ຂ້ອຍຈະພົບສາສະໜາແທ້ໄດ້ແນວໃດ?
ຄຳຕອບຈາກຄຳພີໄບເບິນ
ຄຳພີໄບເບິນໃຊ້ຕົວຢ່າງປຽບທຽບເພື່ອໃຫ້ເຫັນຄວາມແຕກຕ່າງລະຫວ່າງຄົນທີ່ນັບຖືສາສະໜາແທ້ກັບຄົນທີ່ບໍ່ໄດ້ນັບຖືໂດຍເວົ້າວ່າ: “ພວກເຈົ້າຈະຮູ້ຈັກພວກນີ້ໄດ້ຈາກສິ່ງທີ່ເຂົາເຈົ້າເຮັດ. ພວກເຈົ້າຈະປິດໝາກລະແຊັງຫຼືໝາກເດື່ອຈາກຕົ້ນໜາມໄດ້ບໍ?” (ມັດທາຍ 7:16) ຄືກັບທີ່ເຈົ້າຮູ້ວ່າຫງ່າໃດເປັນຫງ່າໝາກລະແຊັງໃນຟຸ່ມໜາມ ເຈົ້າກໍຮູ້ໄດ້ວ່າສາສະໜາໃດເປັນສາສະໜາແທ້ໂດຍເບິ່ງຈາກໝາກຜົນຫຼືລັກສະນະເດັ່ນຂອງສາສະໜານັ້ນ.
ສາສະໜາແທ້ສອນຄວາມຈິງຈາກຄຳພີໄບເບິນບໍ່ແມ່ນຈາກທິດສະດີຂອງມະນຸດ. (ໂຢຮັນ 4:24; 17:17) ສອນຄວາມຈິງວ່າມະນຸດບໍ່ມີວິນຍານ ແລະສອນເລື່ອງຄວາມຫວັງທີ່ຈະມີຊີວິດຕະຫຼອດໄປໃນໂລກທີ່ເປັນສວນທີ່ງາມໆ. (ເພງສັນລະເສີນ 37:29; ເອຊາຢາ 35:5, 6; ເອເຊກຽນ 18:4) ສາສະໜາແທ້ຕ້ອງເປີດໂປງຄຳສອນຕົວະນຳ.—ມັດທາຍ 15:9; 23:27, 28
ສາສະໜາແທ້ສອນຄົນໃຫ້ຮູ້ຈັກພະເຈົ້າແລະສອນວ່າຊື່ຂອງເພິ່ນແມ່ນພະເຢໂຫວາ. (ເພງສັນລະເສີນ 83:18; ເອຊາຢາ 42:8; ໂຢຮັນ 17:3, 6) ສາສະໜາແທ້ບໍ່ໄດ້ສອນວ່າເລື່ອງພະເຈົ້າເປັນເລື່ອງທີ່ຍາກໂພດທີ່ຈະເຂົ້າໃຈ ແຕ່ສອນວ່າພະເຈົ້າຢາກໃຫ້ເຮົາໃກ້ຊິດກັບເພິ່ນ.—ຢາໂກໂບ 4:8
ສາສະໜາແທ້ສອນວ່າພະເຢຊູເປັນຜູ້ທີ່ພະເຈົ້າສົ່ງມາເພື່ອຊ່ວຍມະນຸດໃຫ້ລອດ. (ກິດຈະການ 4:10, 12) ຄົນທີ່ນັບຖືສາສະໜານີ້ເຊື່ອຟັງຄຳສັ່ງຂອງພະເຢຊູແລະພະຍາຍາມຮຽນແບບເພິ່ນ.—ໂຢຮັນ 13:15; 15:14
ສາສະໜາແທ້ເນັ້ນວ່າການປົກຄອງຂອງພະເຈົ້າເປັນຄວາມຫວັງດຽວຂອງມະນຸດ. ຄົນທີ່ນັບຖືສາສະໜານີ້ເຕັມໃຈບອກຄົນອື່ນເລື່ອງການປົກຄອງຂອງພະເຈົ້າ.—ມັດທາຍ 10:7; 24:14
ສາສະໜາແທ້ສົ່ງເສີມໃຫ້ຄົນຮັກກັນແບບບໍ່ເຫັນແກ່ໂຕ. (ໂຢຮັນ 13:35) ສອນໃຫ້ນັບຖືຄົນທຸກຊົນເຜົ່າແລະເປັນໝູ່ກັບທຸກຄົນບໍ່ວ່າຈະມາຈາກພູມຫຼັງ ວັດທະນະທຳ ພາສາ ຫຼືເຊື້ອຊາດໃດກໍຕາມ. (ກິດຈະການ 10:34, 35) ຄົນທີ່ນັບຖືສາສະໜາແທ້ຈະບໍ່ເຮັດສົງຄາມຍ້ອນເຂົາເຈົ້າຮັກຄົນອື່ນ.—ມີກາ 4:3; 1 ໂຢຮັນ 3:11, 12
