ວັນທີ 6-12 ກໍລະກົດ 2026
ເພງທີ 98 ພະຄຳພີຂຽນຂຶ້ນໂດຍການດົນໃຈຈາກພະເຈົ້າ
ເປັນຫຍັງຫຼັກການໃນຄຳພີໄບເບິນຈຶ່ງສຳຄັນ?
“ອາຫານແຂງເປັນອາຫານສຳລັບຜູ້ໃຫຍ່ທີ່ໄດ້ຝຶກໃຊ້ຄວາມຄິດຈົນແຍກອອກໄດ້ວ່າອັນໃດຖືກອັນໃດຜິດ.”—ຮຣ. 5:14
ຈຸດສຳຄັນ
ຫຼັກການແມ່ນຫຍັງ ແລະເຮົາຈະຮູ້ໄດ້ແນວໃດວ່າອັນໃດແມ່ນຫຼັກການຕອນທີ່ເຮົາອ່ານຄຳພີໄບເບິນ.
1-2. (ກ) ເປັນຫຍັງຄຳພີໄບເບິນຈຶ່ງເປັນປຶ້ມທີ່ເກົ່າແກ່? (ຂ) ເປັນຫຍັງຄຳແນະນຳໃນຄຳພີໄບເບິນຈຶ່ງຍັງໃຊ້ໄດ້ໃນທຸກມື້ນີ້?
ຄຳພີໄບເບິນເປັນປຶ້ມທີ່ເກົ່າແກ່ຫົວໜຶ່ງ ເຊິ່ງເລີ່ມຂຽນເມື່ອປະມານ 3.500 ປີກ່ອນແລະຂຽນແລ້ວປະມານ 2.000 ປີກ່ອນ. ແຕ່ “ຖ້ອຍຄຳຂອງພະເຈົ້າ” ທີ່ຢູ່ໃນຄຳພີໄບເບິນຍັງມີຊີວິດແລະມີພະລັງຫຼາຍໃນທຸກມື້ນີ້. (ຮຣ. 4:12; 2ຕມ. 3:16, 17) ຫຼາຍລ້ານຄົນໃນທຸກມື້ນີ້ເຫັນວ່າຄຳພີໄບເບິນຊ່ວຍເຂົາເຈົ້າໃຫ້ຕັດສິນໃຈໄດ້ດີແລະມີຄວາມສຸກຫຼາຍຂຶ້ນໄດ້.
2 ເປັນໄປໄດ້ແນວໃດທີ່ຄຳແນະນຳໃນປຶ້ມເກົ່າແກ່ຫົວນີ້ຍັງໃຊ້ໄດ້ໃນທຸກມື້ນີ້? ມີ 2 ເຫດຜົນຫຼັກ. ເຫດຜົນທຳອິດ ສິ່ງທີ່ຂຽນໃນຄຳພີໄບເບິນມາຈາກ “ພະເຈົ້າຜູ້ມີຊີວິດຢູ່” ເຊິ່ງເປັນຜູ້ສ້າງທີ່ສະຫຼາດຮອບດ້ານ. (1ຕມ. 4:10; ຣມ. 16:26, 27) ເຫດຜົນທີສອງ ຄຳພີໄບເບິນມີຫຼັກການທີ່ໃຊ້ໄດ້ຕະຫຼອດ. ຍ້ອນແນວນີ້ ຫຼັກການໃນຄຳພີໄບເບິນຈຶ່ງເປັນປະໂຫຍດກັບຫຼາຍຄົນບໍ່ວ່າເຂົາເຈົ້າຈະຢູ່ໃນສະໄໝໃດຫຼືເຈິກັບບັນຫາແບບໃດ.
3. ເຮົາຈະຕອບຄຳຖາມຫຍັງແດ່ໃນບົດນີ້?
3 ໃນບົດນີ້ເຮົາຈະຕອບຄຳຖາມຕໍ່ໄປນີ້: ຫຼັກການໃນຄຳພີໄບເບິນແມ່ນຫຍັງ? ເປັນຫຍັງຫຼັກການເຫຼົ່ານີ້ຈຶ່ງສຳຄັນຫຼາຍສຳລັບເຮົາໃນທຸກມື້ນີ້? ເຮົາຈະຮູ້ໄດ້ແນວໃດວ່າອັນໃດແມ່ນຫຼັກການຕອນທີ່ເຮົາອ່ານຄຳພີໄບເບິນ? ນອກຈາກນັ້ນ ເຮົາຍັງຈະມາເບິ່ງວ່າຄຳສອນຂອງພະເຢຊູເນັ້ນເຖິງຫຼັກການທີ່ສຳຄັນຫຍັງແດ່.
ຫຼັກການໃນຄຳພີໄບເບິນແມ່ນຫຍັງ?
4. ຫຼັກການໃນຄຳພີໄບເບິນແມ່ນຫຍັງ?
