ບົດທີ 57

ເຈົ້າຈະເຮັດແນວໃດຖ້າເຮັດຜິດຮ້າຍແຮງ?

ສະບັບພິມ

ເຖິງເຈົ້າຈະຮັກພະເຢໂຫວາຫຼາຍແລະຕັ້ງໃຈຈະບໍ່ເຮັດໃຫ້ເພິ່ນເສຍໃຈ ແຕ່ບາງເທື່ອເຈົ້າກໍອາດເຮັດຜິດພາດ. ຄວາມຜິດບາງຢ່າງກໍເປັນພຽງເລື່ອງເລັກໆນ້ອຍໆ ແຕ່ບາງຢ່າງກໍເປັນຄວາມຜິດຮ້າຍແຮງ. (1 ໂກຣິນໂທ 6:9, 10) ເຖິງວ່າເຈົ້າຈະເຮັດຜິດຮ້າຍແຮງ ແຕ່ຂໍໃຫ້ຈື່ໄວ້ວ່າພະເຢໂຫວາຍັງຮັກເຈົ້າ ເພິ່ນພ້ອມຈະໃຫ້ອະໄພແລະຊ່ວຍເຫຼືອເຈົ້າ.

1. ເຮົາຕ້ອງເຮັດຫຍັງເພື່ອພະເຢໂຫວາຈະໃຫ້ອະໄພເຮົາ?

ຄົນທີ່ຮັກພະເຢໂຫວາຄືຊິຮູ້ສຶກເສຍໃຈຫຼາຍເມື່ອເຂົາເຈົ້າເຮັດຜິດຮ້າຍແຮງ. ແຕ່ເຂົາເຈົ້າຈະໄດ້ກຳລັງໃຈຈາກຄຳສັນຍາຂອງພະເຢໂຫວາທີ່ໃຫ້ໄວ້ກັບຄົນຂອງເພິ່ນ ທີ່ບອກວ່າ: “ເຖິງວ່າຄວາມຜິດຂອງພວກເຈົ້າເປັນສີແດງຄືກັບເລືອດ ເຮົາກໍຈະເຮັດໃຫ້ມັນຂາວຄືກັບຫິມະ.” (ເອຊາຢາ 1:18) ຖ້າເຮົາກັບໃຈແທ້ໆ ເຮົາກໍໝັ້ນໃຈໄດ້ວ່າພະເຢໂຫວາຈະໃຫ້ອະໄພເຮົາແນ່ນອນ. ເຮົາຕ້ອງເຮັດແນວໃດແດ່ເພື່ອສະແດງວ່າເຮົາກັບໃຈ? ເຮົາຕ້ອງຮູ້ສຶກເສຍໃຈແທ້ໆກັບສິ່ງທີ່ເຮົາໄດ້ເຮັດແລະເຊົາເຮັດສິ່ງນັ້ນ ແລະຂໍໃຫ້ພະເຢໂຫວາຍົກໂທດໃຫ້ເຮົາ. ຈາກນັ້ນ ເຮົາຕ້ອງພະຍາຍາມປ່ຽນຄວາມຄິດຫຼືນິດໄສທີ່ບໍ່ດີທີ່ອາດເຮັດໃຫ້ເຮົາກັບໄປເຮັດຜິດອີກ ແລະເຮົາຕ້ອງພະຍາຍາມສຸດຄວາມສາມາດທີ່ຈະໃຊ້ຊີວິດຕາມມາດຕະຖານຂອງພະເຢໂຫວາ.—ອ່ານເອຊາຢາ 55:6, 7

2. ພະເຢໂຫວາໃຫ້ຜູ້ເບິ່ງແຍງຊ່ວຍເຮົາແນວໃດເມື່ອເຮົາເຮັດຜິດ?

