ວັນທີ 28 ກັນຍາ–4 ຕຸລາ 2026
ເພງທີ 79 ສອນພວກເຂົາໃຫ້ມີຄວາມເຊື່ອທີ່ໝັ້ນຄົງ
ຊ່ວຍຄົນອື່ນໃຫ້ຮູ້ຈັກພະເຢໂຫວາ
“ຜູ້ທີ່ຈະໄດ້ຊີວິດຕະຫຼອດໄປຕ້ອງຮູ້ຈັກພໍ່ທີ່ເປັນພະເຈົ້າທ່ຽງແທ້ອົງດຽວ.”—ຢຮ. 17:3
ຈຸດສຳຄັນ
ເຈົ້າຈະຊ່ວຍນັກນຶກສາແນວໃດໃຫ້ຮູ້ຈັກພະເຢໂຫວາ ຄຸນລັກສະນະຕ່າງໆຂອງເພິ່ນ ແລະສິ່ງໃດທີ່ເພິ່ນມັກແລະສິ່ງໃດທີ່ເພິ່ນບໍ່ມັກ.
1. ເຈົ້າຮູ້ສຶກແນວໃດເມື່ອເຫັນນັກສຶກສາກ້າວໜ້າ?
ເຈົ້າຮູ້ສຶກແນວໃດຕອນທີ່ນັກສຶກສາເຂົ້າຮ່ວມປະຊຸມເທື່ອທຳອິດ ເລີ່ມອອກຄວາມຄິດເຫັນ ເວົ້າເລື່ອງຂອງພະເຢໂຫວາກັບຄົນອື່ນ ແລະໃນທີ່ສຸດລາວກໍຕັດສິນໃຈອຸທິດໂຕໃຫ້ພະເຢໂຫວາແລະຮັບບັບເຕມາ? ແນ່ນອນວ່າເຈົ້າຄືຊິດີໃຈຫຼາຍແທ້ໆ! ເຮົາຮູ້ວ່າພະເຢໂຫວາເປັນຜູ້ທີ່ຊ່ວຍນັກສຶກສາໃຫ້ກ້າວໜ້າ. ເຮົາຢາກຈະຍ້ອງຍໍພະເຢໂຫວາທີ່ເພິ່ນໄດ້ເຮັດແບບນັ້ນ.—1ກຣ. 3:5-9; 3ຢຮ. 3, 4
2. ພະເຢໂຫວາຢາກໃຫ້ນັກສຶກສາໄດ້ຮັບຫຍັງ? (1 ຕີໂມທຽວ 2:3, 4)
2 ພະເຢໂຫວາຕ້ອງການໃຫ້ “ຄົນທຸກປະເພດລອດແລະໄດ້ຮັບຄວາມຮູ້ທີ່ຖືກຕ້ອງເລື່ອງຄວາມຈິງ.” (ອ່ານ 1 ຕີໂມທຽວ 2:3, 4) ເພິ່ນຢາກໃຫ້ຄົນຮູ້ຈັກເພິ່ນແລະຮູ້ກ່ຽວກັບຄວາມຕ້ອງການຂອງເພິ່ນໃຫ້ຫຼາຍທີ່ສຸດເທົ່າທີ່ເປັນໄປໄດ້. (ຢຣມ. 9:24) ເພື່ອຈະເປັນແບບນັ້ນ ເຂົາເຈົ້າຕ້ອງໄດ້ຮັບຄວາມຮູ້ທີ່ຖືກຕ້ອງ. ຄຳພາສາດັ້ງເດີມທີ່ແປວ່າ “ຄວາມຮູ້ທີ່ຖືກຕ້ອງ” ບໍ່ໄດ້ໝາຍເຖິງແຕ່ຄວາມຈິງທີ່ຄົນໃດຄົນໜຶ່ງໄດ້ຮຽນຮູ້ເທົ່ານັ້ນ ແຕ່ນັກວິຊາການດ້ານຄຳພີໄບເບິນຜູ້ໜຶ່ງບອກວ່າມັນໝາຍເຖິງຄວາມຮູ້ທີ່ “ມີຜົນກະທົບຕໍ່ຊີວິດຂອງຄົນໃດຄົນໜຶ່ງຫຼາຍແທ້ໆ.” ເມື່ອນັກສຶກສາໄດ້ຮຽນຮູ້ກ່ຽວກັບພະເຢໂຫວາ ຄວາມຮູ້ນັ້ນຈະສົ່ງຜົນຕໍ່ຊີວິດຂອງລາວຫຼາຍຈົນເຮັດໃຫ້ລາວຢາກປ່ຽນແປງຊີວິດຂອງໂຕເອງ ແລະເປີດໂອກາດໃຫ້ລາວມີຄວາມຫວັງທີ່ຈະມີ “ຊີວິດຕະຫຼອດໄປ.”—ຢຮ. 17:3
3. ເຮົາຈະຮຽນຫຍັງໃນບົດນີ້?
