ອັນ​ໃດ​ຈະ​ຊ່ວຍ​ເຮົາ​ໃຫ້​ຕັດສິນໃຈ​ໄດ້​ດີ​ວ່າ​ຈະ​ຮຽນ​ຕໍ່​ຫຼື​ບໍ່?

1-2. (ກ) ໄວລຸ້ນ​ອາດ​ຕ້ອງ​ໄດ້​ຕັດສິນໃຈ​ເລື່ອງ​ຫຍັງ? (ຂ) “ການ​ຮຽນ​ຕໍ່” ໝາຍ​ຄວາມ​ວ່າ​ແນວ​ໃດ? (ເບິ່ງ “ການ​ອະທິບາຍ​ຄຳສັບ”)

ເດັກນ້ອຍ​ແລະ​ໄວລຸ້ນ​ຫຼາຍ​ຄົນ​ມັກ​ຈະ​ຖືກ​ຖາມ​ເລື້ອຍໆ​ວ່າ “ໃຫຍ່​ມາ​ເຈົ້າ​ຢາກ​ເຮັດ​ວຽກ​ຫຍັງ?” ແນ່ນອນ​ວ່າ​ວຽກ​ທີ່​ດີ​ທີ່​ສຸດ​ແມ່ນ​ວຽກ​ຮັບໃຊ້​ພະ​ເຢໂຫວາ​ເຕັມ​ເວລາ. ແຕ່​ເຈົ້າ​ກໍ​ຕ້ອງ​ຫາ​ເງິນ​ເພື່ອ​ລ້ຽງ​ໂຕເອງ​ນຳ. (2ທຊ. 3:10) ເຈົ້າ​ອາດ​ຈະ​ເຄີຍ​ຄິດ​ໄວ້​ແລ້ວ​ວ່າ​ເຈົ້າ​ຈະ​ເຮັດ​ວຽກ​ອາຊີບ​ຫຍັງ​ໃນ​ອະນາຄົດ.

² ຫຼັງ​ຈາກ​ທີ່​ໄດ້​ລົມ​ກັບ​ພໍ່​ແມ່​ວ່າ​ໃຫຍ່​ມາ​ຢາກ​ເຮັດ​ວຽກ​ຫຍັງ ໄວລຸ້ນ​ຫຼາຍ​ຄົນ​ຕັດສິນໃຈ​ວ່າ​ຈະ​ຮຽນ​ຕໍ່​ເມື່ອ​ຈົບ​ການ​ສຶກສາ​ຂັ້ນ​ພື້ນຖານ​ຕາມ​ທີ່​ລັດຖະບານ​ກຳນົດ​ໄວ້​ໃນ​ປະເທດ​ທີ່​ເຂົາເຈົ້າ​ຢູ່.a ເຈົ້າ​ອາດ​ສົງໄສ​ວ່າ​ຈະ​ຮຽນ​ຕໍ່​ຫຼື​ບໍ່. ຖ້າ​ຮຽນ ຈະ​ຮຽນ​ຫຍັງ? ໃນ​ບົດ​ນີ້​ເຮົາ​ຈະ​ເບິ່ງ​ຫຼັກການ​ໃນ​ຄຳພີ​ໄບເບິນ​ເຊິ່ງ​ຈະ​ຊ່ວຍ​ໃຫ້​ຕັດສິນໃຈ​ໄດ້​ດີ​ເລື່ອງ​ການ​ຮຽນ​ຕໍ່. ເຖິງ​ວ່າ​ໃນ​ບົດ​ນີ້​ຈະ​ເປັນ​ຄຳ​ແນະນຳ​ສຳລັບ​ໄວລຸ້ນ ແຕ່​ພີ່ນ້ອງ​ທຸກ​ຄົນ​ທີ່​ກຳລັງ​ຄິດ​ຈະ​ຮຽນ​ຕໍ່​ກໍ​ໄດ້​ຮັບ​ປະໂຫຍດ​ຄື​ກັນ. ນອກ​ຈາກ​ນັ້ນ ຫຼັກການ​ເຫຼົ່າ​ນີ້​ຍັງ​ສາມາດ​ຊ່ວຍ​ພໍ່​ແມ່​ໃຫ້​ຊ່ວຍ​ລູກ​ຂອງ​ເຂົາເຈົ້າ​ໃຫ້​ຕັດສິນໃຈ​ໄດ້​ດີ.

ເຈົ້າ​ຄວນ​ຮຽນ​ຕໍ່​ບໍ?

3. ເປັນ​ຫຍັງ​ພະຍານ​ພະ​ເຢໂຫວາ​ບາງ​ຄົນ​ອາດ​ຕັດສິນໃຈ​ຮຽນ​ຕໍ່?

³ ໃນ​ບາງ​ປະເທດ ຄົນ​ທີ່​ຮຽນ​ຈົບ​ຂັ້ນ​ພື້ນຖານ​ກໍ​ສາມາດ​ຊອກ​ວຽກ​ເຮັດ​ໄດ້​ແລ້ວ. ແຕ່​ບາງ​ປະເທດ ຖ້າ​ຢາກ​ຊອກ​ວຽກ​ທີ່​ມີ​ລາຍ​ໄດ້​ດີ​ແລະ​ເຮັດ​ວຽກ​ບໍ່​ໜັກ​ເກີນ​ໄປ​ອາດ​ຕ້ອງ​ໄດ້​ຮຽນ​ສູງ​ກວ່າ​ນັ້ນ. ສຳລັບ​ພະຍານ​ພະ​ເຢໂຫວາ ນີ້​ອາດ​ຊ່ວຍ​ລາວ​ໃຫ້​ມີ​ເວລາ​ເຮັດ​ວຽກ​ປະກາດ​ຫຼາຍ​ຂຶ້ນ ເປັນ​ໄພໂອເນຍ ຫຼື​ຮັບໃຊ້​ຮູບ​ແບບ​ອື່ນໆ​ໄດ້. ແຕ່​ຄົນ​ທີ່​ເລືອກ​ຮຽນ​ຕໍ່​ຈະ​ຕ້ອງ​ໄດ້​ສະລະ​ບາງ​ສິ່ງ ເຊັ່ນ: ເວລາ ກຳລັງ ແລະ​ເງິນ ລວມ​ທັງ​ອາດ​ຈະ​ຕ້ອງ​ເຈິ​ກັບ​ຂໍ້​ທ້າທາຍ​ຫຼາຍ​ຢ່າງ.

4. ໃຜ​ຄວນ​ເປັນ​ຄົນ​ຕັດສິນໃຈ​ໃຫ້​ເຮົາ​ວ່າ​ຈະ​ຮຽນ​ຕໍ່​ຫຼື​ບໍ່? (ເບິ່ງ​ໄຂເງື່ອນ​ນຳ)