ຖ້າເຮົາເຮັດຜິດຮ້າຍແຮງ ພະເຢໂຫວາບອກເຮົາໃຫ້ “ເອີ້ນພວກຜູ້ເບິ່ງແຍງປະຊາຄົມໃຫ້ມາຫາ.” (ອ່ານຢາໂກໂບ 5:14, 15) ຜູ້ເບິ່ງແຍງເຫຼົ່ານີ້ຮັກພະເຢໂຫວາແລະຮັກຄົນທີ່ຮັບໃຊ້ເພິ່ນ. ເຂົາເຈົ້າໄດ້ຮັບການຝຶກຢ່າງດີເພື່ອຈະຮູ້ວິທີຊ່ວຍເຮົາໃຫ້ກັບມາສະໜິດກັບພະເຢໂຫວາໄດ້ອີກ.—ຄາລາເຕຍ 6:1

ຖ້າເຮົາເຮັດຜິດຮ້າຍແຮງ ຜູ້ເບິ່ງແຍງຈະຊ່ວຍເຮົາແນວໃດ? ອາດມີການມອບໝາຍຜູ້ເບິ່ງແຍງສອງຫຼືສາມຄົນໃຫ້ຊ່ວຍເຮົາ. ເຂົາເຈົ້າຈະໃຫ້ຄຳແນະນຳຈາກຄຳພີໄບເບິນແລະກະຕຸ້ນໃຫ້ເຮົາປ່ຽນແປງໂຕເອງເພື່ອເຮົາຈະບໍ່ກັບໄປເຮັດຜິດຊ້ຳອີກ. ຖ້າຄົນໜຶ່ງເຮັດຜິດຮ້າຍແຮງແລະບໍ່ກັບໃຈ ຜູ້ເບິ່ງແຍງຈະຕ້ອງຕັດລາວອອກຈາກປະຊາຄົມເພື່ອບໍ່ໃຫ້ລາວມີອິດທິພົນທີ່ບໍ່ດີຕໍ່ພີ່ນ້ອງຄົນອື່ນໆໃນປະຊາຄົມ.

ຮຽນຮູ້ຫຼາຍຂຶ້ນ

ເມື່ອເຮົາເຮັດຜິດຮ້າຍແຮງ ເຮົາຈະເຂົ້າໃຈແລະເຫັນຄ່າການຊ່ວຍເຫຼືອຂອງພະເຢໂຫວາຫຼາຍຂຶ້ນໄດ້ແນວໃດ.

3. ເຮົາຈະກັບມາສະໜິດກັບພະເຢໂຫວາໄດ້ອີກຖ້າເຮົາສາລະພາບຄວາມຜິດ

ຖ້າເຮົາເຮັດຜິດ ເຮົາກໍກຳລັງເຮັດໃຫ້ພະເຢໂຫວາເສຍໃຈ. ດັ່ງນັ້ນ ເຮົາຕ້ອງຂ້ຽວສາລະພາບຄວາມຜິດຕໍ່ເພິ່ນທັນທີ. ອ່ານເພງສັນລະເສີນ 32:1-5 ແລ້ວລົມກັນກ່ຽວກັບຄຳຖາມຕໍ່ໄປນີ້:

ແທນທີ່ຈະພະຍາຍາມປົກປິດຄວາມຜິດຂອງເຮົາ ເປັນຫຍັງຈຶ່ງເປັນເລື່ອງດີທີ່ເຮົາຈະຂ້ຽວສາລະພາບຄວາມຜິດຕໍ່ພະເຢໂຫວາ?

ນອກຈາກການສາລະພາບຄວາມຜິດຕໍ່ພະເຢໂຫວາແລ້ວອີກສິ່ງໜຶ່ງທີ່ຈະຊ່ວຍເຮົາໃຫ້ດີຂຶ້ນກໍຄື ການຂໍຄວາມຊ່ວຍເຫຼືອຈາກຜູ້ເບິ່ງແຍງ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: “ພະເຢໂຫວາຮັກຜູ້ໃດ ພະອົງຈຶ່ງຕີສອນຜູ້ນັ້ນ” (3:01)

ໃນວິດີໂອ ຜູ້ເບິ່ງແຍງຊ່ວຍເຄັນນ໋ອນແນວໃດໃຫ້ກັບມາຫາພະເຢໂຫວາ?

