ໜຸ່ມສາວຖາມວ່າ
ເວົ້າຄຳຫຍາບຄາຍບໍ່ດີບ່ອນໃດ?
“ຂ້ອຍໄດ້ຍິນຄຳຫຍາບຄາຍເລື້ອຍໆຈົນລຶ້ງແລ້ວ. ຕອນນີ້ຂ້ອຍຮູ້ສຶກວ່າມັນເປັນເລື່ອງທຳມະດາ.”—ຄລິດສ໌ໂຕເຟີ້ ອາຍຸ 17 ປີ
“ຕອນຂ້ອຍຍັງນ້ອຍ ຂ້ອຍເວົ້າຄຳຫຍາບຄາຍຕະຫຼອດຈົນເປັນນິດໄສ. ມັນເປັນນິດໄສທີ່ຕິດງ່າຍ ແຕ່ເຊົາຍາກ.”—ເຣເບກກາ ອາຍຸ 19 ປີ
ຄຳຖາມທົດສອບ
ເຈົ້າຮູ້ສຶກແນວໃດເມື່ອໄດ້ຍິນຄົນອື່ນເວົ້າຄຳຫຍາບຄາຍ?
ບໍ່ຮູ້ສຶກຫຍັງຍ້ອນວ່າລຶ້ງແລ້ວ
ບໍ່ມັກປານໃດ ແຕ່ກໍພໍຮັບໄດ້
ຮັບບໍ່ໄດ້ ຟັງຈັກເທື່ອກໍບໍ່ມັກ
ເຈົ້າເວົ້າຄຳຫຍາບຄາຍເລື້ອຍໆບໍ?
ບໍ່ເຄີຍ
ບາງເທື່ອ
ເລື້ອຍໆ
ເຈົ້າຄິດແນວໃດກັບການເວົ້າຄຳຫຍາບຄາຍ?
ທຳມະດາ
ບໍ່ຄວນເວົ້າ
ເປັນຫຍັງເລື່ອງນີ້ຈຶ່ງສຳຄັນ?
ເຈົ້າຄິດວ່າການເວົ້າຄຳຫຍາບຄາຍເປັນເລື່ອງທີ່ຮ້າຍແຮງບໍ? ເຈົ້າອາດຄິດວ່າ: ‘ກະບໍ່ແມ່ນເລື່ອງໃຫຍ່ຫຍັງດອກ. ໃນໂລກນີ້ມີບັນຫາທີ່ເປັນຕາຫ່ວງຫຼາຍກວ່ານີ້ອີກ. ນອກຈາກນັ້ນ ທຸກຄົນກໍເວົ້າຄຳຫຍາບຄາຍໝົດຫັ້ນແຫຼະ!’ ແຕ່ເປັນແບບນັ້ນແທ້ໆບໍ?
ເຊື່ອບໍວ່າມີຫຼາຍຄົນທີ່ບໍ່ເວົ້າຄຳຫຍາບຄາຍຍ້ອນເຂົາເຈົ້າມີເຫດຜົນທີ່ດີທີ່ບາງຄົນອາດຈະຄິດບໍ່ພໍ້. ຕົວຢ່າງເຊັ່ນ:
ການເວົ້າຄຳຫຍາບຄາຍບໍ່ໄດ້ເປັນພຽງຄຳເວົ້າຊື່ໆ. ຄຳເວົ້າຈະບົ່ງບອກໃຫ້ຮູ້ວ່າເຈົ້າເປັນຄົນແນວໃດ. ຖ້າເຈົ້າໃຊ້ຄຳຫຍາບຄາຍກໍສະແດງວ່າເຈົ້າບໍ່ສົນໃຈຄວາມຮູ້ສຶກຂອງຄົນອື່ນ. ເຈົ້າເປັນຄົນແບບນັ້ນແທ້ໆບໍ?