3 ພະເຢໂຫວາໃຫ້ເຮົາມີສິດທິພິເສດຊ່ວຍຄົນອື່ນໃຫ້ຮູ້ຈັກເພິ່ນ. ໃນບົດນີ້ເຮົາຈະມາເບິ່ງວ່າເປັນຫຍັງນັກສຶກສາຕ້ອງຮູ້ຈັກພະເຢໂຫວາດີ? ເຮົາຈະສອນເຂົາເຈົ້າແນວໃດໃຫ້ຮູ້ວ່າພະເຢໂຫວາເປັນພະເຈົ້າແບບໃດ? ແລະເຮົາຈະຊ່ວຍເຂົາເຈົ້າໃຫ້ເອົາສິ່ງທີ່ໄດ້ຮຽນກ່ຽວກັບພະເຢໂຫວາໄປໃຊ້ໃນຊີວິດແນວໃດ?
ຊ່ວຍນັກສຶກສາໃຫ້ຮູ້ຈັກພະເຢໂຫວາດີ
4. ຕາມມາຣະໂກ 12:30 ຕອນທີ່ນຳການສຶກສາຄຳພີໄບເບິນ ເປົ້າໝາຍຫຼັກຂອງເຮົາແມ່ນຫຍັງ?
4 ພະເຢຊູບອກວ່າກົດໝາຍຂໍ້ທີ່ສຳຄັນທີ່ສຸດແມ່ນໃຫ້ຮັກພະເຢໂຫວາສຸດຫົວໃຈ ສຸດຊີວິດ ສຸດຄວາມຄິດ ແລະສຸດກຳລັງຂອງເຮົາ. (ອ່ານມາຣະໂກ 12:30) ເພື່ອນັກສຶກສາຈະຮັກພະເຢໂຫວາ ລາວຕ້ອງຮູ້ຈັກເພິ່ນ. ເຮົາຢາກໃຫ້ນັກສຶກສາຮັບບັບເຕມາຍ້ອນຮັກພະເຢໂຫວາ ບໍ່ແມ່ນຍ້ອນຢາກເປັນໝູ່ກັບເຮົາ ເປັນໝູ່ກັບພີ່ນ້ອງໃນປະຊາຄົມ ຫຼືມັກຄຳສອນໃນຄຳພີໄບເບິນຊື່ໆ. ສະນັ້ນ ຕອນທີ່ນຳການສຶກສາຄຳພີໄບເບິນ ເປົ້າໝາຍຫຼັກຂອງເຮົາແມ່ນຊ່ວຍນັກສຶກສາໃຫ້ຮູ້ຈັກແລະຮັກພະເຢໂຫວາ.
5. ຖ້ານັກສຶກສາຮັກພະເຢໂຫວາ ລາວຢາກຈະເຮັດຫຍັງ?
5 ຄວາມຮັກແລະການເຊື່ອຟັງກ່ຽວຂ້ອງກັນ. ຖ້ານັກສຶກສາຮູ້ຈັກແລະຮັກພະເຢໂຫວາ ລາວກໍຢາກຈະເຊື່ອຟັງເພິ່ນ. ພະເຢຊູເວົ້າວ່າ: “ຂ້ອຍກຳລັງເຮັດທຸກຢ່າງຕາມທີ່ພະເຈົ້າຜູ້ເປັນພໍ່ສັ່ງໄວ້ ເພື່ອໃຫ້ໂລກຮູ້ວ່າຂ້ອຍຮັກເພິ່ນ.” (ຢຮ. 14:31) ຄ້າຍຄືກັນ ຖ້ານັກສຶກສາຮັກພະເຢໂຫວາຫຼາຍກວ່າສິ່ງອື່ນ ລາວກໍຢາກຈະເຊື່ອຟັງແລະພັກດີຕໍ່ພະເຢໂຫວາ.—1ຢຮ. 5:3
6. ເມື່ອນັກສຶກສາຮູ້ຈັກພະເຢໂຫວາດີຈະຊ່ວຍລາວໃຫ້ຕັດສິນໃຈແນວໃດ? ຂໍໃຫ້ຍົກຕົວຢ່າງ.
6 ນັກສຶກສາທີ່ຮູ້ຈັກພະເຢໂຫວາດີມັກຈະຕັດສິນໃຈໄດ້ຢ່າງສະຫຼາດ. ໃຫ້ຄິດເຖິງຕົວຢ່າງນີ້: ຄົນທີ່ຢາກຂັບລົດໃຫຍ່ບໍ່ພຽງແຕ່ເບິ່ງຄົນອື່ນຂັບ ຮຽນທິດສະດີ ຫຼືເສັງເອົາໃບຂັບຂີ່ເທົ່ານັ້ນ ແຕ່ລາວຕ້ອງໄດ້ຝຶກຂັບລົດໂຕຈິງຫຼາຍໆເທື່ອແລະອາດຈະຫຼາຍຊົ່ວໂມງນຳ. ການຝຶກຂັບລົດໂຕຈິງຈະຊ່ວຍລາວໃຫ້ມີປະສົບການ ຮູ້ວິທີແກ້ໄຂແຕ່ລະສະຖານະການ ແລະຕັດສິນໃຈໄດ້ຢ່າງສະຫຼາດ. ຄ້າຍຄືກັນ ນັກສຶກສາຈະຮູ້ຈັກພະເຢໂຫວາໄດ້ບໍ່ແມ່ນແຕ່ໂດຍການຮຽນຄຳພີໄບເບິນເທົ່ານັ້ນ ແຕ່ໂດຍເບິ່ງວ່າຕອນທີ່ລາວຕັດສິນໃຈເລື່ອງຕ່າງໆຕາມຫຼັກການໃນຄຳພີໄບເບິນເປັນປະໂຫຍດຕໍ່ລາວແນວໃດນຳ. ເມື່ອນັກສຶກສາຮູ້ຈັກພະເຢໂຫວາຫຼາຍຂຶ້ນເລື້ອຍໆແລະເຫັນວ່າເພິ່ນໄດ້ຊ່ວຍລາວແນວໃດ ລາວກໍຈະຕັດສິນໃຈໄດ້ຢ່າງສະຫຼາດບໍ່ວ່າຈະເຈິກັບສະຖານະການແບບໃດໃນຊີວິດ.
