ໝວດ 12
ສະຕິປັນຍາຂອງພະເຈົ້າຊີ້ນຳຊີວິດ
ສຸພາສິດເປັນພະທຳທີ່ຮຽບຮຽງເອົາຄຳແນະນຳທີ່ໄດ້ຮັບການດົນບັນດານ ສ່ວນຫຼາຍແມ່ນຊາໂລໂມນເປັນຜູ້ຮຽບຮຽງ ເຊິ່ງໃຫ້ການຊີ້ນຳສຳລັບຊີວິດປະຈຳວັນ
ພະເຢໂຫວາເປັນຜູ້ປົກຄອງທີ່ສະຫຼາດເລີດລ້ຳບໍ? ເພື່ອຈະຕອບຄຳຖາມນັ້ນແມ່ນໃຫ້ພິຈາລະນາຄຳແນະນຳຂອງພະອົງວ່າໃຊ້ໄດ້ຜົນບໍ? ເມື່ອນຳໃຊ້ແລ້ວເຮັດໃຫ້ຊີວິດດີຂຶ້ນແລະມີຄວາມໝາຍຫຼາຍກວ່າບໍ? ຊາໂລໂມນກະສັດທີ່ສະຫຼາດໄດ້ຂຽນສຸພາສິດຫຼາຍຮ້ອຍຂໍ້ ເຊິ່ງເຂົ້າເຖິງທຸກໆແງ່ມຸມຂອງຊີວິດ. ຂໍໃຫ້ພິຈາລະນາບາງຕົວຢ່າງ.
ການໄວ້ວາງໃຈພະເຈົ້າ. ການໄວ້ວາງໃຈເປັນສິ່ງສຳຄັນເພື່ອມີສຳພັນທະພາບທີ່ດີກັບພະເຢໂຫວາ. ຊາໂລໂມນຂຽນວ່າ: “ຈົ່ງປົງໃຈໃນພະເຢໂຫວາດ້ວຍສຸດຈິດ ແລະຢ່າວາງໃຈໃນສະຕິປັນຍາຂອງເຈົ້າ. ໃນຮີດຄອງທັງຫຼາຍຂອງເຈົ້າ ຈົ່ງຍອມຮູ້ຈັກພະເຈົ້າ ແລະພະອົງຈະນຳໜ້າເຈົ້າໄປໃນຫົນທາງທັງຫຼາຍຂອງເຈົ້າ.” (ສຸພາສິດ 3:5, 6) ການໄວ້ວາງໃຈພະເຈົ້າໂດຍການສະແຫວງຫາການຊີ້ນຳແລະເຊື່ອຟັງພະອົງຈະເຮັດໃຫ້ຊີວິດມີຄວາມໝາຍເລິກເຊິ່ງ. ແນວທາງນັ້ນຊ່ອຍໃຫ້ມະນຸດສາມາດເຮັດໃຫ້ພະເຢໂຫວາຍິນດີແລະມີຄຳຕອບຕໍ່ປະເດັນທີ່ສັດຕູຂອງພະອົງ ຊາຕານຍົກຂຶ້ນມາ.—ສຸພາສິດ 27:11.
ປະຕິບັດກັບຄົນອື່ນຢ່າງສຸຂຸມ. ຄຳແນະນຳທີ່ພະເຈົ້າໃຫ້ກັບຜົວ ເມຍແລະລູກ ແມ່ນເໝາະສົມກັບສະໄໝນີ້ຫຼາຍກວ່າແຕ່ກ່ອນ. ພະເຈົ້າບອກຜູ້ເປັນຜົວວ່າ “ຈົ່ງຊົມຊື່ນຍິນດີດ້ວຍເມຍທີ່ເຈົ້າໄດ້ເອົາເວລາຍັງຫນຸ່ມຢູ່” ເຊິ່ງໝາຍຄວາມວ່າລາວຄວນຈະສັດຊື່ຕໍ່ເມຍ. (ສຸພາສິດ 5:18-20) ຍິງທີ່ແຕ່ງດອງແລ້ວພົບວ່າພະທຳສຸພາສິດມີຄຳພັນລະນາທີ່ງົດງາມກ່ຽວກັບເມຍທີ່ມີຄວາມສາມາດເຊິ່ງໄດ້ຮັບຄຳຊົມເຊີຍຈາກຜົວແລະລູກ. (ສຸພາສິດບົດ 31) ແລະລູກຈະໄດ້ພົບການຊີ້ນຳທີ່ໃຫ້ເຊື່ອຟັງພໍ່ແມ່. (ສຸພາສິດ 6:20) ພະທຳນີ້ຍັງສະແດງວ່າມິດຕະພາບສຳຄັນຫຼາຍ ເພາະວ່າການແຍກໄປຢູ່ຜູ້ດຽວກໍ່ໃຫ້ເກີດຄວາມເຫັນແກ່ຕົວ. (ສຸພາສິດ 18:1) ມິດສະຫາຍສາມາດຊັກຈູງເຮົາໄປໃນທາງດີແລະໃນທາງຊົ່ວກໍໄດ້ ດັ່ງນັ້ນເຮົາຕ້ອງເລືອກຄົບຫາຢ່າງສຸຂຸມ.—ສຸພາສິດ 13:20; 17:17.
ການຖະໜອມຕົວເອງ. ພະທຳສຸພາສິດມີຄຳແນະນຳກ່ຽວກັບເລື່ອງການດື່ມເຫຼົ້າເກີນກຳນົດ ການປູກຝັງຄວາມຮູ້ສຶກທີ່ໃຫ້ເກີດຜົນດີຕໍ່ສຸຂະພາບ ແລະຕ້ານທານຄວາມຮູ້ສຶກທີ່ທຳລາຍສຸຂະພາບ ແລະການເປັນຄົນດຸໝັ່ນ. (ສຸພາສິດ 6:6; 14:30; 20:1) ພະທຳສຸພາສິດເຕືອນວ່າການໄວ້ໃຈໃນການຕັດສິນໃຈຂອງມະນຸດໂດຍບໍ່ຮັບການຊີ້ນຳຈາກພະເຈົ້ານຳໄປສູ່ຄວາມຈິບຫາຍ. (ສຸພາສິດ 14:12) ທັງກະຕຸ້ນເຕືອນເຮົາໃຫ້ປົກປ້ອງຫົວໃຈຈາກແຮງຊັກຈູງທີ່ເສື່ອມຊາມ ເຕືອນວ່າ “ຜົນແລະເຫດແຕ່ຊີວິດມາແຕ່ໃຈ.”—ສຸພາສິດ 4:23.
ຫຼາຍລ້ານຄົນທົ່ວໂລກພົບວ່າການນຳໃຊ້ຄຳແນະນຳນີ້ເຮັດໃຫ້ຊີວິດດີຂຶ້ນ. ເມື່ອເປັນດັ່ງນັ້ນ ເຂົາເຈົ້າຈຶ່ງມີເຫດຜົນພຽງພໍທີ່ຈະຍອມຮັບພະເຢໂຫວາໃນຖານະຜູ້ປົກຄອງ.
—ຂໍ້ມູນມາຈາກສຸພາສິດ.