ຄຳພີໄບເບິນບອກວ່າ: “ສິ່ງທີ່ອອກຈາກປາກກໍມາຈາກໃຈ.”—ມັດທາຍ 15:18
ຄຳເວົ້າຫຍາບຄາຍເປັນຄືກັບມົນລະພິດ. ເປັນຫຍັງເຮົາຕ້ອງດົມມົນລະພິດນີ້ຈາກຄົນອື່ນ ຫຼືເປັນຄົນທີ່ແພ່ມົນລະພິດນີ້ເອງ?
ການເວົ້າຄຳຫຍາບຄາຍອາດເຮັດໃຫ້ຄົນອື່ນເບິ່ງເຮົາບໍ່ດີ. ປຶ້ມເຊົາເວົ້າຫຍາບຄາຍ (ພາສາອັງກິດ) ບອກວ່າ: “ວິທີທີ່ເຮົາເວົ້າຈະເປັນໂຕກຳນົດວ່າໃຜຈະເປັນໝູ່ຂອງເຮົາ ເຮົາຈະໄດ້ຮັບຄວາມນັບຖືຫຼາຍໜ້ອຍສ່ຳໃດຈາກຄົນໃນຄອບຄົວແລະໝູ່ທີ່ເຮັດວຽກນຳກັນ ສາຍສຳພັນຂອງເຮົາກັບຄົນອື່ນເປັນແນວໃດ ເຮົາຈະສາມາດຊະນະໃຈຄົນຫຼາຍໜ້ອຍສ່ຳໃດ ເຮົາຈະໄດ້ວຽກເຮັດຫຼືໄດ້ຕຳແໜ່ງສູງຂຶ້ນບໍ ແລະຄົນທີ່ເຮົາບໍ່ຮູ້ຈັກຈະມີທ່າທີຕໍ່ເຮົາແນວໃດ.” ປຶ້ມຫົວນີ້ຍັງເວົ້າຕື່ມວ່າ: “ໃຫ້ຖາມໂຕເອງວ່າ ຖ້າເຈົ້າເຊົາເວົ້າຄຳຫຍາບຄາຍສາຍສຳພັນຂອງເຈົ້າກັບຄົນອື່ນຈະດີຂຶ້ນບໍ?”
ຄຳພີໄບເບິນບອກວ່າ: “[ໃຫ້] ກຳຈັດ...ການເວົ້າດູຖູກ.”—ເອເຟໂຊ 4:31
ຄຳຫຍາບຄາຍອາດບໍ່ໄດ້ເຮັດໃຫ້ເຈົ້າເທ້ແບບທີ່ຄິດ. ດຣ. ອາເລັກຊ໌ ແພັກເກີ້ ຂຽນໃນປຶ້ມຝຶກມາລະຍາດ (ພາສາອັງກິດ) ວ່າ: “ບໍ່ມີໃຜຢາກຟັງຄົນທີ່ເວົ້າຄຳຫຍາບຄາຍຕະຫຼອດເວລາ.” ລາວຍັງບອກອີກວ່າພາສາທີ່ຫຍາບຄາຍ “ບໍ່ໄດ້ຖ່າຍທອດຄວາມເຂົ້າໃຈ ສະຕິປັນຍາ ໄຫວພິບ ຫຼືຄວາມເຫັນອົກເຫັນໃຈ. ຖ້າເຈົ້າເວົ້າແບບທີ່ບໍ່ໄດ້ໃຊ້ຄວາມຄິດດີໆ ຄຸມເຄືອແລະບໍ່ມີແນວຄິດສ້າງສັນ ສະຕິປັນຍາຂອງເຈົ້າກໍຈະດ້ອຍໄປນຳ.”
ຄຳພີໄບເບິນບອກວ່າ: “ຢ່າໃຫ້ຄຳຫຍາບຄາຍອອກມາຈາກປາກຂອງພວກເຈົ້າ.”—ເອເຟໂຊ 4:29
ເຈົ້າຈະເຮັດຫຍັງໄດ້ແດ່?
