ບົດທີ 27
ທຸກຢ່າງທີ່ຂ້ອຍເຮັດຕ້ອງສົມບູນແບບບໍ?
ຖ້າເຈົ້າສອບເສັງບໍ່ໄດ້ຄະແນນເຕັມ ເຈົ້າອາລົມເສຍບໍ?
□ ແມ່ນ
□ ບໍ່ແມ່ນ
ຖ້າເຈົ້າຖືກເວົ້າໃຫ້ແມ່ນແຕ່ເລື່ອງເລັກໆນ້ອຍໆ ເຈົ້າຮູ້ສຶກວ່າໂຕເອງບໍ່ມີຄວາມສາມາດເລີຍບໍ?
□ ແມ່ນ
□ ບໍ່ແມ່ນ
ເຈົ້າຫຼິ້ນນຳໃຜບໍ່ໄດ້ດົນຍ້ອນບໍ່ມີໃຜເຮັດຕາມມາດຕະຖານຂອງເຈົ້າໄດ້?
□ ແມ່ນ
□ ບໍ່ແມ່ນ
ຖ້າມີຂໍ້ໃດຂໍ້ໜຶ່ງທີ່ເຈົ້າຕອບວ່າແມ່ນ ເຈົ້າອາດເປັນຄົນທີ່ຄາດໝາຍຄວາມສົມບູນແບບຫຼືຕ້ອງເຮັດທຸກຢ່າງໃຫ້ສົມບູນແບບ. ເຈົ້າອາດຖາມວ່າ ‘ການພະຍາຍາມເຮັດສິ່ງຕ່າງໆໃຫ້ສົມບູນແບບມັນບໍ່ດີບໍ?’ ດີແນ່ນອນ. ຄຳພີໄບເບິນຊົມເຊີຍຄົນທີ່ “ເຮັດວຽກເກັ່ງໆ.” (ສຸພາສິດ 22:29) ແຕ່ຄົນທີ່ຄາດໝາຍຄວາມສົມບູນແບບມັກຈະບໍ່ຍອມໃຫ້ມີຫຍັງຜິດພາດເລີຍແມ່ນແຕ່ໜ້ອຍດຽວ.
ຕົວຢ່າງເຊັ່ນ ເຈສັນອາຍຸ 19 ປີຍອມຮັບວ່າ: “ຕອນຮຽນຢູ່ມັດທະຍົມປາຍໃນປີສຸດທ້າຍ ຂ້ອຍຄິດວ່າຖ້າເສັງໄດ້ຄະແນນບໍ່ດີ ຂ້ອຍກໍຄືຊິເປັນນັກຮຽນທີ່ບໍ່ໄດ້ເລື່ອງຫຍັງເລີຍ. ເມື່ອຂ້ອຍຫຼິ້ນເປຍໂນ ຂ້ອຍກໍຄິດວ່າໂຕເອງຕ້ອງຫຼິ້ນໃຫ້ໄດ້ຄືກັບນັກເປຍໂນມືອາຊີບ.”
ການຄາດໝາຍຄວາມສົມບູນແບບອາດມີຜົນເສຍຕໍ່ການນະມັດສະການພະເຢໂຫວານຳ. ສົມມຸດວ່າຊາຍໜຸ່ມຄົນໜຶ່ງມີແຕ່ຄົນມາຍົກຍ້ອງຊົມເຊີຍແລະໃຜກໍມັກເບິ່ງລາວເປັນແບບຢ່າງ. ແມ່ນຢູ່ວ່າ ການມີຕົວຢ່າງທີ່ດີໃນປະຊາຄົມເປັນປະໂຫຍດຕໍ່ທຸກຄົນ. ແຕ່ການທີ່ລາວກາຍເປັນຈຸດສົນໃຈແລະທຸກຄົນຕ້ອງເຝົ້າເບິ່ງທຸກບາດກ້າວຂອງລາວຕະຫຼອດອາດເຮັດໃຫ້ລາວຕ້ອງຮັກສາພາບລັກຂອງໂຕເອງໄວ້ ລາວຈຶ່ງບໍ່ມີຄວາມສຸກໃນການຮັບໃຊ້ພະເຢໂຫວາ. ຖ້າເປັນແນວນັ້ນ ໜຸ່ມສາວຕ້ອງໄດ້ຮັບຄວາມຊ່ວຍເຫຼືອ. ລາວຄວນຂໍຄວາມຊ່ວຍເຫຼືອ ແຕ່ລາວອາດຈະບໍ່ກ້າຍ້ອນຢ້ານວ່າຈະເຮັດໃຫ້ຄົນທີ່ຍົກຍ້ອງລາວຕ້ອງຜິດຫວັງ. ໃນທີ່ສຸດ ລາວອາດເຊົາຮັບໃຊ້ພະເຈົ້າໂດຍຫາເຫດຜົນວ່າ ‘ຖ້າຂ້ອຍເຮັດໃຫ້ສົມບູນແບບບໍ່ໄດ້ ກໍຢ່າເຮັດດີກວ່າ.’
