ການເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າໝາຍເຖິງຫຍັງ?
‘ຂໍໂຜດ [ພະເຈົ້າ] ໃຫ້ທ່ານທັງຫຼາຍມີໃຈອັນດຽວກັນຕາມພະຄລິດເຍຊູ.’—ໂລມ 15:5
1, 2. (ກ) ພີ່ນ້ອງຫຼາຍຄົນຮູ້ສຶກແນວໃດກັບການເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ? (ຂ) ຄຳຖາມທີ່ສຳຄັນຫຍັງທີ່ເຮົາຈະພິຈາລະນາໃນບົດຄວາມນີ້?
ພີ່ນ້ອງຍິງຄົນໜຶ່ງໃນການາດາບອກວ່າ ການເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າເຮັດໃຫ້ລາວມີຄວາມສຸກຫຼາຍຂຶ້ນແລະຊ່ວຍລາວໃຫ້ຮັບມືກັບບັນຫາໃນຊີວິດໄດ້. ພີ່ນ້ອງຊາຍຄົນໜຶ່ງໃນເບຣຊິນເຊິ່ງແຕ່ງດອງໄດ້ 23 ປີແລ້ວບອກວ່າ: ການເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຊ່ວຍລາວກັບເມຍໃຫ້ມີຄວາມສຸກໃນຊີວິດຄູ່. ພີ່ນ້ອງຊາຍຄົນໜຶ່ງໃນຟີລິບປິນບອກວ່າ ການເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຊ່ວຍລາວໃຫ້ມີຄວາມສະຫງົບໃຈແລະເຂົ້າກັບພີ່ນ້ອງທີ່ມີພູມຫຼັງແຕກຕ່າງກັນໄດ້.
2 ເຫັນໄດ້ແຈ້ງວ່າ ເຮົາໄດ້ຮັບປະໂຫຍດຫຼາຍຢ່າງເມື່ອເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ. ເຮົາຕ້ອງເຮັດແນວໃດເພື່ອຈະເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າແລະໄດ້ຮັບປະໂຫຍດເຫຼົ່ານັ້ນ? ທຳອິດ ເຮົາຕ້ອງເຂົ້າໃຈວ່າຄຳພີໄບເບິນເວົ້າແນວໃດກ່ຽວກັບຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າເຊິ່ງເປັນຄົນທີ່ຄິດຄືກັບພະເຢໂຫວາຄິດ. ໃນບົດຄວາມນີ້ເຮົາຈະໄດ້ຮັບຄຳຕອບຈາກ 3 ຄຳຖາມທີ່ສຳຄັນ (1) ຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າເປັນຄົນແບບໃດ? (2) ມີຕົວຢ່າງຂອງໃຜແດ່ທີ່ຈະຊ່ວຍເຮົາໃຫ້ເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຫຼາຍຂຶ້ນ? (3) ການພະຍາຍາມມີ “ຈິດໃຈຢ່າງພະຄລິດ” ຊ່ວຍເຮົາໃຫ້ເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າແນວໃດ?
ຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າເປັນຄົນແບບໃດ?
3. ຄຳພີໄບເບິນເວົ້າແນວໃດກ່ຽວກັບຄວາມແຕກຕ່າງຂອງຄົນທີ່ຄິດແບບໂລກກັບຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ?
3 ໂປໂລຊ່ວຍເຮົາໃຫ້ເຂົ້າໃຈຄວາມແຕກຕ່າງລະຫວ່າງ “ຄົນທີ່ຄິດແບບໂລກ” ແລະ “ຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ.” (ອ່ານ 1 ໂກລິນໂທ 2:14-16a) ຄົນທີ່ຄິດແບບໂລກຈະ “ບໍ່ຍອມຮັບສິ່ງທີ່ມາຈາກພະລັງຂອງພະເຈົ້າ ລາວຖືວ່າສິ່ງເຫຼົ່ານັ້ນເປັນເລື່ອງໂງ່ ແລະລາວບໍ່ສາມາດເຂົ້າໃຈໄດ້.” ກົງກັນຂ້າມ ຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຈະ “ກວດສອບທຸກສິ່ງໄດ້” ແລະມີ “ຈິດໃຈຢ່າງພະຄລິດ” ເຊິ່ງໝາຍເຖິງການພະຍາຍາມຄິດຄືກັບພະເຍຊູ. ໂປໂລກະຕຸ້ນເຮົາໃຫ້ເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ. ໃຫ້ເຮົາມາເບິ່ງຄວາມແຕກຕ່າງອື່ນໆອີກລະຫວ່າງຄົນທີ່ຄິດແບບໂລກກັບຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ?
