Twalekenuhu Kukolesha Wubwambu Wenu naMwinikwenu

1. Muloñadi amabwambu amawahi chekalilawu chawaana chafumaña kudi Yehova?

AMABWAMBU amawahi hichawaana chafumaña kudi Yehova. (Yak. 1:17) Amukeña Nzambi, nawa atukeña ninetu. Neyi tunazañalali niwena azañalalaña, atukundejaña neyi tunaneñi nawa atufumbaña chakadi kuhita mumbadi neyi amona nawu tunakukeñeka kufumba. Ekalaña ashinshika, nawa twatela kuyikuhwelela. Amabwambu amuchidawa mwamweni “[azañaleshaña] muchima”!—Yish. 27:9.

2. Muloñadi chichalemena adisumbula kutwalekahu kukolesha wubwambu wawu? (Matewu 19:6)

² Chalema nankashi iyala nañodindi kwikala nawubwambu wezala kambuki namunu. Atela kwanukaña nawu chalema hama kutwalekahu kuzata nañovu kukolesha wubwambu wawu. Neyi adiwula kulema kwawubwambu wawu, akutachika kutiya wuudi, kubula kwikala namuzañalu nikuhilashana. Ilaña neyi atwalekahu kuzata nañovu kwila yuma yikukolesha wubwambu wawu, akudikundaña chikupu muwulu wawu. (Tañenu Matewu 19:6.) Muchinu chibaaba, tukuhanjeka kulonda tumoni yuma yatela kwilawu adisumbula hakwila atwalekihu kukolesha wubwambu wawu. Ilaña, tusambilenu kuhanjeka kulonda tumoni akaKristu ajiki chinateli kutondawu chiwahi muntu wakudisumbula nindi wakekala ibwambu dawu wamuwahi muchihandilu chawu chejima.

CHAKUTONDA CHIWAHI IBWAMBU IMWAKAHANDA NINDI MUCHIHANDILU CHENU CHEJIMA

3-4. Yumanyi yinateli kumukwasha muntu kuwana muntu wamuwahi wakwiñila nindi muwulu? (Yishimu 18:22)

³ Henohu kanda tufuukuli chuma chalema, twatela kutoñojoka hayuma yayiwahi niyuma yatama yinateli kufumamu. Yuma yitwafuukulaña yinateli kuletesha chihandilu chetu chejima kwikala chachiwahi kumbidi hela nehi, dichi twatela kutoñojokahu nankashi henohu kanda tufuukuli chuma chalema.

⁴ Neyi tunakutonda ibwambu itwakahanda nindi muchihandilu chetu chejima—muntu wakudisumbula nindi—dikwila nawu tunakufuukula chuma chasweja kulema nankashi muchihandilu chetu. Chineli Yehova diyi washiliku ntanjikilu yawulu, tukwila chiwahi nankashi neyi tukulondela wunlomboli windi hampinji yitunakutonda muntu wakwiñila nindi muwulu. Wakeñaña iyala yawani mumbanda wamuwahi, nawa wakeñaña mumbanda niyena yawani iyala wamuwahi. Yehova mpinji yejima weluka yuma yinateli kutuletela muzañalu muchihandilu. (Tañenu Yishimu 18:22; Isa. 48:​17, 18) Yishina yekala Mwizu daNzambi yinateli kumukwasha mukaKristu kuwana muntu watelela kwikala mwinikwindi.

5. Muloñadi chichalemena kutonda muntu wapapatishewa kwikala mwinikwenu?

⁵ Neyi tupapatishewa, twekalaña amabwambu jaNzambi. (Mas. 25:14) Neyi munakukeña kusumbula hela kusumbuka, mwatela kutonda muntu wakudisumbula nindi hadi amabwambu jaYehova. (1 Kor. 7:39) Neyi mwila mwenimu, mukumwekesha nenu mwalemesha nshimbi jaYehova nawa mukumumonaña mwinikwenu nenu hinkisu kufuma kudi Yehova. (Yish. 19:14) Mukutondolwela cheñi kumona kukala kwafumaña “[mukudikasa] mumpaanda” namuntu wabula kwitiya. (2 Kor. 6:14) Hikubula maana neyi mutachika kudiluka namuntu wabula kwitiya, hadaha mutachika kutoñojoka nenu amanakwetu indi kwiji ahela anakumwekana wanyi mukuloñesha kwaYehova. Hela kudidimba nenu neyi mutachika kudiluka namuntu wabula kwitiya, mwakamubalumuna kulonda yakadizi chalala.