ຜູ້ເບິ່ງແຍງພ້ອມຈະຊ່ວຍເຮົາ. ດັ່ງນັ້ນ ຖ້າເຮົາເຮັດຜິດຮ້າຍແຮງ ໃຫ້ເຮົາບອກຄວາມຈິງທັງໝົດກັບຜູ້ເບິ່ງແຍງ. ອ່ານຢາໂກໂບ 5:16 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງຜູ້ເບິ່ງແຍງຈຶ່ງຊ່ວຍເຮົາໄດ້ງ່າຍຂຶ້ນຖ້າເຮົາບອກຄວາມຈິງທັງໝົດກັບເຂົາເຈົ້າ?

ຮູບ: 1. ພີ່ນ້ອງຊາຍຄົນໜຶ່ງຮູ້ສຶກເສຍໃຈຫຼາຍ ລາວນັ່ງກົ້ມຫົວແລະເອົາມືປິດໜ້າໄວ້. 2. ລາວອະທິດຖານເຖິງພະເຢໂຫວາ. 3. ລາວໂທລົມກັບຜູ້ເບິ່ງແຍງຄົນໜຶ່ງ. 4. ລາວໄປພົບກັບຜູ້ເບິ່ງແຍງ 3 ຄົນ ແລະເລົ່າເລື່ອງທັງໝົດໃຫ້ຜູ້ເບິ່ງແຍງຟັງ. 5. ລາວຮູ້ສຶກສະບາຍໃຈຂຶ້ນແລະຍິ້ມໄດ້ເພາະຕອນນີ້ໃຈຮູ້ຜິດຮູ້ຖືກຂອງລາວບໍ່ໄດ້ລົບກວນລາວອີກແລ້ວ. — ສາລະພາບຄວາມຜິດຂອງເຈົ້າ ເລົ່າຄວາມຈິງທັງໝົດໃຫ້ຜູ້ເບິ່ງແຍງຟັງ ແລະຍອມຮັບຄວາມຊ່ວຍເຫຼືອຈາກພະເຢໂຫວາເພາະເພິ່ນຮັກເຈົ້າ

4. ພະເຢໂຫວາສະແດງຄວາມເມດຕາຕໍ່ຄົນທີ່ເຮັດຜິດ

ຖ້າຄົນທີ່ເຮັດຜິດຮ້າຍແຮງບໍ່ຍອມກັບໃຈແລະບໍ່ຍອມເຮັດຕາມມາດຕະຖານຂອງພະເຢໂຫວາ ລາວຈະຖືກຕັດອອກຈາກປະຊາຄົມແລະເຮົາກໍຈະບໍ່ຫຍຸ້ງກ່ຽວກັບລາວ. ອ່ານ 1 ໂກຣິນໂທ 5:6, 11 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຄືກັບເຊື້ອເຂົ້າຈີ່ທີ່ເຮັດໃຫ້ແປ້ງຟູຂຶ້ນ ການຫຍຸ້ງກ່ຽວຫຼືຄົບຫາກັບຄົນທີ່ເຮັດຜິດແຕ່ບໍ່ຍອມກັບໃຈ ຈະມີຜົນແນວໃດຕໍ່ປະຊາຄົມ?

ຜູ້ເບິ່ງແຍງຈະຮຽນແບບພະເຢໂຫວາທີ່ສະແດງຄວາມເມດຕາຕໍ່ຄົນທີ່ເຮັດຜິດໂດຍ ພະຍາຍາມຊ່ວຍຄົນທີ່ຖືກຕັດອອກຈາກປະຊາຄົມ. ຫຼາຍຄົນທີ່ເຄີຍຖືກຕັດອອກຈາກປະຊາຄົມໄດ້ກັບເຂົ້າມາເປັນສ່ວນໜຶ່ງຂອງປະຊາຄົມອີກ. ເຖິງວ່າເຂົາເຈົ້າຈະຮູ້ສຶກເຈັບປວດທີ່ຖືກຕັດອອກຈາກປະຊາຄົມ ແຕ່ມັນກໍຊ່ວຍເຂົາເຈົ້າໃຫ້ສຳນຶກຜິດ.—ເພງສັນລະເສີນ 141:5