4, 5. ຄົນທີ່ຄິດແບບໂລກເປັນຄົນແນວໃດ?
4 ຄົນທີ່ຄິດແບບໂລກຄືຄົນທີ່ສົນໃຈແຕ່ຄວາມຕ້ອງການຂອງຕົວເອງ. ໂປໂລບອກວ່າຄວາມຄິດແບບນີ້ເປັນ ‘ນ້ຳໃຈທີ່ກຳລັງມີອິດທິພົນຕໍ່ຄົນທີ່ບໍ່ເຊື່ອຟັງ.’ (ເອເຟດ 2:2, ລ.ມ.) ນ້ຳໃຈນີ້ກະຕຸ້ນຄົນສ່ວນຫຼາຍໃຫ້ເຮັດຕາມຄົນທີ່ຢູ່ອ້ອມຂ້າງ. ເຂົາເຈົ້າເຮັດສິ່ງທີ່ຕົວເອງຄິດວ່າຖືກຕ້ອງໂດຍບໍ່ສົນໃຈມາດຕະຖານຂອງພະເຈົ້າ. ຄົນທີ່ຄິດແບບໂລກມັກຈະຄິດແຕ່ເລື່ອງເງິນຄຳ ໜ້າທີ່ຕຳແໜ່ງ ແລະສິດຜົນປະໂຫຍດທີ່ຕົວເອງຄວນຈະໄດ້ສຳຄັນຫຼາຍກວ່າສິ່ງອື່ນ.
5 ຄຳພີໄບເບິນເອີ້ນສິ່ງທີ່ຄົນທີ່ຄິດແບບໂລກມັກເຮັດວ່າ: “ການກະທຳທີ່ເກີດຈາກຄວາມຕ້ອງການຂອງຮ່າງກາຍທີ່ມີບາບ.” (ຄາລາຊີ 5:19-21, ລ.ມ.) ຈົດໝາຍສະບັບທຳອິດທີ່ໂປໂລຂຽນເຖິງຄລິດສະຕຽນຢູ່ເມືອງໂກລິນໂທ ລາວເວົ້າເຖິງການກະທຳອື່ນໆຂອງຄົນທີ່ຄິດແບບໂລກເຮັດ ເຊັ່ນ: ມັກແບ່ງຝ່າຍ ສ້າງຄວາມແຕກແຍກ ສົ່ງເສີມໃຫ້ເກີດຄວາມຂັດແຍ່ງກັນ ຟ້ອງຮ້ອງກັນ ບໍ່ນັບຖືຄົນທີ່ເປັນຜູ້ນຳ ແລະໃຫ້ເລື່ອງກິນເລື່ອງດື່ມເປັນສິ່ງສຳຄັນ. ຄົນທີ່ຄິດແບບໂລກຈະບໍ່ຕ້ານທານເມື່ອຖືກລໍ້ໃຈໃຫ້ເຮັດສິ່ງທີ່ຜິດ. (ສຸພາສິດ 7:21, 22) ຢູເດບອກວ່າຄົນທີ່ຄິດແບບໂລກຈະບໍ່ມີພະລັງບໍລິສຸດຂອງພະເຈົ້າ.—ຢູເດ 18, 19
6. ຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າເປັນຄົນແບບໃດ?
