ຄຳແນະນຳສຳລັບການປະຊຸມຊີວິດຄລິດສະຕຽນແລະວຽກຮັບໃຊ້
ສາລະບານ
ອະທິບາຍຄວາມເຊື່ອຂອງເຈົ້າ 10
ປະທານການປະຊຸມຊີວິດແລະວຽກຮັບໃຊ້ 24
1. ຄຳແນະນຳໃນເອກະສານນີ້ຈະຊ່ວຍທຸກຄົນທີ່ມີສ່ວນໃນການປະຊຸມຊີວິດຄລິດສະຕຽນແລະວຽກຮັບໃຊ້. ຄົນທີ່ມີສ່ວນຄວນທົບທວນຄຳແນະນຳສຳລັບສ່ວນຂອງໂຕເອງຕາມທີ່ສະຫຼຸບໄວ້ໃນຊີວິດແລະວຽກຮັບໃຊ້—ຄູ່ມືປະຊຸມ ແລະໃນເອກະສານນີ້ກ່ອນຈະກຽມສ່ວນຂອງໂຕເອງ. ຜູ້ປະກາດທຸກຄົນຄວນໄດ້ຮັບເຊີນໃຫ້ພ້ອມທີ່ຈະຮັບການມອບໝາຍເປັນນັກຮຽນ. ຄົນອື່ນໆທີ່ສົມທົບກັບປະຊາຄົມຢ່າງຫ້າວຫັນອາດຮ່ວມເຮັດສ່ວນນັກຮຽນໄດ້ຖ້າເຂົາເຈົ້າເຫັນດີກັບຄຳສອນໃນຄຳພີໄບເບິນແລະຊີວິດຂອງເຂົາເຈົ້າສອດຄ່ອງກັບຫຼັກການຂອງຄລິດສະຕຽນ. ຜູ້ເບິ່ງແຍງການປະຊຸມຊີວິດແລະວຽກຮັບໃຊ້ຄວນພິຈາລະນາກ່ຽວກັບການສະໝັກເປັນນັກຮຽນກັບໃຜກໍຕາມທີ່ບໍ່ແມ່ນຜູ້ປະກາດແລະຢາກສະໝັກເປັນນັກຮຽນ ຈາກນັ້ນແຈ້ງໃຫ້ຄົນນັ້ນຮູ້ວ່າລາວມີຄຸນສົມບັດຫຼືບໍ່. ຄວນໃຫ້ຜູ້ນຳການສຶກສາຄຳພີໄບເບິນຂອງລາວຢູ່ນຳຕອນທີ່ພິຈາລະນາ (ຫຼືໃຫ້ພໍ່ແມ່ທີ່ມີຄວາມເຊື່ອຢູ່ນຳ). ຂໍ້ກຳນົດສຳລັບການເປັນນັກຮຽນ ຄືກັບຂໍ້ກຳນົດສຳລັບຜູ້ປະກາດທີ່ຍັງບໍ່ຮັບບັບເຕມາ.—od-SI ບົດ 8 ຂໍ້ 8
ຄຳນຳເປີດການປະຊຸມ
2. 1 ນາທີ. ແຕ່ລະອາທິດ ຫຼັງຮ້ອງເພງແລະອະທິດຖານເປີດການປະຊຸມ ປະທານການປະຊຸມຊີວິດແລະວຽກຮັບໃຊ້ຈະເວົ້າເພື່ອໃຫ້ຜູ້ທີ່ເຂົ້າຮ່ວມການປະຊຸມສົນໃຈສ່ວນຕ່າງໆຂອງມື້ນັ້ນ. ປະທານຄວນເນັ້ນຈຸດຕ່າງໆທີ່ຈະເປັນປະໂຫຍດຕໍ່ປະຊາຄົມຫຼາຍທີ່ສຸດ.
ສິ່ງທີ່ມີຄ່າຈາກຄຳສອນຂອງພະເຈົ້າ
3. ບັນລະຍາຍ: 10 ນາທີ. ຫົວຂໍ້ແລະໂຄງຮ່າງຂອງຈຸດຫຼັກສອງຫຼືສາມຈຸດມີຢູ່ໃນຊີວິດແລະວຽກຮັບໃຊ້—ຄູ່ມືປະຊຸມ. ຄຳບັນລະຍາຍນີ້ຕ້ອງມອບໝາຍໃຫ້ຜູ້ເບິ່ງແຍງຫຼືຜູ້ຊ່ວຍວຽກຮັບໃຊ້ທີ່ມີຄຸນສົມບັດ. ເມື່ອການອ່ານຄຳພີໄບເບິນໃນແຕ່ລະອາທິດເລີ່ມຕົ້ນໃນປຶ້ມຫົວໃຫມ່ ຈະມີການເປີດວິດີໂອເພື່ອແນະນຳປຶ້ມນັ້ນ. ຜູ້ບັນລະຍາຍອາດຍົກໃຫ້ເຫັນວ່າວິດີໂອກ່ຽວຂ້ອງກັບຫົວຂໍ້ແນວໃດ. ແນວໃດກໍຕາມ ລາວຄວນແນ່ໃຈວ່າໄດ້ກວມເອົາຈຸດຕ່າງໆທີ່ໃຫ້ໄວ້ໃນຄູ່ມືປະຊຸມ. ນອກຈາກນີ້ ລາວຄວນໃຊ້ຮູບພາບຫຼືແຜນພູມ ເພື່ອເນັ້ນແນວຄິດຫຼັກຕາມທີ່ຈຳເປັນ. ລາວອາດເພີ່ມຂໍ້ມູນຈາກແຫຼ່ງອ້າງອີງອື່ນໆຖ້າຂໍ້ມູນນັ້ນຊ່ວຍເສີມຈຸດຕ່າງໆໃນໂຄງຮ່າງ.
