ເຮົາໄດ້ບົດຮຽນຫຍັງຈາກຜູ້ຍິງໃນຄຳພີໄບເບິນ?

ຄຳຕອບໃນຄຳພີໄບເບິນ

ຄຳພີໄບເບິນມີເລື່ອງຂອງຜູ້ຍິງຫຼາຍຄົນ ຊີວິດຂອງເຂົາເຈົ້າສອນບົດຮຽນຫຼາຍຢ່າງໃຫ້ກັບເຮົາ. (ໂຣມ 15:4; 2 ຕີໂມທຽວ 3:16, 17) ບົດຄວາມນີ້ເວົ້າເຖິງຊີວິດຂອງຜູ້ຍິງບາງຄົນໃນຄຳພີໄບເບິນແບບລວມໆ ຫຼາຍຄົນເປັນຕົວຢ່າງທີ່ໜ້າຮຽນແບບ ແຕ່ບາງຄົນເປັນຕົວຢ່າງທີ່ບໍ່ຄວນເຮັດຕາມ.—1 ໂກຣິນໂທ 10:11; ເຮັບເຣີ 6:12

ອາບີກາຍ

ອາບີກາຍແມ່ນໃຜ? ລາວເປັນເມຍຂອງນາບານ ຜູ້ຊາຍທີ່ລວຍແຕ່ນິດໄສແຂງກະດ້າງ. ອາບີກາຍເປັນຄົນສະຫຼາດແລະຖ່ອມ. ລາວເປັນຄົນງາມແລະມີຄຸນລັກສະນະທີ່ພະເຢໂຫວາພໍໃຈ.—1 ຊາມູເອນ 25:3

ລາວເຮັດຫຍັງ? ອາບີກາຍເຮັດສິ່ງທີ່ສະຫຼາດແລະສຸຂຸມເພື່ອບໍ່ໃຫ້ເກີດເລື່ອງຮ້າຍໆ. ລາວກັບນາບານອາໄສຢູ່ໃນເຂດທີ່ດາວິດໜີມາລີ້ຍ້ອນຖືກຊາອູນໄລ່ລ່າ. ດາວິດຈະເປັນກະສັດຄົນຕໍ່ໄປຂອງຊາດອິດສະຣາເອນ. ຕອນທີ່ດາວິດແລະຄົນຂອງລາວຢູ່ທີ່ນັ້ນ. ເຂົາເຈົ້າປົກປ້ອງຝູງແກະຂອງນາບານຈາກພວກໂຈນ. ແຕ່ຕອນທີ່ຄົນສົ່ງຂ່າວຂອງດາວິດມາຂໍແບ່ງອາຫານຈາກນາບານ ນາບານພັດປະຕິເສດແລະເວົ້າດູຖູກຢຽດຫຍາມ. ດາວິດໃຈຮ້າຍແຮງ ລາວເລີຍຍົກພັກພວກມາຈະຂ້ານາບານແລະຜູ້ຊາຍທຸກຄົນ.—1 ຊາມູເອນ 25:10-12, 22

ເມື່ອອາບີກາຍໄດ້ຍິນເລື່ອງທີ່ຜົວເຮັດ ລາວກໍຟ້າວລົງມືຈັດການທັນທີ. ລາວບອກໃຫ້ຄົນຮັບໃຊ້ກຽມອາຫານແລະເອົາໄປໃຫ້ດາວິດກັບຄົນຂອງລາວ. ລາວເອີ້ນຄົນຮັບໃຊ້ໄປນຳເພື່ອຂໍໃຫ້ດາວິດເມດຕາ. (1 ຊາມູເອນ 25:14-19, 24-31) ເມື່ອດາວິດເຫັນເຄື່ອງຂອງທີ່ອາບີກາຍເອົາມາ ເຫັນຄວາມຖ່ອມ ແລະໄດ້ຍິນຄຳແນະນຳທີ່ສະຫຼາດຂອງລາວ ດາວິດຮູ້ທັນທີວ່າພະເຈົ້າໃຊ້ລາວມາເພື່ອປ້ອງກັນບໍ່ໃຫ້ເກີດເລື່ອງບໍ່ດີ. (1 ຊາມູເອນ 25:32, 33) ຫຼັງຈາກນັ້ນບໍ່ດົນ ນາບານກໍຕາຍແລະອາບີກາຍໄດ້ມາເປັນເມຍຂອງດາວິດ.—1 ຊາມູເອນ 25:37-41

ເຮົາໄດ້ບົດຮຽນຫຍັງຈາກອາບີກາຍ? ເຖິງວ່າອາບີກາຍຈະງາມແລະລວຍ ແຕ່ລາວກໍບໍ່ໄດ້ຄິດວ່າໂຕເອງສຳຄັນ. ລາວພ້ອມຈະຂໍໂທດເຖິງວ່າລາວບໍ່ໄດ້ເຮັດຜິດຫຍັງເພື່ອຮັກສາສັນຕິສຸກ. ລາວຮັບມືກັບສະຖານະການທີ່ເຄັ່ງຕຶງຢ່າງໃຈເຢັນ ມີໄຫວພິບ ກ້າຫານ ແລະສະຫຼາດ.

▸ ອ່ານເລື່ອງເພີ່ມເຕີມຂອງອາບີກາຍໃນບົດຄວາມ “ລາວລົງມືເຮັດຢ່າງສຸຂຸມຮອບຄອບ.”

ເດໂບຣາ

ເດໂບຣາແມ່ນໃຜ? ລາວເປັນຜູ້ພະຍາກອນຍິງຂອງພະເຢໂຫວາພະເຈົ້າຂອງພວກອິດສະຣາເອນ. ເພິ່ນໃຊ້ລາວໃຫ້ບອກປະຊາຊົນກ່ຽວກັບສິ່ງທີ່ເພິ່ນຕ້ອງການໃຫ້ເຂົາເຈົ້າເຮັດ. ພະເຈົ້າຍັງໃຊ້ລາວໃຫ້ຊ່ວຍແກ້ບັນຫາໃຫ້ກັບພວກອິດສະຣາເອນນຳ.—ພວກຜູ້ຕັດສິນ 4:4, 5

ລາວເຮັດຫຍັງ? ຜູ້ພະຍາກອນຍິງເດໂບຣາສະໜັບສະໜູນຜູ້ນະມັດສະການພະເຢໂຫວາຢ່າງກ້າຫານ. ພະເຢໂຫວາບອກໃຫ້ລາວເອີ້ນບາຣາກມາເປັນຜູ້ນຳກອງທັບຂອງອິດສະຣາເອນເພື່ອໄປຕໍ່ສູ້ກັບກອງທັບຂອງຄົນການາອານ. (ພວກຜູ້ຕັດສິນ 4:6, 7) ເມື່ອບາຣາກຂໍໃຫ້ເດໂບຣາໄປນຳ ລາວບໍ່ຢ້ານແລະເຕັມໃຈເຮັດຕາມຄຳຂໍ.—ພວກຜູ້ຕັດສິນ 4:8, 9

ຫຼັງຈາກທີ່ພະເຈົ້າໃຫ້ພວກອິດສະຣາເອນໄດ້ຊະນະ ເດໂບຣາກັບບາຣາກກໍຮ້ອງເພງນຳກັນ ເຊິ່ງສ່ວນໜຶ່ງຂອງເພງທີ່ຮ້ອງແມ່ນເດໂບຣາເປັນຄົນແຕ່ງເອງ. ເພງນັ້ນເວົ້າເຖິງເຫດການທີ່ເກີດຂຶ້ນແລະເວົ້າເຖິງຢາເອນຜູ້ຍິງທີ່ກ້າຫານອີກຄົນໜຶ່ງ ເຊິ່ງມີບົດບາດໃນການເອົາຊະນະພວກການາອານ.—ພວກຜູ້ຕັດສິນບົດທີ 5

ເຮົາໄດ້ບົດຮຽນຫຍັງຈາກເດໂບຣາ? ເດໂບຣາເສຍສະລະແລະກ້າຫານ. ລາວສະໜັບສະໜູນຄົນອື່ນໃຫ້ເຮັດສິ່ງທີ່ພະເຈົ້າເຫັນວ່າຖືກຕ້ອງ ແລະເມື່ອເຂົາເຈົ້າເຮັດແບບນັ້ນ ລາວກໍຊົມເຊີຍໃນສິ່ງທີ່ເຂົາເຈົ້າເຮັດ.

▸ ອ່ານເລື່ອງເພີ່ມເຕີມຂອງອາບີກາຍໃນບົດຄວາມ “ຂ້ອຍລຸກຂຶ້ນມາ ຄືກັບແມ່ທີ່ມາຊ່ວຍພວກອິດສະຣາເອນ.”