6 ກົງກັນຂ້າມ ຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຈະໃຫ້ສາຍສຳພັນຂອງລາວກັບພະເຢໂຫວາເປັນສິ່ງສຳຄັນທີ່ສຸດໃນຊີວິດ. ລາວຍອມໃຫ້ພະລັງບໍລິສຸດຊີ້ນຳແລະຕັ້ງໃຈຮຽນແບບພະເຢໂຫວາ. (ເອເຟດ 5:1) ລາວຈະພະຍາຍາມຮຽນຮູ້ວິທີຄິດຂອງພະເຢໂຫວາແລະເບິ່ງສິ່ງຕ່າງໆຄືກັບທີ່ພະອົງເບິ່ງ. ພະເຈົ້າເປັນບຸກຄົນແທ້ໆສຳລັບລາວ. ນອກຈາກນັ້ນ ລາວຈະໃຊ້ມາດຕະຖານຂອງພະອົງໃນທຸກແງ່ມຸມຂອງຊີວິດ. (ຄຳເພງ 119:33; 143:10) ແລະລາວຈະບໍ່ຫຍຸ້ງກ່ຽວກັບ “ການກະທຳທີ່ເກີດຈາກຄວາມຕ້ອງການຂອງຮ່າງກາຍທີ່ມີບາບ” ແຕ່ຈະພະຍາຍາມມີ “ຜົນທີ່ເກີດຈາກພະລັງຂອງພະເຈົ້າ.” (ຄາລາຊີ 5:22, 23, ລ.ມ.) ຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຈະໃຫ້ການນະມັດສະການພະອົງເປັນສິ່ງສຳຄັນທີ່ສຸດໃນຊີວິດ.
7. ຄຳພີໄບເບິນເວົ້າແນວໃດກ່ຽວກັບຄົນທີ່ໄດ້ຮັບການຊີ້ນຳຈາກຳພະລັງຂອງພະເຈົ້າ?
7 ພະເຍຊູບອກວ່າຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າມີຄວາມສຸກ. ມັດທາຍ 5:3 (ລ.ມ.) ບອກວ່າ: “ຄົນທີ່ຮູ້ຕົວວ່າຈຳເປັນຕ້ອງເພິ່ງພະເຈົ້າກໍມີຄວາມສຸກ ເພາະລັດຖະບານສະຫວັນເປັນຂອງເຂົາ” ແລະໂລມ 8:6 ຍັງບອກຂໍ້ດີຂອງການໄດ້ຮັບການຊີ້ນຳຈາກພະລັງຂອງພະເຈົ້າວ່າ: “ຄວາມຄຶດແຫ່ງເນື້ອໜັງກໍເປັນຄວາມຕາຍ ແຕ່ວ່າຄວາມຄຶດແຫ່ງພະວິນຍານກໍເປັນຊີວິດແລະຄວາມສຸກສຳລານ.” ດັ່ງນັ້ນ ຖ້າເຮົາເຮັດຕາມການຊີ້ນຳຈາກພະລັງຂອງພະເຈົ້າ ຕອນນີ້ເຮົາຈະມີສັນຕິສຸກກັບພະເຈົ້າ ມີໃຈສະຫງົບ ແລະມີຄວາມຫວັງທີ່ຈະໄດ້ຊີວິດຕະຫຼອດໄປ.
8. ເປັນຫຍັງເປັນເລື່ອງຍາກທີ່ເຮົາຈະໃຫ້ພະລັງຂອງພະເຈົ້າຊີ້ນຳຊີວິດເຮົາສະເໝີ?
8 ເນື່ອງຈາກເຮົາຢູ່ໃນໂລກທີ່ອັນຕະລາຍ ຢູ່ໃນທ່າມກາງຄົນທີ່ບໍ່ໄດ້ຄິດຄືກັບພະເຈົ້າ ເຮົາຈຶ່ງຕ້ອງພະຍາຍາມຢ່າງໜັກເພື່ອປົກປ້ອງຄວາມຄິດຂອງເຮົາ. ຖ້າເຮົາບໍ່ເອົາຄວາມຄິດຂອງພະເຢໂຫວາໃສ່ໃນຄວາມຄິດຂອງເຮົາ ໂລກກໍຈະເອົາຄວາມຄິດແລະນ້ຳໃຈແບບໂລກໃສ່ໃນຫົວເຮົາແທນ. ແລ້ວເຮົາຈະຫຼີກລ່ຽງໄດ້ແນວໃດ? ເຮົາຈະໃຫ້ພະລັງຂອງພະເຈົ້າຊີ້ນຳຊີວິດເຮົາແນວໃດ?
ຮຽນຮູ້ຈາກຕົວຢ່າງທີ່ດີ
9. (ກ) ສິ່ງໃດຈະຊ່ວຍເຮົາໃຫ້ເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ? (ຂ) ມີຕົວຢ່າງທີ່ດີຂອງໃຜແດ່ທີ່ເຮົາຈະເບິ່ງນຳກັນ?
