ຈົດຈໍ່​ຢູ່​ສະເໝີ​ກັບ​ການ​ເຮັດ​ໃຫ້​ຄົນ​ເປັນ​ລູກ​ສິດ

1. ອັນ​ໃດ​ເປັນ​ສິ່ງ​ຈຳເປັນ​ທີ່​ຈະ​ຊ່ວຍ​ຜູ້​ຄົນ​ໃຫ້​ໄດ້​ຮັບ​ຄວາມ​ລອດ?

¹ ລາຍງານ​ການ​ຮັບໃຊ້​ປະຈຳ​ປີ 2014 ເຮັດ​ໃຫ້​ເຫັນ​ເຖິງ​ຄວາມ​ກະຕືລືລົ້ນ​ແລະ​ຄວາມ​ຕັ້ງ​ໃຈ​ແນ່ວ​ແນ່​ຂອງ​ຜູ້​ຮັບໃຊ້​ພະເຈົ້າ​ໃນ​ການ​ປະກາດ​ຂ່າວ​ດີ​ເລື່ອງ​ລາຊະອານາຈັກ. (ມັດ. 24:14) ໂດຍ​ການ​ປະກາດ​ຕາມ​ບ້ານ​ເຮືອນ ໂຄງການ​ພິເສດ​ເພື່ອ​ແຈກ​ຢາຍ​ແຜ່ນ​ພັບ​ແລະ​ໃບ​ເຊີນ ແລະ​ການ​ປະກາດ​ຕາມ​ທີ່​ສາທາລະນະ ເຮົາ​ກຳລັງ​ເຂົ້າ​ເຖິງ​ຜູ້​ຟັງ​ດ້ວຍ​ຂ່າວ​ສານ​ຈາກ​ຄຳພີ​ໄບເບິນ​ທີ່​ບໍ່​ເຄີຍ​ເຮັດ​ມາ​ກ່ອນ. ເຖິງ​ຢ່າງ​ໃດ​ກໍ​ຕາມ ເພື່ອ​ຈະ​ໄດ້​ຮັບ​ຄວາມ​ລອດ ເຮົາ​ຈຳເປັນ​ຕ້ອງ​ຊ່ວຍ​ເຂົາ​ເຈົ້າ​ໃຫ້​ມາ​ເປັນ​ລູກ​ສິດ​ຂອງ​ພະ​ເຍຊູ​ໂດຍ​ການ​ສຶກສາ​ຄຳພີ​ໄບເບິນ​ກັບ​ເຂົາ​ເຈົ້າ.—1 ຕີໂມ. 2:4

2. ເຮົາ​ຄວນ​ຖາມ​ຕົວ​ເອງ​ວ່າ ຄຳຖາມ​ອັນ​ໃດ​ທີ່​ຈະ​ຊ່ວຍ​ເຮົາ​ໃຫ້​ພ້ອມ​ສະເໝີ​ທີ່​ຈະ​ສະເໜີ​ການ​ສຶກສາ​ຄຳພີ​ໄບເບິນ?

² ພ້ອມ​ສະເໝີ​ທີ່​ຈະ​ສະເໜີ​ການ​ສຶກສາ​ຄຳພີ​ໄບເບິນ: ເມື່ອ​ມີ​ຄົນ​ສະແດງ​ຄວາມ​ສົນ​ໃຈ​ໃນ​ເລື່ອງ​ຂ່າວ​ດີ ເຈົ້າ​ໄດ້​ຂໍ​ຂໍ້​ມູນ​ຕິດ​ຕໍ່​ແລະ​ໄປ​ຢາມ​ທັນທີ​ໂດຍ​ມີ​ເປົ້າ​ໝາຍ​ເພື່ອ​ເລີ່ມ​ສຶກສາ​ຄຳພີ​ໄບເບິນ​ບໍ? ເມື່ອ​ໃດ​ເປັນ​ຄັ້ງ​ສຸດ​ທ້າຍ​ທີ່​ເຈົ້າ​ໄດ້​ສາທິດ​ການ​ສຶກສາ​ຄຳພີ​ໄບເບິນ​ກັບ​ຄົນ​ທີ່​ເຈົ້າ​ໄປ​ຢາມ? ເມື່ອ​ໃດ​ເປັນ​ຄັ້ງ​ສຸດ​ທ້າຍ​ທີ່​ເຈົ້າ​ໄດ້​ສະເໜີ​ການ​ສຶກສາ​ຄຳພີ​ໄບເບິນ​ກັບ​ສາຍ​ວຽນ​ສົ່ງ​ວາລະສານ? ເຈົ້າ​ໄດ້​ເປີດ​ວິດີໂອ​ເປັນ​ຫຍັງ​ຈຶ່ງ​ສຶກສາ​ຄຳພີ​ໄບເບິນ? ແລະ​ພວກ​ເຮົາ​ສຶກສາ​ຄຳພີ​ໄບເບິນ​ແນວ​ໃດ? ໃຫ້​ໝູ່​ຢູ່​ບ່ອນ​ເຮັດ​ວຽກ ໝູ່​ທີ່​ຮຽນ​ນຳ​ກັນ ເພື່ອນ​ບ້ານ ຍາດ​ຕິ​ພີ່​ນ້ອງ ແລະ​ຄົນ​ທີ່​ຮູ້ຈັກ​ເບິ່ງ​ແລ້ວ​ບໍ? ເມື່ອ​ປະກາດ​ໂດຍ​ການ​ວາງ​ສັບພະ​ໜັງສື ເຈົ້າ​ໄດ້​ພະຍາຍາມ​ບອກ​ຜູ້​ທີ່​ເອົາ​ໜັງສື​ບໍ​ວ່າ​ມີ​ການ​ສຶກສາ​ຄຳພີ​ໄບເບິນ​ໃຫ້​ຟຣີ?