4 ຫຼັກການໃນຄຳພີໄບເບິນແມ່ນຄວາມຈິງພື້ນຖານ ເຊິ່ງກົດໝາຍຂອງພະເຈົ້າກໍມາຈາກຫຼັກການໃນຄຳພີໄບເບິນ. ບາງເທື່ອເຮົາອາດເຫັນຫຼັກການໄດ້ແຈ້ງໃນກົດໝາຍບາງຂໍ້. (ມທ. 22:37) ແຕ່ຫຼັກການເໜືອກວ່າກົດໝາຍ. ກົດໝາຍອາດມີຂອບເຂດຈຳກັດໃນການນຳໃຊ້. ກົດໝາຍອາດຈະໃຊ້ໄດ້ກັບຍຸກສະໄໝໃດໜຶ່ງ ຫຼືສະຖານະການໃດໜຶ່ງເທົ່ານັ້ນ. ແຕ່ຫຼັກການໃນຄຳພີໄບເບິນຊ່ວຍເຮົາໃຫ້ເຂົ້າໃຈຄວາມຄິດຂອງພະເຢໂຫວາໃນແງ່ມຸມທີ່ກວ້າງກວ່າ. ເຮົາອາດເວົ້າໄດ້ວ່າຫຼັກການເປັນເຫດຜົນທີ່ຢູ່ເບື້ອງຫຼັງໃນການຕັ້ງກົດໝາຍ. ກົດໝາຍຂອງພະເຢໂຫວາທຸກຂໍ້ມີເຫດຜົນຮອງຮັບສະເໝີ. ຫຼັກການສາມາດໃຊ້ກັບຫຼາຍສະຖານະການທີ່ແຕກຕ່າງກັນແລະໃຊ້ໄດ້ຕະຫຼອດບໍ່ວ່າເວລາຈະຜ່ານໄປດົນສ່ຳໃດ. (ພສ. 119:111) ກົດໝາຍອາດຕ້ອງມີການປ່ຽນແປງຖ້າຈຳເປັນ ແຕ່ຫຼັກການຈະໃຊ້ໄດ້ຕະຫຼອດແລະບໍ່ຫຼ້າສະໄໝ.—ອຊຢ. 40:8
5. ກົດໝາຍແລະຫຼັກການແຕກຕ່າງກັນແນວໃດ? ຂໍໃຫ້ຍົກຕົວຢ່າງ (ເບິ່ງຮູບນຳ)
5 ເພື່ອຈະຊ່ວຍເຮົາໃຫ້ເຂົ້າໃຈຄວາມແຕກຕ່າງລະຫວ່າງກົດໝາຍແລະຫຼັກການໄດ້ດີຂຶ້ນ ຂໍໃຫ້ເຮົາຄິດເຖິງຕົວຢ່າງນີ້. ແມ່ຄົນໜຶ່ງອາດບອກລູກທີ່ຍັງນ້ອຍວ່າ: ‘ຫ້າມຈັບເຕົາໄຟເດີ້!’ ນີ້ເປັນກົດຫຼືຄຳສັ່ງ. ແຕ່ຫຼັກການຫຼືເຫດຜົນທີ່ແຝງຢູ່ເບື້ອງຫຼັງຂອງກົດນັ້ນແມ່ນບໍ່ໃຫ້ຈັບອັນໃດທີ່ມັນຮ້ອນ. ຄັນບໍ່ຊັ້ນ ລາວຈະບາດເຈັບ. ຫຼັກການນີ້ບໍ່ໄດ້ໃຊ້ແຕ່ກັບເຕົາໄຟເທົ່ານັ້ນ ແຕ່ມັນໃຊ້ໄດ້ກັບເຕົາລີດ ໝໍ້ຕົ້ມນ້ຳ ຫຼືອັນໃດກໍຕາມທີ່ມັນຮ້ອນເຊິ່ງເຮັດໃຫ້ບາດເຈັບໄດ້. ຫຼັກການນີ້ບໍ່ໄດ້ໃຊ້ແຕ່ຢູ່ໃນເຮືອນເທົ່ານັ້ນ ແຕ່ໃຊ້ໄດ້ກັບທຸກບ່ອນ. ແນ່ນອນວ່າເມື່ອລູກໃຫຍ່ຂຶ້ນລາວອາດຈະຕ້ອງໃຊ້ເຕົາໄຟ ແຕ່ລາວຍັງຕ້ອງໃຊ້ຢ່າງລະມັດລະວັງເພື່ອຈະບໍ່ໃຫ້ໂຕເອງບາດເຈັບ. ສະນັ້ນ ກົດອາດປ່ຽນແປງໄດ້ ແຕ່ວ່າຫຼັກການທີ່ຢູ່ເບື້ອງຫຼັງຂອງກົດນັ້ນບໍ່ປ່ຽນແປງ.
ກົດໝາຍອາດຈະປ່ຽນ ແຕ່ຫຼັກການທີ່ຢູ່ເບື້ອງຫຼັງຂອງກົດໝາຍນັ້ນບໍ່ປ່ຽນແປງ (ເບິ່ງຂໍ້ 5)
ເປັນຫຍັງຫຼັກການໃນຄຳພີໄບເບິນຈຶ່ງສຳຄັນ?
6. (ກ) ພະເຢໂຫວາໃຫ້ມີຫຍັງໃນຄຳພີໄບເບິນ? (ຂ) ພະເຢໂຫວາໃຫ້ກຽດເຮົາແນວໃດ?
