Mukuhwelelenu Nyuuli Wabadika waYuma Yejima

1. Yumanyi yatama yamumwekeneni Yoba?

YOBA, iyala wadiña nachikuhwelelu, wamweni kukala kwakuvulu nankashi. Wafwishili anyanindi, wakatili chikatu cheneni nawa wajimbesheli maheta indi. Kubombelahu, amutamishilili ijina dindi dadiwahi. Kutalisha hadi “amabwambu” jindi, yuma yayivulu yahosheleñawu yamuneñesheleña. Ñodindi akeñeliyi niyena watiyili kutama chakwila wamulejeli Yoba nindi ‘amuhoshi Nzambi chatama afwi.’ (Yoba 2:9; 15:​4, 5; 19:​1-3) Iyi yuma yatama yamumwekeneni Yoba yadi kumuletesha kuleka kumukuhwelela Nzambi walala nakutachika kujinoka neyi chakwila Yehova nateli kukiña antu amukeña nawa amukalakelaña.

2-3. Tunateli kutachika kutoñojoka netudi, nawa yumanyi yitukudiza mumukanda waYoba?

² Mpinji jikwawu, ninetu twahitaña mukukala kunateli kutwisha mukweseka chikupu kwakukañanya kumukuhwelela Yehova. Tunakushakama “[mumpinji] jakala.” (2 Tim. 3:1) Neyi tunakumona kukala kwakuvulu hampinji yoyimu, tunateli kutachika kuneña nankashi nikwakama, nakutoñojoka netu tukutwesha wanyi kuumika. Kukala kwamuchidiwu, kwaleteshaña antu amavulu kujinoka neyi chakwila mwamweni Yehova wayakamenaña.

³ Neyi chakwila mwatiyahu dehi muniyi njila, bayi muzeyaku. Yoba welukili nindi Yehova wamwinaña antu ekalaña ashinshika kudi Yena. Ninetu tunateli kumukuhwelela chikupu Tata yetu wamwiwulu neyi cheliliyi Yoba. Hakwila twili mwenimu, tuhanjekenu hamukanda waYoba kulonda tumoni chiwatukwashaña kukuhwelela yuma yiyedi yalema: Chatachi, Yehova nkawindi hohu diyi Nyuuli Wabadika wayuma yejima. Chamuchiyedi, Nzambi yetu wañovu jejima nateli kukañesha yuma yatama yinakumwekana mukaayi hakwila nawu yishikiji nkeñelu yindi yashimunayi dehi nawa kulonda yakiñi antu jindi kuyuma yinateli kuyikisañana chikupu kuspiritu nikumujimba.

SATANA WENJILI HADIÑAWU

4. Anyi apompeli kukubulakana kwadiña mwiwulu kwashimunawu mumukanda waYoba?

⁴ Ifuku dimu, “anyana kaNzambi walala” apompeli kudi Yehova mwiwulu. Kuhiñahu Bayibolu yahosha nawu: “Satana niyena wenjili hadiñawu.” (Yoba 1:6) Aka dikatachi muBayibolu hitwawanaña nkumbu yakwila nawu “Satana,” nawa amutenaña naniyi nkumbu muloña wamudimbululaña Yehova. Haniyi mpinji, Satana hadiña cheñi mwana kaNzambi washinshikaku. Wekalili chilumbu chaYehova niwachisaka Chindi chamwiwulu nichahanu hamaseki. Hampinji yahosheliyi mazu asonekawu haKutachika 3:​15, Yehova wamwekesheli nindi Satana hachidiña muchisaka chindi chamwiwuluku. Dichi Satana wekala wanyi kabadi “kamumbanda,” dikwila nawu chisaka chaYehova chayileñaleña yakuspiritu, ashimwiniwu nawu wakavwala ‘mwana.’

5. Yumanyi yitunakudizila kuyuma yahosheliyi Satana nichamwakwiliwu kudi Yehova?

⁵ Yehova wetejeli iyi nsañu yahanjekeliwu haniku kukubulakana kwadiña mwiwulu nindi ayisoneki muBayibolu. Mazu ahosheliyi Satana amwekeshaña hatooka nawu himukakutwambila antu muneni. (Yoba 1:9; esekejenu Chimwekeshu 12:10.) Muloña wakwila Yehova wetejeli yuma yamwekeni mwiwulu nindi ayisoneki muBayibolu, chatukwashaña kukuhwelela netu wamwekeshaña wuswa windi wabadika munjila yaloña nawa yayiwahi. Chumichi chatukwashaña kwiluka cheñi netu chineli Wañovu Jejima, Yehova wafuukulaña yuma yatela kwilawu amakwawu niyatela kubula kwilawu.