7. ການທີ່ໂຢເຊັບຮູ້ຈັກພະເຢໂຫວາດີຊ່ວຍລາວໃຫ້ຕັດສິນໃຈຢ່າງສະຫຼາດໄດ້ແນວໃດ?
7 ໂຢເຊັບຮູ້ຈັກພະເຢໂຫວາດີແລະສິ່ງນີ້ຊ່ວຍລາວຕອນທີ່ເມຍຂອງໂປຕີຟາພະຍາຍາມຊວນລາວໃຫ້ນອນນຳ. ຕອນຍັງນ້ອຍ ໂຢເຊັບຄືຊິໄດ້ຍິນເລື່ອງຂອງອາດາມກັບເອວາ ແລະອັບຣາຮາມກັບຊາຣາ. (ປຖກ. 2:24; 20:3, 6) ເລື່ອງເຫຼົ່ານັ້ນສອນໂຢເຊັບວ່າພະເຢໂຫວາຄິດແນວໃດເລື່ອງການແຕ່ງດອງ ແລະຊ່ວຍລາວໃຫ້ຮູ້ວ່າເພດສຳພັນເປັນຂອງຂວັນຈາກພະເຢໂຫວາສຳລັບຄົນທີ່ແຕ່ງດອງກັນແລ້ວເທົ່ານັ້ນ. ຍ້ອນໂຢເຊັບຮູ້ຈັກພະເຢໂຫວາດີ ລາວຈຶ່ງກ້າປະຕິເສດເມຍຂອງໂປຕີຟາແລະເວົ້າວ່າ: “ຂ້ອຍຈະເຮັດຊົ່ວແບບນີ້ແລະເຮັດບາບຕໍ່ພະເຈົ້າບໍ່ໄດ້.” (ປຖກ. 39:7-9) ໂຢເຊັບຮູ້ວ່າອັນໃດທີ່ພະເຢໂຫວາເຫັນວ່າດີຫຼືບໍ່ດີ ແລະອັນໃດທີ່ເຮັດໃຫ້ເພິ່ນເສຍໃຈ. ຍ້ອນແນວນີ້ ລາວຈຶ່ງຕັດສິນໃຈໄດ້ຢ່າງຖືກຕ້ອງ. ຖ້າເຮົາຊ່ວຍນັກສຶກສາໃຫ້ຮູ້ຈັກພະເຢໂຫວາດີແລະຮູ້ວ່າເພິ່ນເປັນພະເຈົ້າແບບໃດ ເຂົາເຈົ້າກໍຈະຕັດສິນໃຈໃນແບບທີ່ເຮັດໃຫ້ເພິ່ນພໍໃຈ.
ສອນນັກສຶກສາໃຫ້ຮູ້ວ່າພະເຢໂຫວາເປັນພະເຈົ້າແບບໃດ
8. ເຈົ້າຈະໃຊ້ປຶ້ມຊີວິດທີ່ມີຄວາມສຸກຕະຫຼອດໄປ! ເພື່ອຊ່ວຍນັກສຶກສາໃຫ້ຮູ້ຈັກພະເຢໂຫວາໄດ້ແນວໃດ?
8 ເຈົ້າຈະສອນນັກສຶກສາແນວໃດໃຫ້ຮູ້ວ່າພະເຢໂຫວາເປັນພະເຈົ້າແບບໃດ? ພະເຢໂຫວາຊ່ວຍໂຢບໃຫ້ຮູ້ຈັກເພິ່ນໂດຍໃຊ້ຄຳຖາມຖາມລາວຫຼາຍກວ່າ 50 ຂໍ້. (ໂຢບ 38:1–41:34) ເຮົາກໍຮຽນແບບພະເຢໂຫວາໄດ້ໂດຍໃຊ້ຄຳຖາມທີ່ຢູ່ໃນປຶ້ມຊີວິດທີ່ມີຄວາມສຸກຕະຫຼອດໄປ! ເຊິ່ງຄຳຖາມເຫຼົ່ານີ້ຈະຊ່ວຍນັກສຶກສາໃຫ້ຮູ້ຈັກຄຸນລັກສະນະຕ່າງໆຂອງພະເຢໂຫວາຫຼາຍຂຶ້ນເລື້ອຍໆ. (ເບິ່ງຂອບ “ຄຳຖາມທີ່ຊ່ວຍໄດ້ຫຼາຍຕອນທີ່ສອນຄຳພີໄບເບິນ”) ສະນັ້ນຕອນທີ່ສຶກສາ ຂໍໃຫ້ໃຊ້ຄຳຖາມເຫຼົ່ານີ້ເພື່ອຊ່ວຍນັກສຶກສາໃຫ້ຮູ້ຈັກພະເຢໂຫວາ.