6 ພະເຢໂຫວາຮັກເຮົາຫຼາຍ ເພິ່ນຈຶ່ງໃຫ້ກົດໝາຍກັບເຮົາເຊິ່ງເປັນຄຳແນະນຳທີ່ສະເພາະເຈາະຈົງເພື່ອຊ່ວຍເຮົາແລະຄົນອື່ນໃຫ້ຫຼີກລ່ຽງຈາກອັນຕະລາຍໄດ້. (ຢກບ. 2:11) ນອກຈາກນັ້ນ ເພິ່ນຍັງຊ່ວຍເຮົາໃຫ້ເຂົ້າໃຈຫຼັກການຫຼືເຫດຜົນທີ່ຢູ່ເບື້ອງຫຼັງຂອງກົດໝາຍເຫຼົ່ານັ້ນ. ພະເຢໂຫວາບໍ່ໄດ້ໃຫ້ກົດໝາຍກັບເຮົາໃນທຸກສະຖານະການ ແຕ່ເພິ່ນໃຫ້ຫຼັກການໃນຄຳພີໄບເບິນເພື່ອຊ່ວຍເຮົາໃຫ້ຕັດສິນໃຈໄດ້ດີແລະເຮັດໃນສິ່ງທີ່ຖືກຕ້ອງເຖິງວ່າບໍ່ມີກົດໝາຍບອກໄວ້ຢ່າງຊັດເຈນກໍຕາມ. ການທີ່ພະເຢໂຫວາໃຫ້ມີຫຼັກການໃນຄຳພີໄບເບິນສະແດງໃຫ້ເຫັນວ່າເພິ່ນໃຫ້ກຽດເຮົາແລະໃຫ້ເຮົາມີອິດສະຫຼະໃນການຕັດສິນໃຈໃນແບບທີ່ເຮັດໃຫ້ເຫັນວ່າເຮົາຮັກເພິ່ນແລະຮັກມາດຕະຖານຂອງເພິ່ນ.—ຄລຕ. 5:13
7. ຂໍໃຫ້ຍົກຕົວຢ່າງທີ່ເຮັດໃຫ້ເຫັນວ່າຫຼັກການໃນຄຳພີໄບເບິນຊ່ວຍເຮົາແນວໃດ. (ເບິ່ງຮູບນຳ)
7 ເພື່ອຊ່ວຍເຮົາໃຫ້ເຫັນວ່າຫຼັກການໃນຄຳພີໄບເບິນຊ່ວຍເຮົາແນວໃດ ຂໍໃຫ້ຄິດເຖິງຕົວຢ່າງຕໍ່ໄປນີ້: ໃນບາງປະເທດຈະມີປ້າຍຈະລາຈອນຢູ່ຈຸດຕ່າງໆຕາມຫົນທາງ. ປ້າຍເຫຼົ່ານັ້ນບາງອັນກໍເປັນຄຳສັ່ງຫຼືເປັນກົດເຊິ່ງຖ້າຜູ້ໃດບໍ່ເຮັດຕາມຈະຕ້ອງຖືກປັບໄໝ ເຊັ່ນ: ປ້າຍຈຳກັດຄວາມໄວ ຫຼືປ້າຍຫ້າມຈອດ. ແຕ່ກໍມີປ້າຍຈະລາຈອນບາງອັນທີ່ເຕືອນຄົນຂັບໃຫ້ຮູ້ອັນຕະລາຍ ເຊັ່ນ: ປ້າຍທີ່ເຕືອນວ່າໂຄ້ງອັນຕະລາຍ ຫຼືປ້າຍໃຫ້ລະວັງຄົນຍ່າງຂ້າມທາງ. ເມື່ອຄົນຂັບລົດທີ່ມີປະສົບການເຫັນປ້າຍເຕືອນເຫຼົ່ານີ້ ລາວຕ້ອງມີສະຕິແລະຂັບລົດຢ່າງລະມັດລະວັງເພື່ອຫຼີກລ່ຽງອຸບັດຕິເຫດ. ນອກຈາກນັ້ນ ໃນຕອນທີ່ຝົນຕົກຫຼືມີໝອກ ຄົນຂັບແຮ່ງຕ້ອງລະມັດລະວັງຫຼາຍຂຶ້ນອີກແລະຂັບຊ້າລົງ. ຄ້າຍຄືກັນ ຄຳພີໄບເບິນມີກົດໝາຍທີ່ບອກວ່າອັນໃດທີ່ເຮົາເຮັດໄດ້ແລະອັນໃດທີ່ເຮັດບໍ່ໄດ້ ແຕ່ຄຳພີໄບເບິນກໍຍັງມີຫຼັກການນຳ. ເຖິງວ່າຫຼັກການເຫຼົ່ານີ້ບໍ່ແມ່ນກົດໝາຍທີ່ສະເພາະເຈາະຈົງ ແຕ່ເມື່ອເຮົາເຮັດຕາມ ເຮົາກໍຈະສາມາດຫຼີກລ່ຽງທີ່ຈະບໍ່ຄິດຫຼືເຮັດສິ່ງທີ່ຈະເຮັດໃຫ້ພະເຢໂຫວາບໍ່ພໍໃຈ. ຍ້ອນແນວນີ້ ຫຼັກການຈຶ່ງມີຄວາມສຳຄັນຫຼາຍ.
ຄືກັບປ້າຍຈະລາຈອນຕ່າງໆທີ່ຢູ່ຕາມຫົນທາງຊ່ວຍເຕືອນຄົນຂັບໃຫ້ຮູ້ອັນຕະລາຍທີ່ອາດຈະເກີດຂຶ້ນ ຫຼັກການໃນຄຳພີໄບເບິນກໍຊ່ວຍເຮົາໃນແບບດຽວກັນ (ເບິ່ງຂໍ້ 7)
8. ຕາມໂຣມ 12:1, 2 ການຊອກຫາຫຼັກການຈາກເລື່ອງທີ່ເຮົາອ່ານໃນຄຳພີໄບເບິນຊ່ວຍຝຶກເຮົາໃນເລື່ອງໃດ?