4. ຄວາມຮູ້ທີ່ມີຄ່າຈາກພະເຈົ້າ: 10 ນາທີ. ນີ້ເປັນສ່ວນຖາມ-ຕອບໂດຍບໍ່ມີຄຳນຳຫຼືຄຳລົງທ້າຍ. ໃຫ້ເຮັດໂດຍຜູ້ເບິ່ງແຍງຫຼືຜູ້ຊ່ວຍວຽກຮັບໃຊ້ທີ່ມີຄຸນສົມບັດ. ຜູ້ເຮັດສ່ວນນີ້ຄວນຖາມຜູ້ຟັງທັງສອງຄຳຖາມ. ນອກຈາກນີ້ ລາວອາດຕັດສິນໃຈວ່າຈຳເປັນຕ້ອງອ່ານຂໍ້ທີ່ອ້າງເຖິງຫຼືບໍ່. ຜູ້ທີ່ອອກຄວາມຄິດເຫັນຄວນໃຊ້ເວລາບໍ່ເກີນ 30 ວິນາທີ.
5. ການອ່ານຄຳພີໄບເບິນ: 4 ນາທີ. ສ່ວນມອບໝາຍນັກຮຽນນີ້ຈະເຮັດໂດຍຜູ້ຊາຍ. ນັກຮຽນຄວນອ່ານເນື້ອຫາທີ່ໄດ້ຮັບມອບໝາຍໂດຍບໍ່ຕ້ອງເວົ້າຄຳນຳຫຼືຄຳລົງທ້າຍ. ປະທານການປະຊຸມຈະສົນໃຈເປັນພິເສດໃນການຊ່ວຍໃຫ້ນັກຮຽນອ່ານໄດ້ຢ່າງຖືກຕ້ອງ ເຂົ້າໃຈ ຄ່ອງແຄ່ວ ເນັ້ນຄວາມຮູ້ສຶກທີ່ເໝາະສົມ ປັບລະດັບສຽງແລະຈັງຫວະ ຢຸດຢ່າງເໝາະສົມ ແລະເປັນທຳມະຊາດ. ເນື່ອງຈາກການອ່ານຄຳພີໄບເບິນບາງອາທິດສັ້ນກວ່າແລະບາງອາທິດກໍຍາວກວ່າ ຜູ້ເບິ່ງແຍງການປະຊຸມຊີວິດແລະວຽກຮັບໃຊ້ຈຶ່ງຄວນຄິດເຖິງຄວາມສາມາດຂອງນັກຮຽນເມື່ອມອບໝາຍສ່ວນເຫຼົ່ານີ້.
ສິ່ງທີ່ເຈົ້າຈະເອົາໄປໃຊ້ໃນວຽກປະກາດ
6. 15 ນາທີ. ການປະຊຸມສ່ວນນີ້ໄດ້ຮັບການອອກແບບເພື່ອໃຫ້ທຸກຄົນມີໂອກາດຝຶກຝົນການເຮັດວຽກຮັບໃຊ້ແລະເພື່ອພັດທະນາທັກສະການເວົ້າລົມແລະຄວາມສາມາດໃນການປະກາດແລະສອນ. ຜູ້ເບິ່ງແຍງອາດໄດ້ຮັບມອບໝາຍໃຫ້ເຮັດສ່ວນນັກຮຽນ ຕາມຄວາມຈຳເປັນ. ນັກຮຽນແຕ່ລະຄົນຄວນສຶກສາຈຸດທີ່ຕ້ອງເອົາໃຈໃສ່ຈາກຈຸນລະສານການສອນ ຫຼືສອນດ້ວຍຮັກ ເຊິ່ງຢູ່ໃນວົງເລັບຂ້າງສ່ວນມອບໝາຍໃນຊີວິດແລະວຽກຮັບໃຊ້—ຄູ່ມືປະຊຸມ. ໃນບາງເທື່ອ ອາດມີສ່ວນທີ່ຖືກກຳນົດໃຫ້ບັນລະຍາຍແລະຖາມຄວາມຄິດເຫັນ. ສ່ວນນີ້ໃຫ້ຜູ້ເບິ່ງແຍງຫຼືຜູ້ຊ່ວຍວຽກຮັບໃຊ້ທີ່ມີຄຸນສົມບັດເປັນຜູ້ເຮັດ.—ເບິ່ງຂໍ້ທີ 15 ກ່ຽວກັບວິທີເຮັດສ່ວນບັນລະຍາຍແລະຖາມຄວາມຄິດເຫັນ
7. ເລີ່ມລົມ: ສ່ວນມອບໝາຍນັກຮຽນນີ້ອາດເຮັດໂດຍຜູ້ຊາຍຫຼືຜູ້ຍິງ. ຜູ້ຊ່ວຍຄວນເປັນເພດດຽວກັນຫຼືຄວນເປັນສະມາຊິກໃນຄອບຄົວ. ນັກຮຽນແລະຜູ້ຊ່ວຍອາດນັ່ງຫຼືຢືນກໍໄດ້.—ສຳລັບຂໍ້ມູນເພີ່ມເຕີມກ່ຽວກັບເນື້ອຫາແລະສາກສຳລັບສ່ວນມອບໝາຍນີ້ ເບິ່ງຂໍ້ທີ12 ແລະ 13
8. ຕິດຕາມ: ສ່ວນມອບໝາຍນັກຮຽນນີ້ອາດເຮັດໂດຍຜູ້ຊາຍຫຼືຜູ້ຍິງ. ຜູ້ຊ່ວຍຄວນເປັນເພດດຽວກັນ. (km-SI 5/97 ໜ້າ 2) ນັກຮຽນແລະຜູ້ຊ່ວຍອາດນັ່ງຫຼືຢືນກໍໄດ້. ນັກຮຽນຄວນສາທິດສິ່ງທີ່ຈະເວົ້າເມື່ອຕິດຕາມການເວົ້າລົມກັນເທື່ອກ່ອນ.—ສຳລັບຂໍ້ມູນເພີ່ມເຕີມກ່ຽວກັບເນື້ອຫາແລະສາກສຳລັບສ່ວນມອບໝາຍນີ້ ເບິ່ງຂໍ້ທີ 12 ແລະ 13
9. ສອນຄົນໃຫ້ເປັນລູກສິດ: ສ່ວນມອບໝາຍນັກຮຽນນີ້ອາດເຮັດໂດຍຜູ້ຊາຍຫຼືຜູ້ຍິງ. ຜູ້ຊ່ວຍຄວນເປັນເພດດຽວກັນ. (km-SI 5/97 ໜ້າ 2) ນັກຮຽນແລະຜູ້ຊ່ວຍອາດນັ່ງຫຼືຢືນກໍໄດ້. ເມື່ອສະແດງການສຶກສາຄຳພີໄບເບິນທີ່ໄດ້ເລີ່ມ ສຶກສາໄປແລ້ວ ບໍ່ຈຳເປັນຕ້ອງມີຄຳນຳຫຼືຄຳລົງທ້າຍ ເວັ້ນແຕ່ນັກຮຽນຈະຖືກມອບໝາຍແບບສະເພາະເຈາະຈົງໃຫ້ເອົາໃຈໃສ່ໃນຈຸດນັ້ນ. ບໍ່ຈຳເປັນທີ່ຈະຕ້ອງອ່ານອອກສຽງເນື້ອຫາທີ່ໄດ້ຮັບມອບໝາຍທັງໝົດ ແຕ່ຖ້າຈະອ່ານທັງໝົດກໍເຮັດໄດ້.