6-7. Malwihu amuchidinyi imwatela kwakula hampinji yimunakudiluka?

⁶ Hela chochu, bayi neyi muntu wejima wapapatishewa nateli kushikilamu kwikala mwinikwenuku. Mwilukenu chiwahi muntu imunakukeña nenu mwakadisumbuli nindi. Dihulenu nenu: ‘Komana wakamenaña chiwahi chisaka chawu? Watoñojokelañaku antu nikuyilemesha? Amabwambu amuchidinyi adikundañayi nawu? Welaña ñahi neyi yitoñojoka yindi yinaambuki nayitoñojoka yawakwawu? Komana wakolelaña hohu kunochu chinakukeñayi, tahindi walondelaña munakuhoshawu akwawu neyi chakwila kwosi chishina chamuNsona chinafumpiwu? Wazatishaña ñahi mali?’

⁷ Munateli cheñi kudihula nenu: ‘Komana iwu ibwambu dami wamwekeshaña nindi wamukeña Yehova nankashi? “[Nakuvwala] wuntu wawuha”? Komana wakankwashaña kutwalekahu kumukalakela Yehova chachiwahi? Tunakufwila yikonkwanyi yoyimu yakuspiritu? Komana wubwambu wetu wunakumwekana nawu wakakolelañaku hohu chikupu tahindi nehi?’ (Kol. 3:​9, 10) Neyi mudi muhela, munakumona nenu manakwetu imunakudiluka nindi wakekala ibwambu wamuwahi nawa mutu wachisaka wakafuukulaña yuma chiwahi? (1 Kor. 11:3) Neyi mudi manakwetu, munakumona nenu muhela imunakudiluka nindi wakwovwahilaña wuswa wumukweti wawumutu hela chakwila mpinji jikwawu mwakaluwañeshaña? Hatela kuhita mpinji hakwila nawu mwiluki ñakwilu yanawa malwihu. Dichi, zatishenuña chiwahi mpinji yimunakudiluka kulonda mumwiluki chachiwahi muntu imunakukeña kwiñila nindi muwulu.

8-9. Yumanyi yinateli kuyikwasha hampinji yimunakudiluka hakwila nawu mufuukuli chachiwahi? (Talenu nimwevulu.)

⁸ Hampinji yimunakudiluka, munateli kufuukula chiwahi neyi mumwiluka chachiwahi muntu imunakudiluka nindi. Ihulenu antu amakwawu kulonda ayileji chamwilukawu ibwambu denu. Munateli kwihula kutalisha hejina datuñayi niyilwilu yikwetiyi muchipompelu. Chakutalilahu, komana amwiluka nawu himuntu wadizoza, wukweti luwi nawa wamwovu muchima? Sara, muhela wakuFrench Guiana wasumbukili namanakwetu wejina daDaniel, wahosheli nindi: “Nehwili antu amakwawu kutalisha hanochu chamwilukiliwu Daniel. Chakutalilahu, nahanjekeli namanakwetu ashakamineñayi nindi mwitala dimu nawa mwazatilileñawu wupayiniya. Nahanjekeli cheñi namukulumpi muchipompelu mwapompeleñayi Daniel, nahanjekeli nawamabwambu atwilukili chiwahi wejima wetu ayedi, nawa nahanjekeli nawahela amuchipompelu mwapompeleñayi.” Munateli kumwihula munjila yayiwahi muntu imunakudiluka nindi neyi chakwila kudihu chuma chidi chejima chamumwekeneni kunyima indi kwiji katataka chimwatela kwiluka, muloña yuma yikwawu hela yaaku yinateli kuleta kukala kweneni nankashi muwulu kumbidi.

⁹ Bayi mudiwula yuma yimunakujinoka yimunamoni mudi ibwambu denu hela yuma yinayilejiwu amabwambu jenu apama kutalisha hadi yenaku. Neyi mwila yuma muniyi njila, chikuyipelela kufuukulahu neyi chakwila mukutwalekahu kudiluka hela nehi.a Ichi, muchibalu chinashaliku chachinu chibaaba, tuhanjekenu hadi ejima adi dehi muwulu.