8 ຍັງມີປະໂຫຍດອີກຢ່າງໜຶ່ງຈາກການຊອກຫາຫຼັກການໃນຄຳພີໄບເບິນແລະເອົາໄປໃຊ້ໃນຊີວິດ ເຊັ່ນ: ມັນຊ່ວຍຝຶກເຮົາໃຫ້ເຂົ້າໃຈຄວາມຄິດຂອງພະເຢໂຫວາ. ເມື່ອເຮົາອ່ານເລື່ອງຕ່າງໆໃນຄຳພີໄບເບິນ ໃຫ້ພະຍາຍາມຊອກຫາບົດຮຽນທີ່ຈະເອົາໄປໃຊ້ໄດ້. ໃຫ້ຄິດເບິ່ງວ່າເປັນຫຍັງພະເຢໂຫວາຈຶ່ງໃຫ້ຂຽນເລື່ອງນັ້ນໄວ້ໃນຄຳພີໄບເບິນ ແລະເຮົາຈະໄດ້ຮັບປະໂຫຍດຫຍັງຈາກເລື່ອງເຫຼົ່ານັ້ນ. ການເຮັດແບບນີ້ຈະຊ່ວຍເຮົາໃຫ້ຮຽນຮູ້ທີ່ຈະຄິດແລະເຂົ້າໃຈກ່ຽວກັບສິ່ງທີ່ພະເຢໂຫວາພໍໃຈ ແລະຊ່ວຍເຮົາໃຫ້ກວດເບິ່ງຈົນໝັ້ນໃຈວ່າ ‘ອັນໃດແມ່ນສິ່ງທີ່ພະເຈົ້າຕ້ອງການໃຫ້ພວກເຮົາເຮັດ ເຊິ່ງເປັນສິ່ງທີ່ດີ ສົມບູນ ແລະເຮັດໃຫ້ເພິ່ນພໍໃຈ.’—ອ່ານໂຣມ 12:1, 2.a
9. ເຮົາຈະໄດ້ຮັບປະໂຫຍດຫຍັງອີກຖ້າເຮົາໃຊ້ຊີວິດຕາມຫຼັກການໃນຄຳພີໄບເບິນ? (ເຮັບເຣີ 5:13, 14)
9 ການໃຊ້ຊີວິດຕາມຫຼັກການໃນຄຳພີໄບເບິນຊ່ວຍເຮົາໃຫ້ເປັນຜູ້ໃຫຍ່ທາງຄວາມເຊື່ອ. ເມື່ອເຮົາໃຊ້ຊີວິດຕາມຫຼັກການໃນຄຳພີໄບເບິນ ເຮົາກໍຈະສະໜິດກັບພະເຢໂຫວາຫຼາຍຂຶ້ນ. (ອ່ານເຮັບເຣີ 5:13, 14) ປົກກະຕິແລ້ວພໍ່ແມ່ຈະຕັ້ງກົດຫຼາຍຂໍ້ໃຫ້ລູກທີ່ຍັງນ້ອຍ ເພື່ອເຂົາເຈົ້າຈະເຮັດໃນສິ່ງທີ່ຖືກຕ້ອງແລະຫຼີກລ່ຽງທີ່ຈະບໍ່ເຮັດສິ່ງທີ່ຜິດ. ລູກອາດເຊື່ອຟັງຍ້ອນເຂົາເຈົ້າຢ້ານຖືກລົງໂທດ. ແຕ່ພະເຢໂຫວາບໍ່ໄດ້ເຮັດແບບນັ້ນກັບເຮົາຄືກັບວ່າເຮົາເປັນເດັກນ້ອຍ ເພິ່ນເບິ່ງວ່າເຮົາເປັນຜູ້ໃຫຍ່ແລ້ວ. ເພິ່ນໝັ້ນໃຈວ່າເຮົາຈະເຮັດຕາມຄຳແນະນຳຂອງເພິ່ນແລະຕັດສິນໃຈໄດ້ຢ່າງຖືກຕ້ອງ. ຖ້າເຮົາເຮັດແບບນັ້ນ ເຮົາກໍຈະເຮັດໃຫ້ເພິ່ນມີຄວາມສຸກຫຼາຍ.—ພສ. 147:11; ສພສ. 23:15, 26; 27:11
ເຮົາຈະຮູ້ໄດ້ແນວໃດວ່າອັນໃດແມ່ນຫຼັກການ?
10. ເຮົາຈະຮູ້ໄດ້ແນວໃດວ່າອັນໃດແມ່ນຫຼັກການ?