3. ເຮົາ​ຕ້ອງ​ເຮັດ​ອັນ​ໃດ​ເພື່ອ​ຈະ​ສອນ​ຄວາມ​ຈິງ​ໄດ້​ຢ່າງ​ປະສົບ​ຜົນ​ສຳເລັດ?

³ ຂໍ​ຄວາມ​ຊ່ວຍ​ເຫຼືອ​ຈາກ​ພະ​ເຢໂຫວາ​ແລະ​ພະ​ເຍຊູ: ໂດຍ​ເລີ່ມ​ຈາກ​ຄຳ​ສັ່ງ​ຂອງ​ພະ​ເຍຊູ​ທີ່​ວ່າ “ກະທຳ​ໃຫ້​ເປັນ​ລູກ​ສິດ” ແລະ​ຄຳ​ວ່າ “ໄປ” ພະ​ເຍຊູ​ສະແດງ​ໃຫ້​ເຫັນ​ວ່າ​ເຮົາ​ຈຳເປັນ​ຕ້ອງ​ອອກ​ຄວາມ​ພະຍາຍາມ​ແລະ​ເປັນ​ຝ່າຍ​ລິເລີ່ມ​ທີ່​ຈະ​ເຮັດ. ເຖິງ​ຢ່າງ​ໃດ​ກໍ​ຕາມ ພະອົງ​ບໍ່​ໄດ້​ປ່ອຍ​ໃຫ້​ເຮົາ​ເຮັດ​ຕາມ​ລຳພັງ​ແຕ່​ໄດ້​ສັນຍາ​ວ່າ​ຈະ​ຢູ່​ກັບ​ເຮົາ. (ມັດ. 28:19, 20) ນອກ​ຈາກ​ນັ້ນ ພະ​ເຢໂຫວາ​ຍັງ​ໃຫ້​ພະລັງ​ບໍລິສຸດ​ຂອງ​ພະອົງ​ພ້ອມ​ທັງ​ເຄື່ອງ​ມື​ຕ່າງໆ​ແລະ​ການ​ຝຶກ​ອົບຮົມ​ທີ່​ຈຳເປັນ​ເພື່ອ​ຈະ​ສອນ​ຄວາມ​ຈິງ​ໃຫ້​ແກ່​ຄົນ​ອື່ນໆ. (ຊກາ. 4:6; 2 ໂກ. 4:7) ເຮົາ​ສາມາດ​ອະທິດຖານ​ຂໍ​ໃຫ້​ເຮົາ​ມີ ‘ນ້ຳ​ໃຈ​ແລະ​ລົງ​ມື’ ເຮັດ​ວຽກ​ທີ່​ສຳຄັນ​ນີ້.—ຟີລິບ 2:13

4. ເປັນ​ຫຍັງ​ເຮົາ​ຄວນ​ຈົດຈໍ່​ຢູ່​ສະເໝີ​ກັບ​ການ​ເຮັດ​ໃຫ້​ຄົນ​ເປັນ​ລູກ​ສິດ?

⁴ ການ​ປະກາດ​ຂ່າວ​ດີ​ເຮັດ​ໃຫ້​ເຮົາ​ມີ​ຄວາມ​ສຸກ​ຫຼາຍ. ເຮົາ​ຈະ​ມີ​ຄວາມ​ສຸກ​ຫຼາຍ​ຂຶ້ນ​ເມື່ອ​ເຮົາ​ສອນ​ຄວາມ​ຈິງ​ໃຫ້​ກັບ​ຄົນ​ອື່ນ ແລະ​ຊ່ວຍ​ເຂົາ​ເຈົ້າ​ເຂົ້າ​ມາ​ຮ່ວມ​ກັບ​ເຮົາ​ໃນ “ທາງ . . . ທີ່​ນຳ​ໄປ​ເຖິງ​ຊີວິດ.” (ມັດ. 7:14; 1 ເທ. 2:19, 20) ສິ່ງ​ສຳຄັນ​ກວ່າ​ແມ່ນ​ເຮົາ​ຈົດຈໍ່​ຢູ່​ກັບ​ການ​ເຮັດ​ໃຫ້​ຄົນ​ເປັນ​ລູກ​ສິດ ເຮົາ​ເຮັດ​ໃຫ້​ພະ​ເຢໂຫວາ​ພໍ​ໃຈ ເພາະ​ພະອົງ​ເປັນ​ຜູ້​ທີ່ “ບໍ່​ຢາກ​ໃຫ້​ຄົນ​ໜຶ່ງ​ຄົນ​ໃດ​ຈິບຫາຍ ແຕ່​ວ່າ​ຈະ​ໃຫ້​ຄົນ​ທັງ​ປວງ​ປະ​ໃຈ​ເກົ່າ​ເອົາ​ໃຈ​ໃໝ່.”—2 ເປ. 3:9