Yuma Yikuyikwasha Kutiyishisha Yakutalilahu Yazatishawu muBayibolu

MuBayibolu mwenzala yakutalilahu yayivulu. Hela chochu, antu amavulu atañaña Bayibolu akañanyaña kuyitiyishisha. (Mat. 13:13) Yumanyi yinateli kuyikwasha kwiluka mwatalisha yakutalilahu yazatishawu muBayibolu? Esekenu kuzatisha njila jinalondelihu:

• Ilukenu mutu wansañu nichuma chinakufwikijawu nachu. Yakutalilahu yesekejaña mutu wansañu nachuma chinakufwikijawu nachu. Chakutalilahu, Chimwekeshu 3:3 yesekejaña kwinza kwaYesu (mutu wansañu) nachenzaña ikombi (chuma chinakufwikijawu nachu).

• Ilukenu kudifwana kudi hamutu wansañu nachuma chinakufwikijawu nachu. Talenu yuma niyilwilu yinakuletesha mutu wansañu wudifwani nachuma chinakufwikijawu nachu.

• Kunkululenu munjila yaloña. Mpinji jikwawu, muntu nateli kukunkulula mwaheña muloña wakukañanya kutiyishisha kudifwana kudi hamutu wansañu nachuma chinakufwikijawu nachu. Muchakutalilahu chashimunawu hewulu, Yesu hanakwinza nakwiya chuma chidi chejimaku. Hela chochu, iyi nsañu yamwekeshaña nawu kwinza kwindi kwakekala neyi chenzaña ikombi, muloña wakenza chakadi kumukuhwelela nawa chakadi kubidika nindi nakwinza.