YEHOVA DIYI WUDI NAÑOVU YAKUSHIMUNA HAKUKUMINA

6. Yehova wamwekesheli ñahi nindi diyi wadiña nañovu chikupu hakubulakana kwadiña mwiwulu? (Yoba 1:​7, 8)

⁶ Tañenu Yoba 1:​7, 8. Yehova diyi wadiña nañovu yakufuukula yuma haniku kubulakana. Wamwihwili Satana nindi: “Wunamumoni kambuñami Yoba?” Eña, Yehova welukili chikupu nindi Satana wakeñeleña kumulukuka Yoba, iyala washinshika. Tuhanjekenu kulonda tumoni Yehova chazatishiliyi ñovu yindi yabadika hakwila yamukwashi Yoba.

7. Kwesekeja naYoba 1:​10, 11, Satana watalishileña mudihi namazu ahosheliyi kutalisha hadi antu amukalakelaña Yehova?

⁷ Tañenu Yoba 1:​10, 11. Yehova diyi Nyuuli Mukakubadika chikupu wayuma yejima, nawa wazatishaña wuswa windi niñovu munjila yejima yinamoniyi nindi yidi chiwahi. (Yere. 32:17; Dan. 4:35) Hela chochu, Satana wahosheli nindi Yehova wazatishili ñovu yindi munjila yabula kutelela. Munjila yikwawu, chidi neyi Satana wahosheleña nindi Nzambi wenkaña antu majika kanwa, chidi neyi Yoba, kulonda amukalakeleña. Satana watalishileña cheñi mukwila nindi antu amukalakelaña Yehova, elaña mwenimu muloña hohu wayuma yayiwahi yinateli kuyinkayi. Yehova welili ñahi nachumichi?

8-9. Yehova wamulejeli Satana kukumina hadihi, nawa muloñadi? (Yoba 1:12) (Talenu nimwevulu.)

⁸ Tañenu Yoba 1:12. Yehova wamwitejeli Diyabolu kumweseka Yoba kulonda yamoni neyi mwahosheleñayi mwalala—ilaña wamulejeli hakukumina. Nzambi wamulejeli chakadi kuhita mumbadi nindi: “Bayi wukwata hamujimba [waYobaku]!” Iku ejima anapompi haniku kubulakana anakutalaku, Yehova wamulejeli Satana hakukumina hakumulukuka Yoba. Satana wadiña wanyi nañovu yakubadikisha halushimbi lwamwinkeliwu, dichi wafuukwilihu kwila yuma kwesekeja nahamulejeliwu nawu dihatela kukuminayi. Nichayinu mpinji, Satana wudi nahakukumina. Dichi Yehova wazatishili wuswa windi niñovu kumukiña Yoba niijina Dindi dadiwahi.

⁹ Hampinji yamulukukiliyi katachi, Satana wakañenyi chikupu. Yoba watwalekelihu kwikala washinshika kudi Tata yindi wamwiwulu. (Yoba 1:22) Hela chochu, Mukakudimbulula hakuminini hohenaha kumweseka Yobaku.

10. Muloñadi Yehova chamwitejeleliyi Satana kutwalekahu kumweseka Yoba? (Yoba 2:​2-6)

¹⁰ Tañenu Yoba 2:​2-6. Haniyi mpinji, Satana wazatishili kweseka kukwawu kweneni hakwila yamuzeyeshi Yoba. Satana wahosheli nindi Yoba, chakadi nikujina, wukumuhosha Nzambi chatama kulonda hohu yamwini wumi windi. Hakwila amanishi iku kukala, Yehova wamwitejeli Diyabolu kumukatisha iwu iyala washinshika. Ilaña cheñi, Yehova wamulejeli hakukumina, nakumuleja nindi: “Bayi wumujahaku!” Satana hadiña nañovu yakumujaha Yobaku, muloña Nzambi wamwitejeli wanyi kwila chumichi. Cheñi, tunamoni netu Mukakubadika Chikupu diyi wadiña nañovu nankashi hampinji yamweneñayi Yoba kukala, muloña Satana hiyamwitejeli kubadikisha hamulejeliwu kudi Yehova nawu dihatela kukuminayiku.

YEHOVA WALEKESHELI MAKABI AMWENEÑAYI YOBA

11. Yehova chalekesheliyi kukala kwamweneñayi Yoba, wamukiswilili ñahi? (Yoba 42:​10-13)

¹¹ Tañenu Yoba 42:​10-13. Yoba chamwekesheliyi hatooka nindi wukwikalaña washinshika mpinji yejima, Yehova hamwitejeli Satana kutwalekahu kumulukukaku. Yehova walekesheli makabi amweneñayi kambuñindi washinshika. Haniyi mpinji cheñi, Mukakudimbulula wadiña wanyi nañovu yakukañesha mwafuukwiliyi Yehova. Satana hiyamwitejeli cheñi kutwalekahu kumulukuka hatooka Yoba kambuña aYehova alemesheliyiku.