9 ຄືກັບລູກທີ່ຕ້ອງຮຽນຮູ້ຈາກພໍ່ແມ່ແລະຮຽນແບບຕົວຢ່າງທີ່ດີຂອງພໍ່ແມ່ ເຮົາກໍຕ້ອງຮຽນຮູ້ແລະຮຽນແບບຕົວຢ່າງຂອງຄົນທີ່ສະໜິດກັບພະເຢໂຫວາ. ສິ່ງນີ້ຈະສອນເຮົາໃຫ້ຮູ້ວ່າເຮົາຈະເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າໄດ້ແນວໃດ. ໃນອີກແງ່ໜຶ່ງ ການເບິ່ງຕົວຢ່າງຂອງຄົນທີ່ຄິດແບບໂລກຈະຊ່ວຍເຮົາບໍ່ໃຫ້ເຮັດແບບເຂົາເຈົ້າ. (1 ໂກລິນໂທ 3:1-4) ຄຳພີໄບເບິນມີຕົວຢ່າງທີ່ດີແລະບໍ່ດີ. ໃຫ້ເຮົາມາເບິ່ງຕົວຢ່າງທີ່ດີຂອງຢາໂຄບ ມາລີ ແລະພະເຍຊູ.
ເຮົາໄດ້ຮຽນຮູ້ຫຍັງຈາກຕົວຢ່າງຂອງຢາໂຄບ? (ເບິ່ງຂໍ້ 10)
10. ຢາໂຄບສະແດງໃຫ້ເຫັນແນວໃດວ່າລາວເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ?
10 ຄືກັບພວກເຮົາ ຊີວິດຂອງຢາໂຄບກໍບໍ່ງ່າຍ. ເອຊາອຶອ້າຍລາວກໍຢາກຂ້າລາວ ແລະພໍ່ຂອງເມຍກໍສໍ້ໂກງລາວຫຼາຍເທື່ອ ແຕ່ລາວກໍຍັງເຊື່ອໝັ້ນໃນຄຳສັນຍາທີ່ພະເຢໂຫວາໃຫ້ກັບອັບລາຫາມ. ຢາໂຄບຮູ້ວ່າຄອບຄົວຂອງລາວຈະເປັນສ່ວນໜຶ່ງທີ່ເຮັດໃຫ້ຄຳພະຍາກອນນີ້ສຳເລັດ ລາວຈຶ່ງເບິ່ງແຍງຄອບຄົວຢ່າງດີ. (ຕົ້ນເດີມ 28:10-15) ຢາໂຄບບໍ່ໄດ້ຍອມໃຫ້ຄວາມຄິດແບບໂລກຂອງຄົນທີ່ຢູ່ອ້ອມຕົວລາວເຮັດໃຫ້ລາວລືມຄຳສັນຍາຂອງພະເຢໂຫວາ. ຕົວຢ່າງ: ຢາໂຄບຂໍໃຫ້ພະເຢໂຫວາຊ່ວຍເມື່ອລາວຮູ້ສຶກຢ້ານວ່າອ້າຍຈະມາທຳຮ້າຍລາວ. ລາວອະທິດຖານວ່າ: “ພະອົງໄດ້ບອກແລ້ວວ່າ ‘ເຮົາຈະກະທຳການດີແກ່ເຈົ້າເປັນແທ້ ແລະຈະກະທຳໃຫ້ເຊື້ອສາຍຂອງເຈົ້າທະວີມາກຂຶ້ນເໝືອນດັ່ງເມັດດິນຊາຍໃນນ້ຳທະເລ.’” (ຕົ້ນເດີມ 32:6-12) ຢາໂຄບມີຄວາມເຊື່ອແທ້ໆໃນຄຳສັນຍາຂອງພະເຢໂຫວາເຊິ່ງເຫັນໄດ້ຈາກການໃຊ້ຊີວິດຂອງລາວ.
ເຮົາໄດ້ຮຽນຮູ້ຫຍັງຈາກຕົວຢ່າງຂອງໂຢເຊບແລະມາລີ? (ເບິ່ງຂໍ້ 11)
11. ເຮົາຮູ້ໄດ້ແນວໃດວ່າມາລີເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ?