IKALENUÑA NAMPINJI YAKWIKALA HAMU NAKUKOLESHA WUBWAMBU WENU

10. Chalemenadi eyala namumbanda kwikala nampinji yakwikala hamu wena ayedi?

¹⁰ Eyala namumbanda adisumbula anateli kutwalekahu kukolesha wubwambu niwulu wawu neyi ekalaña nampinji yakwikala hamu, hichikweti muloña nanyidimu yikwetiwuku. Kwila mwenimu kukuyikwasha kuhanjeka hayuma yamwekana hanodu ifuku, kushimuna yitoñojoka yawu nichinakutiyawu, kudimwekeshela kukeña nikwilila hamu tuyuma twakusehesha.

11. Chumanyi chinateli kuluwañesha wubwambu wekalaña hakachi keyala namumbanda?

¹¹ Eyala namumbanda akweti wubwambu wezala kambuki namunu, akeñaña kwikala hamu mpinji yejima. Hela chochu, mpinji jikwawu kudi yuma yayileteshaña kubula kwikala hamu hakapinji. Ilaña kudaambula hadi mpinji yayilehi munateli kufuma yuma yomisha mbaña. Chakutalilahu, amakwawu etejaña mudimu wayileteshaña kuya nakuzatila kwituña dacheñi, nakushiya chisaka chawu hadi mpinji yayilehi. Hela chakwila kwila mwenimu hadaha kukuyiletesha kwikala namali amavulu, kuya nakuzatila kwacheñi hadi mpinji yayilehi nakushiya chisaka kunateli kukisañana wulu.

12-13. (a) Yumanyi yelañawu akaKristu amakwawu adisumbula hakwila ekaleña nampinji yakwikala hamu namwinikwawu? (Talenu nimwevulu.) (b) Wubwambu wenu namwinikwenu mwawulemesha kushika hadihi? (Talenu chikasha chidi namutu nawu “Mwinikwami Watela Kwikala Ñahi Walema Kudi Ami”?)

¹² Talenu yuma yelañawu adisumbula amakwawu hakwila nawu ekaleñaku nampinji yakwikala hamu mpinji yejima. Leah, wakuGuam, wahosheli nindi: “Ami nanfumwami twadiluñishaña kwilila hamu yuma yashiyashana. Kakavulu twadishiyaña wanyi neyi anatutambiki kuchidika indi kwiji tunakuya nakuhema.” Roxanne, wakuUnited States, wabombelelihu nindi: “Chineli tukweti yuma yayivulu nankashi yakwila chayinu mpinji, twafuukwilaña chadimu mpinji yakwikala hamu etu ayedi, neyi chochitwelaña nayuma yikwawu yalema.” (Esekejenu Amosi 3:3.) Damien, wakuFrance, wahosheli nindi: “Tunadizi kulemesha chuma chakeña kwilayi mukwenu, nawa mukuhita kwampinji, wejima wetu ayedi twatachikaña kudiluñisha kwila ochu chuma.” (Mat. 7:12) Nawa Katie, niyena wakuUnited States, wahosheli nindi: “Ami nanfumwami mpinji jikwawu twatentekaña mafoni etu kwakulehi kulonda abuli kutuluwañesha.”

¹³ Chasweja kubadika, ililenuña hamu yuma yakuspiritu. Myriam, wakuFrance, wahosheli nindi: “Twatachikaña ifuku nakutaña Bayibolu nawa twahanjekaña hayuma yinatutiyishi kuwaha niyitwatela kuzatisha muchihandilu chetu. Natiyaña kuwaha iyi mpinji yitwelilaña hamu yuma.” Wabombelelihu nindi: “Natiyaña cheñi kuwaha neyi tunakulombela hamu nawa nitiya nfumwami chinakuhoshayi mazu anakumwekesha chamukeñayi Yehova.” Katie, atenawu dehi, wahosheli nindi: “Mpinji yatuzañaleshaña nankashi hikuzatila hamu mumudimu wakushimwina. Chatutiyishaña kuwaha kutiya mukwenu chinakulumbululayi yuma yakuhwelelayi, nawa twatwalekañahu kudizilaku yuma yayiha kudi wumu namukwawu.”—Yish. 27:17.

TWALEKENUHU KUZATILA HAMU NIHAMPINJI YIMUNAKUMONA KUKALA

14-15. Muloñadi adisumbula chinateli kuzatilawu hakumina ñovu jawu kumanisha kukala kunateli kumonawu muwulu wawu? Shimunenu chakutalilahu.

