ໂລກຈະຖືກທຳລາຍບໍ?
ຄຳຕອບຈາກຄຳພີໄບເບິນ
ບໍ່. ໂລກຈະບໍ່ມີມື້ຖືກທຳລາຍ ບໍ່ຖືກໄຟເຜົາ ຫຼື ຖືກແທນທີ່ດ້ວຍດາວດວງອື່ນ ຄຳພີໄບເບິນສອນວ່າພະເຈົ້າສ້າງໂລກໃຫ້ຢູ່ຕະຫຼອດໄປ
“ຄົນດີຈະໄດ້ຢູ່ໃນໂລກ ພວກເຂົາຈະໄດ້ຢູ່ໃນໂລກຕະຫຼອດໄປ.”—ຄຳເພງ 37:29, ລ.ມ
“ພະອົງໃຫ້ໂລກມີຮາກຖານທີ່ໝັ້ນຄົງ ໂລກຈະບໍ່ເຄື່ອນອອກຈາກທີ່ຂອງມັນຕະຫຼອດໄປ.”—ຄຳເພງ 104:5, ລ.ມ
“ໂລກນີ້ຄົງຢູ່ຕະຫຼອດໄປ.”—ຜູ້ເທສະໜາປ່າວປະກາດ 1:4, ລ.ມ
“ພະເຢໂຫວາເປັນຜູ້ສ້າງຟ້າ. ເພິ່ນເປັນພະເຈົ້າທ່ຽງແທ້.ເພິ່ນເປັນຜູ້ສ້າງໂລກແລະເຮັດໃຫ້ໂລກຕັ້ງຢູ່ຢ່າງໝັ້ນຄົງ. ເພິ່ນບໍ່ໄດ້ສ້າງໂລກໄວ້ຊື່ໆ ແຕ່ສ້າງເພື່ອໃຫ້ຄົນອາໄສຢູ່.”—ເອຊາຢາ 45:18, ລ.ມ
ມະນຸດຈະທຳລາຍໂລກບໍ?
ພະເຈົ້າຈະບໍ່ຍອມໃຫ້ມະນຸດທຳລາຍໂລກໃຫ້ເສຍຫາຍຢ່າງຖາວອນ ບໍ່ວ່າຈະໂດຍທາງມົນລະພິດຫຼືສົງຄາມ. ແທນທີ່ຈະເປັນຢ່າງນັ້ນ ເພິ່ນຈະ “ທຳລາຍຜູ້ຄົນທີ່ທຳລາຍໂລກນີ້.” (ພະນິມິດ 11:18) ພະອົງຈະເຮັດແບບນັ້ນໄດ້ແນວໃດ?
ພະເຈົ້າຈະຈັດໃຫ້ມີການປົກຄອງໃນສະຫວັນທີ່ສົມບູນແບບມາແທນທີ່ການປົກຄອງຕ່າງໆຂອງມະນຸດທີ່ບໍ່ສາມາດປົກປ້ອງເບິ່ງແຍງໂລກຂອງເຮົາໄດ້. (ດານີເອນ 2:44; ມັດທາຍ 6:9, 10) ການປົກຄອງຂອງພະເຈົ້າຈະມີພະເຢຊູຄລິດລູກຂອງພະອົງເປັນຜູ້ປົກຄອງ. (ເອຊາຢາ 9:6, 7) ຕອນທີ່ພະເຢຊູຢູ່ເທິງໂລກ ເພິ່ນສະແດງໃຫ້ເຫັນວ່າເພິ່ນມີອຳນາດເໜືອທຳມະຊາດ. (ມາຣະໂກ 4:35-41) ຖານະທີ່ເປັນກະສັດໃນການປົກຄອງຂອງພະເຈົ້າ ພະເຢຊູສະແດງໃຫ້ເຫັນວ່າເພິ່ນສາມາດຄວບຄຸມທຸກຢ່າງໃນໂລກໄດ້. ພະເຢຊູສາມາດສ້າງຫຼືແປງໂລກທີ່ເປັນຢູ່ໃນຕອນນີ້ໃຫ້ກັບມາດີຄືກັບໂລກໃນສະໄໝທີ່ຍັງມີສວນເອເດນໄດ້.—ມັດທາຍ 19:28; ລູກາ 23:43
ໂລກຈະຖືກທຳລາຍດ້ວຍໄຟເປັນຄຳສອນໃນຄຳພີໄບເບິນບໍ?