⁴ ຄຳພີ​ໄບເບິນ​ບອກ​ວ່າ​ເຮົາ​ແຕ່​ລະ​ຄົນ​ຕ້ອງ “ແບກ​ຄວາມ​ຮັບ​ຜິດ​ຊອບ​ຂອງ​ໂຕເອງ.” (ຄລຕ. 6:5) ສະນັ້ນ ພະຍານ​ພະ​ເຢໂຫວາ​ທີ່​ໃຫຍ່​ແລ້ວ​ຈະ​ຕ້ອງ​ຕັດສິນໃຈ​ດ້ວຍ​ໂຕເອງ​ວ່າ​ຈະ​ຮຽນ​ຕໍ່​ຫຼື​ບໍ່.b ແຕ່​ສຳລັບ​ລູກ​ທີ່​ຍັງ​ເປັນ​ເດັກນ້ອຍ ພໍ່​ແມ່​ມີ​ໜ້າທີ່​ຮັບ​ຜິດ​ຊອບ​ໃນ​ການ​ຕັດສິນໃຈ​ເລື່ອງ​ການ​ຮຽນ​ຂອງ​ລູກ. (ອຟຊ. 6:1) ຄຳ​ແນະນຳ​ຂອງ​ພໍ່​ແມ່​ຈະ​ຊ່ວຍ​ກຽມ​ລູກ​ໃຫ້​ຕັດສິນໃຈ​ຢ່າງ​ສະຫຼາດ​ໃນ​ເລື່ອງ​ການ​ຮຽນ​ຕໍ່​ເມື່ອ​ເຂົາເຈົ້າ​ໃຫຍ່​ຂຶ້ນ.—ສພສ. 22:6

5. ຕອນ​ໃດ​ທີ່​ໄວລຸ້ນ​ຄວນ​ເລີ່ມ​ຄິດ​ເລື່ອງ​ການ​ຮຽນ​ຕໍ່ ແລະ​ຍ້ອນຫຍັງ? (ເບິ່ງ​ຮູບ​ໜ້າ​ປົກ​ນຳ)

⁵ ໄວລຸ້ນ​ມັກ​ຈະ​ຕ້ອງ​ໄດ້​ຕັດສິນໃຈ​ວ່າ​ເຂົາເຈົ້າ​ຈະ​ຮຽນ​ຕໍ່​ຫຼື​ບໍ່​ກ່ອນ​ທີ່​ເຂົາເຈົ້າ​ຈະ​ຮຽນ​ຈົບ​ຂັ້ນ​ພື້ນຖານ. ແນ່ນອນ​ວ່າ​ເປັນ​ເລື່ອງ​ດີ​ທີ່​ໄວລຸ້ນ​ຈະ​ລົມ​ກັບ​ພໍ່​ແມ່​ກ່ອນ​ທີ່​ເຂົາເຈົ້າ​ຈະ​ຕັດສິນໃຈ. ການ​ເຮັດ​ແນວ​ນີ້​ຈະ​ຊ່ວຍ​ໃຫ້​ເຂົາເຈົ້າ​ມີ​ເວລາ​ຄົ້ນຄວ້າ​ນຳ​ກັນ​ແລະ​ເບິ່ງ​ວ່າ​ມີ​ທາງ​ເລືອກ​ຫຍັງ​ແດ່. ພໍ່​ແມ່​ອາດ​ເຫັນ​ວ່າ​ລູກ​ສາມາດ​ເລືອກ​ຮຽນ​ທັກສະ​ໃດ​ທັກສະ​ໜຶ່ງ​ເພື່ອ​ຈະ​ຊ່ວຍ​ລູກ​ໃຫ້​ຫາ​ວຽກ​ເຮັດ​ໄດ້​ຫຼື​ກຽມ​ລູກ​ເພື່ອ​ຮຽນ​ຕໍ່​ໄດ້. ເຂົາເຈົ້າ​ຈຳເປັນ​ຕ້ອງ​ຕັດສິນໃຈ​ກ່ອນ​ທີ່​ລູກ​ຈະ​ຮຽນ​ຈົບ​ບໍ? ບໍ່​ແມ່ນ​ແບບ​ນັ້ນ​ສະເໝີ​ໄປ. (ສພສ. 21:5) ໄວລຸ້ນ​ບາງ​ຄົນ​ຕັດສິນໃຈ​ວ່າ​ຈະ​ຮຽນ​ຕໍ່​ຫຼື​ບໍ່​ແມ່ນ​ຕອນ​ທີ່​ເຂົາເຈົ້າ​ຮຽນ​ຈົບ​ແລ້ວ ຕອນ​ຊອກ​ວຽກ ແລະ​ຕອນ​ເລີ່ມ​ເປັນ​ໄພໂອເນຍ. ບາງ​ຄົນ​ອາດ​ເຖິງຂັ້ນ​ຕັດສິນໃຈ​ກ່ຽວກັບ​ເລື່ອງ​ນີ້​ຫຼັງ​ຈາກ​ຜ່ານ​ໄປ​ໄດ້​ໄລຍະ​ໜຶ່ງ.

6. ອັນ​ໃດ​ຈະ​ຊ່ວຍ​ເຈົ້າ​ໃຫ້​ຕັດສິນໃຈ​ໄດ້​ດີ​ກ່ຽວກັບ​ການ​ຮຽນ​ຕໍ່?

⁶ ອັນ​ໃດ​ຈະ​ຊ່ວຍ​ເຈົ້າ​ໃຫ້​ຕັດສິນໃຈ​ໄດ້​ດີ​ກ່ຽວກັບ​ການ​ຮຽນ​ຕໍ່? ໃຫ້​ອະທິດຖານ​ກ່ຽວກັບ​ເລື່ອງ​ນີ້. (ຢກບ. 1:5) ນອກ​ຈາກ​ນັ້ນ ໃຫ້​ຄິດ​ເຖິງ 2 ຢ່າງ​ຕໍ່​ໄປ​ນີ້: ຢ່າງ​ທຳອິດ ໃຫ້​ຄິດ​ດີໆ​ວ່າ​ແຮງ​ກະຕຸ້ນ​ຂອງ​ເຈົ້າ​ແມ່ນ​ຫຍັງ. (ພສ. 26:2) ຢ່າງ​ທີ​ສອງ ໃຫ້​ຄິດ​ເບິ່ງ​ຄັກໆ​ວ່າ​ການ​ຮຽນ​ຕໍ່​ມີ​ຂໍ້​ດີ​ຂໍ້​ເສຍ​ແນວ​ໃດ. (ສພສ. 14:15) ໃຫ້​ເຮົາ​ມາ​ເບິ່ງ​ແຕ່​ລະ​ຢ່າງ​ນຳ​ກັນ.

ຄິດ​ດີໆ​ກ່ຽວກັບ​ແຮງ​ກະຕຸ້ນ​ຂອງ​ເຈົ້າ

7. ຖ້າ​ເຈົ້າ​ຄິດ​ທີ່​ຈະ​ຮຽນ​ຕໍ່ ເຈົ້າ​ຄວນ​ຄິດ​ເຖິງ​ຫຍັງ?

⁷ ຖ້າ​ເຈົ້າ​ຄິດ​ທີ່​ຈະ​ຮຽນ​ຕໍ່ ຄຳ​ຖາມ​ໜຶ່ງ​ທີ່​ສຳຄັນ​ທີ່​ເຈົ້າ​ຄວນ​ຖາມ​ໂຕເອງ​ແມ່ນ ‘ເປັນ​ຫຍັງ​ຂ້ອຍ​ຈຶ່ງ​ຢາກ​ຮຽນ​ຕໍ່​ໃນ​ດ້ານ​ນີ້?’ ຫຼາຍ​ຄົນ​ຮຽນ​ຕໍ່​ຍ້ອນ​ເຂົາເຈົ້າ​ຢາກ​ເຮັດ​ວຽກ​ທີ່​ໂຕເອງ​ມັກ​ຫຼື​ເຮັດ​ວຽກ​ທີ່​ໄດ້​ເງິນ​ດີ. ການ​ມີ​ແຮງ​ກະຕຸ້ນ​ແບບ​ນີ້​ຜິດ​ບໍ່? ບໍ່​ແມ່ນ​ແບບ​ນັ້ນ​ສະເໝີ​ໄປ. (1ຕມ. 5:8) ແຕ່​ຄຳພີ​ໄບເບິນ​ເຕືອນ​ເຮົາ​ໃຫ້​ຮູ້​ເຖິງ​ອັນຕະລາຍ​ຂອງ​ການ​ເປັນ​ຄົນ​ຮັກ​ເງິນ​ຫຼື​ຄິດ​ວ່າ​ມີ​ແຕ່​ເງິນ​ເທົ່າ​ນັ້ນ​ທີ່​ຈະ​ປົກປ້ອງ​ເຮົາ​ໄດ້. (ສພສ. 23:4, 5; 1ຕມ. 6:8-10; 1ຢຮ. 2:17) ຖ້າ​ເຈົ້າ​ຢາກ​ຮຽນ​ຕໍ່​ຍ້ອນ​ຢາກ​ເປັນ​ຄົນ​ລວຍ​ຫຼື​ຢາກ​ມີ​ຊື່​ສຽງ ເຈົ້າ​ກໍ​ຈະ​ບໍ່​ມີ​ຄວາມ​ສຸກ​ແລະ​ອາດ​ເຖິງຂັ້ນ​ເຫີນ​ຫ່າງ​ຈາກ​ພະ​ເຢໂຫວາ.