ຕໍ່ສູ້ກັບການມັກຄວາມສົມບູນແບບ
ຄົນທີ່ຄາດໝາຍຄວາມສົມບູນແບບມັກຄິດວ່າບໍ່ຄວນເຮັດຫຍັງຜິດພາດເລີຍ. ແຕ່ຄວາມຄິດແບບນັ້ນບໍ່ຖືກຕ້ອງ. ຄຳພີໄບເບິນບອກຢ່າງຊັດເຈນວ່າ: “ທຸກຄົນເປັນຄົນບາບແລະບໍ່ໄດ້ສະແດງຄຸນລັກສະນະທີ່ດີໆຂອງພະເຈົ້າຢ່າງຄົບຖ້ວນ.” (ໂຣມ 3:23) ດັ່ງນັ້ນ ຈຶ່ງບໍ່ມີໃຜທີ່ຈະສົມບູນແບບໄດ້ແທ້ໆ. ການເຊື່ອວ່າຄົນເຮົາສາມາດເຮັດສິ່ງຕ່າງໆໄດ້ຢ່າງສົມບູນແບບນັ້ນເປັນຄືກັບການທີ່ຄິດວ່າເຮົາຈະໂດດລົງມາແລ້ວກໍບິນຂຶ້ນໄປໄດ້. ບໍ່ວ່າເຈົ້າຈະເຊື່ອເລື່ອງນີ້ຫຼາຍສ່ຳໃດ ມັນກໍເປັນໄປບໍ່ໄດ້!
ຖ້າເຈົ້າເປັນຄົນທີ່ມັກຄວາມສົມບູນແບບ ເຈົ້າຈະຄວບຄຸມແນວໂນ້ມນີ້ໄດ້ແນວໃດ? ລອງໃຊ້ຄຳແນະນຳເຫຼົ່ານີ້ເບິ່ງ:
ບໍ່ຕ້ອງເປັນ “ທີໜຶ່ງ.” ເຈົ້າຕ້ອງເປັນທີໜຶ່ງໃນທຸກເລື່ອງບໍ? ຄຳພີໄບເບິນບອກວ່າ ນັ້ນເປັນຄືກັບການ “ແລ່ນໄລ່ຕາມລົມ.” (ປັນຍາຈານ 4:4) ຄວາມຈິງກໍຄື ມີພຽງບໍ່ເທົ່າໃດຄົນທີ່ຈະໄດ້ເປັນທີໜຶ່ງ ແລະເຖິງວ່າເຈົ້າຈະໄດ້ເປັນ ມັນກໍຢູ່ພຽງແຕ່ຊົ່ວຄາວເພາະອີກບໍ່ດົນຄົນອື່ນທີ່ເຮັດໄດ້ດີກວ່າກໍຈະມາແທນທີ່ເຈົ້າ. ດັ່ງນັ້ນ ເຈົ້າບໍ່ຈຳເປັນຕ້ອງເປັນ “ທີໜຶ່ງ” ກໍໄດ້ ພຽງແຕ່ພະຍາຍາມເຮັດໃຫ້ດີທີ່ສຸດກໍພໍ ແລະບໍ່ຈຳເປັນຕ້ອງປຽບທຽບກັບຄົນອື່ນ.—ຄາລາເຕຍ 6:4
ເບິ່ງຕາມຄວາມເປັນຈິງ. ເຈົ້າບໍ່ຄວນຄາດໝາຍຫຍັງເກີນຄວາມສາມາດແລະຂີດຈຳກັດຂອງເຈົ້າ. ຖ້າຕັ້ງເປົ້າໝາຍໄວ້ສູງເກີນໄປ ເຈົ້າອາດຈະກາຍເປັນຄົນທີ່ບໍ່ຈຽມຕົວຫຼືຫຼົງໂຕເອງກໍໄດ້. ອັກຄະສາວົກໂປໂລໃຫ້ຄຳແນະນຳທີ່ດີວ່າ: “ຂ້ອຍຈຶ່ງຂໍບອກພວກເຈົ້າທຸກຄົນວ່າ ຢ່າຄິດວ່າໂຕເອງສຳຄັນກວ່າຄົນອື່ນ.” (ໂຣມ 12:3) ດັ່ງນັ້ນ ໃຫ້ເບິ່ງຕາມຄວາມເປັນຈິງ ປັບຄວາມຄາດໝາຍໃໝ່ ແລະພະຍາຍາມເຮັດໃຫ້ດີທີ່ສຸດກໍພໍ ບໍ່ຕ້ອງສົມບູນແບບ.
