimu nawu amujahi. Hadaha watoñojokeleña cheñi hadi antu adiña mwizaza abidikili nawu amujahi, muloña ayiluwañesheli kudi ayilumbu jindi. Yesu welukili nindi awa antu elukili wanyi chuma chelileñawu. Munjila yoyimu, kambanji Stefwanu walombeli kudi Nzambi nindi ayanakeni antu adiña kwakwihi nakumujaha. (Yilw. 7:​58-60) Komana Yehova waakwili kulomba kwaYesu nikwaStefwanu? Eña. Antu amavulu amusompesheli Yesu nikumujaha, mukuhita kwampinji abalumukili mumuchima, amukuhweleleli Yesu nawa apapatisheweli. (Yilw. 2:​36-41) Nawa Sawulu wadiña hakachi kawantu etejeli nawu Stefwanu amujahi, wekalili mukaKristu nawa waditoñesheli chikupu hayuma yatama yakoñeliyi mukubula kwiluka.—1 Tim. 1:13.

5. Yumanyi yimunakudizila kuchuma chamumwekeneni César?

⁵ Yehova natwalekihu kwakula kulomba kutwayilombelañaku antu atukabishaña makonu. Talenu chuma chamumwekeneni César, washakamaña kuVenezuela. Atata yindi adiña nakudimbulula chalala chikupu. César wahosheli nindi: “Amama adiña mumbanda wadikita nawa nvwali wamuwahi. Hela chakwila mpinji yejima atwamijileñaku yuma yaWanta, hiyalekeli kuyakamena atataku. Amama atulejeli etu anyana nawu tuyilemesheña atata. Atulejeli cheñi nawu tuyovwahileña, ilaña twatela hohu kubula kuyovwahila neyi atuleja nawu twili chuma chinabuli kwesekana nankeñelu yaNzambi.” Chimwahitili yaaka, atata yindi atachikili kuhimpa yilwilu. César wahosheli nindi: “Ifuku dimu hanyima yakulomba chakufuma hamuchima, nayihwili atata neyi chakwila akwiteja kudiza Bayibolu nanami. Chelili atata ashikeni kwiteja, nashikeneni kwamukanwa boku-u.” Nkumininaku, atata yaCésar apapatisheweli. Bayi neyi akakudimbulula ejima ahimpaña muniyi njilaku, ilaña amakwawu ahimpaña yilwilu yawu hanyima yakumona kavumbi kitwamwekeshaña munhoshelu yetu nimuyilwilu yetu. Wenowu muzañalu wutwatiyaña neyi ahimpa! Twamutalilaña chikupu Yehova, “Nsompeshi yeseki dejima” wukweti luwi, kukwasha antu amuchidawa kudiza kulonda amwiluki.—Kutach. 18:25.

6. Kwesekeja naMaku 13:​13, chumanyi chikwawu chaleteshaña atuheleña?

⁶ Atuhelaña muloña twamulemesha Yesu. Yesu wahosheli nindi akaKristu alala akayihela kudi antu ejima “kukoola ijina [dindi].” (Tañenu Maku 13:13.) “Ijina” dakwila nawu Yesu demenañaku yumanyi? Demenañaku yilwilu yindi niwuswa wukwetiyi hakwikala Mwanta waWanta waNzambi. Atuhela kudi antu akuhwelela anlomboli ahanu hamaseki, ilaña abula kukuhwelela muntu atondawu kudi Yehova kuyuula iwulu niiseki, Yesu Kristu. Yesu hiMwanta waWanta waNzambi kufuma tuhu mu 1914. Katataka yafumishihu yiyuulu yejima yinakudikaña nawuswa windi.

7-8. Muloñadi antu jaYehova amakwawu chayisehelañawu? (Yowanu 15:​18-20) (Talenu ninyevulu.)

⁷ Atuhelaña muloña twakaanaña kwikala kabadi kakaayi kaSatana. Yesu walumbulwili nindi akakumulondela akayihela muloña hiyadi “kabadi kakaayiku.” (Tañenu Yowanu 15:​18-20.) Neyi chelili akaKristu akusambila, twakaanaña yaaku, yilwilu ninhoshelu yamukaayi yakubula kumwakama Nzambi. Muloña wachumichi, amanakwetu niahela amavulu ayisehaña kunyidimu hela kushikola. (1 Pet. 4:​3, 4) Hela chochu, twatiyaña kuwaha muloña antu amakwawu atudimbululaña ahimpaña yilwilu yawu mukuhita kwampinji nawa atachikaña kutulemesha.