10 ຕອນທີ່ເຮົາອ່ານຄຳພີໄບເບິນແລະພະຍາຍາມຊອກຫາບົດຮຽນຈາກສິ່ງທີ່ອ່ານ ເຮົາຈະເຫັນຫຼັກການທີ່ຊ່ວຍເຮົາໃຫ້ເຂົ້າໃຈວ່າພະເຢໂຫວາຄິດແລະຮູ້ສຶກແນວໃດກ່ຽວກັບເລື່ອງນັ້ນ. ນອກຈາກນັ້ນ ເຮົາຈະຮູ້ວ່າອັນໃດແມ່ນຫຼັກການຖ້າເຮົາພະຍາຍາມຄິດເບິ່ງວ່າເປັນຫຍັງພະເຢໂຫວາຈຶ່ງຕັ້ງກົດໝາຍນັ້ນ. ແຮ່ງເຮົາເຂົ້າໃຈເຫດຜົນ ເຮົາກໍແຮ່ງຈະເຂົ້າໃຈພະເຢໂຫວາຫຼາຍຂຶ້ນ. ແຕ່ເພື່ອເຮົາຈະເຂົ້າໃຈຄວາມຄິດຂອງພະເຢໂຫວາ ເຮົາຕ້ອງອະທິດຖານຂໍໃຫ້ເພິ່ນຊ່ວຍແລະເຮົາເອງກໍຕ້ອງປັບປຸງຄວາມສາມາດໃນການຄິດຫາເຫດຜົນຂອງເຮົາ. (ສພສ. 2:10-12) ເຮົາອາດຖາມໂຕເອງວ່າ: ‘ເປັນຫຍັງພະເຢໂຫວາຈຶ່ງໃຫ້ກົດໝາຍນີ້? ຖ້າພະເຢໂຫວາບໍ່ມັກການປະພຶດແບບນີ້ ແລ້ວເພິ່ນຈະຮູ້ສຶກແນວໃດກັບການປະພຶດທີ່ຄ້າຍໆກັນ? ຂ້ອຍໄດ້ບົດຮຽນຫຍັງຈາກເລື່ອງນີ້ໃນຄຳພີໄບເບິນແລະຂ້ອຍຈະເອົາມາໃຊ້ໃນຊີວິດໄດ້ແນວໃດ?’ ເມື່ອເຮົາເຂົ້າໃຈເຫດຜົນທີ່ຢູ່ເບື້ອງຫຼັງຂອງກົດໝາຍແລະໄດ້ບົດຮຽນຈາກເລື່ອງທີ່ອ່ານໃນຄຳພີໄບເບິນ ເຮົາກໍຈະຕັດສິນໃຈໄດ້ດີໃນຊີວິດ ເຊິ່ງເປັນການຕັດສິນໃຈທີ່ສອດຄ່ອງກັບຄວາມຕ້ອງການຂອງພະເຢໂຫວາ.
11. ໃນຄຳບັນລະຍາຍເທິງພູ ພະເຢຊູຊ່ວຍເຮົາແນວໃດໃຫ້ຮູ້ວ່າອັນໃດແມ່ນຫຼັກການທີ່ຢູ່ໃນຄຳພີໄບເບິນ? (ເບິ່ງຮູບນຳ)
11 ໃນຄຳບັນລະຍາຍເທິງພູ ພະເຢຊູຊ່ວຍເຮົາໃຫ້ຮູ້ວ່າອັນໃດແມ່ນຫຼັກການທີ່ຢູ່ໃນຄຳພີໄບເບິນ. ໃຫ້ເຮົາມາເບິ່ງ 3 ເລື່ອງທີ່ພະເຢຊູເວົ້າເຖິງ ເຊິ່ງແຕ່ລະເລື່ອງເພິ່ນຈະເວົ້າເຖິງກົດໝາຍກ່ອນ. ຈາກນັ້ນກໍເວົ້າເຖິງເຫດຜົນຫຼືຫຼັກການທີ່ຢູ່ເບື້ອງຫຼັງຂອງກົດໝາຍນັ້ນ. ຖ້າເຮົາຄິດຕຶກຕອງສິ່ງທີ່ພະເຢຊູສອນ ເຮົາຈະກໍເຫັນວ່າເຮົາຈະເອົາຫຼັກການເຫຼົ່ານັ້ນມາໃຊ້ໃນທຸກມື້ນີ້ແນວໃດ ແລະເຮົາຈະໄດ້ປະໂຫຍດແນວໃດຈາກຫຼັກການເຫຼົ່ານັ້ນ.
ໃນຄຳບັນລະຍາຍເທິງພູ ພະເຢຊູຊ່ວຍເຮົາໃຫ້ຮູ້ວ່າອັນໃດແມ່ນຫຼັກການທີ່ຢູ່ເບື້ອງຫຼັງກົດໝາຍຂອງພະເຈົ້າ (ເບິ່ງຂໍ້ 11)
12. ຕາມມັດທາຍ 5:21, 22 ຫຼັກການທີ່ຢູ່ເບື້ອງຫຼັງຂອງກົດໝາຍຂໍ້ນີ້ແມ່ນຫຍັງ? (ເບິ່ງຮູບນຳ)