ເດລີລາ

ເດລີລາແມ່ນໃຜ? ລາວເປັນຜູ້ທີ່ແຊມຊັນທີ່ເປັນຜູ້ຕັດສິນພວກອິດສະຣາເອນຫຼົງຮັກ.—ພວກຜູ້ຕັດສິນ 16:4, 5

ລາວເຮັດຫຍັງ? ລາວຮັບເງິນຈາກພວກເຈົ້ານາຍຄົນຟີລິດສະຕີນເພື່ອທໍລະຍົດແຊມຊັນ. ແຊມຊັນເປັນຄົນທີ່ພະເຈົ້າໃຊ້ເພື່ອຊ່ວຍພວກອິດສະຣາເອນໃຫ້ລອດຈາກພວກຟີລິດສະຕີນ. ຄົນຟີລິດສະຕີນບໍ່ສາມາດເອົາຊະນະລາວໄດ້ຍ້ອນລາວມີພະລັງພິເສດຈາກພະເຈົ້າ. (ພວກຜູ້ຕັດສິນ 13:5) ພວກເຈົ້ານາຍກໍເລີຍຂໍໃຫ້ເດລີລາຊ່ວຍ.

ເຂົາເຈົ້າໃຫ້ເງິນກັບເດລີລາເພື່ອໃຫ້ລາວຫຼອກຖາມແຊມຊັນວ່າພະລັງບັກຫຼາຍໆຂອງລາວມາແຕ່ໃສ. ເດລີລາເອົາເງິນມາແລ້ວພະຍາມຍາມຊູຊີແຊມຊັນຫຼາຍເທື່ອ. ໃນທີ່ສຸດລາວກໍຮູ້ຄວາມລັບຂອງແຊມຊັນ. (ພວກຜູ້ຕັດສິນ 16:15-17) ລາວບອກຄວາມລັບນັ້ນໃຫ້ພວກເຈົ້ານາຍຄົນຟີລິດສະຕີນຮູ້. ເຂົາເຈົ້າຈຶ່ງຈັບແຊມຊັນໄດ້ແລະຂັງໄວ້ໃນຄຸກ.—ພວກຜູ້ຕັດສິນ 16:18-21

ເຮົາໄດ້ບົດຮຽນຫຍັງຈາກເດລີລາ? ເດລີລາເປັນຕົວຢ່າງທີ່ບໍ່ຄວນເຮັດຕາມ. ຄວາມໂລບຢາກໄດ້ເງິນເຮັດໃຫ້ລາວຫຼອກລວງ ບໍ່ສັດຊື່ ແລະສະແດງຄວາມເຫັນແກ່ໂຕຕໍ່ຜູ້ຮັບໃຊ້ຂອງພະເຢໂຫວາພະເຈົ້າ.

ເອັດສະເທີ

ເອັດສະເທີແມ່ນໃຜ? ລາວເປັນຜູ້ຍິງຄົນຢິວທີ່ກະສັດອາຫະສຸເອຣັດຂອງເປີເຊຍເລືອກມາເປັນລາຊີນີ.

ລາວເຮັດຫຍັງ? ລາຊີນີເອັດສະເທີໃຊ້ອຳນາດເພື່ອປົກປ້ອງຄົນຢິວບໍ່ໃຫ້ຖືກຂ້າລ້າງເຜົ່າພັນ. ລາວຮູ້ວ່າມີການອອກກົດໝາຍໂດຍເລືອກມື້ໜຶ່ງສະເພາະເພື່ອຂ້າພວກຢິວທັງໝົດໃນຈັກກະວັດເປີເຊຍ. ແຜນການຊົ່ວນີ້ມາຈາກຮາມານ ນາຍຍົກລັດຖະມົນຕີ. (ເອັດສະເທີ 3:13-15; 4:1, 5) ແຕ່ເອັດສະເທີໄດ້ຮັບຄວາມຊ່ວຍເຫຼືອຈາກໂມເດກາຍທີ່ເປັນພີ່ນ້ອງຂອງລາວເຊິ່ງມີອາຍຸຫຼາຍກວ່າລາວ ແລະລາວກໍຍອມສ່ຽງຊີວິດເພື່ອເປີດໂປງແຜນຊົ່ວນີ້ໃຫ້ກະສັດອາຫະສຸເອຣັດຜົວຂອງລາວຮູ້. (ເອັດສະເທີ 4:10-16; 7:1-10) ກະສັດອາຫະສຸເອຣັດອະນຸຍາດໃຫ້ເອັດສະເທີກັບໂມເດກາຍອອກກົດໝາຍອີກຂໍ້ໜຶ່ງໃຫ້ຄົນຢິວມີສິດປົກປ້ອງໂຕເອງ. ຄົນຢິວທົ່ວອານາຈັກຈຶ່ງປົກປ້ອງໂຕເອງໄດ້.—ເອັດສະເທີ 8:5-11; 9:16, 17

ເຮົາໄດ້ບົດຮຽນຫຍັງຈາກເອັດສະເທີ? ລາຊີນີເອັດສະເທີເປັນຕົວຢ່າງທີ່ດີແທ້ໆໃນເລື່ອງຄວາມກ້າຫານ ຄວາມຖ່ອມ ແລະຈຽມໂຕ. (ເພງສັນລະເສີນ 31:24; ຟີລິບປອຍ 2:3) ເຖິງວ່າລາວຈະງາມ ມີຕຳແໜ່ງສູງ ແຕ່ລາວກໍຂໍຄຳແນະນຳແລະຄວາມຊ່ວຍເຫຼືອຈາກຄົນອື່ນ. ລາວໃຊ້ໄຫວພິບ ສະແດງຄວາມນັບຖື ແລະກ້າຫານເມື່ອຕ້ອງເວົ້າກັບຜົວ ແລະຕອນທີ່ຊີວິດຂອງຄົນຢິວຕົກຢູ່ໃນອັນຕະລາຍ ລາວກໍກ້າເປີດເຜີຍໂຕເອງວ່າລາວກໍເປັນຄົນຢິວ.

▸ ອ່ານເລື່ອງເພີ່ມເຕີມຂອງເອັດສະເທີໃນບົດຄວາມ “ລາວສ່ຽງຊີວິດເພື່ອປົກປ້ອງປະຊາຊົນຂອງພະເຈົ້າ” ແລະຂອບ “ລາວຮອບຄອບ ກ້າຫານ ແລະບໍ່ເຫັນແກ່ໂຕ.”

ເອວາ

ເອວາແມ່ນໃຜ? ລາວເປັນຜູ້ຍິງຄົນທຳອິດທີ່ມີຊີວິດຢູ່ໂລກ ແລະເປັນຜູ້ຍິງຄົນທຳອິດທີ່ຄຳພີໄບເບິນເວົ້າເຖິງ.

ລາວເຮັດຫຍັງ? ເອວາບໍ່ເຊື່ອຟັງຄຳສັ່ງຂອງພະເຈົ້າ ລາວຖືກສ້າງມາໃຫ້ເປັນມະນຸດທີ່ສົມບູນແບບຄືກັບອາດາມຜົວຂອງລາວ. ລາວມີອິດສະຫຼະທີ່ຈະເລືອກແລະສາມາດພັດທະນາຄຸນລັກສະນະແບບພະເຈົ້າໄດ້ເຊັ່ນ ຄວາມຮັກແລະສະຕິປັນຍາ. (ປະຖົມມະການ 1:27) ລາວຮູ້ເລື່ອງທີ່ພະເຈົ້າບອກອາດາມວ່າ ຖ້າເຂົາເຈົ້າກິນໝາກໄມ້ຈາກຕົ້ນທີ່ຢູ່ກາງສວນ ເຂົາເຈົ້າກໍຈະຕາຍ. ແຕ່ຊາຕານຕົວະເອວາໃຫ້ເຊື່ອວ່າຈະບໍ່ຕາຍ. ທີ່ຈິງ ລາວຖືກຕົວະວ່າຈະມີຊີວິດທີ່ດີກວ່າຖ້າບໍ່ເຊື່ອຟັງພະເຈົ້າ. ລາວເລີຍກິນໝາກໄມ້ຈາກຕົ້ນນັ້ນແລະຊວນຜົວໃຫ້ກິນນຳ.—ປະຖົມມະການ 3:1-6; 1 ຕີໂມທຽວ 2:14

ເຮົາໄດ້ບົດຮຽນຫຍັງຈາກເອວາ? ເອວາເປັນຕົວຢ່າງທີ່ບໍ່ຄວນເຮັດຕາມ. ລາວ ມີແຕ່ຄິດເຖິງຄວາມຕ້ອງການແບບຜິດໆທີ່ພາໄປສູ່ອັນຕະລາຍ. ລາວບໍ່ເຊື່ອຟັງຄຳສັ່ງທີ່ຊັດເຈນຂອງພະເຈົ້າ. ລາວປ່ອຍໃຫ້ຄວາມຢາກໄດ້ໃນສິ່ງທີ່ບໍ່ແມ່ນຂອງໂຕເອງມີຫຼາຍຂຶ້ນເລື້ອຍໆ.—ປະຖົມມະການ 3:6; 1 ໂຢຮັນ 2:16