¹⁴ Chineli awanina wanyi, adisumbula akumonaña kukala muwulu wawu. Bayibolu yahosha chakadi kuhita mumbadi nawu antu adisumbula “akumonaña yihuñu mumujimba wawu.” (1 Kor. 7:28) Iwu mukuku wamazu watalisha kukukala kwavula kumonawu antu adisumbula. Neyi kukala kwamuchidiwu kumwekana, muloñadi chatela kuzatilawu nañovu kutwalekahu kuzatila hamu kumanisha kukala kunamoniwu?

¹⁵ Toñojokenu hanichi chakutalilahu. Neyi itala dadiwahi nankashi indi kwiji chuma chakubaza chiwahi chinakisiki, chakadi nikujina aweni ochu chuma akufuukulahu kuchiwahisha. Anateli kuzatisha mali amavulu nankashi niyuma yikwawu hakwila nawu awahishi ochu chuma, hadaha hanateli kuhita yaaka yayivulu hakwila amanishi. Muloñadi? Muloña odu itala indi kwiji chuma chakubaza achilemesha nankashi. Munjila yoyimu, wulu wejima walema nankashi. Hela chakwila eyala namumbanda akweti wubwambu wakola chikupu muwulu wawu, ifuku dimu akamona kukala hela kwambokelamu. Hela chochu, neyi chinateli kuwahishawu itala indi kwiji chuma chakubaza chiwahi chinakisiki, adisumbula anakumona kukala muwulu anateli kukolesha cheñi wubwambu wawu wadiñawu nawu hakusambila. Hakwila eli mwenimu, hadaha hakuhita mpinji yayilehi nawa atela kuzata nañovu. Hela chochu, Yehova wukutiya kuwaha neyi adisumbula azata nañovu kukolesha wulu wawu nawa atwalekahu kushakama hamu. (Mal. 2:16) Neyi ela mwenimu, hiyakumwekesha nawu adikeña nikudilemesha wena ayedi hohuku, ilaña niYehova, Ntachiki yawulu.

16. Kwesekeja na 1 AKorinda 13:​4-8a, yumanyi yinateli kukwasha adisumbula anakumona kukala kweneni muwulu wawu? (Talenu nimwevulu, kushilahu nichikasha chidi namutu nawu “Yuma Yikuyikwasha Kukolesha Wubwambu Wenu.”)

¹⁶ Neyi muwulu wenu mumwekana kukala, bayi munyakala kudaambulaku. (1 Kor. 7:​10, 11) Ilaña, dihulenu nenu, ‘Kudihu yuma yinatela kwila hakwila nikoleshi wubwambu wetu?’ Dizenu chahosha Bayibolu hakumwekesha kukeña, nawa dihulenu kulonda mumoni neyi mwatela kuzatila hakumwekesha yilwilu yikwawu yashimunawu ha 1 AKorinda 13:​4-8a. (Tañenu.) Chatela mutoñojokeña hajakumushiya mwinikwenu, zatenu hakumina ñovu jenu kulonda mukoleshi wubwambu wenu cheñi. Shenu muchima hayuma yimunateli kwila yikuyikwasha kwikala cheñi namuzañalu muwulu wenu. Mulombenu Yehova ayilomboli. Sandujolenu munyikanda yetu nikutala mavidiyo kulonda muwani nsañu yikuyikwasha. Munateli cheñi kulomba wukwashu kudi akulumpi nikudi akwenu akaKristu apama. Neyi mumushindamenaña Yehova, mwonji wamuchisatu nawa wakola nankashi “[hachibaaba] chanyonji yisatu,” wulu wenu “[hiwunateli] kuketuka swayiku.”—Mukwa. 4:12.

17. Antu anakudiluka kulonda akadisumbuli ninowu adi dehi muwulu anateli kwikala ñahi namuzañalu?

¹⁷ Yehova wakeñaña nindi ambuñindi ejima ekali namuzañalu, kushilahu anakudiluka kulonda akadisumbuli ninowu adi dehi muwulu. Neyi mudi mujiki nawa munakukeña wakudisumbula nindi, tondenu chiwahi ibwambu imunakukeña kuhanda nindi muchihandilu chenu chejima. Nawa neyi mudi dehi muwulu, twalekenuhu kukolesha wubwambu wenu namwinikwenu. Zatilenu hakumanisha kukala kunateli kumwekana muwulu wenu kuhitila mukushindamena hawukwashu waYehova. Neyi mwilaña yumiyi, ‘mukudiluñishaña’ namwinikwenu imwakeña!—Mukwa. 9:9.