8-9. (ກ) ເຮົາ​ຄວນ​ເບິ່ງ​ການ​ຮຽນ​ຕໍ່​ແນວ​ໃດ? (ມັດທາຍ 6:33) (ຂ) ເຮົາ​ຮຽນ​ຫຍັງ​ໄດ້​ຈາກ​ຄຳເວົ້າ​ຂອງ​ພີ່ນ້ອງ​ໂຮເຊຟີນ້າ ໂມຣີນ ແລະ​ໄອຣິດສ໌?

⁸ ຄັນຊັ້ນ ເຈົ້າ​ຄວນ​ເບິ່ງ​ການ​ຮຽນ​ຕໍ່​ແນວ​ໃດ? ບໍ່​ຄວນ​ໃຫ້​ຫຍັງ​ມາ​ສຳຄັນ​ກວ່າ​ການ​ຮັບໃຊ້​ພະ​ເຢໂຫວາ. (ມທ. 22:37, 38; ຟລປ. 3:8) ສະນັ້ນ ໃຫ້​ເບິ່ງ​ວ່າ​ການ​ຮຽນ​ຕໍ່​ເປັນ​ສິ່ງ​ທີ່​ຈະ​ຊ່ວຍ​ເຈົ້າ​ໃຫ້​ຫາ​ລ້ຽງ​ໂຕເອງ​ເພື່ອ​ເຈົ້າ​ຈະ​ຮັບໃຊ້​ພະ​ເຢໂຫວາ​ສຸດ​ຫົວໃຈ​ໄດ້.—ອ່ານ​ມັດທາຍ 6:33

⁹ ໃຫ້​ເຮົາ​ມາ​ເບິ່ງ​ວ່າ​ອັນ​ໃດ​ຊ່ວຍ​ພະຍານ​ພະ​ເຢໂຫວາ​ບາງ​ຄົນ​ໃຫ້​ເບິ່ງ​ການ​ຮຽນ​ຕໍ່​ໃນ​ແບບ​ທີ່​ເໝາະສົມ. ໂຮເຊຟີນ້າ​ຈາກ​ປະເທດ​ຊີລີ​ເວົ້າ​ວ່າ: “ການ​ຮຽນ​ຕໍ່​ເປັນ​ສິ່ງ​ທີ່​ຊ່ວຍ​ໃຫ້​ຂ້ອຍ​ຮັບໃຊ້​ພະ​ເຢໂຫວາ​ໃຫ້​ຫຼາຍ​ທີ່​ສຸດ​ເທົ່າ​ທີ່​ເປັນ​ໄປ​ໄດ້. ແຕ່​ມັນ​ກໍ​ບໍ່​ແມ່ນ​ສິ່ງ​ທີ່​ສຳຄັນ​ທີ່​ສຸດ ສິ່ງ​ທີ່​ສຳຄັນ​ທີ່​ສຸດ​ສຳລັບ​ຂ້ອຍ​ແມ່ນ​ພະ​ເຢໂຫວາ.” ພີ່ນ້ອງ​ຍິງ​ທີ່​ຊື່​ໂມຣີນ​ເລືອກ​ຮຽນ​ເສີມ​ສວຍ​ໃນ​ຫຼັກ​ສູດ 1 ປີ. ຍ້ອນຫຍັງ? ລາວ​ເວົ້າ​ວ່າ: “ເປົ້າໝາຍ​ຂອງ​ຂ້ອຍ​ແມ່ນ​ເພື່ອ​ຮັບໃຊ້​ພະ​ເຢໂຫວາ​ໃນ​ເຂດ​ທີ່​ມີ​ຄວາມ​ຈຳເປັນ​ຫຼາຍ​ກວ່າ. ສະນັ້ນ ຂ້ອຍ​ຈຶ່ງ​ຊອກ​ຮຽນ​ຫຼັກ​ສູດ​ທີ່​ຈະ​ຊ່ວຍ​ຂ້ອຍ​ໃຫ້​ເຮັດ​ຕາມ​ເປົ້າໝາຍ​ນັ້ນ​ໄດ້. ຫຼັງ​ຈາກ​ຮຽນ​ຈົບ ຂ້ອຍ​ກໍ​ເປັນ​ຊ່າງ​ເສີມ​ແລະ​ເລີ່ມ​ທ້ອນ​ເງິນ​ເພື່ອ​ຈະ​ຍ້າຍ​ໄປ​ເຂດ​ທີ່​ມີ​ຄວາມ​ຈຳເປັນ​ຫຼາຍ​ກວ່າ. ເມື່ອ​ຍ້າຍ​ໄປ​ແລ້ວ ສິ່ງ​ທີ່​ຂ້ອຍ​ຮຽນ​ກໍ​ຍັງ​ຊ່ວຍ​ຂ້ອຍ​ໃຫ້​ມີ​ວຽກ​ເຮັດ​ຢູ່​ຫັ້ນ​ໄດ້.” ພີ່ນ້ອງ​ໄອຣິດສ໌​ທີ່​ຮຽນ​ຈົບ​ທັນຕະແພດ​ເພື່ອ​ຈະ​ເປັນ​ໝໍ​ປົວ​ແຂ້ວ​ເຊິ່ງ​ເປັນ​ຫຼັກ​ສູດ​ທີ່​ໃຊ້​ເວລາ​ດົນ​ກວ່າ ເວົ້າ​ວ່າ: “ການ​ຮຽນ​ຕໍ່​ກໍ​ມີ​ຂໍ້​ດີ​ຢູ່ ແຕ່​ມັນ​ກໍ​ບໍ່​ໄດ້​ຊ່ວຍ​ເຈົ້າ​ໃຫ້​ປະສົບ​ຄວາມ​ສຳເລັດ​ຫຼື​ມີ​ຄວາມ​ສຸກ​ແທ້​ໄດ້. ແຕ່​ເຄັດລັບ​ທີ່​ເຮັດ​ໃຫ້​ປະສົບ​ຄວາມ​ສຳເລັດ​ຫຼື​ມີ​ຄວາມ​ສຸກ​ແທ້​ແມ່ນ ການ​ໃຫ້​ພະ​ເຢໂຫວາ​ສຳຄັນ​ທີ່​ສຸດ​ໃນ​ຊີວິດ​ສະເໝີ.” ແມ່ນ​ແລ້ວ ເມື່ອ​ເຮົາ​ໃຫ້​ສາຍ​ສຳພັນ​ທີ່​ເຮົາ​ມີ​ກັບ​ພະ​ເຢໂຫວາ​ເປັນ​ສິ່ງ​ສຳຄັນ​ທີ່​ສຸດ​ໃນ​ຊີວິດ ເຮົາ​ກໍ​ຈະ​ຕັດສິນໃຈ​ໃນ​ແບບ​ທີ່​ເຮັດ​ໃຫ້​ເຮົາ​ມີ​ຄວາມ​ສຸກ​ຕະຫຼອດ​ໄປ.