ຮັນນາ

ຮັນນາແມ່ນໃຜ? ລາວເປັນເມຍຂອງເອນການາແລະເປັນແມ່ຂອງຊາມູເອນ. ຊາມູເອນເປັນຜູ້ພະຍາກອນຄົນສຳຄັນຂອງອິດສະຣາເອນບູຮານ.—1 ຊາມູເອນ 1:1, 2, 4-7

ລາວເຮັດຫຍັງ? ຍ້ອນຮັນນາເປັນໝັນ ລາວຈຶ່ງຂໍໃຫ້ພະເຈົ້າຊ່ວຍ. ຜົວຂອງຮັນນາມີເມຍ 2 ຄົນ. ອີກຄົນໜຶ່ງຊື່ເປນິນນາເຊິ່ງມີລູກຫຼາຍຄົນ. ແຕ່ຮັນນາບໍ່ມີລູກເລີຍເຖິງວ່າຈະແຕ່ງດອງມາຫຼາຍປີແລ້ວ. ເປນິນນາມັກເຍາະເຍີ້ຍຮັນນາ. ຮັນນາໄດ້ອະທິດຖານເຖິງພະເຈົ້າໃນເລື່ອງນີ້. ລາວສາບານກັບພະເຈົ້າວ່າຈະຍົກລູກຄົນນີ້ໃຫ້ເພິ່ນແລະໃຫ້ລູກຮັບໃຊ້ຢູ່ເຕັ້ນສັກສິດທີ່ເປັນເຕັ້ນທີ່ເຄື່ອນທີ່. ຊາດອິດສະຣາເອນໃຊ້ເຕັ້ນນີ້ເພື່ອນະມັດສະການພະເຈົ້າ.—1 ຊາມູເອນ 1:11

ພະເຈົ້າຕອບຄຳອະທິດຖານຂອງຮັນນາ. ລາວມີລູກຊາຍຊື່ຊາມູເອນ. ຮັນນາຮັກສາສັນຍາແລະໃຫ້ຊາມູເອນຮັບໃຊ້ຢູ່ເຕັ້ນສັກສິດຕັ້ງແຕ່ລາວຍັງເປັນເດັກນ້ອຍໆ. (1 ຊາມູເອນ 1:27, 28) ລາວຈະເຮັດເສື້ອແຂນກິ້ນແລະເອົາໄປໃຫ້ລູກຂອງລາວທຸກໆປີ. ບໍ່ດົນຫຼັງຈາກນັ້ນ ພະເຢໂຫວາກໍອວຍພອນໃຫ້ຮັນນາມີລູກອີກ 5 ຄົນ. ລູກຊາຍ 3 ຄົນ ແລະລູກສາວ 2 ຄົນ.—1 ຊາມູເອນ 2:18-21

ເຮົາໄດ້ບົດຮຽນຫຍັງຈາກຮັນນາ? ການອະທິດຖານຈາກໃຈຊ່ວຍຮັນນາໃຫ້ອົດທົນກັບບັນຫາໄດ້. ຄຳອະທິດຖານຂອບໃຈຂອງລາວສະແດງໃຫ້ເຫັນວ່າລາວມີຄວາມເຊື່ອໃນພະເຈົ້າຫຼາຍແທ້ໆ. ຄຳອະທິດຖານນີ້ມີຢູ່ 1 ຊາມູເອນ 2:1-10

▸ ອ່ານເລື່ອງເພີ່ມເຕີມຂອງຮັນນາໃນບົດຄວາມ “ລາວລະບາຍຄວາມໃນໃຈກັບພະເຈົ້າໃນຄຳອະທິດຖານ.”
▸ ເພື່ອຈະຮູ້ວ່າເປັນຫຍັງພະເຈົ້າຍອມໃຫ້ປະຊາຊົນຂອງເພິ່ນໃນສະໄໝບູຮານມີເມຍຫຼາຍຄົນ ໃຫ້ເບິ່ງບົດຄວາມ “ພະເຈົ້າເຫັນດີກັບການມີເມຍຫຼາຍຄົນບໍ?”

ຢາເອນ

ຢາເອນແມ່ນໃຜ? ລາວເປັນເມຍຂອງເຮເບ ຜູ້ຊາຍທີ່ບໍ່ແມ່ນຄົນອິດສະຣາເອນ. ຢາເອນສະໜັບສະໜູນຄົນຂອງພະເຈົ້າຢ່າງກ້າຫານ.

ລາວເຮັດຫຍັງ? ຢາເອນລົງມືເຮັດໂດຍບໍ່ໄດ້ລັງເລເມື່ອຊີເຊຣາ ແມ່ທັບຂອງຄົນການາອານມາທີ່ຄ້າຍພັກຂອງລາວ. ຕອນນັ້ນຊີເຊຣາແພ້ສົງຄາມກັບຄົນອິດສະຣາເອນແລະກຳລັງຊອກບ່ອນລີ້. ຢາເອນຊວນລາວເຂົ້າໄປໃນເຕັ້ນເພື່ອບໍ່ໃຫ້ຄົນເຫັນແລະພັກຜ່ອນ. ແຕ່ຕອນທີ່ຊີເຊຣານອນຫຼັບ ລາວກໍຂ້າຊີເຊຣາ.—ພວກຜູ້ຕັດສິນ 4:17-21

ການກະທຳຂອງຢາເອນເຮັດໃຫ້ຄຳພະຍາກອນທີ່ເດໂບຣາບອກໄວ້ເກີດຂຶ້ນແທ້ທີ່ວ່າ: “ພະເຢໂຫວາຊິມອບຊີເຊຣາໄວ້ໃນມືຂອງຜູ້ຍິງຄົນໜຶ່ງ.” (ພວກຜູ້ຕັດສິນ 4:9) ການກະທຳຂອງຢາເອນເທື່ອນີ້ເຮັດໃຫ້ລາວເປັນ “ຜູ້ຍິງທີ່ໄດ້ພອນຫຼາຍທີ່ສຸດ.”—ພວກຜູ້ຕັດສິນ 5:24

ເຮົາໄດ້ບົດຮຽນຫຍັງຈາກຢາເອນ? ຢາເອນຕັດສິນໃຈລົງມືເຮັດດ້ວຍໂຕເອງ ແລະກ້າຫານ. ປະສົບການຂອງລາວສະແດງໃຫ້ເຫັນວ່າ ພະເຈົ້າສາມາດແຊກແຊງເຫດການຕ່າງໆເພື່ອເຮັດໃຫ້ຄຳພະຍາກອນເກີດຂຶ້ນແທ້.

ເຢເຊເບນ

ເຢເຊເບນແມ່ນໃຜ? ລາວເປັນເມຍຂອງອາຮາບ ກະສັດຂອງຊາດອິດສະຣາເອນ. ເຢເຊເບນບໍ່ໄດ້ເປັນຄົນອິດສະຣາເອນແລະບໍ່ໄດ້ນະມັດສະການພະເຢໂຫວາ. ລາວນະມັດສະການພະບາອານພະເຈົ້າຂອງຄົນການາອານ.

ລາວເຮັດຫຍັງ? ລາຊີນີເຢເຊເບນຂົ່ມເຫງຄົນອື່ນ ໂຫດຫ້ຽມ ແລະໃຊ້ຄວາມຮຸນແຮງ. ລາວສົ່ງເສີມການນະມັດສະການພະບາອານແລະການເຮັດຜິດສິນລະທຳທາງເພດທີ່ກ່ຽວຂ້ອງກັບການນະມັດສະການນັ້ນ. ຂະນະດຽວກັນ ລາວພະຍາຍາມກວາດລ້າງການນະມັດສະການພະເຢໂຫວາພະເຈົ້າທ່ຽງແທ້.—1 ກະສັດ 18:4, 13; 19:1-3

ເຢເຊເບນຕົວະແລະຂ້າຄົນເພື່ອໃຫ້ໄດ້ສິ່ງທີ່ລາວຕ້ອງການ. (1 ກະສັດ 21:8-16) ສຸດທ້າຍລາວຕາຍຢ່າງໂຫດຮ້າຍ ແລະບໍ່ມີຄົນຝັງສົບລາວຄືກັບທີ່ພະເຈົ້າບອກໄວ້ລ່ວງໜ້າ.—1 ກະສັດ 21:23; 2 ກະສັດ 9:10, 32-37

ເຮົາໄດ້ບົດຮຽນຫຍັງຈາກເຢເຊເບນ? ເຢເຊເບນເປັນຕົວຢ່າງທີ່ບໍ່ຄວນເຮັດຕາມ. ລາວເປັນຜູ້ຍິງທີ່ບໍ່ມີສິນລະທຳແລະຍອມເຮັດທຸກຢ່າງເພື່ອໃຫ້ໄດ້ສິ່ງທີ່ຕ້ອງການ. ຊື່ຂອງລາວກາຍເປັນສັນຍະລັກຂອງຜູ້ຍິງທີ່ບໍ່ມີຢາງອາຍ ບໍ່ມີສິນລະທຳ ແລະບໍ່ສົນໃຈວ່າສິ່ງທີ່ເຮັດນັ້ນຈະຖືກຫຼືຜິດ.

