ເປັນຫຍັງພະຍານພະເຢໂຫວາບໍ່ສະຫຼອງວັນເກີດ?
ພະຍານພະເຢໂຫວາບໍ່ສະຫຼອງວັນເກີດຍ້ອນເຮົາເຊື່ອວ່າພະເຢໂຫວາບໍ່ພໍໃຈງານສະຫຼອງແບບນັ້ນ. ຄຳພີໄບເບິນບໍ່ໄດ້ສັ່ງກົງໆວ່າ ຫ້າມສະຫຼອງວັນເກີດ. ແຕ່ຄຳພີໄບເບິນຊ່ວຍເຮົາໃຫ້ຫາເຫດຜົນເພື່ອຈະເຂົ້າໃຈຄວາມຄິດຂອງພະເຢໂຫວາ. ໃຫ້ເຮົາມາເບິ່ງເຫດຜົນ 4 ຢ່າງທີ່ມາຈາກຫຼັກການໃນຄຳພີໄບເບິນກ່ຽວກັບເລື່ອງນີ້.
ການສະຫຼອງວັນເກີດມີຕົ້ນຕໍມາຈາກພວກນອກຮີດ. ປຶ້ມວັດຈະນານຸກົມ Standard Dictionary of Folklore, Mythology, and Legend ຂອງຟັງກ໌ແລະແວກເນລບອກວ່າ ການສະຫຼອງເຫຼົ່ານີ້ມີຕົ້ນຕໍມາຈາກຄວາມເຊື່ອທີ່ວ່າ ໃນວັນເກີດຂອງຄົນໆໜຶ່ງ “ເປັນຫົນທາງຂອງພວກວິນຍານແລະອຳນາດຊົ່ວຮ້າຍທີ່ຈະເຂົ້າມາທຳຮ້າຍຄົນທີ່ເກີດໃນມື້ນັ້ນ” ແລະ “ຄຳອວຍພອນດີໆຂອງໝູ່ທີ່ມາຮ່ວມງານຈະຊ່ວຍປົກປ້ອງເຈົ້າຂອງວັນເກີດ.” ໃນປຶ້ມຄວາມຮູ້ກ່ຽວກັບວັນເກີດ (ພາສາອັງກິດ) ບອກວ່າ ໃນສະໄໝບູຮານບັນທຶກກ່ຽວກັບວັນເດືອນປີເກີດ “ເປັນສ່ວນສຳຄັນໃນການທຳນາຍດວງຊະຕາ” ເຊິ່ງອາໄສ “ຄວາມລຶກລັບຂອງໂຫລາສາດ.” ປຶ້ມຫົວນີ້ຍັງບອກນຳວ່າ: “ຕາມຄວາມເຊື່ອພື້ນບ້ານ ການໃຊ້ຄາຖາອາຄົມປຸກເສກທຽນວັນເກີດຈະເຮັດໃຫ້ຄຳອວຍພອນເປັນຈິງ.”
ແນວໃດກໍຕາມ ຄຳພີໄບເບິນຕຳໜິການໃຊ້ຄາຖາອາຄົມ ການທຳນາຍອະນາຄົດ ການເຊື່ອເລື່ອງຜີແລະວິນຍານ ຫຼື “ເລື່ອງຕ່າງໆໃນທຳນອງນີ້.” (ພະບັນຍັດ 18:14; ຄາລາເຕຍ 5:19-21) ທີ່ຈິງ ສາເຫດໜຶ່ງທີ່ພະເຢໂຫວາຕັດສິນໃຈທຳລາຍເມືອງບາບີໂລນບູຮານກໍຍ້ອນວ່າເຂົາເຈົ້າໃຊ້ໂຫລາສາດເຊິ່ງກ່ຽວຂ້ອງກັບການທຳນາຍໂຊກຊະຕາ. (ເອຊາຢາ 47:11-15) ພະຍານພະເຢໂຫວາບໍ່ໄດ້ຄົ້ນເບິ່ງລາຍລະອຽດຂອງທຳນຽມທຸກຢ່າງ ແຕ່ເມື່ອຄຳພີໄບເບິນຊີ້ໃຫ້ເຫັນຕົ້ນຕໍຂອງທຳນຽມເຫຼົ່ານີ້ຢ່າງຊັດເຈນ ເຮົາກໍໃສ່ໃຈເລື່ອງເຫຼົ່ານີ້ຢ່າງຈິງຈັງ.