11 ຕອນນີ້ຂໍໃຫ້ຄິດເຖິງມາລີ. ພະເຢໂຫວາເລືອກລາວໃຫ້ເປັນແມ່ຂອງພະເຍຊູຍ້ອນລາວເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ. ຂໍໃຫ້ອ່ານສິ່ງທີ່ມາລີເວົ້າຕອນທີ່ໄປຢາມຊາກາລີແລະເອລີຊາເບດເຊິ່ງເປັນຍາດພີ່ນ້ອງຂອງລາວ. (ອ່ານລືກາ 1:46-55) ເຮົາຈະເຫັນວ່າມາລີຮັກພະຄຳຂອງພະເຈົ້າແລະຮູ້ຈັກພະຄຳພີພາກພາສາເຫບເລີເປັນຢ່າງດີ. (ຕົ້ນເດີມ 30:13; 1 ຊາເມືອນ 2:1-10; ມາລາກີ 3:12) ເຖິງວ່າມາລີແລະໂຢເຊບແຕ່ງດອງກັນແລ້ວ ເຂົາເຈົ້າກໍລໍຖ້າຈົນກວ່າພະເຍຊູເກີດແລ້ວຈຶ່ງມີເພດສຳພັນ. ເຂົາເຈົ້າໃຫ້ຄວາມສຳຄັນກັບວຽກມອບໝາຍຈາກພະເຈົ້າຫຼາຍກວ່າຄວາມຕ້ອງການຂອງຕົວເອງ. (ມັດທາຍ 1:25) ມາລີຍັງສັງເກດເບິ່ງທຸກສິ່ງທີ່ເກີດຂຶ້ນໃນຂະນະທີ່ພະເຍຊູເຕີບໃຫຍ່ແລະໄດ້ຟັງສິ່ງທີ່ເພິ່ນສອນ. ລາວໄດ້ “ເກັບກຳເລື່ອງທັງໝົດນີ້ໄວ້ໃນໃຈ.” (ລືກາ 2:51, ທ.ປ.) ເຫັນໄດ້ແຈ້ງວ່າມາລີສົນໃຈແທ້ໆໃນຄຳສັນຍາຂອງພະເຈົ້າກ່ຽວກັບເມຊີ. ເຮົາຈະຮຽນແບບມາລີແລະພະຍາຍາມເຮັດສິ່ງທີ່ພະເຈົ້າຢາກໃຫ້ເຮົາເຮັດຕໍ່ໆໄປໄດ້ແນວໃດ?
12. (ກ) ພະເຍຊູຮຽນແບບພໍ່ຂອງເພິ່ນແນວໃດ? (ຂ) ເຮົາຈະຮຽນແບບພະເຍຊູໄດ້ແນວໃດ? (ເບິ່ງຮູບທຳອິດ)
12 ພະເຍຊູເປັນຕົວຢ່າງທີ່ດີທີ່ສຸດຂອງຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ. ຕະຫຼອດໄລຍະທີ່ເພິ່ນມີຊີວິດຢູ່ແລະເຮັດວຽກຮັບໃຊ້ເທິງໂລກ ເພິ່ນເຮັດໃຫ້ເຫັນວ່າເພິ່ນຢາກຮຽນແບບພໍ່ຂອງເພິ່ນ. ພະເຍຊູຄິດ ຮູ້ສຶກ ແລະປະພຶດຄືກັບພະເຢໂຫວາ. ເພິ່ນເຮັດຕາມຄວາມຕ້ອງການແລະໃຊ້ຊີວິດຕາມມາດຕະຖານຂອງພະອົງ. (ໂຢຮັນ 8:29; 14:9; 15:10) ຕົວຢ່າງ: ຂໍໃຫ້ສົມທຽບລະຫວ່າງຄວາມເມດຕາຂອງພະເຢໂຫວາທີ່ຢູ່ໃນເອຊາອີກັບຄວາມຮູ້ສຶກຂອງພະເຍຊູທີ່ຢູ່ໃນມາລະໂກ. (ອ່ານເອຊາອີ 63:9; ມາລະໂກ 6:34) ເຮົາຮຽນແບບພະເຍຊູບໍໂດຍພ້ອມສະເໝີທີ່ຈະສະແດງຄວາມເມດຕາຕໍ່ຄົນທີ່ຕ້ອງການຄວາມຊ່ວຍເຫຼືອ? ເຮົາຈົດຈໍ່ໃນການປະກາດແລະການສອນຂ່າວດີຄືກັບພະເຍຊູບໍ? (ລືກາ 4:43) ຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຈະເປັນຄົນທີ່ເມດຕາສົງສານແລະພະຍາຍາມຊ່ວຍເຫຼືອຄົນອື່ນ.