ບໍ່. ຄຳສອນທີ່ບໍ່ຖືກຕ້ອງນີ້ມັກມາຈາກຄວາມເຂົ້າໃຈຜິດຈາກຂໍ້ຄຳພີທີ່ 2 ເປໂຕ 3:7 ທີ່ບອກວ່າ: “ຟ້າສະຫວັນກັບໂລກທີ່ຢູ່ຕອນນີ້ຈຶ່ງຖືກເກັບໄວ້ເພື່ອໃຫ້ຖືກທຳລາຍດ້ວຍໄຟ.” ໃຫ້ເຮົາມາເບິ່ງຈຸດສຳຄັນ 2 ຈຸດທີ່ຊ່ວຍເຮົາໃຫ້ເຂົ້າໃຈຄວາມໝາຍຂອງຂໍ້ຄຳພີນີ້ນຳກັນ.
ຄຳພີໄບເບິນໃຊ້ຄຳວ່າ “ຟ້າສະຫວັນ” “ໂລກ” ແລະ “ໄຟ” ເພື່ອອ້າງອີງເຖິງບາງສິ່ງ. ຕົວຢ່າງເຊັ່ນ ໃນພາສາເດີມທີ່ປະຖົມມະການ 11:1 ບອກໄວ້ວ່າ: ໂລກ “ເວົ້າພາສາດຽວກັນໝົດ.” ຄຳວ່າ “ໂລກ” ໃນທີ່ນີ້ອ້າງອີງເຖິງສັງຄົມມະນຸດ ບໍ່ແມ່ນໜ່ວຍໂລກ.
ເນື້ອເລື່ອງທີ່ 2 ເປໂຕ 3:7 ຊ່ວຍໃຫ້ເຮົາຮູ້ວ່າ ມີການໃຊ້ຄຳວ່າ “ຟ້າສະຫວັນ” “ໂລກ” ແລະ “ໄຟ” ເພື່ອອ້າງອີງເຖິງອັນໃດ. ໃນຂໍ້ 5ແລະ 6 ເວົ້າເຖິງສະໄໝຂອງໂນອາທີ່ມີເຫດການນ້ຳຖ້ວມໂລກ. ເທື່ອໜຶ່ງ ໂລກໃນສະໄໝບູຮານເຄີຍຖືກທຳລາຍ ແຕ່ໂລກກໍບໍ່ໄດ້ຫາຍໄປໃສ. ແທນທີ່ຈະເປັນແນວນັ້ນ ນ້ຳໄດ້ຖ້ວມກວາດທຳລາຍສັງຄົມມະນຸດ ຫຼືໂລກທີ່ຊົ່ວຮ້າຍອອກໄປ. (ປະຖົມມະການ 6:11) ແລະຍັງທຳລາຍ “ຟ້າສະຫວັນ” ຫຼືຄົນທີ່ປົກຄອງສັງຄົມມະນຸດໄປນຳ ດັ່ງນັ້ນ ຄົນຊົ່ວຈຶ່ງຖືກທຳລາຍ ບໍ່ແມ່ນໂລກຂອງເຮົາ. ໂນອາແລະຄອບຄົວລອດຈາກການທຳລາຍລ້າງເທື່ອນັ້ນ ເຂົາເຈົ້າມີຊີວິດຢູ່ເທິງໂລກຫຼັງຈາກນ້ຳຖ້ວມໂລກ.—ປະຖົມມະການ 8:15-18
ຄ້າຍຄືກັນກັບນ້ຳທີ່ມາຖ້ວມທຳລາຍໃນສະໄໝກ່ອນ “ໄຟ” ທີ່ເວົ້າເຖິງໃນ 2 ເປໂຕ 3:7 ກໍຈະທຳລາຍໂລກຊົ່ວໃນສະໄໝນີ້ ບໍ່ໄດ້ທຳລາຍໜ່ວຍໂລກ. ພະເຈົ້າສັນຍາວ່າຈະມີ “ຟ້າສະຫວັນໃໝ່ແລະໂລກໃໝ່” ເຊິ່ງບ່ອນນັ້ນ “ຈະມີຄວາມຍຸຕິທຳ” (2 ເປໂຕ 3:13) “ຟ້າສະຫວັນໃໝ່” ຫຼືການປົກຄອງໃໝ່ໃນການປົກຄອງຂອງພະເຈົ້າຈະປົກຄອງ “ໂລກໃໝ່” ເຊິ່ງກໍຄືສັງຄົມມະນຸດໃໝ່ທີ່ມີແຕ່ຄົນດີ. ການປົກຄອງນີ້ໂລກຈະເຮັດໃຫ້ໂລກກາຍເປັນສວນອຸທິຍານທີ່ສະຫງົບສຸກ.—ພະນິມິດ 21:1-4