⁸ Talenu chuma chamumwekeneni Ignacio, wakuCentral America. Hashikola hayileñayi hadiña ntañishi wumu wavulileña kumusupisha muloña wayilwilu yindi yayiwahi. Hela chochu, henohu Ignacio kanda yamanishi shikola, iwu ntañishi wamwihwili kulonda yamulumbulwili chuma chacheni chaletesheli yovwahileña yishina yamuBayibolu hela chakwila amusupishileña kudi antu amavulu muloña wakwila mwenimu. Ignacio walumbulwili nindi kwovwahila nshimbi jaNzambi kwamukiñileña. Kuhiñahu, wamutambikili nindi yakenzi kukupompa kwachipompelu. Ignacio wahayamini chelili yamoni ntañishi yawu nenzi nakupompa! Ntañishi watiyili kuwaha hakumona kukeña kwamwekesheleñawu amanakwetu niahela muchipompelu chakwila watwalekelihu kwinza nakupompa. Mukuhita kwampinji, muloña wakudiza Bayibolu, iwu ntañishi niyena atachikili kumudimbulula. Ilaña watwalekelihu kupama kuspiritu nawa nkumininaku, wapapatisheweli.

9-10. (a) Chumanyi chikwawu chaleteshaña akaKristu kukaana kwikala kabadi kakaayi kaSatana? (b) Yumanyi yitunakudizila kuchuma cheliliyi kapostolu Pawulu?

⁹ Twakaanaña cheñi kwikala kabadi kakaayi kaSatana muloña hitwadiñijaña munsañu jamatuña nachiyuulu ninjitaku. (Yow. 18:36) Kwesekeja nakufumba kwekala haARoma 13:​1, twazataña nañovu kwovwahila nshimbi janfulumendi. Hela chochu, etu akaKristu hitwadiñijaña muyikonkojola yamumapolitikiku, dichi hitwakeñaña atuvoteli hela kuvotela antu amakwawuku. Muloñadi? Muloña chuma chitwalemesha nankashi hikwikala ashinshika kudi Yehova niWanta windi wunakuyuulawu kudi Kristu. AYinsahu jaYehova amavulu ayishaña mutuleya muloña wayuma yakuhwelelawu. Hela chochu, amanakwetu niahela ashañawu mutuleya atwalekañahu kushimwina. Dichi embujolaña kapostolu Pawulu, washakamini yaaka yayivulu mwitala mwamukasililiwu nimukaleya. (Yilw. 24:27; 28:​16, 30) Watwalekelihu kushimwina nsañu yayiwahi kudi antu ejima amutiyilileña, kushilahu nianhembi amutuleya, ayilolu amuchota chanyiloña, anguvulu, anyanta nawa hadaha niayilolu jaNero Mwanta wawaRoma.—Yilw. 9:15.

¹⁰ Munjila yoyimu, amanakwetu niahela ashañawu mutuleya ashimwinaña kudi antu ejima atiyililaña, kushilahu ansompeshi, ayilolu janfulumendi nianhembi amutuleya. Manakwetu wumu washakamini yaaka kubadika ha 6 mukaleya muloña wakukaana kudiñija munsañu jamapolitiki, wahosheli nindi wamweneña wanyi iyi mpinji yadiñayi mukaleya neyi anakumukabisha, ilaña wamweneña neyi himudimu wunamwinkiwu kudi Yehova kulonda yawani antu adi neyi anyikoku. Wenowu muzañalu wutunateli kutiya neyi Yehova atuzatisha kushimwina antu amuchidawa nsañu yayiwahi! (Kol. 4:3) Tuhanjekenu cheñi hayuma yikwawu yinateli kutuletela muzañalu hela chakwila anatuheli muloña wakumukalakela Yehova.