ເລອາ

ເລອາແມ່ນໃຜ? ລາວເປັນເມຍຄົນທຳອິດຂອງຢາໂຄບຜູ້ຮັບໃຊ້ທີ່ສັດຊື່ຂອງພະເຈົ້າ. ຣາເຄນນ້ອງສາວຂອງລາວກໍເປັນເມຍອີກຄົນໜຶ່ງຂອງຢາໂຄບ.—ປະຖົມມະການ 29:20-29

ລາວເຮັດຫຍັງ? ເລອາກັບຢາໂຄບມີລູກຊາຍນຳກັນ 6 ຄົນ. (ນາງຣຸດ 4:11) ຕອນທຳອິດ ຢາໂຄບຕັ້ງໃຈຈະແຕ່ງດອງກັບຣາເຄນບໍ່ແມ່ນເລອາ. ແຕ່ລາບານພໍ່ຂອງເລອາໄດ້ໃຫ້ເລອາແຕ່ງດອງກັບຢາໂຄບ ແທນທີ່ຈະເປັນຣາເຄນ. ເມື່ອຢາໂຄບຮູ້ວ່າຖືກຕົວະໃຫ້ແຕ່ງດອງກັບເລອາ ລາວກໍໄປເວົ້າກັບລາບານ. ລາບານກໍອ້າງວ່າຢູ່ນີ້ບໍ່ມີທຳນຽມໃຫ້ນ້ອງແຕ່ງດອງກ່ອນເອື້ອຍ. ອາທິດຕໍ່ມາ ຢາໂຄບກໍແຕ່ງດອງກັບຣາເຄນ.—ປະຖົມມະການ 29:26-28

ຢາໂຄບຮັກຣາເຄນຫຼາຍກວ່າເລອາ. (ປະຖົມມະການ 29:30) ຍ້ອນແນວນີ້ ເລອາຈຶ່ງອິດສານ້ອງສາວທີ່ໄດ້ຮັບຄວາມຮັກແລະຄວາມສົນໃຈຈາກຢາໂຄບ. ພະເຈົ້າຮູ້ວ່າເລອາຮູ້ສຶກແນວໃດ ເພິ່ນຈຶ່ງອວຍພອນໃຫ້ລາວມີລູກຊາຍ 6 ຄົນ ແລະລູກສາວ 1 ຄົນ.—ປະຖົມມະການ 29:31

ເຮົາໄດ້ບົດຮຽນຫຍັງຈາກເລອາ? ເລອາເພິ່ງພະເຈົ້າໂດຍການອະທິດຖານ ເຖິງວ່າຈະມີບັນຫາໃນຄອບຄົວ ແຕ່ລາວກໍຍັງຂອບໃຈພະເຈົ້າ. (ປະຖົມມະການ 29:32-35; 30:20) ເລື່ອງຊີວິດຂອງລາວເຮັດໃຫ້ເຫັນຜົນເສຍຂອງການມີເມຍຫຼາຍຄົນ ເຊິ່ງເປັນສິ່ງທີ່ພະເຈົ້າຍອມໃຫ້ເກີດຂຶ້ນຢູ່ໄລຍະໜຶ່ງ. ມາດຕະຖານການແຕ່ງດອງທີ່ເພິ່ນຍອມຮັບແມ່ນໃຫ້ຜົວເມຍມີຄູ່ແຕ່ງດອງພຽງຄົນດຽວເທົ່ານັ້ນ.—ມັດທາຍ 19:4-6

▸ ອ່ານເລື່ອງເພີ່ມເຕີມຂອງເລອາໄດ້ໃນບົດຄວາມ “ສອງນ້ອງເອື້ອຍຜູ້ມີຄວາມທຸກເຊິ່ງໄດ້ ‘ສ້າງວົງຕະກູນຂອງອິດສະຣາເອນ’”
▸ ເພື່ອຈະຮູ້ວ່າເປັນຫຍັງພະເຈົ້າຍອມໃຫ້ປະຊາຊົນຂອງເພິ່ນໃນສະໄໝບູຮານມີເມຍຫຼາຍຄົນ ໃຫ້ເບິ່ງບົດຄວາມ “ພະເຈົ້າເຫັນດີກັບການມີເມຍຫຼາຍຄົນບໍ?”

ມາທາ

ມາທາແມ່ນໃຜ? ລາວເປັນເອື້ອຍຂອງລາຊະໂຣກັບມາຣິອາ. ເຂົາເຈົ້າຢູ່ບ້ານເບທະນີໃກ້ກັບເມືອງເຢຣູຊາເລັມ.

ລາວເຮັດຫຍັງ? ມາທາເປັນໝູ່ສະໜິດຂອງພະເຢຊູ ເພິ່ນ “ຮັກມາທາກັບມາຣິອາລວມທັງລາຊະໂຣນຳ.” (ໂຢຮັນ 11:5) ມາທາເປັນຜູ້ຍິງທີ່ມີນ້ຳໃຈມັກຕ້ອນຮັບແຂກ. ມີເທື່ອໜຶ່ງເມື່ອພະເຢຊູມາຢາມຢູ່ເຮືອນຂອງລາວ ມາຣິອາເລືອກທີ່ຈະນັ່ງຟັງພະເຢຊູເວົ້າ ສ່ວນມາທາຫຍຸ້ງຢູ່ກັບການເຮັດວຽກເຮືອນ. ມາທາຈົ່ມກັບພະເຢຊູວ່າມາຣິອາບໍ່ໄດ້ຊ່ວຍວຽກເຮືອນລາວ. ພະເຢຊູເລີຍແກ້ໄຂຄວາມຄິດຂອງມາທາດ້ວຍຄວາມກະລຸນາ.—ລູກາ 10:38-42

ຕອນທີ່ລາຊະໂຣບໍ່ສະບາຍ ມາທາກັບມາຣິອາສົ່ງຄົນໄປບອກພະເຢຊູຍ້ອນໝັ້ນໃຈວ່າເພິ່ນປິ່ນປົວລາຊະໂຣໄດ້. (ໂຢຮັນ 11:3, 21) ແຕ່ສຸດທ້າຍລາຊະໂຣກໍຕາຍ ສິ່ງທີ່ມາທາເວົ້າກັບພະເຢຊູສະແດງໃຫ້ເຫັນວ່າ ລາວໝັ້ນໃຈໃນຄຳສັນຍາທີ່ຢູ່ໃນຄຳພີໄບເບິນເລື່ອງການຄືນມາຈາກຕາຍ ແລະລາວກໍໝັ້ນໃຈວ່າພະເຢຊູສາມາດເຮັດໃຫ້ນ້ອງຊາຍຂອງລາວກັບມາມີຊີວິດອີກໄດ້.—ໂຢຮັນ 11:20-27

ເຮົາໄດ້ບົດຮຽນຫຍັງຈາກມາທາ? ມາທາພະຍາຍາມຕ້ອນຮັບແຂກຢ່າງດີ. ລາວເຕັມໃຈຍອມຮັບຄຳແນະນຳ. ລາວເວົ້າເຖິງຄວາມຮູ້ສຶກແລະຄວາມເຊື່ອຂອງລາວຢ່າງເປີດເຜີຍ.

▸ ອ່ານເລື່ອງຂອງມາທາເພີ່ມເຕີມໄດ້ໃນບົດຄວາມ “ຂ້ອຍເຊື່ອ.”

ມາຣິອາ (ແມ່ຂອງພະເຢຊູ)

ມາຣິອາແມ່ນໃຜ? ລາວເປັນຜູ້ຍິງຄົນຢິວແລະຍັງບໍລິສຸດຢູ່ຕອນທີ່ເກີດພະເຢຊູ. ລາວຖືພາລູກຂອງພະເຈົ້າໂດຍການອັດສະຈັນ.

ລາວເຮັດຫຍັງ? ມາຣິອາເຮັດຕາມຄວາມຕ້ອງການຂອງພະເຈົ້າດ້ວຍຄວາມຖ່ອມ. ລາວໝັ້ນກັບໂຢເຊັບແລ້ວຕອນທີ່ທູດສະຫວັນມາຫາແລະບອກວ່າລາວຊິຖືພາ ແລະເກີດລູກຊາຍຜູ້ທີ່ຈະມາເປັນເມຊີອາທີ່ພວກຢິວລໍຖ້າມາດົນ. (ລູກາ 1:26-33) ລາວເຕັມໃຈຍອມຮັບເອົາໜ້າທີ່ນີ້. ຫຼັງຈາກທີ່ພະເຢຊູເກີດ ມາຣິອາກັບໂຢເຊັບກໍມີລູກຊາຍນຳກັນ 4 ຄົນ ແລະມີລູກສາວຢ່າງໜ້ອຍ 2 ຄົນ. ລາວບໍ່ໄດ້ເປັນສາວບໍລິສຸດອີກຕໍ່ໄປ. (ມັດທາຍ 13:55, 56) ເຖິງວ່າລາວໄດ້ຮັບສິດທິພິເສດບໍ່ຄືໃຜ ແຕ່ລາວກໍບໍ່ເຄີຍຢາກໄດ້ຄຳສັນລະເສີນແລະການປະຕິບັດແບບພິເສດ. ບໍ່ວ່າຈະໃນໄລຍະທີ່ພະເຢຊູຮັບໃຊ້ຢູ່ໂລກ ຫຼືຕອນທີ່ລາວເປັນສະມາຊິກຂອງປະຊາຄົມຄລິດສະຕຽນສະຕະວັດທຳອິດ.