ໃຫ້​ຄິດ​ເບິ່ງ​ວ່າ​ການ​ຮຽນ​ຕໍ່​ມີ​ຂໍ້​ດີ​ຂໍ້​ເສຍ​ແນວ​ໃດ

10. ເຮົາ​ຈະ​ໃຊ້​ຫຼັກການ​ທີ່​ຢູ່​ໃນ​ພະ​ບັນຍັດ 32:29 ແນວ​ໃດ​ເມື່ອ​ຕັດສິນໃຈ​ເລື່ອງ​ການ​ຮຽນ​ຕໍ່?

¹⁰ ເຈົ້າ​ອາດ​ຄິດ​ໄວ້​ແລ້ວ​ວ່າ​ເຈົ້າ​ຢາກ​ຮຽນ​ຫຍັງ. ແຕ່​ມັນ​ຄື​ຊິ​ດີ​ຖ້າ​ເຈົ້າ​ຄິດ​ເຖິງ​ທາງ​ເລືອກ​ອື່ນ​ນຳ ເຊັ່ນ: ເຈົ້າ​ອາດ​ເລືອກ​ຮຽນ​ໃນ​ສາຂາ​ຄ້າຍໆ​ກັນ​ຫຼື​ຮຽນ​ໃນ​ສາຂາ​ທີ່​ບໍ່​ກ່ຽວ​ຂ້ອງ​ກັນ​ເລີຍ. (ສົມທຽບ​ກັບ​ສຸພາສິດ 18:17) ໃນ​ທຸກ​ມື້​ນີ້ ການ​ຮຽນ​ມີ​ທາງ​ເລືອກ​ຫຼາຍ​ກວ່າ​ແຕ່​ກ່ອນ ເຊັ່ນ: ການ​ຮຽນ​ອອນລາຍ. ແຕ່​ກໍ​ຢ່າ​ລືມ​ຄິດ​ນຳ​ວ່າ​ເຈົ້າ​ສາມາດ​ຫາ​ລ້ຽງ​ໂຕ​ໄດ້​ບໍ​ຖ້າ​ບໍ່​ຮຽນ​ຕໍ່. ຕົວຢ່າງ​ເຊັ່ນ: ພີ່ນ້ອງ​ໂຢຮັນ​ນ້າ​ທີ່​ຢູ່​ປະເທດ​ຟິນແລນ​ທີ່​ບໍ່​ໄດ້​ຮຽນ​ຕໍ່​ຫຍັງ​ເລີຍ​ເວົ້າ​ວ່າ: “ຫຼັງ​ຈາກ​ທີ່​ຂ້ອຍ​ຮຽນ​ຈົບ ຂ້ອຍ​ເລີ່ມ​ເຮັດ​ວຽກ​ບໍ່​ເຕັມ​ເວລາ​ແລະ​ເປັນ​ໄພໂອເນຍ​ນຳ. ຂ້ອຍ​ເຮັດ​ວຽກ​ຫຼາຍ​ຢ່າງ​ແລະ​ເຫັນ​ວ່າ​ພະ​ເຢໂຫວາ​ຮັກສາ​ສັນຍາ​ສະເໝີ​ທີ່​ວ່າ​ຈະ​ເບິ່ງແຍງ​ຂ້ອຍ​ໃຫ້​ມີ​ສິ່ງ​ຈຳເປັນ.” ຂໍ​ໃຫ້​ຈື່​ໄວ້​ວ່າ​ການ​ຕັດສິນໃຈ​ທຸກ​ຢ່າງ​ກ່ຽວກັບ​ການ​ຮຽນ​ຕໍ່ ບໍ່​ວ່າ​ຈະ​ເປັນ​ການ​ຕັດສິນໃຈ​ຮຽນ​ຫຼື​ບໍ່​ຮຽນ ແລະ​ຕັດສິນໃຈ​ວ່າ​ຈະ​ຮຽນ​ຫຍັງ​ຕ່າງ​ກໍ​ມີ​ທັງ​ຂໍ້​ດີ​ແລະ​ຂໍ້​ເສຍ. ສະນັ້ນ ໃຫ້​ຖາມ​ໂຕເອງ​ວ່າ: ‘ມັນ​ມີ​ຂໍ້​ດີ​ຫຼາຍ​ກວ່າ​ຂໍ້​ເສຍ​ບໍ?’ (ອ່ານ​ພະ​ບັນຍັດ 32:29; 1ກຣ. 10:23) ໃຫ້​ເຮົາ​ມາ​ເບິ່ງ​ບາງ​ປັດໄຈ​ທີ່​ຈະ​ຊ່ວຍ​ເຮົາ​ໃຫ້​ຕອບ​ຄຳ​ຖາມ​ນີ້​ໄດ້.

11. ເປັນ​ຫຍັງ​ຈຶ່ງ​ສຳຄັນ​ທີ່​ເຮົາ​ຈະ​ຄິດ​ເບິ່ງ​ວ່າ​ເຮົາ​ຈະ​ໃຊ້​ເວລາ​ຫຼາຍ​ສ່ຳ​ໃດ​ໃນ​ການ​ຮຽນ? (ເບິ່ງ​ຮູບ​ນຳ)

¹¹ ຕາຕະລາງ​ຮຽນ. ໃຫ້​ຄິດ​ເບິ່ງ​ວ່າ​ເຈົ້າ​ຈະ​ໄດ້​ໃຊ້​ເວລາ​ໃນ​ການ​ຮຽນ​ແລະ​ເຮັດ​ວຽກ​ບ້ານ​ຈັກ​ຊົ່ວໂມງ​ໃນ​ແຕ່​ລະ​ອາທິດ. ເຈົ້າ​ຍັງ​ຈະ​ມີ​ເວລາ​ເຮັດ​ກິດຈະກຳ​ທາງ​ຄວາມ​ເຊື່ອ​ເປັນ​ປະຈຳ​ແລະ​ຊ່ວຍ​ເຮັດ​ວຽກ​ເຮືອນ​ໄດ້​ຢູ່​ບໍ? (ຟລປ. 1:10) ການ​ຮຽນ​ຈະ​ເຮັດ​ໃຫ້​ເຈົ້າ​ເມື່ອຍ​ໂພດ​ຈົນ​ບໍ່​ມີ​ແຮງ​ກຽມ​ການ​ປະຊຸມ​ຫຼື​ສຶກສາ​ສ່ວນ​ໂຕ​ບໍ? ເລື່ອງ​ນີ້​ເກີດຂຶ້ນ​ກັບ​ເຈ​ໂຣດສ໌​ທີ່​ຢູ່​ປະເທດ​ອິນເດຍ. ລາວ​ເວົ້າ​ວ່າ: “ຂ້ອຍ​ຮູ້ສຶກ​ວ່າ​ມັນ​ເປັນ​ເລື່ອງ​ຍາກ​ທີ່​ຂ້ອຍ​ຈະ​ຈົດຈໍ່​ຢູ່​ກັບ​ການ​ເຮັດ​ກິດຈະກຳ​ທາງ​ຄວາມ​ເຊື່ອ. ບາງ​ເທື່ອ​ຂ້ອຍ​ກໍ​ບໍ່​ໄດ້​ໄປ​ປະຊຸມ. ເມື່ອ​ເບິ່ງ​ຄືນ ຂ້ອຍ​ຮູ້ສຶກ​ວ່າ​ມັນ​ບໍ່​ຄຸ້ມ​ເລີຍ​ກັບ​ເວລາ​ແລະ​ກຳລັງ​ທີ່​ເສຍ​ໄປ.” ແຕ່​ກໍ​ມີ​ບາງ​ຫຼັກ​ສູດ​ທີ່​ບໍ່​ຕ້ອງ​ໃຊ້​ເວລາ​ຮຽນ​ຫຼາຍ ບໍ່​ໄດ້​ຮຽນ​ໝົດ​ມື້ ແລະ​ບໍ່​ມີ​ວຽກ​ບ້ານ​ຫຼາຍ. ຕົວຢ່າງ​ເຊັ່ນ: ເຣເບກ້າ​ທີ່​ຢູ່​ປະເທດ​ໂມຊຳບິກ​ດີ​ໃຈ​ທີ່​ໄດ້​ເລືອກ​ຮຽນ​ຫຼັກ​ສູດ​ໜຶ່ງ. ລາວ​ເວົ້າ​ວ່າ: “ຂ້ອຍ​ຮຽນ​ມື້​ລະ 2 ຊົ່ວໂມງ​ເທົ່າ​ນັ້ນ ຂ້ອຍ​ກໍ​ເລີຍ​ເປັນ​ໄພໂອເນຍ​ປະຈຳ​ຕໍ່​ໄປ​ໄດ້.”