9-10. (ກ) ອັນໃດຈະຊ່ວຍນັກສຶກສາໃຫ້ໄດ້ຮັບປະໂຫຍດຫຼາຍທີ່ສຸດຈາກການອ່ານຄຳພີໄບເບິນ? (ຢາໂກໂບ 5:11) (ຂ) ຂໍໃຫ້ຍົກຕົວຢ່າງເລື່ອງໃນຄຳພີໄບເບິນທີ່ຈະຊ່ວຍນັກສຶກສາໃຫ້ຖາມໂຕເອງວ່າພະເຢໂຫວາມັກຫຍັງແລະບໍ່ມັກຫຍັງ.
9 ຕັ້ງແຕ່ໄລຍະທຳອິດທີ່ເຮົາສອນຄຳພີໄບເບິນໃຫ້ນັກສຶກສາ ເຮົາສາມາດກະຕຸ້ນເຂົາເຈົ້າໃຫ້ອ່ານຄຳພີໄບເບິນທຸກມື້ໄດ້.a ເຮົາຈະຊ່ວຍເຂົາເຈົ້າໃຫ້ໄດ້ຮັບປະໂຫຍດຫຼາຍທີ່ສຸດຈາກການອ່ານຄຳພີໄບເບິນໄດ້ແນວໃດ? ເຮົາອາດບອກເຂົາເຈົ້າວ່າແຕ່ລະເທື່ອທີ່ອ່ານຄຳພີໄບເບິນ ໃຫ້ຄິດເບິ່ງວ່າເປັນຫຍັງພະເຢໂຫວາຈຶ່ງໃຫ້ຂຽນເລື່ອງນີ້ ແລະເລື່ອງທີ່ອ່ານເຮັດໃຫ້ເຫັນຄຸນລັກສະນະຫຍັງແດ່ຂອງພະເຢໂຫວາ. ຢາໂກໂບໄດ້ເຮັດແບບນັ້ນຕອນທີ່ລາວເວົ້າເຖິງເລື່ອງຂອງໂຢບ. ລາວບໍ່ໄດ້ເວົ້າເຖິງແຕ່ວ່າໂຢບມີຄວາມອົດທົນເທົ່ານັ້ນ ແຕ່ລາວຍັງຊ່ວຍເຮົາໃຫ້ເຫັນຄຸນລັກສະນະຂອງພະເຢໂຫວານຳ ເຊັ່ນ: ຄວາມອີ່ຕົນແລະຄວາມເຫັນອົກເຫັນໃຈ.—ອ່ານຢາໂກໂບ 5:11
10 ເຮົາຢາກໃຫ້ນັກສຶກສາຮູ້ວ່າແຕ່ລະເລື່ອງທີ່ລາວອ່ານໃນຄຳພີໄບເບິນຊ່ວຍລາວໃຫ້ເຫັນແນວໃດວ່າພະເຢໂຫວາມັກຫຍັງແລະບໍ່ມັກຫຍັງ. ຕົວຢ່າງເຊັ່ນ: ນັກສຶກສາອາດບອກເຈົ້າວ່າລາວໄດ້ເບິ່ງສ່ວນ “ເລີ່ມອ່ານຄຳພີໄບເບິນ” ທີ່ຢູ່ໃນປຶ້ມຊີວິດທີ່ມີຄວາມສຸກຕະຫຼອດໄປ! ແລະບອກວ່າລາວເລືອກອ່ານເລື່ອງຂອງດານີເອນຕອນທີ່ຖືກຖິ້ມລົງໃນຂຸມທີ່ມີໂຕສິງ. ຄັນຊັ້ນ ເຈົ້າອາດແນະນຳລາວໃຫ້ຄິດເຖິງຄຳຖາມເຫຼົ່ານີ້: ‘ເປັນຫຍັງພະເຢໂຫວາຈຶ່ງຊ່ວຍດານີເອນ? ຈາກເລື່ອງນີ້ເຮັດໃຫ້ຂ້ອຍເຫັນແນວໃດວ່າອັນໃດເປັນສິ່ງທີ່ເຮັດໃຫ້ພະເຢໂຫວາດີໃຈ?’ (ດນອ. 6:10, 22) ນອກຈາກນັ້ນ ນັກສຶກສາອາດຖາມໂຕເອງວ່າ: ‘ເກີດຫຍັງຂຶ້ນກັບຄົນທີ່ຫາເລື່ອງດານີເອນ? ເລື່ອງນີ້ເຮັດໃຫ້ຂ້ອຍເຫັນແນວໃດວ່າອັນໃດເປັນສິ່ງທີ່ພະເຢໂຫວາບໍ່ມັກ? (ດນອ. 6:4, 5, 24) ສຸດທ້າຍ ເຈົ້າອາດບອກນັກສຶກສາໃຫ້ຄິດເບິ່ງວ່າລາວໄດ້ເຫັນຄຸນລັກສະນະຫຍັງອີກຂອງພະເຢໂຫວາຈາກເລື່ອງທີ່ລາວໄດ້ອ່ານ.—ດນອ. 6:26, 27
11. ເຮົາຈະຊ່ວຍນັກສຶກສາແນວໃດໃຫ້ເຫັນວ່າພະເຢໂຫວາເປັນຜູ້ທີ່ສອນລາວ?