ເຮົາໄດ້ບົດຮຽນຫຍັງຈາກມາຣິອາ? ມາຣິອາເປັນຜູ້ຍິງທີ່ສັດຊື່ ລາວເຕັມໃຈເຮັດວຽກທີ່ສຳຄັນທີ່ໄດ້ຮັບມອບໝາຍ. ມາຣິອາມີຄວາມຮູ້ໃນຄຳພີໄບເບິນຢ່າງດີ. ເບິ່ງຄືວ່າລາວຍົກຂໍ້ຄຳພີປະມານ 20 ເທື່ອໃນຄຳເວົ້າຂອງລາວຢູ່ລູກາ 1:46-55

▸ ອ່ານເລື່ອງຂອງມາຣິອາເພີ່ມເຕີມໃນບົດຄວາມ “ຕົວຢ່າງຂອງມາຣິອາສອນຫຍັງເຮົາ.”

ມາຣິອາ (ນ້ອງຂອງມາທາແລະເອື້ອຍຂອງລາຊະໂຣ)

ມາຣິອາແມ່ນໃຜ? ລາວເປັນເອື້ອຍຂອງລາຊະໂຣແລະເປັນນ້ອງສາວຂອງມາທາ. ມາຣິອາເປັນໝູ່ສະໜິດຂອງພະເຢຊູ.

ລາວເຮັດຫຍັງ? ມາຣິອາສະແດງຫຼາຍເທື່ອວ່າລາວໝັ້ນໃຈວ່າພະເຢຊູເປັນລູກຊາຍຂອງພະເຈົ້າ. ລາວເວົ້າດ້ວຍຄວາມເຊື່ອວ່າພະເຢຊູຈະຊ່ວຍລາຊະໂຣນ້ອງຊາຍຂອງລາວບໍ່ໃຫ້ຕາຍໄດ້ ແລະລາວຢູ່ນຳຕອນທີ່ພະເຢຊູປຸກລາຊະໂຣໃຫ້ຄືນມາຈາກຕາຍ. ມາທາເວົ້າໃຫ້ມາຣິອາທີ່ມົວແຕ່ຟັງພະເຢຊູເວົ້າ ແທນທີ່ຈະມາຊ່ວຍເຮັດວຽກເຮືອນ. ແຕ່ພະເຢຊູຊົມເຊີຍມາຣິອາທີ່ລາວໃຫ້ຄວາມຈິງຂອງພະເຈົ້າສຳຄັນກວ່າສິ່ງອື່ນ.—ລູກາ 10:38-42

ອີກເຫດການໜຶ່ງ ມາຣິອາສະແດງນ້ຳໃຈຕໍ່ພະເຢຊູເມື່ອລາວເທ “ນ້ຳມັນຫອມລາຄາແພງ” ໃສ່ຫົວແລະໃສ່ຕີນຂອງພະເຢຊູ. (ມັດທາຍ 26:6, 7) ຄົນອື່ນໆທີ່ຢູ່ຫັ້ນກໍເວົ້າໃຫ້ລາວວ່າເທນ້ຳມັນເສຍຖິ້ມລ້າໆ ແຕ່ພະເຢຊູປົກປ້ອງລາວ. ເພິ່ນບອກວ່າ: “ຂ່າວດີປະກາດໄປຮອດບ່ອນໃດໃນໂລກ ສິ່ງທີ່ຜູ້ຍິງຄົນນີ້ເຮັດກໍຈະຮູ້ໄປຮອດບ່ອນນັ້ນ ແລະຄົນຈະບໍ່ລືມລາວ.”—ມັດທາຍ 24:14; 26:8-13

ເຮົາໄດ້ບົດຮຽນຫຍັງຈາກມາຣິອາ? ມາຣິອາປູກຝັງຄວາມເຊື່ອທີ່ເລິກເຊິ່ງ. ລາວໃຫ້ການນະມັດສະການພະເຈົ້າມາກ່ອນເລື່ອງອື່ນໆ. ລາວອ່ອນນ້ອມແລະຍິນດີສະລະເງິນຈຳນວນຫຼາຍເພື່ອໃຫ້ກຽດພະເຢຊູ.

ມາຣິອາຄົນມັກດາເລນ

ມາຣິອາຄົນມັກດາເລນແມ່ນໃຜ? ລາວເປັນລູກສິດທີ່ສັດຊື່ຂອງພະເຢຊູ.

ລາວເຮັດຫຍັງ? ມາຣິອາຄົນມັກດາເລນເປັນໜຶ່ງໃນຜູ້ຍິງຫຼາຍຄົນທີ່ເດີນທາງຮ່ວມກັບພະເຢຊູກັບພວກລູກສິດ. ລາວສະແດງນ້ຳໃຈໂດຍໃຊ້ເງິນຂອງລາວເພື່ອຊ່ວຍໃຫ້ລູກສິດມີສິ່ງຈຳເປັນ. (ລູກາ 8:1-3) ລາວຕິດຕາມພະເຢຊູຈົນຮອດມື້ສຸດທ້າຍຂອງຊີວິດເພິ່ນ ແລະຕອນທີ່ພະເຢຊູຖືກປະຫານຊິວິດ ລາວກໍຢູ່ຫັ້ນ. ລາວເປັນຄົນໜຶ່ງທີ່ມີສິດທິພິເສດໄດ້ເຫັນພະເຢຊູຫຼັງຈາກທີ່ເພິ່ນຄືນມາຈາກຕາຍ.—ໂຢຮັນ 20:11-18

ເຮົາໄດ້ບົດຮຽນຫຍັງຈາກມາຣິອາຄົນມັກດາເລນ? ມາຣິອາຄົນມັກດາເລນສະໜັບສະໜູນການຮັບໃຊ້ຂອງພະເຢຊູຢ່າງໃຈກວ້າງ ແລະລາວເປັນລູກສິດທີ່ສັດຊື່ຕະຫຼອດຊີວິດ.

ມີຣີອາມ

ມີຣີອາມແມ່ນໃຜ? ລາວເປັນເອື້ອຍຂອງໂມເຊກັບອາໂຣນ ແລະເປັນຄົນທຳອິດທີ່ຄຳພີໄບເບິນເອີ້ນວ່າຜູ້ພະຍາກອນຍິງ.

ລາວເຮັດຫຍັງ? ໃນຖານະຜູ້ພະຍາກອນຍິງ ລາວມີໜ້າທີ່ບອກຂ່າວສານຂອງພະເຈົ້າໃຫ້ຄົນອື່ນຮູ້. ລາວຍິນດີຮັບເອົາໜ້າທີ່ສຳຄັນໃນອິດສະຣາເອນ ແລະຮ່ວມຮ້ອງເພງສະຫຼອງໄຊຊະນະກັບພວກຜູ້ຊາຍຫຼັງຈາກທີ່ພະເຈົ້າທຳລາຍກອງທັບເອຢິບໃນທະເລແດງ.—ອົບພະຍົບ 15:1, 20, 21

ຕໍ່ມາ ຄວາມຍິ່ງແລະຄວາມອິດສາເຮັດໃຫ້ມີຣີອາມກັບອາໂຣນຕຳໜິໂມເຊ. ພະເຈົ້າ “ໄດ້ຍິນ” ແລະຕໍ່ວ່າເຂົາເຈົ້າແຮງໆ. (ຈົດເຊັນບັນຊີ 12:1-9) ຈາກນັ້ນ ພະເຈົ້າກໍເຮັດໃຫ້ມີຣີອາມເປັນພະຍາດຂີ້ທູດຍ້ອນລາວເປັນຄົນເລີ່ມເວົ້າໃນແງ່ລົບ. ໂມເຊຂໍຮ້ອງພະເຈົ້າໃຫ້ຊ່ວຍລາວ ແລ້ວເພິ່ນກໍໄດ້ເຮັດແບບນັ້ນ. ຫຼັງຈາກທີ່ຖືກກັກໂຕ 7 ມື້ ມີຣີອາມກໍໄດ້ຮັບອະນຸຍາດໃຫ້ກັບມາຢູ່ໃນຄ້າຍຂອງພວກອິດສະຣາເອນອີກ.—ຈົດເຊັນບັນຊີ 12:10-15