ຕັ້ງເປົ້າໝາຍ. ລອງບໍ່ເວົ້າຄຳຫຍາບຄາຍຈັກ 1 ເດືອນຫຼືໜ້ອຍກວ່ານັ້ນ. ໃຫ້ຈົດໃສ່ປຶ້ມຫຼືປະຕິທິນວ່າເຈົ້າບໍ່ໄດ້ເວົ້າຄຳຫຍາບຄາຍຈັກມື້ແລ້ວ. ແຕ່ເພື່ອຈະເຮັດຕາມເປົ້າໝາຍໄດ້ແທ້ໆ ເຈົ້າອາດຈະຕ້ອງເຮັດບາງຢ່າງນຳອີກ ເຊັ່ນ:
ຫຼີກລ່ຽງຄວາມບັນເທີງທີ່ເຮັດໃຫ້ສະໝອງຂອງເຈົ້າມີແຕ່ຄຳຫຍາບຄາຍ. ຄຳພີໄບເບິນບອກວ່າ: “ການຄົບຫາກັບຄົນທີ່ບໍ່ດີເຮັດໃຫ້ນິດໄສດີໆເສຍໄປ.” (1 ໂກຣິນໂທ 15:33) “ການຄົບຫາ” ບໍ່ໄດ້ມີແຕ່ກັບຄົນ ແຕ່ຍັງລວມເຖິງຄວາມບັນເທີງນຳ ເຊັ່ນ: ໜັງທີ່ເຈົ້າເບິ່ງ ເກມທີ່ເຈົ້າຫຼິ້ນ ແລະເພງທີ່ເຈົ້າຟັງ. ເຄັນເນັດອາຍຸ 17 ປີບອກວ່າ: “ເມື່ອໄດ້ຍິນເພງທີ່ມັກ ເຈົ້າອາດຈະຮ້ອງໄປນຳໂດຍທີ່ບໍ່ໄດ້ສົນໃຈວ່າມັນມີຄຳຫຍາບຄາຍຢູ່ ຍ້ອນທຳນອງມັນມ່ວນ.”
ສະແດງໃຫ້ເຫັນວ່າເຈົ້າມີຄວາມເປັນຜູ້ໃຫຍ່. ບາງຄົນຄິດວ່າການໃຊ້ຄຳຫຍາບຄາຍເຮັດໃຫ້ລາວເບິ່ງຄືເປັນຜູ້ໃຫຍ່. ແຕ່ທີ່ຈິງແລ້ວບໍ່ໄດ້ເປັນແບບນັ້ນ. ຄຳພີໄບເບິນບອກວ່າ ຜູ້ໃຫຍ່ຈະ “ໃຊ້ຄວາມຄິດຈົນແຍກອອກໄດ້ວ່າອັນໃດຖືກອັນໃດຜິດ.” (ເຮັບເຣີ 5:14) ເຂົາເຈົ້າຈະບໍ່ຍອມຫຼຸດມາດຕະຖານຂອງໂຕເອງພຽງເພື່ອຈະເຮັດໃຫ້ຄົນອື່ນປະທັບໃຈ.
ທີ່ຈິງແລ້ວ ຄຳເວົ້າຫຍາບຄາຍມີແຕ່ຈະເຮັດໃຫ້ຄວາມຄິດແລະຈິດໃຈເປິເປື້ອນ ແລະຍັງທຳລາຍບັນຍາກາດທີ່ດີຄືກັບອາກາດທີ່ເປັນພິດ! ປັດຈຸບັນກໍມີຄົນແບບນີ້ຫຼາຍພໍຢູ່ແລ້ວ. ປຶ້ມວິທີເຊົາເວົ້າຄຳຫຍາບຄາຍບອກວ່າ: “ຢ່າເພີ່ມສິ່ງທີ່ເປິເປື້ອນດ້ວຍຄຳເວົ້າທີ່ຫຍາບຄາຍ ແຕ່ໃຫ້ໃຊ້ຄຳເວົ້າທີ່ດີທີ່ຈະເຮັດໃຫ້ບັນຍາກາດສົດຊື່ນ. ໂຕເຈົ້າເອງຈະຮູ້ສຶກດີ ແລະຄົນອື່ນກໍຈະຮັກເຈົ້າຫຼາຍຂຶ້ນ.”