11 ເຮົາມີຄວາມສຸກເມື່ອນັກສຶກສາເຫັນຄ່າທີ່ລາວໄດ້ຮັບປະໂຫຍດຈາກການຮຽນຄຳພີໄບເບິນ. ແຕ່ເຮົາຄວນຊ່ວຍລາວໃຫ້ເຫັນວ່າພະເຢໂຫວາຄູຜູ້ຍິ່ງໃຫຍ່ເປັນຜູ້ທີ່ຊ່ວຍລາວໃຫ້ໄດ້ຮັບປະໂຫຍດຈາກການຮຽນຄຳພີໄບເບິນ. (ອຊຢ. 30:20, 21) ນັກສຶກສາອາດຂອບໃຈເຮົາທີ່ສອນຄຳພີໄບເບິນໃຫ້ລາວແລະອາດເຖິງຂັ້ນຍ້ອງເຮົາວ່າສອນເກັ່ງ. ທີ່ຈິງ ການທີ່ລາວເວົ້າແບບນັ້ນກໍບໍ່ແມ່ນເລື່ອງຜິດ. ແຕ່ເຮົາຄວນໃຫ້ລາວຍ້ອງຍໍພະເຢໂຫວາແລະຂອບໃຈເພິ່ນດີກວ່າ.
ຊ່ວຍນັກສຶກສາໃຫ້ເອົາສິ່ງທີ່ໄດ້ຮຽນໄປໃຊ້
12-13. ການຮູ້ຈັກພະເຢໂຫວາດີຊ່ວຍນັກສຶກສາແນວໃດຕອນທີ່ລາວອ່ານເຈິເລື່ອງທີ່ເຂົ້າໃຈຍາກໃນຄຳພີໄບເບິນ? (ເບິ່ງຮູບນຳ)
12 ເພື່ອຈະໄດ້ຮັບປະໂຫຍດຢ່າງເຕັມທີຈາກຄວາມຮູ້ທີ່ຖືກຕ້ອງເລື່ອງພະເຢໂຫວາ ເຮົາຕ້ອງເອົາສິ່ງທີ່ໄດ້ຮຽນໄປໃຊ້. ແລ້ວເຮົາຈະຊ່ວຍນັກສຶກສາໃຫ້ເຮັດແບບນັ້ນໄດ້ແນວໃດ? ຢ່າງທຳອິດ ເມື່ອນັກສຶກສາອ່ານເລື່ອງໃດເລື່ອງໜຶ່ງໃນຄຳພີໄບເບິນແລ້ວຮູ້ສຶກວ່າເຂົ້າໃຈຍາກ ເຮົາຕ້ອງສອນລາວໃຫ້ຄິດເບິ່ງວ່າລາວຮູ້ຫຍັງແດ່ກ່ຽວກັບພະເຢໂຫວາ. ຕົວຢ່າງເຊັ່ນ: ຕອນທີ່ລາວອ່ານເລື່ອງການຕັດສິນຂອງພະເຢໂຫວາ ລາວອາດສົງໄສວ່າເປັນຫຍັງພະເຢໂຫວາຈຶ່ງຂ້າບາງຄົນແຕ່ບໍ່ໄດ້ຂ້າບາງຄົນ. ເຈົ້າຈະຊ່ວຍນັກສຶກສາໃຫ້ຄິດຫາເຫດຜົນກ່ຽວກັບເລື່ອງນີ້ແນວໃດ?