ຄຳພີໄບເບິນເຮັດໃຫ້ເຮົາຮູ້ວ່າມີຣີອາມຍອມຟັງຄຳຕັກເຕືອນ. ຫຼາຍຮ້ອຍປີຕໍ່ມາ ພະເຈົ້າເວົ້າເຖິງສິດທິພິເສດທີ່ມີຣີອາມໄດ້ຮັບຕອນທີ່ເພິ່ນເຕືອນພວກອິດສະຣາເອນວ່າ: “ເຮົານິແຫຼະທີ່ສົ່ງໂມເຊ ອາໂຣນ ແລະມີຣີອາມໄປຊ່ວຍພວກເຈົ້າ.”—ມີກາ 6:4

ເຮົາໄດ້ບົດຮຽນຫຍັງຈາກມີຣີອາມ? ເລື່ອງຂອງມີຣີອາມເຮັດໃຫ້ເຫັນວ່າ ພະເຢໂຫວາສົນໃຈສິ່ງທີ່ຜູ້ນະມັດສະການຂອງເພິ່ນເວົ້າບໍ່ວ່າຈະເປັນຕໍ່ໜ້າຫຼືລັບຫຼັງ. ເຮົາຍັງໄດ້ຮຽນວ່າເພື່ອຈະເຮັດໃຫ້ພະເຈົ້າພໍໃຈ ເຮົາຕ້ອງບໍ່ເປັນຄົນຍິ່ງແລະອິດສາຍ້ອນນິດໄສແບບນີ້ອາດເຮັດໃຫ້ເຮົາເວົ້າບາງຢ່າງທີ່ທຳລາຍຊື່ສຽງຂອງຄົນອື່ນໄດ້.

ຣາເຄນ

ຣາເຄນແມ່ນໃຜ? ລາວເປັນລູກສາວຂອງລາບານ ແລະເປັນເມຍຄົນທີ່ຢາໂຄບບັນພະບຸລຸດຂອງພວກອິດສະຣາເອນຮັກຫຼາຍທີ່ສຸດ.

ລາວເຮັດຫຍັງ? ຣາເຄນແຕ່ງດອງກັບຢາໂຄບແລະໄດ້ລູກຊາຍ 2 ຄົນ. ຕໍ່ມາ ລູກຊາຍສອງຄົນຂອງລາວເປັນສ່ວນໜຶ່ງຂອງຕົ້ນຕະກູນຂອງພວກອິດສະຣາເອນ ເຊິ່ງມີ 12 ຕະກູນ. ຣາເຄນເຈິກັບຢາໂຄບຕອນທີ່ລາວເບິ່ງແຍງຝູງແກະຂອງພໍ່. (ປະຖົມມະການ 29:9, 10) ລາວ “ເປັນຄົນງາມ” ຫຼາຍກວ່າເລອາເອື້ອຍຂອງລາວ.—ປະຖົມມະການ 29:17

ຢາໂຄບຮັກຣາເຄນແລະຍອມເຮັດວຽກ 7 ປີ ເພື່ອຈະໄດ້ແຕ່ງດອງກັບລາວ. (ປະຖົມມະການ 29:18) ແຕ່ລາບານຕົວະໃຫ້ຢາໂຄບແຕ່ງດອງກັບເລອາກ່ອນ. ຈາກນັ້ນ ລາບານຈຶ່ງອະນຸຍາດໃຫ້ຢາໂຄບແຕ່ງດອງກັບຣາເຄນ.—ປະຖົມມະການ 29:25-27

ຢາໂຄບຮັກຣາເຄນແລະລູກຊາຍທັງສອງຄົນຂອງລາວຫຼາຍກວ່າເລອາແລະລູກ. (ປະຖົມມະການ 37:3; 44:20, 27-29) ນີ້ເຮັດໃຫ້ເຂົາເຈົ້າຊີງດີຊີງເດັ່ນກັນ.—ປະຖົມມະການ 29:30; 30:1, 15

ເຮົາໄດ້ບົດຮຽນຫຍັງຈາກຣາເຄນ? ຣາເຄນອົດທົນກັບບັນຫາທີ່ເກີດຂຶ້ນໃນຄອບຄົວ. ລາວຫວັງສະເໝີວ່າພະເຈົ້າຈະຟັງຄຳອະທິດຖານຂອງລາວ. (ປະຖົມມະການ 30:22-24) ເລື່ອງຂອງລາວເຮັດໃຫ້ເຫັນວ່າການມີເມຍຫຼາຍຄົນເຮັດໃຫ້ຄອບຄົວບໍ່ມີຄວາມສຸກ. ປະສົບການຂອງຣາເຄນສະແດງໃຫ້ເຫັນສະຕິປັນຍາຂອງພະເຈົ້າທີ່ຕັ້ງມາດຕະຖານເລື່ອງຊີວິດຄູ່ວ່າໃຫ້ຜູ້ຊາຍມີເມຍແຕ່ຄົນດຽວ.—ມັດທາຍ 19:4-6

▸ ອ່ານເລື່ອງຂອງຣາເຄນເພີ່ມເຕີມໃນບົດຄວາມ “ສອງເອື້ອຍນ້ອງຜູ້ມີຄວາມທຸກເຊິ່ງ ‘ພວກອິດສະຣາເອນເກີດມາຈາກເຂົາເຈົ້າ’”
▸ ເພື່ອຈະຮູ້ວ່າເປັນຫຍັງພະເຈົ້າຍອມໃຫ້ປະຊາຊົນຂອງເພິ່ນໃນສະໄໝບູຮານມີເມຍຫຼາຍຄົນ ໃຫ້ເບິ່ງບົດຄວາມ “ພະເຈົ້າເຫັນດີກັບການມີເມຍຫຼາຍຄົນບໍ?”

ຣາຮາບ

ຣາຮາບແມ່ນໃຜ? ລາວເປັນໂສເພນີ ອາໄສຢູ່ເມືອງເຢຣິໂກແຜ່ນດິນການາອານ ແລະໄດ້ມາເປັນຜູ້ນະມັດສະການພະເຢໂຫວາພະເຈົ້າ.

ລາວເຮັດຫຍັງ? ຣາຮາບເຊື່ອງພວກອິດສະຣາເອນ 2 ຄົນທີ່ໄປສອດແນມຢູ່ເມືອງເຢຣິໂກ. ລາວເຮັດແບບນັ້ນຍ້ອນໄດ້ຍິນເລື່ອງທີ່ພະເຢໂຫວາພະເຈົ້າຂອງອິດສະຣາເອນປົດປ່ອຍປະຊາຊົນຂອງເພິ່ນຈາກເອຢິບ ແລະຕໍ່ມາກໍໄດ້ຍິນເລື່ອງການໂຈມຕີຕະກູນໜຶ່ງທີ່ເອີ້ນວ່າອາໂມ.

ຣາຮາບຊ່ວຍເຫຼືອຄົນສອດແນມແລະຂໍຮ້ອງເຂົາເຈົ້າບໍ່ໃຫ້ຂ້າລາວກັບຄົນໃນຄອບຄົວຕອນທີ່ພວກອິດສະຣາເອນທຳລາຍເມືອງເຢຣິໂກ. ເຂົາເຈົ້າຕົກລົງ ແຕ່ຣາຮາບຕ້ອງເຮັດບາງຢ່າງ. ລາວຈະຕ້ອງບໍ່ບອກເລື່ອງນີ້ໃຫ້ຄົນອື່ນຮູ້. ລາວກັບຄອບຄົວຈະຕ້ອງຢູ່ແຕ່ໃນເຮືອນຕອນທີ່ພວກອິດສະຣາເອນມາໂຈມຕີແລະຈະຕ້ອງມັດເຊືອກສີແດງສົດໄວ້ຢູ່ປ່ອງຢ້ຽມເພື່ອໃຫ້ຮູ້ວ່າເຮືອນຂອງລາວຢູ່ບ່ອນໃດ. ຣາຮາບເຊື່ອຟັງແລະເຮັດຕາມຄຳແນະນຳທຸກຢ່າງ. ລາວກັບຄອບຄົວຈຶ່ງລອດຊີວິດຕອນທີ່ພວກອິດສະຣາເອນທຳລາຍເມືອງເຢຣິໂກ.

ຕໍ່ມາ ຣາຮາບກໍແຕ່ງດອງກັບຄົນອິດສະຣາເອນ ແລະກະສັດດາວິດແລະພະເຢຊູກໍໄດ້ເກີດມາທາງລູກຫຼານຂອງລາວ.—ໂຢຊວຍ 2:1-24; 6:25; ມັດທາຍ 1:5, 6, 16

ເຮົາໄດ້ບົດຮຽນຫຍັງຈາກຣາຮາບ? ຄຳພີໄບເບິນເວົ້າເຖິງຣາຮາບວ່າເປັນຕົວຢ່າງທີ່ດີໃນເລື່ອງຄວາມເຊື່ອ. (ເຮັບເຣີ 11:30, 31; ຢາໂກໂບ 2:25) ເລື່ອງຂອງຣາຮາບເຮັດໃຫ້ເຮົາຮູ້ວ່າພະເຈົ້າໃຫ້ອະໄພການກະທຳທີ່ບໍ່ດີໃນອະດີດ ແລະເພິ່ນບໍ່ລຳອຽງໂດຍອວຍພອນທຸກຄົນທີ່ໄວ້ໃຈໃນເພິ່ນບໍ່ວ່າຄົນນັ້ນຈະມາຈາກຊາດໃດ.