ສາສະໜາແທ້ບໍ່ມີຄຸນພໍ່ທີ່ໄດ້ເງິນເດືອນແລະບໍ່ມີຕຳແໜ່ງທາງສາສະໜາທີ່ຟັງແລ້ວເປັນຄົນສຳຄັນ.—ມັດທາຍ 23:8-12; 1 ເປໂຕ 5:2, 3
ສາສະໜາແທ້ເປັນກາງແທ້ໆໃນເລື່ອງການເມືອງ. (ໂຢຮັນ 17:16; 18:36) ຄົນທີ່ນັບຖືສາສະໜາແທ້ນັບຖືແລະເຊື່ອຟັງລັດຖະບານໃນປະເທດທີ່ເຂົາເຈົ້າຢູ່ຕາມທີ່ຄຳພີໄບເບິນບອກໄວ້ທີ່ວ່າ: “ສິ່ງທີ່ເປັນຂອງກາຍຊາກໍໃຫ້ກາຍຊາ [ຕົວແທນອຳນາດຂອງລັດຖະບານ] ແລະສິ່ງທີ່ເປັນຂອງພະເຈົ້າກໍໃຫ້ພະເຈົ້າ.”—ມາຣະໂກ 12:17; ໂຣມ 13:1, 2
ສາສະໜາແທ້ເປັນແນວທາງຊີວິດ ບໍ່ແມ່ນເປັນແຕ່ທຳນຽມຫຼືການເຮັດພໍເປັນພິທີ. ຄົນທີ່ນັບຖືສາສະໜານີ້ຍຶດໝັ້ນກັບມາດຕະຖານທາງດ້ານສິນລະທຳຂອງຄຳພີໄບເບິນໃນທຸກແງ່ມຸມຂອງຊີວິດ. (ເອເຟໂຊ 5:3-5; 1 ໂຢຮັນ 3:18) ການນະມັດສະການ “ພະເຈົ້າຜູ້ມີຄວາມສຸກ” ເຮັດໃຫ້ເຂົາເຈົ້າມີຄວາມສຸກ ບໍ່ແມ່ນເຮັດໃຫ້ທຸກໃຈ.—1 ຕີໂມທຽວ 1:11
ຄົນທີ່ນັບຖືສາສະໜາແທ້ມີໜ້ອຍ. (ມັດທາຍ 7:13, 14) ເຂົາເຈົ້າມັກຖືກດູຖູກ ຖືກເຍາະເຍີ້ຍ ແລະຖືກຂົ່ມເຫງຍ້ອນເຂົາເຈົ້າເຮັດຕາມສິ່ງທີ່ພະເຈົ້າຕ້ອງການ.—ມັດທາຍ 5:10-12
ສາສະໜາແທ້ບໍ່ແມ່ນສິ່ງທີ່ເຈົ້າເລືອກຕາມຄວາມຮູ້ສຶກ
ການເລືອກສາສະໜາໂດຍອາໄສແຕ່ຄວາມມັກເປັນເລື່ອງທີ່ອັນຕະລາຍຫຼາຍ. ຄຳພີໄບເບິນບອກລ່ວງໜ້າວ່າຈະມີຍຸກສະໄໝໜຶ່ງທີ່ຄົນຈະ “ລວບລວມຄູສອນ [ສາສະໜາ] ໄວ້ຫຼາຍໆເພື່ອໃຫ້ສອນເລື່ອງທີ່ເຂົາເຈົ້າຢາກຟັງ.” (2 ຕີໂມທຽວ 4:3) ກົງກັນຂ້າມ ຄຳພີໄບເບິນສະໜັບສະໜູນເຮົາໃຫ້ເຮັດຕາມ “ສາສະໜາທີ່ສະອາດແລະບໍລິສຸດຕາມຄວາມຄິດຂອງພະເຈົ້າພໍ່ຂອງພວກເຮົາ” ເຖິງວ່າສາສະໜານັ້ນຈະບໍ່ມີຫຼາຍຄົນມັກກໍຕາມ.—ຢາໂກໂບ 1:27, ໄຂເງື່ອນ; ໂຢຮັນ 15:18, 19