12. ມີ​ຄຳ​ຖາມ​ຫຍັງ​ແດ່​ທີ່​ເຈົ້າ​ຄວນ​ຖາມ​ໂຕເອງ​ເພື່ອ​ເຈົ້າ​ຈະ​ໃຊ້​ເວລາ​ໃຫ້​ເກີດ​ປະໂຫຍດ​ຫຼາຍ​ທີ່​ສຸດ? (ປັນຍາຈານ 12:1)

¹² ໄລຍະ​ເວລາ​ໃນ​ການ​ຮຽນ. ໃຫ້​ຄິດ​ເບິ່ງ​ວ່າ​ເຈົ້າ​ຕ້ອງ​ໃຊ້​ເວລາ​ຈັກ​ເດືອນ​ຫຼື​ຈັກ​ປີ​ຈຶ່ງ​ຈະ​ຮຽນ​ຈົບ. ສິ່ງ​ທີ່​ເຈົ້າ​ເລືອກ​ຮຽນ​ເຮັດ​ໃຫ້​ເຈົ້າ​ໄດ້​ໃຊ້​ເວລາ​ໃຫ້​ເກີດ​ປະໂຫຍດ​ຫຼາຍ​ທີ່​ສຸດ​ບໍ? (ອຟຊ. 5:15-17) ເຈົ້າ​ຍັງ​ຈະ​ສາມາດ​ໃຫ້​ສິ່ງ​ທີ່​ດີ​ທີ່​ສຸດ​ກັບ​ພະ​ເຢໂຫວາ​ໃນ​ຕອນ​ທີ່​ເຈົ້າ​ຍັງ​ເປັນ​ໄວລຸ້ນ​ໄດ້​ບໍ ເຊັ່ນ: ການ​ຮັບໃຊ້​ເຕັມ​ເວລາ? (ອ່ານ​ປັນຍາຈານ 12:1) ມີ​ຫຼັກ​ສູດ​ການ​ຮຽນ​ໄລຍະ​ສັ້ນ​ທີ່​ຈະ​ສອນ​ເຈົ້າ​ໃຫ້​ມີ​ທັກສະ​ທີ່​ຈຳເປັນ​ເພື່ອ​ເຮັດ​ວຽກ​ທີ່​ເຈົ້າ​ຢາກ​ເຮັດ​ບໍ? ຕົວຢ່າງ​ເຊັ່ນ: ການ​ຮຽນ​ວິຊາ​ຊີບ​ອາດ​ຊ່ວຍ​ເຈົ້າ​ໃຫ້​ມີ​ທັກສະ​ທີ່​ສາມາດ​ເອົາ​ໄປ​ໃຊ້​ໄດ້​ແທ້​ເຊິ່ງ​ໃຊ້​ເວລາ​ຮຽນ​ໜ້ອຍ​ກວ່າ​ແລະ​ຖືກ​ກວ່າ​ຮຽນ​ຢູ່​ມະຫາວິທະຍາໄລ. ມາຣິໂອ້​ທີ່​ຢູ່​ປະເທດ​ຊີລີ​ເວົ້າ​ວ່າ: “ຂ້ອຍ​ເລືອກ​ຮຽນ​ວິຊາ​ຊີບ​ທີ່​ໃຊ້​ເວລາ​ຮຽນ​ແຕ່ 2 ປີ ແລະ​ຖືກ​ກວ່າ​ຮຽນ​ຢູ່​ມະຫາວິທະຍາໄລ. ຂ້ອຍ​ຮຽນ​ແຕ່ 4 ມື້​ຕໍ່​ອາທິດ ຂ້ອຍ​ກໍ​ເລີຍ​ເປັນ​ໄພໂອເນຍ​ໄດ້​ເຖິງ​ວ່າ​ຈະ​ຍັງ​ຮຽນ​ຢູ່.”

13. ຈະ​ເກີດ​ຫຍັງ​ຂຶ້ນ​ຖ້າ​ເຮົາ​ເລືອກ​ຮຽນ​ຕໍ່​ຢູ່​ບ່ອນ​ທີ່​ໄກ​ຈາກ​ບ້ານ?