13 ເຈົ້າສາມາດຊ່ວຍນັກສຶກສາໃຫ້ຄິດຕຶກຕອງໃນສິ່ງທີ່ລາວໄດ້ຮຽນມາແລ້ວກ່ຽວກັບພະເຢໂຫວາ. ເຈົ້າອາດຊ່ວຍລາວໃຫ້ຖາມໂຕເອງວ່າ: ‘ພະເຢໂຫວາຖືວ່າຊີວິດຂອງຜູ້ຄົນມີຄ່າຫຼາຍສ່ຳໃດ?’ (2ປຕ. 3:9) ເພິ່ນໄດ້ເສຍສະລະຫຼາຍສ່ຳໃດເພື່ອຊ່ວຍຊີວິດເຮົາທັງໆທີ່ເຮົາເປັນຄົນບາບ? (ອຟຊ. 2:4, 5) ເພິ່ນລົງໂທດຄົນທີ່ບໍ່ສົມຄວນຖືກລົງໂທດບໍ? ແລະເພິ່ນປ່ອຍຄົນທີ່ສົມຄວນຖືກລົງໂທດໄປບໍ? (ອພຍ. 34:6, 7) ບາງເທື່ອຄຳພີໄບເບິນກໍບໍ່ໄດ້ໃຫ້ລາຍລະອຽດຫຍັງຫຼາຍກ່ຽວກັບການຕັດສິນໃຈຂອງພະເຢໂຫວາ ແຕ່ເຮົາກໍບໍ່ຈຳເປັນຕ້ອງຮູ້ລາຍລະອຽດເຫຼົ່ານັ້ນຍ້ອນເຮົາຮູ້ຈັກພະເຢໂຫວາພະເຈົ້າຂອງເຮົາດີແລະໝັ້ນໃຈວ່າເພິ່ນເຮັດສິ່ງທີ່ຖືກຕ້ອງສະເໝີ.
ເມື່ອນັກສຶກສາອ່ານເລື່ອງໃດເລື່ອງໜຶ່ງໃນຄຳພີໄບເບິນແລ້ວຮູ້ສຶກວ່າເຂົ້າໃຈຍາກ ເຮົາຕ້ອງສອນລາວໃຫ້ຄິດເບິ່ງວ່າລາວຮູ້ຫຍັງແດ່ກ່ຽວກັບພະເຢໂຫວາ (ເບິ່ງຂໍ້ 12-13)
14. ເຈົ້າຈະຊ່ວຍນັກສຶກສາແນວໃດຖ້າລາວຮູ້ສຶກວ່າເຂົ້າກັບພີ່ນ້ອງບາງຄົນໃນປະຊາຄົມບໍ່ຄ່ອຍໄດ້?
14 ໃຫ້ເຮົາມາເບິ່ງຢ່າງທີ 2 ທີ່ຈະຊ່ວຍນັກສຶກສາໃຫ້ເອົາຄວາມຮູ້ກ່ຽວກັບພະເຢໂຫວາໄປໃຊ້. ສົມມຸດວ່າຕອນນີ້ນັກສຶກສາຂອງເຈົ້າເຂົ້າຮ່ວມການປະຊຸມແລ້ວ ແຕ່ລາວຮູ້ສຶກວ່າເຂົ້າກັບພີ່ນ້ອງບາງຄົນໃນປະຊາຄົມບໍ່ຄ່ອຍໄດ້. ອາດເປັນໄດ້ວ່າພີ່ນ້ອງຄົນນັ້ນເຮັດໃຫ້ລາວຮູ້ສຶກບໍ່ສະບາຍໃຈ. ຖ້າເປັນແບບນັ້ນ ໃຫ້ເຈົ້າຊ່ວຍລາວຄິດເບິ່ງວ່າ ພະເຢໂຫວາເບິ່ງພີ່ນ້ອງແຕ່ລະຄົນແນວໃດ? ເພິ່ນໄດ້ເສຍສະລະຫຍັງທີ່ສະແດງວ່າເພິ່ນຮັກຜູ້ຮັບໃຊ້ຂອງເພິ່ນ? (ຢຮ. 3:16) ພະເຢໂຫວາຖືວ່າຄວາມເປັນນ້ຳໜຶ່ງໃຈດຽວກັນໃນປະຊາຄົມສຳຄັນຫຼາຍສ່ຳໃດ? (ພສ. 133:1) ເພິ່ນຮູ້ສຶກແນວໃດຖ້າເຮົາພະຍາຍາມຮັກສາຄວາມເປັນນ້ຳໜຶ່ງໃຈດຽວກັນ? (2ກຣ. 13:11) ໃຫ້ເຈົ້າຊ່ວຍນັກສຶກສາໃຫ້ເຫັນວ່າພະເຢໂຫວາຈະດີໃຈຫຼາຍເມື່ອເຮົາເບິ່ງແຕ່ຈຸດທີ່ດີຂອງພີ່ນ້ອງແທນທີ່ຈະເບິ່ງຈຸດເສຍຂອງເຂົາເຈົ້າ.
