ຄຳຖາມຈາກຜູ້ອ່ານ
ຜູ້ຂຽນສຸພາສິດ 30:18, 19 ເວົ້າວ່າ: “ການກະທຳຂອງຜູ້ຊາຍໃນຍາມທີ່ລາວຢູ່ກັບຜູ້ຍິງ” ເປັນ ‘ສິ່ງທີ່ເຂົ້າໃຈບໍ່ໄດ້.’ ລາວໝາຍຄວາມວ່າແນວໃດ?
ຫຼາຍຄົນລວມທັງນັກວິຊາການດ້ານຄຳພີໄບເບິນພາກັນສົງໄສວ່າຂໍ້ຄຳພີເຫຼົ່ານີ້ໝາຍເຖິງຫຍັງ. ສອງຂໍ້ນີ້ໃນພະຄຳພີສະບັບແປໂລກໃໝ່ ອ່ານວ່າ: “ມີ 3 ສິ່ງທີ່ຂ້ອຍເຂົ້າໃຈບໍ່ໄດ້ [ຫຼື “ທີ່ເປັນຕາງຶດຫຼາຍສຳລັບຂ້ອຍ,” ໄຂເງື່ອນ] ແລະມີ 4 ສິ່ງທີ່ຂ້ອຍບໍ່ເຂົ້າໃຈ ນັ້ນກໍຄື: ນົກອິນຊີທີ່ບິນຢູ່ເທິງຟ້າ ງູທີ່ເລືອຢູ່ເທິງກ້ອນຫີນ ເຮືອທີ່ແລ່ນຢູ່ໃນທະເລ ແລະການກະທຳຂອງຜູ້ຊາຍໃນຍາມທີ່ລາວຢູ່ກັບຜູ້ຍິງ.”—ສພສ. 30:18, 19
ກ່ອນໜ້ານີ້ເຮົາເຂົ້າໃຈສຳນວນທີ່ວ່າ “ການກະທຳຂອງຜູ້ຊາຍໃນຍາມທີ່ລາວຢູ່ກັບຜູ້ຍິງ” ມີຄວາມໝາຍໃນແງ່ທີ່ບໍ່ດີ. ເປັນຫຍັງຈຶ່ງເຂົ້າໃຈແບບນັ້ນ? ຍ້ອນຂໍ້ຄຳພີອື່ນໆໃນບົດນີ້ເວົ້າເຖິງສິ່ງບໍ່ດີທີ່ບໍ່ເຄີຍເວົ້າວ່າ “ພໍແລ້ວ.” (ສພສ. 30:15, 16) ໃນຂໍ້ທີ 20 ເວົ້າເຖິງ “ຜູ້ຍິງທີ່ຫຼິ້ນຊູ້” ເຊິ່ງເວົ້າວ່າລາວບໍ່ໄດ້ເຮັດຫຍັງຜິດ. ສະນັ້ນ ເຮົາຈຶ່ງສະຫຼຸບໄດ້ວ່າຄືກັບນົກອິນຊີທີ່ບິນຢູ່ເທິງຟ້າ ງູທີ່ເລືອຢູ່ເທິງກ້ອນຫີນ ຫຼືເຮືອທີ່ແລ່ນຢູ່ໃນທະເລ ຜູ້ຊາຍຄົນນີ້ອາດເຮັດບາງຢ່າງໂດຍທີ່ບໍ່ມີໃຜຮູ້ວ່າລາວໄດ້ເຮັດຫຍັງ. ຈາກການຫາເຫດຜົນແບບນັ້ນ ເຮົາໄດ້ເຂົ້າໃຈຄຳເວົ້າທີ່ວ່າ “ການກະທຳຂອງຜູ້ຊາຍໃນຍາມທີ່ລາວຢູ່ກັບຜູ້ຍິງ” ໝາຍເຖິງບາງຢ່າງທີ່ບໍ່ດີ ແລະມັນກຳລັງເວົ້າເຖິງຊາຍໜຸ່ມຄົນໜຶ່ງທີ່ໃຊ້ເລ່ຫຼ່ຽມເພື່ອລໍ້ລວງຍິງສາວທີ່ຂາດປະສົບການໃຫ້ມີເພດສຳພັນກັບລາວ.
ແຕ່ເບິ່ງຄືວ່າມີເຫດຜົນທີ່ຈະເຊື່ອວ່າຂໍ້ຄຳພີເຫຼົ່ານີ້ກຳລັງເວົ້າເຖິງບາງຢ່າງທີ່ດີ. ຜູ້ຂຽນພຽງແຕ່ເວົ້າເຖິງສິ່ງທີ່ລາວຮູ້ສຶກງຶດແລະປະທັບໃຈ.
ສຳເນົາພະຄຳພີພາກພາສາເຮັບເຣີຍັງສະແດງໃຫ້ເຫັນວ່າຂໍ້ຄຳພີນີ້ໝາຍເຖິງບາງຢ່າງທີ່ດີ. ອີງຕາມວັດຈະນານຸກົມທີ່ອະທິບາຍກ່ຽວກັບພະຄຳພີພາກພາສາເຮັບເຣີ ຄຳພາສາເຮັບເຣີທີ່ແປວ່າ “ສິ່ງທີ່ຂ້ອຍເຂົ້າໃຈບໍ່ໄດ້” ໃນສຸພາສິດ 30:18 “ສະແດງເຖິງບາງຢ່າງທີ່ຄົນເຮົາ . . . ຮູ້ສຶກງຶດ ມັນບໍ່ມີທາງເປັນໄປໄດ້ ແລະເຖິງຂັ້ນປະຫຼາດໃຈ.”
ສາສະດາຈານຄຣໍຟອດ ໂຮແວວ ທອຍຈາກມະຫາວິທະຍາໄລຮາເວີດຢູ່ປະເທດອາເມຣິກາຍັງສະຫຼຸບວ່າຂໍ້ຄຳພີນີ້ບໍ່ໄດ້ເວົ້າເຖິງບາງຢ່າງທີ່ບໍ່ດີ. ລາວເວົ້າວ່າ: “ຜູ້ຂຽນກຳລັງພະຍາຍາມອະທິບາຍວ່າສິ່ງເຫຼົ່ານັ້ນເປັນຕາງຶດຫຼາຍແທ້ໆ.”
ສະນັ້ນເບິ່ງຄືວ່າມີເຫດຜົນທີ່ຈະເຊື່ອວ່າສິ່ງທີ່ຂຽນໄວ້ໃນສຸພາສິດ 30:18, 19 ເວົ້າເຖິງສິ່ງທີ່ເປັນຕາງຶດແທ້ໆຈົນເຖິງຂັ້ນທີ່ເຮົາເຂົ້າໃຈບໍ່ໄດ້. ຄືກັບຜູ້ຂຽນຄຳພີໄບເບິນ ເຮົາຮູ້ສຶກງຶດທີ່ນົກອິນຊີບິນຢູ່ເທິງຟ້າໄດ້ແນວໃດ ງູທີ່ບໍ່ມີຂາເລືອຢູ່ເທິງກ້ອນຫີນໄດ້ແນວໃດ ເຮືອທີ່ໜັກໆແລ່ນຢູ່ໃນທະເລໄດ້ແນວໃດ ແລະຊາຍໜຸ່ມກັບຍິງສາວຕົກຫຼຸມຮັກກັນແລະໃຊ້ຊີວິດນຳກັນຢ່າງມີຄວາມສຸກໄດ້ແນວໃດ.