13, 14. (ກ) ເຮົາໄດ້ຮຽນຮູ້ຫຍັງແດ່ຈາກຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ? (ຂ) ຂໍໃຫ້ຍົກຕົວຢ່າງ.
13 ໃນທຸກມື້ນີ້ ພີ່ນ້ອງຫຼາຍຄົນອອກຄວາມພະຍາຍາມຫຼາຍທີ່ຈະຮຽນແບບພະຄລິດ. ເຈົ້າອາດເຫັນວ່າເຂົາເຈົ້າກະຕືລືລົ້ນໃນວຽກຮັບໃຊ້ ມີຄວາມເອື້ອເຟື້ອ ແລະເຫັນອົກເຫັນໃຈ. ເຖິງວ່າເຂົາເຈົ້າເປັນຄົນບໍ່ສົມບູນແບບ ແຕ່ເຂົາເຈົ້າກໍພະຍາຍາມຢ່າງໜັກເພື່ອຈະມີຄຸນລັກສະນະທີ່ດີແລະເຮັດສິ່ງທີ່ພະເຢໂຫວາຕ້ອງການ. ພີ່ນ້ອງຍິງຊື່ລາເຊວໃນເບຣຊິນບອກວ່າ: “ຂ້ອຍມັກຕິດຕາມໂລກແຟຊັ່ນ ຜົນກໍຄືຂ້ອຍແຕ່ງຕົວບໍ່ຄ່ອຍສຸພາບ. ແຕ່ການຮຽນຮູ້ຄວາມຈິງກະຕຸ້ນຂ້ອຍໃຫ້ຢາກເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ. ການປ່ຽນແປງນີ້ບໍ່ງ່າຍ ແຕ່ຂ້ອຍກໍມີຄວາມສຸກແລະພົບເປົ້າໝາຍທີ່ແທ້ຈິງໃນຊີວິດ.”
14 ພີ່ນ້ອງຍິງຊື່ເຣລິນໃນຟີລິບປິນມີບັນຫາອີກຢ່າງໜຶ່ງ. ເຖິງວ່າລາວຈະຢູ່ໃນຄວາມຈິງ ແຕ່ລາວກໍໃຫ້ຄວາມສຳຄັນຕໍ່ການຮຽນສູງໆແລະມີວຽກອາຊີບທີ່ດີ ສຸດທ້າຍເປົ້າໝາຍໃນວຽກຮັບໃຊ້ຂອງລາວກໍກາຍເປັນສິ່ງທີ່ບໍ່ຄ່ອຍສຳຄັນ. ລາວບອກວ່າ: “ຂ້ອຍຮູ້ສຶກວ່າຊີວິດຂ້ອຍມີບາງຢ່າງທີ່ຂາດຫາຍໄປ ບາງຢ່າງທີ່ສຳຄັນກວ່າວຽກອາຊີບຂອງຂ້ອຍ.” ເຣລິນໄດ້ປ່ຽນຄວາມຄິດແລະໃຫ້ວຽກຮັບໃຊ້ພະເຈົ້າມາເປັນສິ່ງສຳຄັນທີ່ສຸດໃນຊີວິດ. ຕອນນີ້ລາວໝັ້ນໃຈໃນຄຳສັນຍາຂອງພະເຢໂຫວາທີ່ມັດທາຍ 6:33, 34 ແລະເວົ້າວ່າ: “ຂ້ອຍໝັ້ນໃຈວ່າພະເຢໂຫວາຈະເບິ່ງແຍງຂ້ອຍ!” ເຈົ້າອາດຮູ້ຈັກພີ່ນ້ອງໃນປະຊາຄົມຂອງເຈົ້າເຊິ່ງມີປະສົບການທີ່ຄ້າຍໆກັນນີ້. ເມື່ອເຮົາເຫັນເຂົາເຈົ້າຮຽນແບບພະຄລິດ ເຮົາກໍຢາກເຮັດຕາມຕົວຢ່າງທີ່ສັດຊື່ຂອງເຂົາເຈົ້າ.—1 ໂກລິນໂທ 11:1; 2 ເທຊະໂລນີກ 3:7
ມີ “ຈິດໃຈຢ່າງພະຄລິດ”
15, 16. (ກ) ເຮົາຕ້ອງເຮັດຫຍັງເພື່ອຈະເປັນຄືກັບພະຄລິດ? (ຂ) ເຮົາຈະຍອມໃຫ້ “ຈິດໃຈຢ່າງພະຄລິດ” ມີຜົນຕໍ່ເຮົາແນວໃດ?