15-16. (ກ) ເມື່ອນັກສຶກສາຕ້ອງຕັດສິນໃຈເລື່ອງທີ່ສຳຄັນ ລາວຈະຮຽນແບບພະເຢຊູໄດ້ແນວໃດ? (ໂຢຮັນ 8:29) (ຂ) ມາຣີອານຊ່ວຍນັກສຶກສາແນວໃດໃຫ້ຕັດສິນໃຈໄດ້ດີ? (ເບິ່ງຮູບນຳ)
15 ຢ່າງທີ 3 ເຈົ້າສາມາດຊ່ວຍນັກສຶກສາໃຫ້ເອົາຄວາມຮູ້ກ່ຽວກັບພະເຢໂຫວາໄປໃຊ້ເພື່ອຈະຕັດສິນໃຈໄດ້ດີ. ເຈົ້າອາດໃຫ້ລາວເບິ່ງປຶ້ມຊີວິດທີ່ມີຄວາມສຸກຕະຫຼອດໄປ! ໃນບົດທີ 35 ເລື່ອງ “ເຮັດແນວໃດຈຶ່ງຈະຕັດສິນໃຈໄດ້ດີ?” ແລ້ວເຈົ້າຈະເຮັດແນວໃດຖ້ານັກສຶກສາໄດ້ອະທິດຖານແລະຄົ້ນຄວ້າກ່ຽວກັບເລື່ອງນັ້ນແລ້ວ ແຕ່ຍັງບໍ່ຮູ້ວ່າຈະຕັດສິນໃຈແນວໃດ? ລາວອາດຮູ້ສຶກວ່າມີຫຼັກການກ່ຽວກັບເລື່ອງນັ້ນຫຼາຍໂພດ ແລະບໍ່ຮູ້ວ່າຈະໃຊ້ຫຼັກການໃດດີກັບສະຖານະການຂອງໂຕເອງ. ຖ້າເປັນແບບນັ້ນ ເຈົ້າອາດແນະນຳລາວໃຫ້ຄິດເຖິງຕົວຢ່າງຂອງພະເຢຊູ. ແລ້ວພະເຢຊູຕັດສິນໃຈເລື່ອງຕ່າງໆແນວໃດ? ເພິ່ນຕັດສິນໃຈໂດຍ “ເຮັດສິ່ງທີ່ [ພໍ່ຂອງເພິ່ນ] ພໍໃຈສະເໝີ.” (ອ່ານໂຢຮັນ 8:29) ຈາກນັ້ນກະຕຸ້ນນັກສຶກສາໃຫ້ຖາມໂຕເອງວ່າ: ‘ຈາກຂໍ້ມູນທີ່ຂ້ອຍຄົ້ນຄວ້າແລະຈາກສິ່ງທີ່ຂ້ອຍໄດ້ຮຽນກ່ຽວກັບພະເຢໂຫວາ ຂ້ອຍຄວນຕັດສິນໃຈແນວໃດເພື່ອເຮັດໃຫ້ເພິ່ນພໍໃຈ?’ ການຕັດສິນໃຈທີ່ດີທີ່ສຸດແມ່ນການຕັດສິນໃຈທີ່ເຮັດໃຫ້ພະເຢໂຫວາພໍໃຈ.
16 ຜູ້ຍິງຄົນໜຶ່ງຢູ່ປະເທດຊີລີທີ່ກຳລັງຮຽນຄຳພີໄບເບິນຕ້ອງຕັດສິນໃຈເລື່ອງທີ່ສຳຄັນ. ລາວຖືກກົດດັນຈາກຄອບຄົວໃຫ້ເຮັດວຽກທີ່ມີລາຍໄດ້ສູງ ແຕ່ວຽກນີ້ຈະເຮັດໃຫ້ລາວໄປປະຊຸມເປັນປະຈຳບໍ່ໄດ້. ມາຣີອານຜູ້ທີ່ສອນຄຳພີໄບເບິນໃຫ້ລາວເລົ່າວ່າ: “ຂ້ອຍບອກລາວໃຫ້ຄິດເບິ່ງວ່າການຕັດສິນໃຈຂອງລາວຈະເຮັດໃຫ້ພະເຢໂຫວາຮູ້ສຶກແນວໃດ? ເພິ່ນຈະດີໃຈຫຼືເສຍໃຈ? ຂ້ອຍຍັງບອກລາວໃຫ້ອະທິດຖານກ່ຽວກັບເລື່ອງນີ້ແບບເຈາະຈົງແລະສັງເກດເບິ່ງວ່າພະເຢໂຫວາຈະຕອບແນວໃດ. ໃນທີ່ສຸດ ນັກສຶກສາຄົນນີ້ກໍປະຕິເສດວຽກນັ້ນ ແລະຕໍ່ມາບໍ່ດົນລາວກໍໄດ້ວຽກທີ່ເຮັດໃຫ້ລາວໄປປະຊຸມໄດ້. ມາຣີອານບໍ່ໄດ້ບອກນັກສຶກສາວ່າຄວນເຮັດຫຍັງ ແຕ່ລາວຊ່ວຍນັກສຶກສາໃຫ້ຄິດຕຶກຕອງເລື່ອງທີ່ໄດ້ຮຽນຮູ້ກ່ຽວກັບພະເຢໂຫວາມາແລ້ວ. ຜົນກໍຄື ນັກສຶກສາບໍ່ພຽງແຕ່ສະໜິດກັບມາຣີອານຫຼາຍຂຶ້ນເທົ່ານັ້ນ ແຕ່ຍັງສະໜິດກັບພະເຢໂຫວາຫຼາຍຂຶ້ນນຳ. ມາຣີອານເລົ່າວ່າ: “ນັກສຶກສາຂອງຂ້ອຍໄດ້ຮຽນວ່າພະເຢໂຫວາຈະເບິ່ງແຍງເຮົາ ຖ້າເຮົາໃຫ້ການນະມັດສະການເພິ່ນເປັນສິ່ງສຳຄັນທີ່ສຸດໃນຊີວິດ.”