10. ອະທິບາຍຄວາມເຊື່ອຂອງເຈົ້າ: ເມື່ອກຳນົດໃຫ້ເປັນຄຳບັນລະຍາຍ ສ່ວນມອບໝາຍນັກຮຽນນີ້ຄວນໃຫ້ຜູ້ຊາຍເຮັດ. ເມື່ອກຳນົດໃຫ້ເປັນການສາທິດ ອາດເຮັດໂດຍຜູ້ຊາຍຫຼືຜູ້ຍິງກໍໄດ້. ຜູ້ຊ່ວຍຄວນເປັນເພດດຽວກັນຫຼືຄວນເປັນສະມາຊິກໃນຄອບຄົວ. ນັກຮຽນຄວນໃຫ້ຄຳຕອບທີ່ຊັດເຈນແລະມີໄຫວພິບສຳລັບຄຳຖາມຫຼັກໂດຍໃຊ້ຂໍ້ມູນໃນແຫຼ່ງອ້າງອີງທີ່ໃຫ້ໄວ້. ນັກຮຽນອາດຕັດສິນໃຈວ່າຈະອ້າງອີງເຖິງສິ່ງພິມອ້າງອີງໃນລະຫວ່າງສ່ວນຂອງລາວຫຼືບໍ່.
11. ບັນລະຍາຍ: ສ່ວນມອບໝາຍນັກຮຽນນີ້ໃຫ້ຜູ້ຊາຍເຮັດແລະໃຫ້ເຮັດແບບບັນລະຍາຍຕໍ່ປະຊາຄົມ. ເມື່ອບັນລະຍາຍໂດຍອາໄສຈຸດຈາກພາກຜະໜວກ ກ ຂອງຈຸນລະສານສອນດ້ວຍຮັກ ນັກຮຽນຄວນເນັ້ນວ່າຈະເອົາຂໍ້ຄຳພີໄປໃຊ້ໃນວຽກປະກາດໄດ້ແນວໃດ. ຕົວຢ່າງເຊັ່ນ ລາວອາດອະທິບາຍວ່າອາດໃຊ້ຂໍ້ຄຳພີເມື່ອໃດ ຄວາມໝາຍຂອງຂໍ້ນັ້ນ ແລະວິທີຫາເຫດຜົນກັບຄົນອື່ນ. ເມື່ອບັນລະຍາຍໂດຍອາໄສຈຸດໜຶ່ງຈາກບົດຮຽນບົດໜຶ່ງໃນຈຸນລະສານສອນດ້ວຍຮັກ ນັກຮຽນຄວນເນັ້ນທີ່ວິທີເອົາຈຸດນັ້ນໄປໃຊ້ໃນວຽກຮັບໃຊ້. ລາວອາດເນັ້ນຕົວຢ່າງໃນຂໍ້ 1 ຂອງບົດຮຽນຫຼືເນັ້ນຂໍ້ເສີມຂໍ້ໃດຂໍ້ໜຶ່ງທີ່ຢູ່ໃນບົດຮຽນ ຖ້າມີປະໂຫຍດ.
12. ເນື້ອຫາ: ເນື້ອຫາໃນຂໍ້ນີ້ແລະຂໍ້ຕໍ່ໄປໃຊ້ກັບສ່ວນມອບໝາຍ “ເລີ່ມລົມ” ແລະ “ຕິດຕາມ”. ເປົ້າໝາຍຂອງນັກຮຽນແມ່ນແບ່ງປັນຄວາມຈິງງ່າຍໆໃນຄຳພີໄບເບິນທີ່ກ່ຽວຂ້ອງກັບຄົນທີ່ລາວເວົ້ານຳແລະວາງຮາກຖານສຳລັບການເວົ້າລົມກັນໃນອະນາຄົດ ເວັ້ນແຕ່ຈະບອກໄວ້ເປັນແນວອື່ນ. ນັກຮຽນຄວນເລືອກຫົວຂໍ້ທີ່ເໝາະກັບເວລາແລະມີປະສິດທິພາບໃນທ້ອງຖິ່ນ. ລາວອາດຕັດສິນໃຈວ່າຈະແນະນຳສິ່ງພິມຫຼືວິດີໂອຈາກກ່ອງເຄື່ອງມືການສອນຂອງເຮົາຫຼືບໍ່. ແທນທີ່ຈະສາທິດການນຳສະເໜີແບບທ່ອງຈຳ ນັກຮຽນຄວນຝຶກທັກສະການເວົ້າລົມກັນ ເຊັ່ນ ການສະແດງຄວາມສົນໃຈສ່ວນໂຕແລະການສະແດງຄວາມເປັນທຳມະຊາດ.
13. ສາກ: ນັກຮຽນຄວນໃຊ້ສາກທົ່ວໄປທີ່ໄດ້ຮັບມອບໝາຍກັບສະຖານະການໃນທ້ອງຖິ່ນ. ຕົວຢ່າງເຊັ່ນ:
(1) ຕາມບ້ານເຮືອນ: ສາກນີ້ລວມເຖິງການປະກາດຕາມເຮືອນ ບໍ່ວ່າຈະຕໍ່ໜ້າ ທາງໂທລະສັບ ຫຼືທາງຈົດໝາຍ ແລະຕິດຕາມການເວົ້າລົມກັນກ່ອນຫນ້ານີ້ກັບຄົນທີ່ເຮົາໄດ້ເວົ້າລົມນຳໃນການປະກາດຕາມເຮືອນ.