▸ ອ່ານເລື່ອງຂອງຣາຮາບເພີ່ມຕື່ມໃນບົດຄວາມ “ພະເຈົ້າຖືວ່າລາວ ‘ເປັນຄົນຊອບທຳຍ້ອນການກະທຳ’”

ເຣເບກາ

ເຣເບກາແມ່ນໃຜ? ລາວເປັນເມຍຂອງອີຊາກ. ລາວມີລູກຊາຍຝາແຝດ 2 ຄົນຊື່ຢາໂຄບກັບເອຊາວ.

ລາວເຮັດຫຍັງ? ເຣເບກາເຮັດຕາມຄວາມຕ້ອງການຂອງພະເຈົ້າເຖິງວ່າການກະທຳແບບນັ້ນຈະບໍ່ງ່າຍ. ຕອນທີ່ລາວຕັກນ້ຳຢູ່ນ້ຳສ້າງ ມີຜູ້ຊາຍຄົນໜຶ່ງມາຂໍກິນນ້ຳນຳ ເຣເບກາກໍຟ້າວເອົານ້ຳໃຫ້ລາວກິນ ແລະສະເໜີທີ່ຈະຕັກນ້ຳໃຫ້ຝູງອູດກິນນຳ. (ປະຖົມມະການ 24:15-20) ຜູ້ຊາຍຄົນນັ້ນເປັນຄົນຮັບໃຊ້ຂອງອັບຣາຮາມ. ລາວເດີນທາງໄກເພື່ອໄປຊອກຫາເມຍໃຫ້ອີຊາກ ລູກຊາຍຂອງອັບຣາຮາມ. (ປະຖົມມະການ 24:2-4) ຄົນຮັບໃຊ້ຂອງອັບຣາຮາມອະທິດຖານຂໍໃຫ້ພະເຈົ້າຊ່ວຍໃນເລື່ອງນີ້. ເມື່ອລາວເຫັນຄວາມດຸໝັ່ນແລະມີນ້ຳໃຈຕ້ອນຮັບແຂກຂອງເຣເບກາ ລາວຮູ້ເລີຍວ່າພະເຈົ້າຕອບຄຳອະທິດຖານຂອງລາວແລ້ວ. ຜູ້ຍິງຄົນນີ້ແຫຼະທີ່ພະເຈົ້າເລືອກໃຫ້ເປັນເມຍຂອງອີຊາກ.—ປະຖົມມະການ 24:10-14, 21, 27

ເມື່ອຮູ້ເຫດຜົນທີ່ຄົນຮັບໃຊ້ມາ ເຣເບກາກໍຍອມໄປກັບລາວແລະແຕ່ງດອງກັບອີຊາກ. (ປະຖົມມະການ 24:57-59) ໃນທີ່ສຸດ ເຣເບກາກໍເກີດລູກຊາຍຝາແຝດ. ພະເຈົ້າບອກເຣເບກາວ່າເອຊາວຜູ້ເປັນອ້າຍຈະຮັບໃຊ້ຢາໂຄບຜູ້ເປັນນ້ອງຊາຍ. (ປະຖົມມະການ 25:23) ເມື່ອອີຊາກກຽມຈະອວຍພອນໃຫ້ເອຊາວໃນຖານະລູກກົກ ເຣເບກາກໍເຮັດບາງຢ່າງເພື່ອໃຫ້ຢາໂຄບໄດ້ຮັບພອນນັ້ນແທນຍ້ອນລາວຢາກໃຫ້ເປັນໄປຕາມຄວາມຕ້ອງການຂອງພະເຈົ້າ.—ປະຖົມມະການ 27:1-17

ເຮົາໄດ້ບົດຮຽນຫຍັງຈາກເຣເບກາ? ເຣເບກາເປັນຄົນຈຽມໂຕ ດຸໝັ່ນ ແລະມີນ້ຳໃຈຕ້ອນຮັບແຂກ. ຄຸນລັກສະນະເຫຼົ່ານີ້ເຮັດໃຫ້ລາວປະສົບຄວາມສຳເລັດໃນການເປັນເມຍ ເປັນແມ່ ແລະຜູ້ນະມັດສະການພະເຈົ້າທ່ຽງແທ້.

▸ ອ່ານເລື່ອງຂອງເຣເບກາເພີ່ມເຕີມໃນບົດຄວາມ ‘ຂ້ອຍຈະໄປ.’

ຣຸດ

ຣຸດແມ່ນໃຜ? ລາວເປັນຄົນໂມອາບທີ່ຖິ້ມພະເຈົ້າຂອງລາວ ແລະຖິ້ມບ້ານເກີດເພື່ອໄປເປັນຜູ້ນະມັດສະການພະເຢໂຫວາໃນແຜ່ນດິນອິດສະຣາເອນ.

ລາວເຮັດຫຍັງ? ຣຸດສະແດງຄວາມຮັກຕໍ່ນາໂອມີທີ່ເປັນແມ່ຍ່າ. ນາໂອມີເດີນທາງໄປໂມອາບພ້ອມກັບຜົວແລະລູກຊາຍ 2 ຄົນຍ້ອນຕອນນັ້ນເກີດການຂາດແຄນອາຫານໃນອິດສະຣາເອນ. ລູກຊາຍຂອງລາວແຕ່ງດອງກັບຣຸດແລະໂອປາຜູ້ຍິງຄົນໂມອາບ. ແຕ່ຕໍ່ມາ ຜົວແລະລູກຊາຍຂອງລາວກໍຕາຍ ເຮັດໃຫ້ທັງສາມຄົນຢູ່ນຳກັນໂດຍບໍ່ມີຜົວ.

ນາໂອມີຕັດສິນໃຈເດີນທາງກັບໄປອິດສະຣາເອນ ເຊິ່ງຕອນນີ້ບໍ່ແຫ້ງແລ້ງອີກແລ້ວ. ຣຸດແລະໂອປາກໍເລືອກທີ່ຈະເດີນທາງໄປກັບນາໂອມີ ແຕ່ນາໂອມີບອກໃຫ້ເຂົາເຈົ້າກັບໄປຫາຍາດຕິພີ່ນ້ອງ. ໂອປາກໍເຮັດຕາມ. (ນາງຣຸດ 1:1-6, 15) ແຕ່ຣຸດຢືນຢັນວ່າຈະຢູ່ກັບແມ່ຍ່າ. ລາວຮັກນາໂອມີແລະຢາກນະມັດສະການພະເຢໂຫວາພະເຈົ້າຂອງນາໂອມີ.—ນາງຣຸດ 1:16, 17; 2:11

ຍ້ອນຣຸດພັກດີຕໍ່ແມ່ຍ່າແລະແລະເຮັດວຽກໜັກ ບໍ່ດົນລາວກໍມີຊື່ສຽງທີ່ດີໃນເມືອງເບັດເລເຮັມ ບ້ານເກີດຂອງນາໂອມີ. ໂບອາດເຈົ້າຂອງທົ່ງນາທີ່ຮັ່ງມີປະທັບໃຈຣຸດ. ລາວຊ່ວຍຣຸດກັບນາໂອມີໃຫ້ມີເຂົ້າກິນ. (ນາງຣຸດ 2:5-7, 20) ຕໍ່ມາ ຣຸດໄດ້ແຕ່ງດອງກັບໂບອາດ ແລະໃນທີ່ສຸດ ກະສັດດາວິດແລະພະເຢຊູໄດ້ເກີດມາທາງລູກຫຼານຂອງລາວ.—ມັດທາຍ 1:5, 6, 16

ເຮົາໄດ້ບົດຮຽນຫຍັງຈາກຣຸດ? ຍ້ອນຣຸດຮັກນາໂອມີແລະພະເຢໂຫວາ ຣຸດຈຶ່ງເຕັມໃຈປະບ້ານເກີດແລະຄອບຄົວ. ລາວເປັນຄົນດຸໝັ່ນ ທຸ່ມເທ ແລະພັກດີ ເຖິງວ່າຈະມີບັນຫາຫຼາຍຢ່າງໃນຊີວິດ.

▸ ອ່ານເລື່ອງຂອງຣຸດເພີ່ມເຕີມໃນບົດຄວາມ “ແມ່ໄປໃສ ລູກກໍຈະໄປນຳ” ແລະ “ຜູ້ຍິງທີ່ມີຊື່ສຽງດີ.”

ຊາຣາ

ຊາຣາແມ່ນໃຜ? ລາວເປັນເມຍຂອງອັບຣາຮາມແລະມີລູກຊາຍຊື່ອີຊາກ.