12 ອ່ານມັດທາຍ 5:21, 22. “ຫ້າມຂ້າຄົນ” ຫຼັກການທີ່ຢູ່ເບື້ອງຫຼັງຂອງກົດໝາຍຂໍ້ນີ້ແມ່ນຫຍັງ? ພະເຢໂຫວາບໍ່ຢາກໃຫ້ເຮົາຊັງຄົນອື່ນ. ເພິ່ນບໍ່ຢາກໃຫ້ເຮົາເວົ້າຫຼືເຮັດສິ່ງທີ່ບໍ່ດີຕໍ່ຄົນອື່ນ ຫຼືແມ່ນແຕ່ຄິດບໍ່ດີຕໍ່ເຂົາເຈົ້າເພິ່ນກໍບໍ່ຢາກໃຫ້ຄິດ. ພະເຢຊູບອກວ່າເຖິງວ່າເຮົາບໍ່ໄດ້ລົງມືຂ້າຄົນ ແຕ່ຖ້າເຮົາຊັງພີ່ນ້ອງ ເຮົາກໍບໍ່ໄດ້ເຊື່ອຟັງຫຼັກການທີ່ຢູ່ເບື້ອງຫຼັງຂອງກົດໝາຍຂໍ້ນີ້. ຖ້າຜູ້ໃດ “ໃຈຮ້າຍໃຫ້ຄົນອື່ນບໍ່ເຊົາ” ຫຼືເວົ້າບໍ່ດີໃຫ້ຄົນອື່ນ ລາວຈະຕ້ອງ “ຖືກສານຕັດສິນ” ຍ້ອນຄວາມໃຈຮ້າຍແລະການກະທຳທີ່ບໍ່ດີເປັນສາເຫດເຮັດໃຫ້ລົງມືຂ້າຄົນ.—1ຢຮ. 3:15
13. ເຮົາຈະໃຊ້ຫຼັກການໃນມັດທາຍ 5:21, 22 ໃນຊີວິດຂອງເຮົາແນວໃດ? (ເບິ່ງຮູບນຳ)
13 ເຮົາຈະໃຊ້ຫຼັກການທີ່ຢູ່ມັດທາຍ 5:21, 22 ແນວໃດໃນທຸກມື້ນີ້? ເຮົາບໍ່ຄວນເກັບຄວາມໃຈຮ້າຍຫຼືຄວາມຄຽດແຄ້ນໄວ້. (ລລວ. 19:18; ໂຢບ 36:13) ຍ້ອນຫຍັງ? ຍ້ອນຄວາມຮູ້ສຶກເຫຼົ່ານີ້ຈະກະຕຸ້ນໃຈເຮົາໃຫ້ມີຄວາມກຽດຊັງເຊິ່ງອາດຈະເຮັດໃຫ້ເຮົາເວົ້າຫຼືເຮັດຫຍັງບາງຢ່າງທີ່ເຮັດໃຫ້ຄົນອື່ນເສຍໃຈ. (ສພສ. 10:12) ນີ້ລວມເຖິງການເວົ້າຂວັນແລະການເວົ້າໃສ່ຮ້າຍເຊິ່ງເຮັດໃຫ້ຄົນອື່ນເສຍຊື່ສຽງ. (ສພສ. 20:19; 25:23) ແມ່ນແຕ່ກ່ອນທີ່ຈະມີອິນເຕີເນັດ ສື່ສັງຄົມອອນລາຍ ຫຼືແອັບສົ່ງຂໍ້ຄວາມ ພະເຢຊູກໍໄດ້ໃຫ້ຫຼັກການເພື່ອເຕືອນຄລິດສະຕຽນໃຫ້ລະວັງອັນຕະລາຍຈາກການໃຊ້ສິ່ງເຫຼົ່ານີ້. ສະນັ້ນ ບໍ່ວ່າຈະຢູ່ໃນສະຖານະການໃດ ເຮົາຕ້ອງບໍ່ໃຊ້ຄຳເວົ້າທີ່ສະແດງເຖິງຄວາມກຽດຊັງເຊິ່ງອາດທຳລາຍຊື່ສຽງຂອງຄົນອື່ນ.
(ເບິ່ງຂໍ້ 12-13)
14. ຕາມມັດທາຍ 5:27, 28 ຫຼັກການທີ່ຢູ່ເບື້ອງຫຼັງຂອງກົດໝາຍຂໍ້ນີ້ແມ່ນຫຍັງ? (ເບິ່ງຮູບນຳ)
14 ອ່ານມັດທາຍ 5:27, 28. “ຫ້າມຫຼິ້ນຊູ້.” ຫຼັກການທີ່ຢູ່ເບື້ອງຫຼັງຂອງກົດໝາຍຂໍ້ນີ້ແມ່ນຫຍັງ? ພະເຢໂຫວາບໍ່ພຽງແຕ່ຊັງການເຮັດຜິດສິນລະທຳທາງເພດເທົ່ານັ້ນ ແຕ່ເພິ່ນຍັງຊັງຄວາມຄິດທີ່ພາໃຫ້ເຮົາເຮັດຜິດສິນລະທຳທາງເພດນຳ. ພະເຢຊູບອກວ່າ ຖ້າຜູ້ຊາຍທີ່ແຕ່ງດອງແລ້ວແນມເບິ່ງຜູ້ຍິງທີ່ບໍ່ແມ່ນເມຍຂອງໂຕເອງຈົນເກີດຄວາມຕ້ອງການທາງເພດ ລາວກໍໄດ້ເຮັດຜິດຮ້າຍແຮງແລ້ວ. ສະນັ້ນ ເມື່ອເຮົາມີຄວາມຄິດທີ່ຜິດສິນລະທຳທາງເພດໂຜ່ຂຶ້ນມາໃນຄວາມຄິດ ເຮົາຕ້ອງຟ້າວກຳຈັດມັນທັນທີເຖິງວ່າການເຮັດແບບນີ້ຈະຕ້ອງອອກຄວາມພະຍາຍາມຢ່າງໜັກ. (ມທ. 5:29, 30) ຫຼັກການນີ້ຍັງໃຊ້ໄດ້ກັບຄລິດສະຕຽນທີ່ເປັນໂສດນຳ.
