Ikalenu Ahamuka Nawa Ashinshika Neyi Benaya

Benaya wadiña mukakuzuña njita wahamuka wamuzuñilileñaku njita Mwanta Davidi niMwanta Solomoni. Benaya wadiña mwana kakapristu. Atupristu niaLevi avulileña wanyi kuya kunjita nikuzatisha yitwa, ilaña Benaya wazuñiliku chikupu munjita jaYehova. Wamwekesheli kuhamuka chikupu. Chakutalilahu, wajahili mutupa mwibuku damenji nawa washindili iyala wataluka wadimanyekeli yitwa. Davidi wamukuhweleleli Benaya nankashi chakwila wamutondeli kwikala mukulumpi wawanhembi jindi.—2 Sam. 23:​20-23.

Benaya watwalekelihu kwikala washinshika kudi Davidi hampinji aAbisalomi naAdoniya yadikañiliwu. (2 Sam. 8:18; 15:18; 1 Anya. 1:8) Davidi chashinakajiliyi, Benaya wakwashañeni cheñi hampinji yamuswanyikileñawu Solomoni kwikala mwanta. (1 Anya. 1:​32-40) Mwamweni, Benaya wadiña washinshika kudi Yehova nikudi antu Jindi awayishiliyi hela chakwila akwawu hiyamwekesheli nawu ashinshikaku.

Ninetu twatela kwikala ahamuka hakwila nawu tumwimiki mushindu chilumbu chetu wañovu, Satana, ninowu amukwashañaku. Nawa twatela kutwalekahu kuzata nañovu kwovwahila nshimbi jaYehova muchihandilu chetu chejima. (Efwe. 6:11; 1 Pet. 5:​8, 9) Hela chakwila antu amakwawu anafuukulihu kumushiya Yehova, etu twatwalekañahu kwikala ashinshika kudi yena, nakukuhwelela netu wakatufweta.—2 Sam. 22:26.