15 ເຮົາຈະຮຽນແບບພະຄລິດໄດ້ແນວໃດ? 1 ໂກລິນໂທ 2:16 ບອກວ່າເຮົາຕ້ອງມີ “ຈິດໃຈຢ່າງພະຄລິດ” ແລະໂລມ 15:5 ບອກໃຫ້ເຮົາ ‘ມີໃຈ [“ຄວາມຄິດ,” ລ.ມ.] ອັນດຽວກັນຕາມພະຄລິດເຍຊູ.’ ເພື່ອຈະເປັນຄືກັບພະເຍຊູ ເຮົາຕ້ອງຮຽນຮູ້ວິທີທີ່ເພິ່ນຄິດ ຮູ້ສຶກ ແລະເພິ່ນເປັນຄົນແບບໃດ. ພະເຍຊູໃຫ້ສາຍສຳພັນຂອງເພິ່ນກັບພະເຈົ້າເປັນສິ່ງສຳຄັນທີ່ສຸດໃນຊີວິດ. ດັ່ງນັ້ນ ແຮ່ງເຮົາເປັນຄືກັບພະຄລິດຫຼາຍເທົ່າໃດ ເຮົາກໍແຮ່ງເປັນຄືກັບພະເຢໂຫວາຫຼາຍເທົ່ານັ້ນ. ນີ້ຈຶ່ງເປັນເຫດຜົນທີ່ສຳຄັນຫຼາຍທີ່ເຮົາຕ້ອງຮຽນຮູ້ເພື່ອຈະຄິດຄືກັບພະເຍຊູ.
16 ເຮົາຈະຮຽນຮູ້ທີ່ຈະຄິດແບບພະເຍຊູໄດ້ແນວໃດ? ພວກລູກສິດເຄີຍເຫັນເພິ່ນເຮັດການອັດສະຈັນ ຟັງເພິ່ນສອນຄົນກຸ່ມໃຫຍ່ ເຫັນເພິ່ນປິ່ນປົ່ວຄົນທຸກຊະນິດ ແລະເຫັນເພິ່ນເຮັດຕາມຄວາມຄິດຂອງພະເຢໂຫວາ. ເຂົາເຈົ້າບອກວ່າ: “ເຮົາທັງຫຼາຍເປັນພິຍານຝ່າຍສັບພະການທີ່ພະອົງໄດ້ກະທຳ.” (ກິດຈະການ 10:39) ທຸກມື້ນີ້ ເຮົາບໍ່ສາມາດເຫັນພະເຍຊູ ແຕ່ເຮົາມີພະຄຳພີທີ່ຊ່ວຍເຮົາໃຫ້ຮູ້ຈັກເພິ່ນຫຼາຍຂຶ້ນ. ເມື່ອອ່ານແລະຄິດຕຶກຕອງໃນພະທຳກິດຕິຄຸນມັດທາຍ ມາລະໂກ ລືກາ ແລະໂຢຮັນ ເຮົາກໍຈະຮູ້ວິທີຄິດຂອງພະເຍຊູຫຼາຍຂຶ້ນ. ນີ້ຊ່ວຍເຮົາໃຫ້ “ຕິດຕາມຮອຍຕີນຂອງພະອົງໄປ” ແລ້ວເຮົາກໍຈະມີ “ຄວາມຄຶດອັນດຽວ” ກັບພະເຍຊູ.—1 ເປໂຕ 2:21; 4:1
17. ເຮົາຈະໄດ້ຮັບປະໂຫຍດຫຍັງຖ້າເຮົາມີຄວາມຄິດຄືກັບພະເຍຊູ?