15. ເຮົາຈະໃຊ້ຫຼັກການໃນມັດທາຍ 5:27, 28 ແນວໃດໃນທຸກມື້ນີ້? (ເບິ່ງຮູບນຳ)
15 ເຮົາຈະໃຊ້ຫຼັກການທີ່ຢູ່ມັດທາຍ 5:27, 28 ແນວໃດໃນທຸກມື້ນີ້? ເຮົາຕ້ອງບໍ່ຄິດເຖິງແຕ່ເລື່ອງການເຮັດຜິດສິນລະທຳທາງເພດ. (2ຊມ. 11:2-4; ໂຢບ 31:1-3) ແນ່ນອນວ່າຄົນທີ່ມີຄວາມເຊື່ອເຂັ້ມແຂງຈະບໍ່ຫຍຸ້ງກ່ຽວກັບສື່ລາມົກທຸກຮູບແບບ. ລາວຈະບໍ່ຫາເຫດຜົນແບບຜິດໆວ່າມີແຕ່ເບິ່ງຊື່ໆບໍ່ໄດ້ລົງມືເຮັດ ມັນຊິຜິດຫຍັງ. ລາວຈະບໍ່ພະຍາຍາມຫາຂໍ້ອ້າງວ່າສິ່ງທີ່ເບິ່ງບໍ່ແມ່ນສື່ລາມົກທີ່ໜ້າລັງກຽດຫຍັງເລີຍ ແຕ່ເປັນຮູບພາບຍົ້ວຍວນໜ້ອຍໜຶ່ງຊື່ໆເຊິ່ງບາງຄົນກໍຖືວ່າມັນເປັນເລື່ອງທຳມະດາ ບໍ່ມີພິດມີໄພຫຍັງ. ໃນສະໄໝຂອງພະເຢຊູຍັງບໍ່ມີອຸປະກອນເອເລັກໂຕຣນິກ ໜັງ ຫຼື ຮູບພາບຕ່າງໆເທື່ອ ແຕ່ພະເຢຊູກໍໃຫ້ຫຼັກການເພື່ອສອນເຮົາວ່າພະເຢໂຫວາຮູ້ສຶກແນວໃດກ່ຽວກັບສື່ລາມົກທີ່ຢູ່ໃນອຸປະກອນທີ່ທັນສະໄໝເຫຼົ່ານີ້. ຫຼັກການນີ້ຍັງຊ່ວຍເຮົາໃຫ້ເຂົ້າໃຈວ່າພະເຢໂຫວາຊັງສິ່ງທີ່ຄົນໃນທຸກມື້ນີ້ເຮັດ ເຊັ່ນ: ການສົ່ງສື່ລາມົກໃຫ້ຄົນອື່ນທາງໂທລະສັບ ບໍ່ວ່າຈະເປັນຮູບ ວິດີໂອ ຂໍ້ຄວາມ ຫຼືການລົມກັນທາງໂທລະສັບກ່ຽວກັບການເຮັດຜິດສິນລະທຳທາງເພດ. ການຍຶດໝັ້ນໃນຫຼັກການນີ້ຈະຊ່ວຍຄົນທີ່ແຕ່ງດອງແລ້ວບໍ່ໃຫ້ນອກໃຈຄູ່ຂອງໂຕເອງ. (ມລກ. 2:15) ນອກຈາກນັ້ນ ຫຼັກການນີ້ຍັງຊ່ວຍທຸກຄົນບໍ່ວ່າຈະເປັນຄົນໂສດຫຼືແຕ່ງດອງແລ້ວບໍ່ໃຫ້ເຮັດອັນໃດກໍຕາມທີ່ອາດພາໄປສູ່ການເຮັດຜິດສິນລະທຳທາງເພດ.—ສພສ. 5:3-14
(ເບິ່ງຂໍ້ 14-15)
16. ຕາມມັດທາຍ 5:43, 44 ຫຼັກການທີ່ຢູ່ເບື້ອງຫຼັງຂອງກົດໝາຍຂໍ້ນີ້ແມ່ນຫຍັງ? (ເບິ່ງຮູບນຳ)
16 ອ່ານມັດທາຍ 5:43, 44. “ເຈົ້າຕ້ອງຮັກເພື່ອນບ້ານ.” ຫຼັກການທີ່ຢູ່ເບື້ອງຫຼັງຂອງກົດໝາຍຂໍ້ນີ້ແມ່ນຫຍັງ? ພະເຢໂຫວາຢາກໃຫ້ເຮົາເບິ່ງທຸກຄົນວ່າເປັນເພື່ອນບ້ານຂອງເຮົາແລະສະແດງຄວາມຮັກຕໍ່ເຂົາເຈົ້າ. ຄົນຢິວໃນສະໄໝຂອງພະເຢຊູຕີຄວາມໝາຍຂອງກົດໝາຍຂໍ້ນີ້ໄປໃນທາງທີ່ຜິດໂດຍຄິດວ່າເຂົາເຈົ້າຕ້ອງຮັກແຕ່ຄົນຢິວທີ່ເປັນຄົນຊາດດຽວກັນເທົ່ານັ້ນແລະຊັງສັດຕູໄດ້. ແຕ່ພະເຢຊູຮູ້ວ່າການເຮັດແບບນັ້ນບໍ່ແມ່ນຈຸດປະສົງຂອງກົດໝາຍຂໍ້ນີ້. ເພິ່ນຮູ້ວ່າພະເຢໂຫວາພະເຈົ້າທີ່ມີຄວາມຮັກຢາກໃຫ້ເຮົາເບິ່ງທຸກຄົນວ່າເປັນເພື່ອນບ້ານຂອງເຮົາ ບໍ່ວ່າເຂົາເຈົ້າຈະມາຈາກເຊື້ອຊາດໃດຫຼືປະເທດໃດກໍຕາມ.—ມທ. 5:45-48