ລາວເຮັດຫຍັງ? ລາວຖິ້ມຊີວິດທີ່ສະດວກສະບາຍໃນເມືອງອູເຣທີ່ຮຸ່ງເຮືອງ ຍ້ອນລາວມີຄວາມເຊື່ອໃນຄຳສັນຍາທີ່ພະເຈົ້າບອກກັບອັບຣາຮາມຜົວຂອງລາວ. ພະເຈົ້າບອກອັບຣາຮາມໃຫ້ອອກຈາກເມືອງອູເຣແລ້ວເດີນທາງໄປການາອານ. ເພິ່ນສັນຍາວ່າຈະອວຍພອນລາວແລະເຮັດໃຫ້ລາວກາຍເປັນຊາດໃຫຍ່. (ປະຖົມມະການ 12:1-5) ຕອນນັ້ນຊາຣາອາດຈະມີອາຍຸ 60 ປາຍປີແລ້ວ. ຕັ້ງແຕ່ນັ້ນມາ ຊາຣາກັບຜົວຂອງລາວກໍໃຊ້ຊີວິດຢູ່ເຕັ້ນທີ່ຍ້າຍບ່ອນຢູ່ໄປເລື້ອຍໆ.

ເຖິງວ່າການຍ້າຍບ່ອນຢູ່ໄປເລື້ອຍໆຈະເຮັດໃຫ້ຊາຣາຕ້ອງສ່ຽງອັນຕະລາຍ ແຕ່ລາວກໍສະໜັບສະໜູນຜົວທີ່ເຮັດຕາມຄຳແນະນຳຂອງພະເຈົ້າ. (ປະຖົມມະການ 12:10, 15) ຊາຣາເປັນໝັນມາຫຼາຍປີແລ້ວ ຍ້ອນແນວນີ້ລາວຈຶ່ງເສຍໃຈຫຼາຍ. ແຕ່ພະເຈົ້າສັນຍາວ່າຈະອວຍພອນໃຫ້ລູກຫຼານຂອງອັບຣາຮາມ. (ປະຖົມມະການ 12:7; 13:15; 15:18; 16:1, 2, 15) ໃນທີ່ສຸດ ພະເຈົ້າກໍຢືນຢັນວ່າຊາຣາຈະມີລູກໃຫ້ອັບຣາຮາມ. ລາວມີລູກຕອນທີ່ກາຍຍາມທີ່ຈະມີລູກໄດ້. ຕອນທີ່ມີລູກ ຊາຣາອາຍຸ 90 ປີ ແລະຜົວຂອງລາວອາຍຸ 100 ປີ. (ປະຖົມມະການ 17:17; 21:2-5) ເຂົາເຈົ້າຕັ້ງຊື່ໃຫ້ລູກວ່າອີຊາກ.

ເຮົາໄດ້ບົດຮຽນຫຍັງຈາກຊາຣາ? ຈາກຕົວຢ່າງຂອງຊາຣາ ເຮົາໝັ້ນໃຈໄດ້ວ່າພະເຈົ້າຈະເຮັດໃຫ້ຄຳສັນຍາຂອງເພິ່ນເກີດຂຶ້ນແທ້ສະເໝີ. ເຖິງວ່າເລື່ອງນັ້ນເບິ່ງຄືຈະເປັນໄປບໍ່ໄດ້. (ເຮັບເຣີ 11:11) ນອກຈາກນັ້ນ ຕົວຢ່າງຂອງຊາຣາໃນຖານະເປັນເມຍເນັ້ນວ່າການໃຫ້ຄວາມນັບຖືກັນໃນຄອບຄົວເປັນເລື່ອງສຳຄັນ.—1 ເປໂຕ 3:5, 6

▸ ອ່ານເລື່ອງຂອງຊາຣາເພີ່ມເຕີມໃນບົດຄວາມ “ລາວເປັນຄົນງາມຫຼາຍ” ແລະ “ພະເຈົ້າເອີ້ນລາວວ່າ ‘ເຈົ້າຍິງ.’”

ສາວເມືອງຊູເລມ

ສາວເມືອງຊູເລມແມ່ນໃຜ? ລາວເປັນສາວງາມທີ່ຢູ່ຊົນນະບົດ ແລະເປັນຕົວລະຄອນຫຼັກໃນເພງຂອງໂຊໂລໂມນ ເຊິ່ງເປັນປຶ້ມໜຶ່ງໃນຄຳພີໄບເບິນ. ແຕ່ບໍ່ມີບັນທຶກໃນຄຳພີໄບເບິນວ່າລາວຊື່ຫຍັງ.

ລາວເຮັດຫຍັງ? ສາວເມືອງຊູເລມມີຄວາມຮັກທີ່ໝັ້ນຄົງຕໍ່ຊາຍໜຸ່ມຄົນລ້ຽງແກະ. (ເພງຂອງໂຊໂລໂມນ 2:16) ແຕ່ຄວາມງາມທີ່ສະດຸດຕາຂອງລາວເຮັດໃຫ້ກະສັດໂຊໂລໂມນຜູ້ຮັ່ງມີມັກແລະຢາກເອົາຊະນະໃຈລາວ. (ເພງຂອງໂຊໂລໂມນ 7:6) ເຖິງວ່າຄົນອື່ນໆຈະບອກໃຫ້ລາວເລືອກໂຊໂລໂມນ ແຕ່ລາວກໍປະຕິເສດ. ສາວເມືອງຊູເລມຮັກຜູ້ຊາຍທີ່ເປັນຄົນລ້ຽງແກະທີ່ຕ່ຳຕ້ອຍແລະບໍ່ປ່ຽນໃຈໄປຈາກລາວ.—ເພງຂອງໂຊໂລໂມນ 3:5; 7:10; 8:6

ເຮົາໄດ້ບົດຮຽນຫຍັງຈາກສາວເມືອງຊູເລມ? ລາວເປັນຄົນງາມແລະມີຫຼາຍຄົນສົນໃຈ ແຕ່ລາວກໍຈຽມໂຕ. ເຖິງວ່າຖືກກົດດັນຫຼືໄດ້ຮັບຂໍ້ສະເໜີວ່າຈະເຮັດໃຫ້ລວຍແລະມີຊື່ສຽງ ແຕ່ລາວກໍບໍ່ເຊົາຮັກຄົນລ້ຽງແກະ. ລາວຄວບຄຸມອາລົມສະເໝີ ແລະຮັກສາຄວາມສະອາດດ້ານສິນລະທຳ.

ເມຍຂອງໂລດ

ເມຍຂອງໂລດແມ່ນໃຜ? ຄຳພີໄບເບິນບໍ່ໄດ້ບອກວ່າລາວຊື່ຫຍັງ ແຕ່ບອກວ່າລາວມີລູກ 2 ຄົນ ແລະລາວກັບຄອບຄົວຢູ່ເມືອງໂຊໂດມ.—ປະຖົມມະການ 19:1, 15

ລາວເຮັດຫຍັງ? ລາວບໍ່ເຊື່ອຟັງຄຳສັ່ງຂອງພະເຈົ້າ. ພະເຈົ້າຕັ້ງໃຈຈະທຳລາຍເມືອງໂຊໂດມແລະເມືອງທີ່ຢູ່ໃກ້ຄຽງຍ້ອນຄົນເຫຼົ່ານັ້ນເຮັດຜິດສິນລະທຳທາງເພດ ແຕ່ເພິ່ນຮັກໂລດທີ່ເຮັດສິ່ງທີ່ຖືກຕ້ອງ ແລະຮັກຄອບຄົວຂອງລາວ. ເພິ່ນຈຶ່ງສົ່ງທູດສະຫວັນ 2 ອົງໃຫ້ມາປົກປ້ອງເຂົາເຈົ້າໃຫ້ປອດໄພ.—ປະຖົມມະການ 18:20; 19:1, 12, 13

ທູດສະຫວັນບອກຄອບຄົວຂອງໂລດໃຫ້ໜີອອກຈາກເມືອງນີ້ ແລະຢ່າຫຼຽວຄືນຫຼັງ ຖ້າບໍ່ຊັ້ນກໍຈະຕາຍ. (ປະຖົມມະການ 19:17) ເມຍຂອງໂລດ “ໄດ້ຫຼຽວຄືນຫຼັງແລະກາຍເປັນເສົາເກືອ.”—ປະຖົມມະການ 19:26

ເຮົາໄດ້ບົດຮຽນຫຍັງຈາກເມຍຂອງໂລດ? ເລື່ອງຂອງລາວເນັ້ນອັນຕະລາຍຂອງການຮັກວັດຖຸສິ່ງຂອງຈົນເຮັດໃຫ້ບໍ່ເຊື່ອຟັງພະເຈົ້າ. ພະເຢຊູຍົກເລື່ອງເມຍຂອງໂລດມາເປັນຕົວຢ່າງເຕືອນໃຈ. ເພິ່ນບອກວ່າ: “ຈື່ເລື່ອງເມຍຂອງໂລດໄວ້ໃຫ້ດີ.”—ລູກາ 17:32.