YUMA YIKULETESHA TWIIKALI NAMUZAÑALU NEYI ANATUHELI

11. Kutukabisha kunateli kutuletesha ñahi kwikala nachikuhwelelu chakola? Shimunenu chakutalilahu.

¹¹ Tweluka netu kuhelañana kudi mukaayi kunakushikija wuprofwetu wamuBayibolu. Yehova washimwineñahu dehi muwuprofwetu watachi washimunawu muBayibolu nindi Satana nianyanindi achifwikija, dikwila nawu owu amulondelaña, akahela antu amukeña Yehova nawa amukalakelaña. (Kutach. 3:15) Yesu kakavulu niyena wamwekesheli nindi awa mazu awuprofwetu alala, kwesekeja nachasonekeliwu ansoneki awana aNyikanda yaNsañu Yayiwahi. (Mat. 10:22; Maku 13:​9-12; Luka 6:​22, 23; Yow. 15:20) NiakaKristu amakwawu asonekeli Bayibolu niwena dicheliliwu. (2 Tim. 3:12; Yak. 1:2; 1 Pet. 4:​12-14; Yuda 3, 17-19) Dichi neyi atachika kutukabisha, hitwahayamañaku. Ilaña, twazañalalaña muloña tuneluki netu wuprofwetu wamuBayibolu wunakushikijewa. Chumichi chatwanukishaña nawu tunakukalakela Nzambi walala. Muhela wumu washakamaña mwituña mwakaanishawu mudimu wetu, wahosheli nindi: “Chinadihanini kudi Yehova, nelukili nami hakushimbula wanyi akunkabisha indi kwiji kumbidi. Dichi kukala hikwantiyishileña woma hela kunhayamishaku.” Nfumwindi wadiña hakachi kawantu amudimbulwileña nankashi. Wamukabishileña nawa wamwocheleli Bayibolu ninyikanda yetu yashindamena haBayibolu. Ilaña chatela yafunti hanyima muloña wawoma, iwu muheletu chikuhwelelu chindi chakoleleliku. (Heb. 10:39) Wahosheli nindi: “Aprofweteli dehi nawu akatukabishaña, dichi nelukili nami chumichi chakamwekana. Chatachikiliwu kunkabisha, nakuhweleleli chikupu nami iku dikudifukula kwalala.”

12. Yumanyi yamukwashili manakwetu wumu kuumika makabisha?

¹² Hela chakwila twakuhwelelaña netu akatukabisha, ilaña chinateli kutukalila kuumika neyi anatachiki dehi kutukabisha. Manakwetu wumu wasonekeli kutalisha hayuma yamwekeneña hadiñayi mukaleya nindi: “Mpinji jikwawu naneñeleña nankashi hela kwakama nawa nadilileña.” Yumanyi yamukwashili iwu manakwetu kuumika? Wahosheli nindi: “Nalombeleña mpinji yejima. Henohu kanda niili chuma chidi chejima nantetemena, nasambilileña kulomba. Nalombeleña kala mpinji neyi kudi kukala kunamwekani. Nawa neyi kudi anañili chuma chatama chinanhilishi, nadishinkilileña mukapeka kakuwelela nakulomba.” Iwu manakwetu watoñojokeleña cheñi chikupu hadi antu amwekesheli kashinshi kunyima nimakonu. Yumiyi yamukwashili kuumika makabisha nikwikala nakuwunda kwayikaniniyi Yesu akakumulondela.—Yow. 14:27; 16:33.

13. Yumanyi yitwatela kwila hakwila tushindi kuhelañana?

¹³ Kukeña kutwamukeña Yehova niakwetu kwatukwashaña kushinda kuhelañana. Kushika tuhu nikukufwa kwindi, Yesu wamukeñeli Tata yindi namuchima windi wejima. Yesu wakeñeli niamabwambu jindi. (Yow. 13:1; 15:13) Neyi twikala nakukeña kwamuchidiwu, kwakumukeña Yehova niamanakwetu niahela, ninetu tukutwesha kushinda kuhelañana. Munjilanyi? Hakwila tuwani ñakwilu yanilu lwihu, tuhanjekenu hayuma yamumwekeneni kapostolu Pawulu.