(2) ແບບບໍ່ເປັນທາງການ: ສາກນີ້ອະທິບາຍເຖິງການໃຊ້ໂອກາດປ່ຽນການເວົ້າລົມກັນທຳມະດາໃຫ້ເປັນການເວົ້າເລື່ອງໃນຄຳພີໄບເບິນ. ອາດລວມເຖິງການແບ່ງປັນຄວາມຄິດໃນຄຳພີໄບເບິນກັບຄົນທີ່ເຈົ້າເຈິຢູ່ບ່ອນເຮັດວຽກ ຢູ່ໂຮງຮຽນ ຢູ່ແຖວເຮືອນຂອງເຈົ້າ ເທິງລົດສາທາລະນະ ຫຼືບ່ອນອື່ນໆຂະນະເຮັດກິດຈະກຳປະຈຳວັນຂອງເຈົ້າ.
(3) ໃນບ່ອນສາທາລະນະ: ສາກນີ້ອາດລວມເຖິງການປະກາດໂດຍໃຊ້ລໍ້ວາງສະແດງປຶ້ມ, ປະກາດໃນເຂດທຸລະກິດ, ຕາມຖະໜົນຫົນທາງ, ຫຼືໃນສວນສາທາລະນະ, ບ່ອນຈອດລົດ, ແລະທຸກບ່ອນທີ່ສາມາດເຈິຜູ້ຄົນໄດ້ ຫຼືຕອນທີ່ມີໂອກາດໄດ້ເຈິເຂົາເຈົ້າອີກ.
14. ການໃຊ້ວິດີໂອແລະສິ່ງພິມ: ຂຶ້ນຢູ່ກັບສະຖານະການ ນັກຮຽນອາດຕັດສິນໃຈນຳສະເໜີວິດີໂອຫຼືສິ່ງພິມ. ຖ້າສ່ວນມອບໝາຍນັກຮຽນມີວິດີໂອຫຼືຖ້ານັກຮຽນເລືອກທີ່ຈະນຳສະເໜີວິດີໂອ ລາວຄວນແນະນຳແລະພິຈາລະນາວິດີໂອແຕ່ບໍ່ຕ້ອງເປີດ.
ຊີວິດຄລິດສະຕຽນ
15. ຫຼັງຈາກຮ້ອງເພງແລ້ວ ຊ່ວງ 15 ນາທີຕໍ່ຈາກນີ້ຈະປະກອບດ້ວຍໜຶ່ງຫຼືສອງສ່ວນທີ່ອອກແບບໄວ້ເພື່ອຊ່ວຍຜູ້ຟັງເອົາຫຼັກການໃນຄຳພີໄບເບິນໄປໃຊ້. ເວັ້ນແຕ່ຈະບອກໄວ້ເປັນແນວອື່ນ ສ່ວນເຫຼົ່ານີ້ອາດມອບໝາຍໃຫ້ກັບຜູ້ເບິ່ງແຍງຫຼືຜູ້ຊ່ວຍວຽກຮັບໃຊ້ທີ່ມີຄຸນສົມບັດ ຍົກເວັ້ນສ່ວນຄວາມຈຳເປັນຂອງປະຊາຄົມ ເຊິ່ງຜູ້ເບິ່ງແຍງຈະເຮັດ. ເມື່ອກຳນົດໃຫ້ສ່ວນໃດສ່ວນໜຶ່ງເປັນການພິຈາລະນາຖາມ-ຕອບ ຜູ້ບັນລະຍາຍອາດຖາມຄຳຖາມເສີມໄດ້ຕະຫຼອດທັງສ່ວນນອກເໜືອຈາກຄຳຖາມທີ່ໃຫ້ໄວ້. ລາວຄວນເວົ້າຄຳນຳສັ້ນໆເພື່ອໃຫ້ມີເວລາພຽງພໍໃນການກວມເອົາຈຸດຫຼັກແລະເພື່ອໃຫ້ຜູ້ຟັງມີສ່ວນຮ່ວມ. ຖ້າມີການສຳພາດ ຄວນໃຫ້ຜູ້ຖືກສຳພາດສະແດງຄວາມຄິດເຫັນຈາກເທິງເວທີ ແທນທີ່ຈະສະແດງຄວາມຄິດເຫັນຈາກບ່ອນນັ່ງ ຖ້າເປັນໄປໄດ້.
16. ການສຶກສາຄຳພີໄບເບິນປະຈຳປະຊາຄົມ: 30 ນາທີ. ສ່ວນນີ້ມອບໝາຍໃຫ້ຜູ້ເບິ່ງແຍງທີ່ມີຄຸນສົມບັດເໝາະສົມ. (ໃນກໍລະນີທີ່ຈຳນວນຜູ້ເບິ່ງແຍງມີຈຳກັດ ອາດມອບໝາຍຜູ້ຊ່ວຍວຽກຮັບໃຊ້ທີ່ມີຄຸນສົມບັດໄດ້ ຕາມຄວາມຈຳເປັນ.) ຄະນະຜູ້ເບິ່ງແຍງຄວນພິຈາລະນາວ່າໃຜມີຄຸນສົມບັດເໝາະສົມທີ່ຈະນຳການສຶກສາຄຳພີໄບເບິນປະຈຳປະຊາຄົມ. ຜູ້ທີ່ໄດ້ຮັບອະນຸມັດຄວນນຳໃນວິທີທີ່ມີຄວາມໝາຍເພື່ອໃຫ້ການສຶກສາກົງເວລາ ເນັ້ນຂໍ້ຄຳພີສຳຄັນ ແລະຊ່ວຍໃຫ້ທຸກຄົນເຫັນຄຸນຄ່າທີ່ເປັນປະໂຫຍດຂອງຈຸດຕ່າງໆທີ່ກວມເອົາ. ຜູ້ທີ່ໄດ້ຮັບອະນຸມັດຈະໄດ້ຮັບປະໂຫຍດຈາກການທົບທວນຄຳແນະນຳກ່ຽວກັບວິທີເຮັດສ່ວນຖາມ-ຕອບ. (ຫ23.04 ໜ້າ 24 ຂອບ) ຫຼັງຈາກກວມເອົາເນື້ອຫາທີ່ມອບໝາຍສຳລັບອາທິດນັ້ນຢ່າງລະອຽດແລ້ວ ກໍບໍ່ຈຳເປັນຕ້ອງສຶກສາຕໍ່ອີກ. ຖ້າເປັນໄປໄດ້ ຄວນປ່ຽນຜູ້ນຳແລະຜູ້ອ່ານໃນແຕ່ລະອາທິດ. ຖ້າປະທານການປະຊຸມຊີວິດແລະວຽກຮັບໃຊ້ຂໍໃຫ້ຫຍໍ້ການສຶກສາ ຜູ້ນຳຈະຕ້ອງຕັດສິນໃຈວ່າຈະຫຍໍ້ການສຶກສາແນວໃດ. ລາວອາດເລືອກທີ່ຈະບໍ່ອ່ານບາງຂໍ້.