¹³ ສະຖານ​ທີ່​ຮຽນ. ເປັນ​ໄປ​ໄດ້​ວ່າ​ເຈົ້າ​ອາດ​ຈະ​ເລືອກ​ຮຽນ​ຢູ່​ໃກ້ໆ​ບ້ານ. ແຕ່​ຖ້າ​ເຈົ້າ​ຕ້ອງ​ໄດ້​ໄປ​ຮຽນ​ຢູ່​ບ່ອນ​ອື່ນ​ທີ່​ໄກ​ຈາກ​ບ້ານ​ຫຼື​ຕ້ອງ​ໄດ້​ໄປ​ຢູ່​ຫໍ​ພັກ​ຂອງ​ໂຮງຮຽນ​ເດ? ຖ້າ​ເປັນ​ແບບ​ນັ້ນ ກໍ​ຂໍ​ໃຫ້​ລະວັງ​ຍ້ອນ​ວ່າ​ການ​ຢູ່​ໄກ​ຈາກ​ຄອບຄົວ​ເປັນ​ອັນຕະລາຍ​ຕໍ່​ຄວາມ​ເຊື່ອ​ຂອງ​ເຈົ້າ ໂດຍ​ສະເພາະ​ຖ້າ​ເຈົ້າ​ຕ້ອງ​ໄດ້​ຢູ່​ກັບ​ຍາດ​ຕິ​ພີ່ນ້ອງ​ຫຼື​ຄົນ​ອື່ນ​ທີ່​ບໍ່​ໄດ້​ຮັບໃຊ້​ພະ​ເຢໂຫວາ. (ສພສ. 22:3; 1ກຣ. 15:33) ມາທິອັດສ໌​ຈາກ​ໂມຊຳບິກ​ຮຽນ​ຈົບ​ຫຼັກ​ສູດ 1 ປີ​ທີ່​ຄ່າ​ຮຽນ​ບໍ່​ແພງ​ຫຼາຍ ແຕ່​ລາວ​ບອກ​ວ່າ​ລາວ​ເສຍໃຈ​ກັບ​ການ​ຕັດສິນໃຈ​ແບບ​ນັ້ນ. ຍ້ອນຫຍັງ? ລາວ​ເວົ້າ​ວ່າ: “ບ່ອນ​ທີ່​ຂ້ອຍ​ຮຽນ​ຢູ່​ໄກ​ຈາກ​ບ້ານ ຂ້ອຍ​ຈຶ່ງ​ຕ້ອງ​ໄດ້​ຍ້າຍ​ໄປ​ຢູ່​ຫໍ​ພັກ​ຂອງ​ໂຮງຮຽນ. ຂ້ອຍ​ຖືກ​ລໍ້ໃຈ​ໃຫ້​ເຮັດ​ສິ່ງ​ທີ່​ບໍ່​ດີ​ທຸກ​ມື້. ດັ່ງນັ້ນ ຂ້ອຍ​ຂໍ​ແນະນຳ​ວ່າ ຖ້າ​ໃຜ​ຢາກ​ຮຽນ​ຕໍ່ ກໍ​ຂໍ​ໃຫ້​ຮຽນ​ຢູ່​ບ່ອນ​ທີ່​ບໍ່​ໄກ​ຈາກ​ຄອບຄົວ.” ພີ່ນ້ອງ​ຍິງ​ຄົນ​ໜຶ່ງ​ທີ່​ຢູ່​ລັດເຊຍ​ບອກ​ວ່າ: “ຂ້ອຍ​ຫຼີກລ່ຽງ​ອັນຕະລາຍ​ແລະ​ການ​ລໍ້ໃຈ​ຕ່າງໆ​ໂດຍ​ເລືອກ​ພັກ​ຢູ່​ເຮືອນ​ກັບ​ພໍ່​ແມ່ ແທນ​ທີ່​ຈະ​ພັກ​ຢູ່​ຫໍ​ພັກ​ຂອງ​ໂຮງຮຽນ.” ນອກ​ຈາກ​ນັ້ນ ເຈົ້າ​ຍັງ​ສາມາດ​ເລືອກ​ຮຽນ​ທາງ​ອອນລາຍ​ໄດ້.

14. ຫຼັກການ​ໃນ​ລູກາ 14:28 ຊ່ວຍ​ເຈົ້າ​ແນວ​ໃດ​ຕອນ​ທີ່​ເຈົ້າ​ກຳລັງ​ຄິດ​ຈະ​ຮຽນ​ຕໍ່?

¹⁴ ຄ່າ​ໃຊ້​ຈ່າຍ​ໃນ​ການ​ຮຽນ. ຄ່າ​ຮຽນ​ບາງ​ຫຼັກ​ສູດ​ກໍ​ບໍ່​ແພງ​ຫຼື​ໄດ້​ຮັບ​ທຶນ​ຈາກ​ລັດຖະບານ. ຖ້າ​ເປັນ​ແບບ​ນັ້ນ ການ​ຮຽນ​ຕໍ່​ກໍ​ອາດ​ຈະ​ຊ່ວຍ​ເຈົ້າ​ໃຫ້​ມີ​ຄວາມ​ຮູ້​ແລະ​ມີ​ທັກສະ​ທີ່​ຈະ​ຊ່ວຍ​ເຈົ້າ​ໃຫ້​ຫາ​ວຽກ​ໄດ້​ໂດຍ​ທີ່​ບໍ່​ຕ້ອງ​ເສຍ​ຄ່າ​ໃຊ້​ຈ່າຍ​ຫຼາຍ. ແຕ່​ບາງ​ເທື່ອ​ການ​ຮຽນ​ຕໍ່​ກໍ​ແພງ​ຫຼາຍ ແລະ​ອາດ​ຕ້ອງ​ມີ​ຄ່າ​ໃຊ້​ຈ່າຍ​ອື່ນໆ​ນຳ ເຊັ່ນ: ການ​ຈ້າງ​ຄູ​ມາ​ສອນ​ເພີ່ມ​ເພື່ອ​ຈະ​ເສັງ​ເຂົ້າ​ຮຽນ​ໃນ​ຫຼັກ​ສູດ​ນັ້ນ​ໄດ້. ການ​ຮຽນ​ຕໍ່​ໃນ​ບາງ​ຫຼັກ​ສູດ​ອາດ​ເຮັດ​ໃຫ້​ນັກ​ຮຽນ​ເປັນ​ໜີ້​ຫຼາຍ​ປີ. ພີ່ນ້ອງ​ເອດິວສັນ​ທີ່​ຢູ່​ປະເທດ​ໂມຊຳບິກ​ຮູ້ສຶກ​ເສຍໃຈ​ກັບ​ການ​ຮຽນ​ທີ່​ລາວ​ເລືອກ. ລາວ​ເວົ້າ​ວ່າ: “ຄອບຄົວ​ຂອງ​ຂ້ອຍ​ຕ້ອງ​ເສຍ​ສະລະ​ເງິນ​ເພື່ອ​ຈ່າຍ​ຄ່າ​ຮຽນ​ໃຫ້​ຂ້ອຍ​ຕັ້ງ​ວ່າ 4 ປີ​ຈົນ​ບໍ່​ມີ​ເງິນ​ຊື້​ອາຫານ​ແລະ​ສິ່ງ​ຈຳເປັນ​ອື່ນໆ.” ຕອນ​ທີ່​ເຈົ້າ​ກຳລັງ​ຄິດ​ຈະ​ຮຽນ​ຕໍ່​ໃນ​ຫຼັກ​ສູດ​ໃດ​ໜຶ່ງ ໃຫ້​ຖາມ​ໂຕເອງ​ວ່າ: ‘ມີ​ຄ່າ​ໃຊ້​ຈ່າຍ​ເທົ່າ​ໃດ? ຂ້ອຍ​ຫຼື​ຄອບຄົວ​ຂອງ​ຂ້ອຍ​ມີ​ເງິນ​ພຽງ​ພໍ​ທີ່​ຈະ​ຈ່າຍ​ຄ່າ​ຮຽນ​ໄດ້​ບໍ? ມີ​ທາງ​ເລືອກ​ອື່ນ​ທີ່​ມັນ​ຖືກ​ກວ່າ​ນີ້​ບໍ?’ (ອ່ານ​ລູກາ 14:28) ‘ຖ້າ​ຂ້ອຍ​ຢືມ​ເງິນ​ມາ​ຮຽນ ດົນ​ປານ​ໃດ​ຂ້ອຍ​ຈຶ່ງ​ຈະ​ໄຊ້​ໜີ້​ໝົດ? ແລະ​ໃນ​ອະນາຄົດ ຖ້າ​ຂ້ອຍ​ໄດ້​ວຽກ​ເຮັດ ເງິນ​ທີ່​ຫາ​ມາ​ໄດ້​ຈະ​ເຮັດ​ໃຫ້​ຂ້ອຍ​ສາມາດ​ລ້ຽງ​ໂຕເອງ​ແລະ​ໄຊ້​ໜີ້​ໄດ້​ບໍ?’—ສພສ. 22:7

15. ເປັນ​ຫຍັງ​ເຈົ້າ​ຄວນ​ຄິດ​ເຖິງ​ໂອກາດ​ທີ່​ຈະ​ໄດ້​ວຽກ​ເຮັດ​ກ່ອນ​ທີ່​ເຈົ້າ​ຈະ​ຕັດສິນໃຈ​ວ່າ​ຈະ​ຮຽນ​ຫຍັງ?