14. Chumanyi chamukwashili Pawulu kubula kutiya woma kufwa?

¹⁴ Henohu kunashali mpinji yantesha nakumujaha, Pawulu wamusonekeleli ibwambu dindi akeñayi Timotewu nindi: “Nzambi hatwinkeli spiritu yawomaku, ilaña watwinkeli yañovu niyakukeña.” (2 Tim. 1:7) Pawulu watalishili mudihi? Pawulu watalishili mukwila nindi neyi mukaKristu yamukeña chikupu Yehova, wukutwesha kuumika kukala kwejima kunateli kumonayi. (2 Tim. 1:8) Chakadi nikujina, chineli Pawulu wamukeñeli nankashi Yehova, chumichi chamukwashili kubula kuchiina kufwa ilaña wamwekesheli kuhamuka nakutwalekahu mukudifukula kwalala.—Yilw. 20:​22-24.

15. Amanakwetu niahela makonu adimwekeshelaña ñahi kukeña kwakufuma hamuchima? (Talenu nimwevulu.)

¹⁵ Twayikeña akwetu akakwitiya atwalekañahu kumwekesha kuhamuka hampinji yinakuyikabishawu. Amakwawu makonu ashaña wumi wawu muwubanji kukoola amanakwawu niahela, neyi chelili aAkwila naPrisila ashili wumi wamu muwubanji kukoola Pawulu. (Rom. 16:​3, 4) Chakutalilahu, kuRussia, amanakwetu niahela amavulu ayaña kuyota yanyiloña nakukolesha ana anakukasawu. Muhela wumu akasiliwu chamweniyi izaza dawamanakwetu niahela enjili kuchota chanyiloña, chumichi chamukundejeli nankashi chakwila wamweneni kwanzo-o hakapinji. Kukeña kwakufuma hamuchima kwamumwekesheleliwu kudi akwawu akakwitiya, kwamukolesheli chikupu haniyi mpinji yadiñayi mukukala. Wenowu muzañalu wutunateli kwikala nawu neyi twikala nakukeña kunateli kutukwasha kushinda kuhelañana!

16. Muloñadi kapostolu Petulu chahosheleliyi nindi antu akabishañawu muloña wakumukalakela Nzambi ekalaña namuzañalu? (1 Petulu 4:14)

¹⁶ Tweluka netu Nzambi watutiyaña kuwaha neyi tushinda kuhelañana. (Tañenu 1 Petulu 4:14.) Kapostolu Petulu wahosheli nindi antu omikaña neyi anakuyikabisha muloña wakumukalakela Nzambi, ekalaña namuzañalu. Munjilanyi? Neyi anakutukabisha muniyi njila, chinakumwekesha nawu “spiritu yaNzambi, yidi hadi [etu].” Petulu welukili chichatiyakanaña neyi muntu anakumutiya kuwaha kudi Nzambi nawa nakuumika makabisha. Hashimbwili wanyi kufuma haPentekosta 33 C.E., atupokola ahatembeli yawaYudeya ayitemesheli kuya nakumukwata Petulu niakwawu apostolu muloña wakushimwina. Hela chochu, Petulu wamwekesheli kuhamuka nakukiña yuma yakuhweleleliyi. (Yilw. 5:​24-29) Nihanyima yakuyeta, yena niakwawu apostolu hiyalekeli kushimwinaku. Ilaña azañaleli “muloña ayilemesheli nanochu chayisawiliwu kukoola ijina [daYesu].” Ninetu tunateli kuzañalala neyi tunakuumika kukala.—Yilw. 5:​40-42.

17. Yesu wayilejeli atumbanji twindi nindidi hawufuku wakukumishaku wakutwala kukufwa kwindi?

¹⁷ Hawufuku wakukumishaku wakutwala kukufwa kwindi, Yesu wayilejeli atumbanji twindi nindi: “Muntu wejima wukunkeña, akumukeña kudi Tata yami, ninami nukumukeña.” (Yow. 14:21) Tunakutalila mpinji yayiwahi yakalekawu antu kutuhela, ilaña yakatukeñawu muloña wakumukalakela Yehova! (2 Tes. 1:​6-8) Sampu iyi mpinji yinashiki, tutwalekenuhu kwila yuma yatuletelaña muzañalu hampinji yinakutuhelawu kudi antu.