17. ເຮົາຈະໃຊ້ຫຼັກການໃນມັດທາຍ 5:43, 44 ໃນຊີວິດຂອງເຮົາແນວໃດ? (ເບິ່ງຮູບນຳ)
17 ເຮົາຈະໃຊ້ຫຼັກການທີ່ຢູ່ມັດທາຍ 5:43, 44 ແນວໃດໃນທຸກມື້ນີ້? ຖ້າເຮົາຮັກເພື່ອນບ້ານ ເຮົາກໍຈະບໍ່ຫຍຸ້ງກ່ຽວກັບສົງຄາມແລະຄວາມຂັດແຍ່ງໃດໆໃນໂລກນີ້. (ອຊຢ. 2:4; ມກ. 4:3) ຫຼັກການຂໍ້ນີ້ຈະຊ່ວຍເຮົາໃຫ້ເຮັດດີກັບທຸກຄົນບໍ່ວ່າເຂົາເຈົ້າຈະມາຈາກປະເທດໃດ ເຊື້ອຊາດໃດ ຫຼືນັບຖືສາສະໜາໃດ. (ກຈກ. 10:34, 35) ນອກຈາກນັ້ນ ຫຼັກການຂໍ້ນີ້ຍັງຊ່ວຍເຮົາໃຫ້ອະໄພຄົນທີ່ເຮັດໃຫ້ເຮົາເຈັບຫຼືຄົນທີ່ເຮັດໃຫ້ຄົນທີ່ເຮົາຮັກເສຍໃຈ.—ມທ. 18:21, 22; ມຣກ. 11:25; ລກ. 17:3, 4
(ເບິ່ງຂໍ້ 16-17)
ຂໍໃຫ້ຕັ້ງໃຈໃຊ້ຊີວິດຕາມຫຼັກການໃນຄຳພີໄບເບິນ
18. (ກ) ເຮົາຄວນຕັ້ງໃຈທີ່ຈະເຮັດຫຍັງ? (ຂ) ເຮົາຈະຮຽນຫຍັງໃນບົດຕໍ່ໄປ?
18 ເຮົາຮູ້ສຶກຂອບໃຈແທ້ໆທີ່ພະເຢໂຫວາບໍ່ໄດ້ເຮັດກັບເຮົາຄືກັບວ່າເຮົາເປັນເດັກນ້ອຍ ແຕ່ເບິ່ງວ່າເຮົາເປັນຜູ້ໃຫຍ່. ເພິ່ນຢາກໃຫ້ເຮົາໃຊ້ຫຼັກການໃນຄຳພີໄບເບິນເພື່ອຊ່ວຍເຮົາໃຫ້ຕັດສິນໃຈໄດ້ດີໃນເລື່ອງຕ່າງໆ. (1ກຣ. 14:20) ຕອນທີ່ເຮົາຕັດສິນໃຈ ຂໍໃຫ້ເຮົາ “ພະຍາຍາມເຂົ້າໃຈວ່າພະເຢໂຫວາຕ້ອງການຫຍັງ.” (ອຟຊ. 5:17) ເຮົາຢາກຕັດສິນໃຈໃຫ້ສອດຄ່ອງກັບຄວາມຕ້ອງການຂອງພະເຢໂຫວາຍ້ອນວ່າເຮົາຮັກເພິ່ນ ບໍ່ແມ່ນຍ້ອນເຮົາຢ້ານຖືກລົງໂທດ. ແຕ່ຍັງມີອີກຢ່າງໜຶ່ງທີ່ຈະຊ່ວຍເຮົາໃຫ້ຕັດສິນໃຈໄດ້ດີ ສິ່ງນັ້ນກໍຄືໃຈຮູ້ຜິດຮູ້ຖືກ. ເຮົາຈະຮຽນເລື່ອງນີ້ໃນບົດຕໍ່ໄປ.
ເພງທີ 95 ແສງສະຫວ່າງທີ່ແຮງກ້າຂຶ້ນ
a ມີຫຼາຍສະຖານະການໃນຊີວິດທີ່ຄລິດສະຕຽນຕ້ອງໃຊ້ຫຼັກການໃນຄຳພີໄບເບິນເພື່ອຕັດສິນໃຈ. ເພື່ອເຮົາຈະຕັດສິນໃຈໄດ້ດີໃນສະຖານະການເຫຼົ່ານັ້ນ ເຮົາອາດຕ້ອງໃຊ້ຫຼັກການຫຼາຍຂໍ້ ບໍ່ແມ່ນໃຊ້ແຕ່ຂໍ້ດຽວ. ສະນັ້ນ ເຮົາຈຶ່ງຕ້ອງຮູ້ວ່າຫຼັກການເຫຼົ່ານັ້ນກ່ຽວຂ້ອງກັນແນວໃດ. ພະເຢໂຫວາໃຫ້ເຮົາມີຄວາມສາມາດໃນການຄິດຫາເຫດຜົນເພື່ອເຮົາຈະຕັດສິນໃຈໃນແບບທີ່ເຮັດໃຫ້ເພິ່ນພໍໃຈ ແລະເພິ່ນຈະອວຍພອນເຮົາ. ໃນສະຕະວັດທຳອິດ ຄົນຢິວທີ່ເຂົ້າມາເປັນຄລິດສະຕຽນຕ້ອງຮຽນຮູ້ທີ່ຈະໃຊ້ຫຼັກການຍ້ອນວ່າກ່ອນໜ້ານັ້ນເຂົາເຈົ້າລຶ້ງເຄີຍແຕ່ກັບການເຮັດຕາມກົດໝາຍຫຼາຍຂໍ້ທີ່ພວກຫົວໜ້າສາສະໜາຕັ້ງຂຶ້ນ.