12. Shimunenu chuma chamwekeni chinakumwekesha yuma yayiwahi yafumañamu neyi antu akuhwelela muñovu yaYehova yakwamwina.

¹² Munanu mafuku akukuminina, amavulu anakumona Yehova chinakuyamwinayi nañovu jindi. Chakutalilahu, mu 1945 amashidika akanjikijili aYinsahu jaYehova 230 kwenda lwendu lwalulehi nawa lwakala kufuma muchilombu mukaleya muGermany nakuya kukaluñalwiji kulonda akayijahiliku. Ilaña aYinsahu ejima apulukili. Asonekeli yuma yayimwekeneni nawa ahosheli nawu Yehova wayamwinini neyi chamwininiyi aHeberu asatu muluteñu lwakesi, abulili nikununkahu wishi hampinji yafuminiwu mwayinatililiwu. Munjila yoyimu, awa aYinsahu apulukili muniku kweseka kweneni, hela chochu, chikuhwelelu chawu chakoleleliku chikupu. Yehova wayinkeli ñovu jindi. Atiyili cheñi neyi anayamwini neyi chamwamwininiwu Danyeli mwiyeñu danyitupa. Kufuma haniyi mpinji, adikasili mumuchima kumukalakela Yehova haya nyaaka. Nawa ahosheli nawu kutwalekahu kumukalakela Yehova haya nyaaka hichuma chabadika chadi kutambwilawu.—Esekejenu Danyeli 3:27; 6:22.

13. Chumanyi chimwatela kukuhwelela hampinji yimunakumona kukala? (Talenu ninyevulu.)

¹³ Ninetu mpinji jikwawu tunateli kumona kukala muchihandilu kunateli kutuletesha kutiya neyi anatunatili mwiyeñu danyitupa. (1 Pet. 5:​8-10) Mpinji jikwawu, tunateli kutiya kuzeya nankashi muloña tunakumona neyi kukala kutunakuhitamu kwakamana wanyi. Hampinji jamuchidiwu, kwanuka yuma yahitilimu Yoba kunateli kutukwasha. Twatela kukuhwelela chikupu netu Yehova wukweti ñovu yakumanisha makabi itunakumona, nawa nateli kwila mwenimu chayinu mpinji indi kwiji mukaayi kakaha kanakwinza. Haketeja nshakaminu yamakonu kuhitakana hampinji yatoñolayi nindi dihiyatela kumaninaku!

YEHOVA WAYIKEÑA AMBUÑINDI ASHINSHIKA

14-15. Yumanyi yinakufwilayi Yehova kuyilila ambuñindi ashinshika, nawa muloñadi? (Yoba 14:15) (Talenu nimwevulu.)

¹⁴ Tañenu Yoba 14:15. Tata yetu wamwiwulu wukweti wubwambu wadimena nawantu ekala ashinshika kudi yena. Wayikeña chakwila neyi afwa, wakayisañula. Wakafumishahu kuyeña kutwatiyaña muloña wakufwisha antu itwakeña.—Isa. 65:17.

¹⁵ Hela chakwila Yoba watwalekelihu kushakama mukaayi kayuulileñawu kudi Satana, nsañu yashindamenewa yasonekawu muBayibolu yatukwashaña kwiluka netu Yehova wamukwashili Yoba kwikala wakola cheñi kumujimba nawa wamwinkeli yuma yayiwahi yayivulu nankashi kubadika yadiñayi nayu henohu kanda amweseki. Iyi nkisu yamwekesheleña hohu yuma yayiwahi Yehova yakamwililayi Yoba kumbidi. Yehova wamwekesheli nindi wakeñaña antu jindi ashinshika ekaleña namuzañalu chikupu nikudiluñisha chihandilu. Kafwampi, antu ejima amwekeshaña nawu ashinshika, Yehova wakayinka kukooleka kwakwikala nawumi wawanina muparadisa heseki. (Chim. 21:​3, 4) Chineli diyi Nyuuli Wabadika wayuma yejima, wukweti muchima wakufwila kwila mwenimu. Iyi nsañu yatukundejaña nankashi hampinji yitunakuumika kukala!

16. Chumanyi chikwawu chikutukwasha kumukuhwelela Yehova netu diyi Nyuuli Wabadika?

¹⁶ Nkumininaku, Yoba wafwili hanyima yakushakama yaaka yayivulu. Ilaña Yehova diyi Nyuuli Wabadika, Wañovu Jejima, wukweti ñovu yakufumishahu nikufwa. (Kuhit. 32:39) Dichi kwosi wunateli kumukañesha kusañula antu akeñayi. Nawa wakela mwenimu hampinji yinatondiyi.—Rom. 8:​38, 39.