¹⁵ ໂອກາດ​ທີ່​ຈະ​ໄດ້​ວຽກ​ເຮັດ. ໃຫ້​ເບິ່ງ​ຄວາມ​ຕ້ອງການ​ຂອງ​ຕະຫຼາດ​ແຮງງານ​ໃນ​ບ່ອນ​ທີ່​ເຈົ້າ​ຢູ່​ຫຼື​ບ່ອນ​ທີ່​ເຈົ້າ​ຢາກ​ໄປ​ຢູ່. ສິ່ງ​ທີ່​ເຈົ້າ​ຮຽນ​ຈະ​ຊ່ວຍ​ເຈົ້າ​ໃຫ້​ຫາ​ວຽກ​ໄດ້​ແທ້ໆ​ບໍ? ໃນ​ບາງ​ຫຼັກ​ສູດ​ກໍ​ບໍ່​ໄດ້​ສອນ​ທັກສະ​ທີ່​ຈະ​ເອົາ​ໄປ​ໃຊ້​ໃນ​ບ່ອນ​ເຮັດ​ວຽກ​ໄດ້​ແທ້ໆ. ແທນ​ທີ່​ຈະ​ເປັນ​ແນວ​ນັ້ນ ຫຼາຍ​ບ່ອນ​ພັດ​ມີ​ແຕ່​ສອນ​ທິດສະດີ ໃຫ້​ຄວາມ​ຮູ້ ຫຼື​ສອນ​ປັດຊະຍາ​ຊື່ໆ. (ກລຊ. 2:8) ພີ່ນ້ອງ​ຍິງ​ຄົນ​ໜຶ່ງ​ຈາກ​ປະເທດ​ອິນເດຍ​ເວົ້າ​ວ່າ: “ສິ່ງ​ທີ່​ຂ້ອຍ​ຮຽນ​ບໍ່​ໄດ້​ຊ່ວຍ​ຂ້ອຍ​ໃຫ້​ມີ​ທັກສະ​ທີ່​ກົງ​ກັບ​ນາຍ​ຈ້າງ​ຢາກ​ໄດ້. ຜົນ​ກໍ​ຄື ຂ້ອຍ​ບໍ່​ສາມາດ​ຊອກ​ວຽກ​ໃນ​ສາຂາ​ທີ່​ຂ້ອຍ​ຮຽນ​ມາ​ໄດ້​ເລີຍ.” ບາງ​ສາຂາ​ທີ່​ຮຽນ​ຈົບ​ມາ​ແລ້ວ​ກໍ​ມີ​ວຽກ​ໃຫ້​ເຮັດ​ບໍ່​ຫຼາຍ. ພີ່ນ້ອງ​ຊູບຼິມ​ທີ່​ຢູ່​ປະເທດ​ອາຟຣິກາ​ກາງ​ຮຽນ​ແປງ​ແອ​ມາ ແຕ່​ລາວ​ເວົ້າ​ວ່າ: “ໃນ​ບ່ອນ​ທີ່​ຂ້ອຍ​ຢູ່​ຄົນ​ມັກ​ແປງ​ສິ່ງ​ຕ່າງໆ​ດ້ວຍ​ໂຕເອງ. ສະນັ້ນ ຂ້ອຍ​ຈຶ່ງ​ຫາ​ວຽກ​ໄດ້​ຍາກ​ຫຼາຍ.”

16. ເປັນ​ຫຍັງ​ຈຶ່ງ​ເປັນ​ເລື່ອງ​ທີ່​ດີ​ທີ່​ຈະ​ຄິດ​ເບິ່ງ​ວ່າ​ເຈົ້າ​ຈະ​ໄດ້​ເຮັດ​ວຽກ​ແບບ​ໃດ​ເມື່ອ​ເຈົ້າ​ຮຽນ​ຈົບ?

¹⁶ ໃຫ້​ຄິດ​ນຳ​ວ່າ​ເມື່ອ​ເຈົ້າ​ຮຽນ​ຈົບ​ແລ້ວ​ເຈົ້າ​ຈະ​ໄດ້​ເຮັດ​ວຽກ​ປະເພດ​ໃດ. ວຽກ​ນັ້ນ​ຈະ​ເຮັດ​ໃຫ້​ເຈົ້າ​ມີ​ຄວາມ​ສຸກ​ບໍ? (ປຍຈ. 3:12, 13) ສະພາບ​ແວດ​ລ້ອມ​ຢູ່​ບ່ອນ​ເຮັດ​ວຽກ​ຈະ​ເປັນ​ແນວ​ໃດ​ແລະ​ເຮັດ​ວຽກ​ກັບ​ຄົນ​ແບບ​ໃດ? ວຽກ​ນັ້ນ​ອັນຕະລາຍ ມີ​ການ​ແຂ່ງ​ຂັນ​ສູງ ຫຼື​ມີ​ຄວາມ​ກົດດັນ​ຫຼາຍ​ບໍ? ຕາມ​ປົກກະຕິ​ແລ້ວ​ວຽກ​ປະເພດ​ນີ້​ໄດ້​ເງິນ​ປະມານ​ເທົ່າ​ໃດ? ມັນ​ພໍ​ທີ່​ຈະ​ຊ່ວຍ​ໃຫ້​ຫາ​ລ້ຽງ​ໂຕເອງ​ໄດ້​ບໍ? ເຈົ້າ​ຕ້ອງ​ໄດ້​ຮຽນ​ຕໍ່​ໄປ​ອີກ​ເລື້ອຍໆ​ບໍ​ເພື່ອ​ເຈົ້າ​ຈະ​ເຮັດ​ວຽກ​ນີ້​ຕໍ່​ໄປ​ໄດ້? ແລະ​ທີ່​ສຳຄັນ​ທີ່​ສຸດ ມັນ​ຈະ​ເຮັດ​ໃຫ້​ເຈົ້າ​ໃຫ້​ການ​ປົກຄອງ​ຂອງ​ພະເຈົ້າ​ມາ​ເປັນ​ອັນ​ດັບ​ທຳອິດ​ໄດ້​ບໍ? (ປຍຈ. 12:13) ແນ່ນອນ​ວ່າ​ຖ້າ​ບ່ອນ​ທີ່​ເຈົ້າ​ຢູ່​ຫາ​ວຽກ​ຍາກ ເຈົ້າ​ກໍ​ບໍ່​ຢາກ​ເລືອກ​ວຽກ​ຫຼາຍ​ໂພດ. ແຕ່​ການ​ຕັດສິນໃຈ​ຂອງ​ເຈົ້າ​ໃນ​ເລື່ອງ​ການ​ຮຽນ​ຈະ​ສົ່ງ​ຜົນ​ຕໍ່​ໂອກາດ​ທີ່​ເຈົ້າ​ຈະ​ໄດ້​ວຽກ​ເຮັດ​ໃນ​ອະນາຄົດ. ທາບີທາ​ຈາກ​ປະເທດ​ອິນເດຍ​ເລືອກ​ຮຽນ​ຕັດ​ຫຍິບ​ຫຼັກ​ສູດ 6 ເດືອນ. ລາວ​ເວົ້າ​ວ່າ: “ຂ້ອຍ​ຄິດ​ວ່າ​ການ​ເປັນ​ຊ່າງ​ຕັດ​ຫຍິບ​ຈະ​ຊ່ວຍ​ຂ້ອຍ​ໃຫ້​ເປັນ​ໄພໂອເນຍ​ໄດ້. ມັນ​ເປັນ​ອາຊີບ​ທີ່​ເຮັດ​ໄດ້​ຕະຫຼອດ. ຂ້ອຍ​ສາມາດ​ເລືອກ​ເວລາ​ເຮັດ​ວຽກ​ເອງ​ໄດ້​ແລະ​ບໍ່​ຕ້ອງ​ລົງ​ທຶນ​ຫຼາຍ.” ສິ່ງ​ທີ່​ທາບີທາ​ເລືອກ​ຮຽນ​ຊ່ວຍ​ລາວ​ໃຫ້​ມີ​ວຽກ​ເຮັດ​ເພື່ອ​ທີ່​ຈະ​ເປັນ​ໄພໂອເນຍ​ໄດ້.