ຊ່ວຍນັກສຶກສາຂອງເຈົ້າໃຫ້ຮຽນຮູ້ທີ່ຈະຕັດສິນໃຈໃນແບບທີ່ເຮັດໃຫ້ພະເຢໂຫວາພໍໃຈ (ເບິ່ງຂໍ້ 15-16)b
ພະເຢໂຫວາຈະອວຍພອນຄົນທີ່ຮູ້ຈັກເພິ່ນດີ
17. ນອກຈາກຮູ້ຄວາມຈິງເລື່ອງຕ່າງໆແລ້ວ ເຮົາຢາກໃຫ້ນັກສຶກສາຮູ້ຫຍັງນຳ?
17 ຕອນທີ່ນັກສຶກສາຮຽນຄຳພີໄບເບິນກັບເຮົາ ເຂົາເຈົ້າໄດ້ຮຽນຄຳສອນທີ່ສຳຄັນຫຼາຍເລື່ອງ. ເຂົາເຈົ້າໄດ້ຮຽນຄຳສອນພື້ນຖານໃນຄຳພີໄບເບິນ ເຊັ່ນ: ຕາຍແລ້ວເປັນແນວໃດ? ເປັນຫຍັງພະເຢຊູຈຶ່ງມາຕາຍເພື່ອເຮົາ? ແລະການປົກຄອງຂອງພະເຈົ້າຈະເຮັດຫຍັງໃນອະນາຄົດ? ນອກຈາກນັ້ນ ເຂົາເຈົ້າຍັງໄດ້ຮຽນກ່ຽວກັບອົງການຂອງພະເຢໂຫວາເລື່ອງການປະຊຸມຕ່າງໆການຈັດໃຫ້ມີຜູ້ເບິ່ງແຍງ ແລະໜ້າທີ່ຂອງຄະນະກຳມະການປົກຄອງ. ແຕ່ເຮົາບໍ່ໄດ້ຢາກໃຫ້ນັກສຶກສາຮູ້ແຕ່ຄວາມຈິງເຫຼົ່ານີ້ເທົ່ານັ້ນ ເຮົາຢາກໃຫ້ເຂົາເຈົ້າຮູ້ຈັກພະເຢໂຫວາດີນຳ.
18. ຄົນທີ່ຮູ້ຈັກພະເຢໂຫວາຈະໄດ້ຮັບພອນຫຍັງແດ່?
18 ເປັນສິດທິພິເສດຫຼາຍແທ້ໆທີ່ເຮົາໄດ້ສອນຄົນອື່ນໃຫ້ຮູ້ຈັກພະເຢໂຫວາ. ຄົນທີ່ຮູ້ຈັກແລະນະມັດສະການເພິ່ນສາມາດມີຊີວິດທີ່ມີຄວາມສຸກໄດ້ຕັ້ງແຕ່ຕອນນີ້. (ພສ. 25:12-15) ໃນອະນາຄົດ ທຸກຄົນທີ່ “ຮູ້ຈັກພະເຈົ້າທ່ຽງແທ້” ຈະມີຊີວິດທີ່ມີຄວາມສຸກຕະຫຼອດໄປ. (1ຢຮ. 5:20) ບໍ່ພຽງແຕ່ເທົ່ານັ້ນ ຄຳພີໄບເບິນບອກເຮົາວ່າຄົນທີ່ພະຍາຍາມຮູ້ຈັກແລະຮັກພະເຢໂຫວາ “ເພິ່ນກໍຮູ້ຈັກຜູ້ນັ້ນ” ຄືກັນ. (1ກຣ. 8:3) ພະເຈົ້າຜູ້ມີລິດເດດສູງສຸດສັງເກດເບິ່ງເຮົາແລະຖືວ່າເຮົາເປັນໝູ່ຂອງເພິ່ນ. ເປັນເລື່ອງທີ່ດີຫຼາຍແທ້ໆທີ່ເຮົາໄດ້ຮູ້ຈັກພະເຢໂຫວາພະເຈົ້າທ່ຽງແທ້ອົງດຽວ!
ເພງທີ 84 ຮັບໃຊ້ໃຫ້ຫຼາຍຂຶ້ນ
a ໃນສ່ວນສິ່ງທີ່ເຈົ້າເຮັດໄດ້ຂອງບົດທີ 5 ໃນປຶ້ມຊີວິດທີ່ມີຄວາມສຸກຕະຫຼອດໄປ! ກະຕຸ້ນນັກສຶກສາໃຫ້ “ເລີ່ມຕົ້ນອ່ານຄຳພີໄບເບິນເປັນປະຈຳ ໂດຍເບິ່ງຢູ່ຫົວຂໍ້ ‘ເລີ່ມອ່ານຄຳພີໄບເບິນ.’ ”
b ຄຳອະທິບາຍຮູບ: ການຈຳລອງເຫດການຈິງເລື່ອງຂອງນັກສຶກສາຂອງມາຣີອານທີ່ປະຕິເສດຂໍ້ສະເໜີກ່ຽວກັບວຽກ.