ຄລິດສະຕຽນລຸ້ນທຳອິດບໍ່ສະຫຼອງວັນເກີດ. ປຶ້ມສາລານຸກົມເດີ ເວີນ ບຸກ ບອກວ່າ: “ຄລິດສະຕຽນລຸ້ນທຳອິດຖືວ່າງານສະຫຼອງວັນເກີດເປັນທຳນຽມນອກຮີດ.” ຄຳພີໄບເບິນສະແດງໃຫ້ເຫັນວ່າພວກອັກຄະສາວົກຂອງພະເຢຊູລວມທັງພວກລູກສິດຄົນອື່ນໆທີ່ພະເຢຊູສອນໄດ້ວາງແບບຢ່າງໄວ້ໃຫ້ຄລິດສະຕຽນທຸກຄົນເຮັດຕາມ.—2 ເທຊະໂລນິກ 3:6
ງານດຽວທີ່ຄລິດສະຕຽນໄດ້ຮັບຄຳສັ່ງໃຫ້ສະຫຼອງບໍ່ໄດ້ກ່ຽວຂ້ອງກັບການເກີດ ແຕ່ກ່ຽວຂ້ອງກັບການຕາຍເຊິ່ງກໍຄືການຕາຍຂອງພະເຢຊູ. (ລູກາ 22:17-20) ເລື່ອງນີ້ບໍ່ແປກເລີຍເພາະຄຳພີໄບເບິນບອກວ່າ “ວັນຕາຍກໍດີກວ່າວັນເກີດ.” (ປັນຍາຈານ 7:1) ໃນມື້ສຸດທ້າຍທີ່ພະເຢຊູມີຊີວິດຢູ່ໃນໂລກ ເພິ່ນສ້າງຊື່ສຽງທີ່ດີກັບພະເຈົ້າແລະເຮັດໃຫ້ມື້ທີ່ເພິ່ນຕາຍດີກວ່າມື້ທີ່ເພິ່ນເກີດ.—ເຮັບເຣີ 1:4
ຄຳພີໄບເບິນບໍ່ເຄີຍບອກວ່າຜູ້ຮັບໃຊ້ຂອງພະເຢໂຫວາສະຫຼອງວັນເກີດ. ນີ້ເປັນເລື່ອງທີ່ໜ້າສົນໃຈຍ້ອນຄຳພີໄບເບິນໝົດຫົວໄດ້ເວົ້າເຖິງການສະຫຼອງວັນເກີດພຽງແຕ່ 2 ເທື່ອ ແລະທັງສອງເທື່ອກໍບໍ່ແມ່ນການສະຫຼອງຂອງຜູ້ຮັບໃຊ້ພະເຢໂຫວາ. ນອກຈາກນັ້ນ ງານວັນເກີດທັງສອງເທື່ອກໍເກີດເລື່ອງທີ່ບໍ່ດີ.—ປະຖົມມະການ 40:20-22; ມາຣະໂກ 6:21-29
ການບໍ່ສະຫຼອງວັນເກີດເຮັດໃຫ້ເດັກນ້ອຍທີ່ເປັນພະຍານພະເຢໂຫວາຮູ້ສຶກວ່າຂາດບາງຢ່າງບໍ?
ພໍ່ແມ່ທີ່ເປັນພະຍານພະເຢໂຫວາກໍຄືກັບພໍ່ແມ່ທີ່ດີຄົນອື່ນໆ ເຂົາເຈົ້າສະແດງຄວາມຮັກຕໍ່ລູກຕະຫຼອດປີເຊິ່ງລວມເຖິງການໃຫ້ຂອງຂວັນແລະຈັດງານລ້ຽງສັງສັນ. ເຂົາເຈົ້າພະຍາຍາມຮຽນແບບຕົວຢ່າງທີ່ດີຂອງພະເຢໂຫວາທີ່ຕ້ອງການຈະໃຫ້ສິ່ງດີໆກັບລູກຂອງເພິ່ນຢູ່ສະເໝີ. (ມັດທາຍ 7:11) ເດັກນ້ອຍທີ່ເປັນພະຍານພະເຢໂຫວາຈຶ່ງບໍ່ຮູ້ສຶກວ່າຂາດບາງຢ່າງ. ເຮົາຈະເຫັນຈາກຄຳເວົ້າຕໍ່ໄປນີ້:
“ຂ້ອຍດີໃຈຫຼາຍທີ່ໄດ້ຮັບຂອງຂວັນໃນມື້ທີ່ບໍ່ຄິດວ່າຈະໄດ້ຮັບ.”—ແທມມີ້ ອາຍຸ 12 ປີ
“ເຖິງວ່າຂ້ອຍບໍ່ເຄີຍໄດ້ຂອງຂວັນວັນເກີດ ແຕ່ພໍ່ແມ່ກໍຊື້ຂອງຂວັນໃຫ້ຂ້ອຍເລື້ອຍໆ. ຂ້ອຍມັກແບບນີ້ແຫຼະຍ້ອນມັນຕື່ນເຕັ້ນດີ.”—ເກເກີຣີ ອາຍຸ 11 ປີ
“ຂ້ອຍຄິດວ່າເວລາພຽງ 10 ນາທີ ເຄັກສອງສາມປ່ຽງ ກັບເພງອີກເພງໜຶ່ງບໍ່ໜ້າຈະເອີ້ນວ່າປາຕີ້? ລອງມາເຮືອນຂ້ອຍແມ້ ແລ້ວຈະໄດ້ຮູ້ວ່າປາຕີ້ແທ້ໆເປັນແນວໃດ!”—ເອຣິກ ອາຍຸ 6 ປີ