17. (ກ) ເຈົ້າ​ຈະ​ຊອກ​ຂໍ້ມູນ​ທີ່​ຈະ​ຊ່ວຍ​ໃຫ້​ເຈົ້າ​ຕັດສິນໃຈ​ໄດ້​ດີ​ໃນ​ເລື່ອງ​ການ​ຮຽນ​ໄດ້​ແນວ​ໃດ? (ຂ) ມີ​ຫຼັກການ​ຫຍັງ​ແດ່​ໃນ​ຄຳພີ​ໄບເບິນ​ທີ່​ຈະ​ຊ່ວຍ​ເຈົ້າ​ໃຫ້​ຕັດສິນໃຈ​ໄດ້​ດີ? (ເບິ່ງ​ຂອບ “ຫຼັກການ​ໃນ​ຄຳພີ​ໄບເບິນ​ທີ່​ຕ້ອງ​ຄິດ​ເຖິງ”)

¹⁷ ໃນ​ບົດ​ນີ້​ເຮົາ​ໄດ້​ເບິ່ງ​ຫຼາຍ​ປັດໄຈ​ທີ່​ສຳຄັນ​ກ່ຽວກັບ​ການ​ຮຽນ​ຕໍ່​ນຳ​ກັນ​ແລ້ວ. ແຕ່​ເຈົ້າ​ຈະ​ຊອກ​ຂໍ້ມູນ​ທີ່​ຈະ​ຊ່ວຍ​ໃຫ້​ເຈົ້າ​ຕັດສິນໃຈ​ໄດ້​ດີ​ໄດ້​ແນວ​ໃດ? ໃຫ້​ຄົ້ນຄວ້າ​ຂໍ້ມູນ​ກ່ຽວກັບ​ສິ່ງ​ທີ່​ເຈົ້າ​ຢາກ​ຮຽນ​ໂດຍ​ເຂົ້າ​ໄປ​ຖາມ​ກັບ​ໂຮງຮຽນ​ດ້ວຍ​ໂຕເອງ​ຫຼື​ເຂົ້າ​ໄປ​ເບິ່ງ​ໃນ​ເວັບໄຊ​ຂອງ​ໂຮງຮຽນ. ໃຫ້​ເບິ່ງ​ຂໍ້ມູນ​ວ່າ​ມີ​ການ​ຮັບ​ສະໝັກ​ວຽກ​ຫຼາຍ​ສ່ຳ​ໃດ​ໃນ​ສາຂາ​ທີ່​ເຈົ້າ​ຢາກ​ຮຽນ. ເຈົ້າ​ອາດ​ປຶກສາ​ກັບ​ຄົນ​ທີ່​ຮຽນ​ຈົບ​ສາຂາ​ນີ້​ຫຼື​ຄົນ​ທີ່​ເຮັດ​ວຽກ​ໃນ​ດ້ານ​ນີ້. (ສພສ. 13:10) ເຈົ້າ​ອາດ​ຈະ​ຖາມ​ເຂົາເຈົ້າ​ວ່າ: “ສາຂາ​ທີ່​ຂ້ອຍ​ຈະ​ຮຽນ​ນີ້​ຫຼື​ວຽກ​ດ້ານ​ນີ້​ມີ​ຂໍ້​ດີ​ແລະ​ຂໍ້​ເສຍ​ຫຍັງ​ແດ່?” ໃຫ້​ລົມ​ກັບ​ພີ່ນ້ອງ​ທີ່​ກຳລັງ​ຮັບໃຊ້​ພະ​ເຢໂຫວາ​ຢ່າງ​ມີ​ຄວາມ​ສຸກ. (ສພສ. 15:22) ແລ້ວ​ເບິ່ງ​ວ່າ​ເຂົາເຈົ້າ​ຈະ​ແນະນຳ​ເຈົ້າ​ໃຫ້​ຮຽນ​ຫຍັງ​ແລະ​ແນະນຳ​ໃຫ້​ເຮັດ​ວຽກ​ແບບ​ໃດ. ເຂົາເຈົ້າ​ອາດ​ແນະນຳ​ວຽກ​ທີ່​ເຈົ້າ​ບໍ່​ເຄີຍ​ຄິດ​ໄວ້​ກໍ​ໄດ້.

18. ເຮົາ​ຄວນ​ຈື່​ຫຍັງ​ໄວ້?

¹⁸ ຄື​ກັບ​ທີ່​ເຮົາ​ໄດ້​ຮຽນ​ມາ​ແລ້ວ ການ​ຮຽນ​ຕໍ່​ກໍ​ມີ​ທັງ​ຂໍ້​ດີ​ແລະ​ຂໍ້​ເສຍ. ດັ່ງນັ້ນ ໃຫ້​ອະທິດຖານ​ແລະ​ຄິດ​ຄັກໆ​ກ່ຽວກັບ​ທາງ​ເລືອກ​ທີ່​ເຈົ້າ​ມີ. ໃຫ້​ຈື່​ໄວ້​ວ່າ​ການ​ຮຽນ​ຕໍ່​ອາດ​ຊ່ວຍ​ໃຫ້​ເຈົ້າ​ມີ​ວຽກ​ເຮັດ​ເພື່ອ​ໃຫ້​ມີ​ເງິນ​ພຽງ​ພໍ​ທີ່​ຈະ​ຫາ​ລ້ຽງ​ໂຕເອງ​ໄດ້. ແຕ່​ສິ່ງ​ດຽວ​ທີ່​ຈະ​ເຮັດ​ໃຫ້​ເຈົ້າ​ມີ​ຄວາມ​ສຸກ​ແທ້​ໄດ້​ຄື​ການ​ມີ​ສາຍ​ສຳພັນ​ທີ່​ໃກ້ຊິດ​ກັບ​ພະ​ເຢໂຫວາ. (ພສ. 16:9, 11) ພະ​ເຢໂຫວາ​ຈະ​ເບິ່ງແຍງ​ຄົນ​ຂອງ​ເພິ່ນ​ສະເໝີ​ບໍ່​ວ່າ​ລາວ​ຈະ​ຮຽນ​ຫຼາຍ​ຫຼື​ໜ້ອຍ​ກໍ​ຕາມ. (ຮຣ. 13:5) ແຕ່​ຖ້າ​ເຈົ້າ​ໄດ້​ຕັດສິນໃຈ​ແລ້ວ​ວ່າ​ຈະ​ຮຽນ​ຕໍ່ ອັນ​ໃດ​ຈະ​ຊ່ວຍ​ເຈົ້າ​ໃຫ້​ໃກ້ຊິດ​ກັບ​ພະ​ເຢໂຫວາ​ສະເໝີ​ຕອນ​ທີ່​ຮຽນ​ຕໍ່? ເຮົາ​ຈະ​ມາ​ເບິ່ງ​ເລື່ອງ​ນີ້​ໃນ​ບົດ​ຕໍ່​ໄປ.