MUKUHWELELENU YEHOVA CHIKUPU

17. Yumanyi yinakumwekesha nawu Satana nakañanyi kujiyisha antu jaYehova?

¹⁷ Tunadizi mumukanda waYoba netu kudi yuma yayivulu yatuleteshaña kumukuhwelela Yehova chikupu. Kwenoku kuwaha kutwatiyaña hakwiluka netu Satana nakañanyi kujiyisha antu jaYehova! Tweluka netu Yehova diyi Nyuuli Wabadika muloña antu akushika ku 9 miliyoni anakumukalakela makonu nakashinshi. Kakavulu, yitwa yinakuchilawu nawu akatishi nachu ambuña aYehova hiyinakuzatika hela hantiku. (Isa. 54:17) Nyuza yidi neyi chikuñu nianlomboli jakudifukula anakañanyi kujiyisha antu jaYehova amwekanaña neyi hiyakweti wakuyikiñaku. Nawa kwosi chuma chinateli kutukañesha kutaandisha chalala chahosha hadi Yehova nikumusawula Satana netu hichipwapoki nawa himukakujahana. Hela kufwa hikunateli kutukañeshaku, muloña Yehova wakasañula muntu wejima wafwaña iku washinshika kudi yena.—Hos. 13:14.

18. Muloñadi chitwatela kubulila kutiya woma muloña wayuma yakamwekana kumbidi?

¹⁸ Chitukutoñojokaña hansañu yalala yamwekeni yahosha hadi Yoba, chumichi chikutukwasha kukuhwelela chikupu netu tunateli kushinda kukala kudi kwejima kwakamwekana kumbidi. Hampinji yalukadi lwasweja, antu jaNzambi akamwekana neyi kwosi wakuyikiña nawa Satana ninowu amukwashañaku akamwekana neyi anashindi. Ilaña neyi chichadiña mumafuku aYoba, Yehova wakazatisha ñovu jindi jabadika nawa hakamwiteja Satana kukisañana antu jindi haya nyaakaku. Mpinji yinakunyakala kushika hakamanishayi Yehova makabi aletañayi Satana hadi antu. Diyabolu niandemoni jindi akayikasila mwikela hadi yaaka 1,000. (Luka 8:31; Chim. 20:​1-3) Nkumininaku, Satana niejima amuhakwilañaku akayijilumuna. (Chim. 20:10) Neyi chashimwiniyi dehi Yehova, mutu waSatana akawuchika. Akamujilumuna chahaya nyaaka.—Kutach. 3:15; Rom. 16:20.

19. Yumanyi yayiwahi yatalilaña antu amukuhwelela Yehova chikupu? (Talenu nimwevulu.)

¹⁹ Akakudifukula alala atalilaña chikupu mpinji yakumbidi hakekalawu nawumi wawanina nimuzañalu waweni mukaayi kakaha kanakwinza katataka. Chihandilu kumbidi chakawaha nankashi kubadika nichitwatoñojokaña. Yehova washiika nindi: “Talaña! Inakubalumuna yuma yejima yiikali yayiha.” (Chim. 21:5) Awa mazu atalisha mudihi? Iyi diyakekala mpinji yatachi kufuma tuhu mwitempa daEdeni, Satana niandemoni jindi hiyakatwesha kuyila antu yuma yatama hela kuyikojeja kwila yuma yatamaku. Twakadiluñisha kuwunda kwakweni! Himwakakamahu cheñi nayuma yamukanu kaayi kakakulu yayikojejaña kukañanya kukaama tuluku. Antu akapuluka haAmagedoni, akamona antu amavulu nankashi chakayuukawu muchihayamisha. Kubombelahu, kusañuka kwawantaña jetu niamabwambu itwakeña dihikwakatachika. Twakadiluñishaña wumi kwesekeja nachakeñeleñayi Tata yetu wamwiwulu!

20. Yumanyi yimwatela kutwalekahu kufwila kwila?

²⁰ Munanu mafuku akukuminina, chakadi nikujina, tukumonaña kukala kwakuvulu nawa tukukeñekaña kwikala ahamuka hakwila tutwalekihu kwikala ashinshika. Dichi tufwileña kutwalekahu kumukuhwelela chikupu Yehova nikuhakwilaku chiyuulu chindi. Tutwalekihu kumwekesha netu twamukeña Tata yetu wamwiwulu nikumwekesha hatooka netu yuma yahoshañayi Satana yakutwamba. Mwamweni, twatela kukuhwelela netu neyi tutwalekahu kwikala ashinshika kudi Yehova, Nyuuli Wabadika, twakadiluñisha yuma yayiwahi kumbidi muloña nakufwila chikupu kukiswila ambuñindi ashinshika, nawa dimwakelayi!