ທົບທວນແລະເວົ້າເຖິງສ່ວນຕ່າງໆຂອງອາທິດຕໍ່ໄປ
17. 3 ນາທີ. ປະທານການປະຊຸມຊີວິດແລະວຽກຮັບໃຊ້ຈະທົບທວນຈຸດທີ່ເປັນປະໂຫຍດເປັນພິເສດຈາກການປະຊຸມ. ເທົ່າທີ່ມີເວລາ ລາວອາດເຊີນໃຫ້ຜູ້ຟັງອອກຄວາມຄິດເຫັນເຖິງຈຸດທີ່ເຂົາເຈົ້າໄດ້ປະໂຫຍດ. ລາວຄວນເວົ້າລວມໆເຖິງເນື້ອຫາສຳລັບອາທິດໜ້ານຳ. ລາວອາດປະກາດລາຍຊື່ນັກຮຽນທີ່ໄດ້ຮັບມອບໝາຍໃຫ້ເຮັດສ່ວນໃນອາທິດໜ້າ ຖ້າມີເວລາ. ເວັ້ນແຕ່ຈະບອກໄວ້ເປັນແນວອື່ນ ປະທານຄວນອ່ານຄຳປະກາດແລະຈົດໝາຍທີ່ຈຳເປັນຕໍ່ປະຊາຄົມໃນລະຫວ່າງການທົບທວນແລະເວົ້າເຖິງສ່ວນຕ່າງໆຂອງອາທິດຕໍ່ໄປ. ຂໍ້ມູນກິດຈະວັດ ເຊັ່ນ ການອອກປະກາດຕາມປົກກະຕິແລະຕາຕະລາງການເຮັດຄວາມສະອາດ ບໍ່ຄວນປະກາດຈາກເວທີ ແຕ່ຄວນຕິດໄວ້ເທິງກະດານຄຳປະກາດ. ຖ້າບໍ່ສາມາດອ່ານຄຳປະກາດຫຼືຈົດໝາຍໄດ້ໃນເວລາທີ່ກຳນົດສຳລັບການທົບທວນແລະເວົ້າເຖິງສ່ວນຕ່າງໆຂອງອາທິດຕໍ່ໄປ ປະທານຄວນຂໍໃຫ້ພີ່ນ້ອງທີ່ເຮັດສ່ວນຕ່າງໆໃນຫົວຂໍ້ຊີວິດຄລິດສະຕຽນໃນການປະຊຸມຫຍໍ້ສ່ວນຂອງໂຕເອງຕາມຄວາມຈຳເປັນ. (ເບິ່ງຂໍ້ທີ 16 ແລະ 19) ການປະຊຸມຈະຈົບລົງໂດຍການຮ້ອງເພງແລະອະທິດຖານ.
ຄຳຊົມເຊີຍແລະຄຳແນະນຳ
18. ຫຼັງຈາກຈົບສ່ວນມອບໝາຍນັກຮຽນແຕ່ລະຄົນ ປະທານການປະຊຸມຊີວິດແລະວຽກຮັບໃຊ້ຈະມີເວລາປະມານ 1 ນາທີໃນການໃຫ້ຄຳຊົມເຊີຍແລະຄຳແນະນຳຕາມຈຸດທີ່ມອບໝາຍໄວ້. ເມື່ອປະທານແນະນຳສ່ວນຂອງນັກຮຽນ ລາວຈະບໍ່ປະກາດຈຸດທີ່ມອບໝາຍໄວ້. ແນວໃດກໍຕາມ ເມື່ອນັກຮຽນເຮັດສ່ວນມອບໝາຍແລ້ວໆແລະຫຼັງຈາກເວົ້າຊົມເຊີຍຢ່າງເໝາະສົມ ປະທານອາດປະກາດຈຸດທີ່ມອບໝາຍໄວ້ແລະບອກວ່າເປັນຫຍັງນັກຮຽນຈຶ່ງເຮັດໄດ້ດີໃນຈຸດນັ້ນ ຫຼືອະທິບາຍແບບກະລຸນາວ່າເປັນຫຍັງນັກຮຽນຈຶ່ງຄວນໃຫ້ຄວາມສົນໃຈຈຸດນັ້ນເພີ່ມເຕີມແລະຈະເຮັດແບບນັ້ນແນວໃດ. ປະທານອາດສະແດງຄວາມຄິດເຫັນໃນດ້ານອື່ນໆຂອງສ່ວນທີ່ນັກຮຽນເຮັດຖ້າຮູ້ສຶກວ່າສິ່ງນີ້ຈະເປັນປະໂຫຍດຕໍ່ນັກຮຽນຫຼືຜູ້ຟັງ. ຄຳແນະນຳເພີ່ມເຕີມໂດຍອາໄສຈຸນລະສານສອນດ້ວຍຮັກ ຈຸນລະສານການສອນ ຫຼືປຶ້ມໂຮງຮຽນ ອາດໃຫ້ເປັນສ່ວນໂຕຫຼັງການປະຊຸມຫຼືໃນເວລາອື່ນ ບໍ່ວ່າຈະໃນຈຸດທີ່ມອບໝາຍໄວ້ຫຼືຈຸດອື່ນ.—ສຳລັບຂໍ້ມູນເພີ່ມເຕີມກ່ຽວກັບບົດບາດຂອງປະທານການປະຊຸມຊີວິດແລະວຽກຮັບໃຊ້ແລະບົດບາດຂອງຜູ້ຊ່ວຍໃຫ້ຄຳແນະນຳ ໃຫ້ເບິ່ງຂໍ້ທີ 19, 24 ແລະ 25