ຜ່ອນຄາຍແລະຢ່າຈິງຈັງຫຼາຍເກີນໄປ! ລອງເຮັດບາງສິ່ງທີ່ເຈົ້າບໍ່ເກັ່ງ ເຊັ່ນ ຫຼິ້ນເຄື່ອງດົນຕີ. ແມ່ນຢູ່ ເຈົ້າອາດຈະຫຼິ້ນຜິດໆຖືກໆຫຼາຍເທື່ອ. ແຕ່ເທື່ອນີ້ ໃຫ້ລອງເບິ່ງຄວາມຜິດພາດໄປອີກແບບໜຶ່ງໂດຍເບິ່ງວ່າມັນເປັນເລື່ອງຕະຫຼົກ. ຄຳພີໄບເບິນບອກວ່າມີ “ເວລາຫົວ.” (ປັນຍາຈານ 3:4) ການເຮັດແບບນີ້ຈະຊ່ວຍໃຫ້ເຈົ້າເຫັນວ່າການເຮັດຜິດພາດເປັນພຽງສ່ວນໜຶ່ງຂອງການຮຽນຮູ້. ເຖິງວ່າການຍອມຮັບເລື່ອງນີ້ຈະບໍ່ງ່າຍ ແຕ່ຢ່າເບິ່ງໂຕເອງໃນແງ່ລົບແລະຢ່າຕຳໜິໂຕເອງ.
ຂໍຈື່ໄວ້ສະເໝີວ່າພະເຢໂຫວາບໍ່ໄດ້ຮຽກຮ້ອງຄວາມສົມບູນແບບຈາກເຮົາ. ເພິ່ນພຽງຕ້ອງການໃຫ້ເຮົາສັດຊື່ຕໍ່ເພິ່ນ. (1 ໂກຣິນໂທ 4:2) ຖ້າເຈົ້າພະຍາຍາມຮັກສາຄວາມສັດຊື່ ເຈົ້າກໍຈະມີຄວາມສຸກໄດ້ເຖິງວ່າຈະບໍ່ໄດ້ສົມບູນແບບກໍຕາມ.
ການຮັກເພດດຽວກັນເປັນທີ່ຍອມຮັບຢ່າງກວ້າງຂວາງໃນປັດຈຸບັນ. ເຈົ້າຈະຫຼີກລ່ຽງມັນໄດ້ແນວໃດ? ຖ້າເຈົ້າຮັກຄົນເພດດຽວກັນເດຈະເຮັດແນວໃດ?
ຂໍ້ຄຳພີຫຼັກ
“ຄົນດີໃນໂລກນີ້ບໍ່ມີໃຜຈັກຄົນທີ່ເຮັດດີໄດ້ຕະຫຼອດແລະບໍ່ເຮັດຜິດເລີຍ.”—ປັນຍາຈານ 7:20
ຄຳແນະນຳ
ມີຫຍັງບໍທີ່ເຈົ້າບໍ່ກ້າເຮັດຍ້ອນຢ້ານວ່າຈະເຮັດໄດ້ບໍ່ສົມບູນແບບ? ຖ້າເປັນແບບນັ້ນ ໃຫ້ລອງເຮັດໃໝ່ແລະວາງແຜນວ່າຈະເຮັດສຳເລັດມື້ໃດ.
ເຈົ້າຮູ້ບໍ . . . ?
ພະເຢໂຫວາສົມບູນແບບ ແຕ່ເພິ່ນບໍ່ຄາດໝາຍຄວາມສົມບູນແບບຈາກມະນຸດທີ່ບໍ່ສົມບູນແບບ. ເພິ່ນມີເຫດຜົນສະເໝີແລະບໍ່ຄາດໝາຍຈາກເຮົາເກີນຄວາມເປັນຈິງ.
ແຜນພາກປະຕິບັດ!
ຖ້າຂ້ອຍຕຳໜິໂຕເອງແບບບໍ່ມີເຫດຜົນ ຂ້ອຍຈະ ․․․․․
ຖ້າຂ້ອຍຕຳໜິຄົນອື່ນແບບບໍ່ມີເຫດຜົນ ຂ້ອຍຈະ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ເຈົ້າມັກຕັ້ງເປົ້າໝາຍສູງເກີນໄປໃນເລື່ອງໃດແດ່?
● ຂໍ້ຄຳພີຂໍ້ໃດທີ່ຊ່ວຍເຈົ້າໃຫ້ເຂົ້າໃຈຊັດເຈນວ່າພະເຢໂຫວາພະເຈົ້າບໍ່ໄດ້ຄາດໝາຍຄວາມສົມບູນແບບຈາກຜູ້ຮັບໃຊ້ຂອງເພິ່ນ?
● ເປັນຫຍັງຄົນອື່ນຈຶ່ງບໍ່ຢາກຢູ່ໃກ້ເຈົ້າຖ້າເຈົ້າເປັນຄົນທີ່ມັກຄວາມສົມບູນແບບ?
● ເຈົ້າຈະຮັບມືກັບຄວາມຜິດພາດຂອງໂຕເອງທີ່ອາດເກີດຂຶ້ນໄດ້ແນວໃດ?
[ຖ້ອຍຄຳທີ່ຍົກມາໜ້າ 226]
“ພະຍາຍາມເຮັດໃຫ້ດີທີ່ສຸດກໍພໍ ບໍ່ມີເຫດຜົນທີ່ຈະຕ້ອງເປັນຄົນສົມບູນແບບ.”—ເມແກນ
[ຂອບໜ້າ 228]
ຄົນທີ່ຄາດໝາຍຄວາມສົມບູນແບບຈະຫາໝູ່ໄດ້ບໍ?
ເຈົ້າບໍ່ຄ່ອຍຄົບຫາກັບຄົນອື່ນຍ້ອນບໍ່ມີໃຜດີພໍສຳລັບເຈົ້າບໍ? ຫຼືຄົນດີໆມັກຈະຢູ່ຫ່າງຈາກເຈົ້າຍ້ອນເຈົ້າມີມາດຕະຖານສູງເກີນໄປບໍ? ຄຳພີໄບເບິນແນະນຳເຮົາວ່າ: “ຢ່າຄິດວ່າໂຕເອງດີກວ່າຄົນອື່ນແລະຢ່າຄິດວ່າໂຕເອງສະຫຼາດເອົາແທ້ເອົາວ່າ. ເຈົ້າຈະຫາເລື່ອງໃຫ້ໂຕເອງຈິບຫາຍເຮັດຫຍັງ?” (ປັນຍາຈານ 7:16) ຄົນທີ່ຄາດໝາຍຄວາມສົມບູນແບບອາດທຳລາຍໂຕເອງໂດຍເຮັດໃຫ້ຄົນອື່ນບໍ່ຢາກເຂົ້າໃກ້. ແອມເບີບອກວ່າ: “ບໍ່ມີໃຜມັກຢູ່ໃກ້ຄົນທີ່ເຮັດໃຫ້ເຂົາເຈົ້າຮູ້ສຶກຕ່ຳຕ້ອຍ ແລະຄົນທີ່ຄາດໝາຍຄວາມສົມບູນແບບກໍມັກຈະເສຍໝູ່ດີໆໄປຍ້ອນເຫດຜົນເລັກໆນ້ອຍໆ.”
[ຮູບພາບໜ້າ 229]
ການພະຍາຍາມເປັນຄົນສົມບູນແບບກໍຄືກັບການພະຍາຍາມບິນ ມັນເສຍແຮງໄປລ້າໆ