17 ເຮົາຈະໄດ້ຮັບປະໂຫຍດຫຍັງຖ້າເຮົາຄິດຄືກັບພະເຍຊູ? ການກິນອາຫານທີ່ມີປະໂຫຍດຈະເຮັດໃຫ້ຮ່າງກາຍແຂງແຮງ ຄ້າຍຄືກັນ ການໃສ່ຄວາມຄິດຂອງພະເຍຊູຈະເຮັດໃຫ້ສາຍສຳພັນຂອງເຮົາກັບພະເຢໂຫວາເຂັ້ມແຂງ. ຖ້າເຮັດແບບນີ້ເທື່ອລະເລັກເທື່ອໜ້ອຍ ເຮົາກໍຈະຮູ້ວ່າເພິ່ນຈະເຮັດແນວໃດເມື່ອປະສົບກັບສະພາບການຕ່າງໆ ເຊິ່ງນັ້ນກໍຈະຊ່ວຍເຮົາໃຫ້ຕັດສິນໃຈຢ່າງສຸຂຸມ ເຮັດໃຫ້ພະເຢໂຫວາພໍໃຈ ແລະມີສະຕິຮູ້ສຶກຜິດຊອບທີ່ສະອາດ. ເຫັນໄດ້ວ່າມີຫຼາຍເຫດຜົນແທ້ໆທີ່ເຮົາຈະ “ປູກຝັງລັກສະນະນິດໄສແບບພະເຍຊູຄລິດຜູ້ເປັນນາຍ.”—ໂລມ 13:14, ລ.ມ.
18. ເຈົ້າໄດ້ຮຽນຫຍັງແດ່ກ່ຽວກັບການເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ?
18 ບົດຄວາມນີ້ໄດ້ຊ່ວຍເຮົາໃຫ້ເຂົ້າໃຈຄວາມໝາຍຂອງການເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ. ເຮົາໄດ້ຮຽນຮູ້ຈາກຕົວຢ່າງທີ່ດີຂອງຄົນທີ່ໄດ້ຮັບການຊີ້ນຳຈາກພະລັງບໍລິສຸດ ແລະຍັງຮຽນຮູ້ວ່າການມີ “ຈິດໃຈຢ່າງພະຄລິດ” ຊ່ວຍເຮົາໃຫ້ຄິດຄືກັບພະເຢໂຫວາແລະສະໜິດກັບພະອົງ. ແຕ່ຍັງມີອີກຫຼາຍຢ່າງທີ່ເຮົາຈະຮຽນຮູ້ໄດ້ ເຊັ່ນ: ເຮົາຈະຮູ້ໄດ້ແນວໃດວ່າເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າແລະສະໜິດກັບພະອົງ? ເຮົາຕ້ອງເຮັດຫຍັງເພື່ອຈະສະໜິດກັບພະເຈົ້າຫຼາຍຂຶ້ນ? ການສະໜິດກັບພະເຈົ້າສົ່ງຜົນຕໍ່ຊີວິດປະຈຳວັນຂອງເຮົາແນວໃດ? ເຮົາຈະເບິ່ງນຳກັນໃນບົດຄວາມຕໍ່ໄປ.
a 1 ໂກລິນໂທ 2:14-16 (ລ.ມ.): “ແຕ່ຄົນທີ່ຄິດແບບໂລກບໍ່ຍອມຮັບສິ່ງທີ່ມາຈາກພະລັງຂອງພະເຈົ້າ ເຂົາຖືວ່າສິ່ງເຫຼົ່ານັ້ນເປັນເລື່ອງໂງ່ ແລະເຂົາບໍ່ສາມາດເຂົ້າໃຈໄດ້ ເພາະເພື່ອຈະເຂົ້າໃຈສິ່ງເຫຼົ່ານັ້ນໄດ້ຕ້ອງກວດສອບດ້ວຍຄວາມຊ່ວຍເຫຼືອຈາກພະລັງຂອງພະເຈົ້າ ສ່ວນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້ານັ້ນກໍຈະກວດສອບທຸກສິ່ງໄດ້ ແຕ່ບໍ່ມີໃຜກວດສອບເຂົາໄດ້ ເພາະວ່າ ‘ໃຜຈະຮູ້ໃຈພະເຢໂຫວາເພື່ອຈະສັ່ງສອນພະອົງໄດ້?’ ແຕ່ເຮົາມີຈິດໃຈຢ່າງພະຄລິດ”