ເວລາ
19. ບໍ່ຄວນມີສ່ວນໃດເຮັດເກີນເວລາ ລວມທັງຄຳເວົ້າຂອງປະທານການປະຊຸມຊີວິດແລະວຽກຮັບໃຊ້. ເຖິງວ່າຊີວິດແລະວຽກຮັບໃຊ້—ຄູ່ມືປະຊມ ຈະບອກກຳນົດເວລາສຳລັບແຕ່ລະສ່ວນ ແຕ່ຖ້າເນື້ອຫາກວມເອົາພຽງພໍ ກໍບໍ່ຈຳເປັນຕ້ອງເພີ່ມຂໍ້ມູນເພື່ອໃຊ້ເວລາທີ່ຈັດສັນໄວ້ທັງໝົດ. ຖ້າສ່ວນໃດເຮັດເກີນເວລາ ປະທານການປະຊຸມຊີວິດແລະວຽກຮັບໃຊ້ຫຼືຜູ້ຊ່ວຍໃຫ້ຄຳແນະນຳຄວນໃຫ້ຄຳແນະນຳເປັນສ່ວນໂຕ. (ເບິ່ງຂໍ້ທີ 24 ແລະ 25) ການປະຊຸມທັງໝົດ ລວມທັງເພງແລະຄຳອະທິດຖານ ຄວນໃຊ້ເວລາ 1 ຊົ່ວໂມງ 45 ນາທີ.
ເມື່ອຜູ້ເບິ່ງແຍງໝວດຢ້ຽມຢາມປະຊາຄົມ
20. ເມື່ອຜູ້ເບິ່ງແຍງໝວດມາຢ້ຽມຢາມປະຊາຄົມ ກຳນົດການຄວນເຮັດຕາມທີ່ອະທິບາຍໄວ້ໃນຊີວິດແລະວຽກຮັບໃຊ້—ຄູ່ມືປະຊຸມ ໂດຍມີຂໍ້ຍົກເວັ້ນຕໍ່ໄປນີ້: ສ່ວນການສຶກສາຄຳພີໄບເບິນປະຈຳປະຊາຄົມໃນສ່ວນຊີວິດຄລິດສະຕຽນຈະຖືກແທນທີ່ດ້ວຍຄຳບັນລະຍາຍການຮັບໃຊ້ 30 ນາທີໂດຍຜູ້ເບິ່ງແຍງໝວດ. ກ່ອນຄຳບັນລະຍາຍການຮັບໃຊ້ ປະທານການປະຊຸມຊີວິດແລະວຽກຮັບໃຊ້ຈະທົບທວນການປະຊຸມຂອງມື້ນັ້ນ ເວົ້າເຖິງສ່ວນຕ່າງໆຂອງອາທິດຕໍ່ໄປ ອ່ານຄຳປະກາດແລະຈົດໝາຍທີ່ຈຳເປັນ ແລ້ວແນະນຳຜູ້ເບິ່ງແຍງໝວດ. ຫຼັງຈາກຄຳບັນລະຍາຍການຮັບໃຊ້ ຜູ້ເບິ່ງແຍງໝວດຈະຈົບການປະຊຸມດ້ວຍເພງທີ່ລາວເລືອກ. ລາວອາດຈະເຊີນພີ່ນ້ອງຊາຍອີກຄົນໜຶ່ງໃຫ້ອະທິດຖານປິດ. ບໍ່ຄວນຈັດຫ້ອງຮຽນເພີ່ມໃນພາສາຫຼັກຂອງປະຊາຄົມລະຫວ່າງການຢ້ຽມຢາມຂອງຜູ້ເບິ່ງແຍງໝວດ. ກຸ່ມອາດຈັດການປະຊຸມເຖິງວ່າຜູ້ເບິ່ງແຍງໝວດຈະມາຢ້ຽມຢາມປະຊາຄົມຫຼັກກໍຕາມ. ແຕ່ກຸ່ມຄວນກັບມາເຂົ້າຮ່ວມປະຊາຄົມຫຼັກອີກເທື່ອໜຶ່ງເພື່ອຟັງຄຳບັນລະຍາຍການຮັບໃຊ້ຂອງຜູ້ເບິ່ງແຍງໝວດ.
ອາທິດທີ່ມີການປະຊຸມໝວດຫຼືການປະຊຸມພາກ
21. ໃນຊ່ວງອາທິດຂອງການປະຊຸມໝວດຫຼືການປະຊຸມພາກ ຈະບໍ່ມີການປະຊຸມປະຊາຄົມ. ຄວນເຕືອນປະຊາຄົມວ່າເນື້ອຫາທີ່ກຳນົດໄວ້ສຳລັບການປະຊຸມລະຫວ່າງອາທິດນັ້ນຄວນພິຈາລະນາເປັນສ່ວນໂຕຫຼືເປັນຄອບຄົວ.
ອາທິດທີ່ມີການປະຊຸມອະນຸສອນ
22. ເມື່ອການປະຊຸມອະນຸສອນກົງກັບມື້ທຳມະດາ ຈະບໍ່ມີການປະຊຸມຊີວິດແລະວຽກຮັບໃຊ້.
ຜູ້ເບິ່ງແຍງການປະຊຸມຊີວິດແລະວຽກຮັບໃຊ້
23. ຜູ້ເບິ່ງແຍງທີ່ໄດ້ຮັບເລືອກຈາກຄະນະຜູ້ເບິ່ງແຍງຈະເຮັດໜ້າທີ່ເປັນຜູ້ເບິ່ງແຍງການປະຊຸມຊີວິດແລະວຽກຮັບໃຊ້. ລາວມີໜ້າທີ່ຮັບຜິດຊອບໃນການເບິ່ງແຍງໃຫ້ການປະຊຸມມີການຈັດການຢ່າງດີຕາມຄຳແນະນຳເຫຼົ່ານີ້. ລາວຄວນສື່ສານກັບຜູ້ຊ່ວຍໃຫ້ຄຳແນະນຳຢ່າງດີຢູ່ສະເໝີ. ທັນທີທີ່ມີຊີວິດແລະວຽກຮັບໃຊ້—ຄູ່ມືປະຊຸມ ຜູ້ເບິ່ງແຍງການປະຊຸມຊີວິດແລະວຽກຮັບໃຊ້ຈະມອບໝາຍສ່ວນການປະຊຸມກາງອາທິດທັງໝົດໃນຊ່ວງສອງເດືອນ. ເຊິ່ງລວມເຖິງສ່ວນມອບໝາຍຂອງນັກຮຽນແລະບໍ່ແມ່ນນັກຮຽນ ແລະປະທານການປະຊຸມກາງອາທິດຈາກທີ່ໄດ້ຮັບອະນຸມັດຈາກຄະນະຜູ້ເບິ່ງແຍງ. (ເບິ່ງຂໍ້ທີ 3-16 ແລະ 24) ເມື່ອມອບໝາຍສ່ວນໃຫ້ນັກຮຽນ ລາວຄວນຄິດເຖິງອາຍຸ ປະສົບການ ແລະຄວາມສາມາດໃນການເວົ້າຂອງນັກຮຽນໃນເລື່ອງທີ່ກຳລັງພິຈາລະນານຳ. ລາວຄວນໃຊ້ວິຈາລະນະຍານທີ່ຄ້າຍກັນເມື່ອມອບໝາຍສ່ວນອື່ນໆຂອງການປະຊຸມ. ຄວນມອບໝາຍແຕ່ລະສ່ວນຢ່າງໜ້ອຍສາມອາທິດກ່ອນມື້ເຮັດສ່ວນ. ຄວນໃຊ້ແບບຟອມການມອບໝາຍໃນການປະຊຸມຊີວິດຄລິດສະຕຽນແລະວຽກຮັບໃຊ້ (S-89) ສຳລັບສ່ວນມອບໝາຍຂອງນັກຮຽນ. ຜູ້ເບິ່ງແຍງການປະຊຸມຊີວິດແລະວຽກຮັບໃຊ້ຄວນເຮັດໃຫ້ແນ່ໃຈວ່າໄດ້ຕິດສຳເນົາຕາຕະລາງວຽກມອບໝາຍສຳລັບການປະຊຸມທັງໝົດໄວ້ເທິງກະດານຄຳປະກາດ. ຄະນະຜູ້ເບິ່ງແຍງອາດມອບໝາຍໃຫ້ຜູ້ເບິ່ງແຍງຫຼືຜູ້ຊ່ວຍວຽກຮັບໃຊ້ອີກຄົນໜຶ່ງມາຊ່ວຍໄດ້. ແນວໃດກໍຕາມ ຄວນໃຊ້ສະເພາະຜູ້ເບິ່ງແຍງເທົ່ານັ້ນເພື່ອມອບໝາຍສ່ວນທີ່ບໍ່ແມ່ນນັກຮຽນ.
ປະທານການປະຊຸມຊີວິດແລະວຽກຮັບໃຊ້
24. ແຕ່ລະອາທິດ ຜູ້ເບິ່ງແຍງຄົນໜຶ່ງຈະເຮັດໜ້າທີ່ເປັນປະທານຕະຫຼອດການປະຊຸມຊີວິດແລະວຽກຮັບໃຊ້. (ໃນກໍລະນີທີ່ຈຳນວນຜູ້ເບິ່ງແຍງມີຈຳກັດ ອາດມອບໝາຍຜູ້ຊ່ວຍວຽກຮັບໃຊ້ທີ່ມີຄຸນສົມບັດຕາມຄວາມຈຳເປັນ.) ລາວມີໜ້າທີ່ຈັດກຽມຄຳນຳເປີດການປະຊຸມແລະທົບທວນແລະເວົ້າເຖິງສ່ວນຕ່າງໆຂອງອາທິດຕໍ່ໄປ. ນອກຈາກນີ້ ລາວຍັງແນະນຳທຸກສ່ວນ ແລະຂຶ້ນຢູ່ກັບຂະໜາດຂອງຄະນະຜູ້ເບິ່ງແຍງ ລາວອາດຮັບຜິດຊອບໃນການເຮັດສ່ວນອື່ນໆໃນການປະຊຸມ ໂດຍສະເພາະສ່ວນທີ່ມີແຕ່ໃຫ້ເປີດວິດີໂອໂດຍບໍ່ຕ້ອງເວົ້າເພີ່ມເຕີມ. ຄວນສະແດງຄວາມຄິດເຫັນລະຫວ່າງສ່ວນຕ່າງໆແບບສັ້ນໆ. ຄະນະຜູ້ເບິ່ງແຍງຈະເປັນຜູ້ກຳນົດວ່າຜູ້ເບິ່ງແຍງຄົນໃດມີຄຸນສົມບັດເໝາະສົມທີ່ຈະເຮັດໜ້າທີ່ນີ້. ຜູ້ເບິ່ງແຍງທີ່ມີຄຸນສົມບັດເໝາະສົມຈະໄດ້ຮັບມອບໝາຍໃຫ້ເປັນປະທານເປັນໄລຍະ. ຂຶ້ນຢູ່ກັບສະພາບການໃນທ້ອງຖິ່ນ ອາດໃຊ້ຜູ້ເບິ່ງແຍງການປະຊຸມຊີວິດແລະວຽກຮັບໃຊ້ເປັນປະທານດຸກວ່າຜູ້ເບິ່ງແຍງທີ່ມີຄຸນສົມບັດເໝາະສົມຄົນອື່ນໆ. ຖ້າຜູ້ເບິ່ງແຍງມີຄຸນສົມບັດເໝາະສົມທີ່ຈະນຳການສຶກສາຄຳພີໄບເບິນປະຈຳປະຊາຄົມ ກໍມີແນວໂນ້ມວ່າລາວມີຄຸນສົມບັດທີ່ຈະເຮັດໜ້າທີ່ເປັນປະທານການປະຊຸມໄດ້. ແນວໃດກໍຕາມ ຂໍໃຫ້ຈື່ໄວ້ສະເໝີວ່າ ຜູ້ເບິ່ງແຍງເຊິ່ງເຮັດໜ້າທີ່ເປັນປະທານຈະຕ້ອງຊົມເຊີຍດ້ວຍຄວາມຮັກແລະເປັນປະໂຫຍດ ແລະໃຫ້ຄຳແນະນຳແກ່ຜູ້ທີ່ເປັນນັກຮຽນ ຕາມຄວາມຈຳເປັນ. ປະທານຍັງຮັບຜິດຊອບໃນການເຮັດໃຫ້ການປະຊຸມຈົບກົງເວລາ. (ເບິ່ງຂໍ້ທີ 17 ແລະ 19) ຖ້າປະທານຕ້ອງການແລະຖ້າມີພື້ນທີ່ພຽງພໍ ອາດຈັດວາງໄມໂຄຣໂຟນແບບຕັ້ງໄວ້ເທິງເວທີເພື່ອທີ່ລາວຈະໄດ້ແນະນຳແຕ່ລະສ່ວນຕໍ່ໄປໄດ້ໃນຂະນະທີ່ພີ່ນ້ອງຊາຍທີ່ໄດ້ຮັບສ່ວນຂຶ້ນມາປະຈຳບ່ອນພ້ອມທີ່ຈະເຮັດສ່ວນ. ນອກຈາກນັ້ນ ປະທານອາດຢາກນັ່ງຢູ່ໂຕະເທິງເວທີລະຫວ່າງທີ່ນັກຮຽນອ່ານເຮັດສ່ວນອ່ານຄຳພີໄບເບິນແລະສ່ວນສິ່ງທີ່ເຈົ້າຈະເອົາໄປໃຊ້ໃນວຽກປະກາດຂອງການປະຊຸມ. ເຊິ່ງອາດຊ່ວຍປະຢັດເວລາ.
ຜູ້ຊ່ວຍໃຫ້ຄຳແນະນຳ
25. ຜູ້ຊ່ວຍໃຫ້ຄຳແນະນຳມີໜ້າທີ່ ຮັບຜິດຊອບ ໃຫ້ຄຳແນະນຳເປັນສ່ວນໂຕກັບຜູ້ເບິ່ງແຍງແລະຜູ້ຊ່ວຍວຽກຮັບໃຊ້ກ່ຽວກັບສ່ວນບັນລະຍາຍທີ່ເຂົາເຈົ້າເຮັດ ຖ້າຈຳເປັນ ລວມເຖິງສ່ວນຕ່າງໆຂອງການປະຊຸມຊີວິດແລະວຽກຮັບໃຊ້ ການບັນລະຍາຍສາທາລະນະ ແລະການນຳຫຼືການອ່ານໃນການສຶກສາຫໍສັງເກດການ ຫຼືການສຶກສາຄຳພີໄບເບິນປະຈຳປະຊາຄົມ—ເບິ່ງຂໍ້ທີ 19.
ຫ້ອງຮຽນເພີ່ມ
26. ປະຊາຄົມອາດຈັດຫ້ອງຮຽນເພີ່ມສຳລັບສ່ວນມອບໝາຍນັກຮຽນ ເຊິ່ງກໍຂຶ້ນຢູ່ກັບຈຳນວນນັກຮຽນ. ຫ້ອງຮຽນເພີ່ມແຕ່ລະຫ້ອງຄວນມີຜູ້ໃຫ້ຄຳແນະນຳທີ່ມີຄຸນສົມບັດເໝາະສົມ ໂດຍຄວນເປັນຜູ້ເບິ່ງແຍງ. ໃນກໍລະນີທີ່ຈຳເປັນ ຈະແຕ່ງຕັ້ງຜູ້ຊ່ວຍວຽກຮັບໃຊ້ທີ່ມີຄຸນສົມບັດເໝາະສົມກໍໄດ້. ຄະນະຜູ້ເບິ່ງແຍງຄວນຕັດສິນໃຈວ່າໃຜຈະເຮັດໜ້າທີ່ນີ້ແລະຄວນຫມູນວຽນວຽກມອບໝາຍຫຼືບໍ່. ຜູ້ໃຫ້ຄຳແນະນຳຄວນເຮັດຕາມຂັ້ນຕອນທີ່ອະທິບາຍໄວ້ໃນຂໍ້ທີ 18. ຖ້າມີການຈັດຫ້ອງຮຽນເພີ່ມ ຄວນຂໍໃຫ້ນັກຮຽນໄປທີ່ຫ້ອງຮຽນເພີ່ມລະຫວ່າງທີ່ພິຈາລະນາສ່ວນຄວາມຮູ້ທີ່ມີຄ່າຈາກພະເຈົ້າຂອງຫົວຂໍ້ສິ່ງທີ່ມີຄ່າຈາກຄຳສອນຂອງພະເຈົ້າຂອງການປະຊຸມ. ເຂົາເຈົ້າຄວນກັບເຂົ້າຮ່ວມປະຊຸມກັບປະຊາຄົມອີກເທື່ອໜຶ່ງຫຼັງຈາກສ່ວນມອບໝາຍນັກຮຽນສ່ວນສຸດທ້າຍໃນການປະຊຸມ.
ວິດີໂອ
27. ວິດີໂອທີ່ເລືອກຈະຖືກເອົາມາໃຊ້ໃນການປະຊຸມນີ້. ວິດີໂອສຳລັບການປະຊຸມກາງອາທິດຈະມີໃຫ້ເບິ່ງຜ່ານແອັບ JW Library® ແລະເປີດເບິ່ງໄດ້ໂດຍໃຊ້ອຸປະກອນຫຼາຍຊະນິດ.
© 2025 Watch Tower Bible and Tract Society of Pennsylvania
S-38-LA 9/25