ພໍ່ແມ່ບາງຄົນເວົ້າແນວໃດ?
ເມື່ອລູກເຕີບໃຫຍ່ ທ່ານຈະຊ່ວຍລູກແນວໃດໃຫ້ຮຽນຮູ້ຄຸນຄ່າຂອງການເຊື່ອຟັງ? ທ່ານຈະສອນລູກແນວໃດໃຫ້ມີຄວາມສາມາດທີ່ເປັນປະໂຫຍດເມື່ອກ້າວເຂົ້າສູ່ໄວຜູ້ໃຫຍ່? ຂໍໃຫ້ສັງເກດສິ່ງທີ່ພໍ່ແມ່ບາງຄົນຈາກທົ່ວໂລກໄດ້ເວົ້າ.
ການຢູ່ຮ່ວມກັບຄົນອື່ນແລະການເບິ່ງແຍງເຮືອນຊານ
“ໃນຕອນທີ່ກິນເຂົ້າແລະລົມກັນເຖິງເລື່ອງທີ່ເກີດຂຶ້ນໃນແຕ່ລະມື້ ລູກແຕ່ລະຄົນຈຶ່ງໄດ້ຮຽນຮູ້ທີ່ຈະຟັງຄົນອື່ນ. ເມື່ອລູກເຫັນວ່າພໍ່ແມ່ອົດທົນຟັງ ກໍເຮັດໃຫ້ລູກນັບຖືກັນແລະກັນແລະນັບຖືຕົວເອງນຳ.”—ທ .ຣິຊາດ ຈາກປະເທດອັງກິດ.
“ເປັນເລື່ອງຊື່ນໃຈທີ່ເຫັນລູກປະຕິບັດຕໍ່ກັນດ້ວຍຄວາມນັບຖືແລະແກ້ໄຂຂໍ້ຂັດແຍ່ງດ້ວຍຕົວເອງໂດຍບໍ່ຕ້ອງໃຫ້ພໍ່ແມ່ເຂົ້າໄປຊ່ວຍ. ນອກຈາກນັ້ນ ລູກຍັງສາມາດເວົ້າກັບຜູ້ໃຫຍ່ຄົນອື່ນໆດ້ວຍຄວາມໝັ້ນໃຈ.”—ທ. ຈອນ ຈາກປະເທດອາຝຼິກກາໃຕ້.
“ຂ້ອຍບໍ່ແມ່ນຄົນທີ່ສົມບູນພ້ອມ ບາງຄັ້ງຂ້ອຍທຳຮ້າຍຄວາມຮູ້ສຶກຂອງລູກແບບບໍ່ໄດ້ຕັ້ງໃຈ. ເມື່ອເປັນແບບນັ້ນ ເປັນເລື່ອງສຳຄັນຫຼາຍທີ່ຈະຂໍໂທດລູກ.”—ນ. ເຈແນນ ຈາກປະເທດອົດສະຕຣາລີ.
“ເຮົາສອນລູກໃຫ້ຮູ້ຈັກເຮັດວຽກເຮືອນ. ການທີ່ລູກຮູ້ເຮັດວຽກຊ່ວຍຄົນອື່ນເຮັດໃຫ້ທຸກຢ່າງໃນຄອບຄົວເປັນລະບຽບ ແລະຍັງເຮັດໃຫ້ລູກຮູ້ສຶກພູມໃຈ.”—ທ. ຄາຍ ຈາກປະເທດອົດສະຕຣາລີ.
“ບໍ່ແມ່ນເລື່ອງງ່າຍ ແຕ່ກໍເປັນເລື່ອງສຳຄັນທີ່ຈະສອນລູກໃຫ້ເຂົ້າໃຈ ນັບຖື ແລະໃຫ້ອະໄພກັນແລະກັນ.”— ນ. ຢູໂກະ ຈາກປະເທດຍີ່ປຸ່ນ.
ສຸຂະອະນາໄມແລະສຸຂະພາບ
“ເມື່ອຍັງນ້ອຍ ເຮົາສອນລູກໃຫ້ອາບນ້ຳເອງແລະເພື່ອໃຫ້ມ່ວນເຮົາໃຫ້ລູກຫຼິ້ນຟອງສະບູ ໃຊ້ຢາສະຜົມທີ່ມີຂວດເປັນຮູບກະຕູນ ແລະໃຊ້ຟອງນ້ຳທີ່ເປັນຮູບສັດໂຕນ້ອຍໆ.”—ທ. ເອັດກ້າ ຈາກປະເທດເມັກຊິກ.
“ເມື່ອເຮົາອາໄສຢູ່ເຂດທີ່ບໍ່ມີນ້ຳປະປາ ຂ້ອຍຕັ້ງຄຸນ້ຳແລະສະບູໄວ້ໃນເຮືອນໃນບ່ອນທີ່ຈັບເອົາໄດ້ງ່າຍເພື່ອລ້າງມືຕອນເຂົ້າມາໃນເຮືອນ.”—ທ. ເອັນດູເຣັນ ຈາກປະເທດນີເຊເຣຍ.
“ເຮົາເຮັດຂອງກິນທີ່ມີປະໂຫຍດໃຫ້ລູກທຸກມື້ ແລະບອກລູກໃຫ້ຮູ້ວ່າການກິນອາຫານທີ່ມີຄຸນຄ່າຄົບຖ້ວນເປັນເລື່ອງສຳຄັນ. ລູກຢາກຮູ້ເຄື່ອງປຸງຂອງອາຫານປະເພດຕ່າງໆ ດັ່ງນັ້ນຂ້ອຍຈຶ່ງໃຫ້ລູກຊ່ວຍແຕ່ງກິນ. ການແຕ່ງກິນນຳກັນເຮັດໃຫ້ເຮົາມີໂອກາດເວົ້າລົມກັນຫຼາຍຂຶ້ນ.”—ນ. ຊານດຣາ ຈາກປະເທດອັງກິດ.
“ການອອກກຳລັງກາຍເປັນເລື່ອງສຳຄັນ ແລະເຮົາທີ່ເປັນພໍ່ແມ່ຈຶ່ງໄດ້ວາງຕົວຢ່າງທີ່ດີໃຫ້ລູກ. ລູກມັກອອກກຳລັງກາຍນຳກັນເປັນຄອບຄົວເຊັ່ນ ແລ່ນຊ້າໆ ລອຍນ້ຳ ຕີເຕັນນິດສ ຫຼິ້ນບານບ້ວງ ຫຼືຂີ່ລົດຖີບ. ລູກເຫັນໄດ້ວ່າການອອກກຳລັງກາຍທັງສຳຄັນແລະກໍມ່ວນນຳອີກ.”—ນ. ເຄເຣັນ ຈາກປະເທດອົດສະຕຣາລີ.
“ລູກຕ້ອງການເວລາຢູ່ນຳພໍ່ແມ່ຫຼາຍທີ່ສຸດ. ບໍ່ມີຫຍັງທີ່ຈະທົດແທນໄດ້ ບໍ່ວ່າຈະເປັນເງິນຄຳ ຂອງຂວັນ ຫຼືການໄປທ່ຽວຫຼິ້ນ. ເມື່ອລູກເຂົ້າໂຮງຮຽນ ຂ້ອຍເຮັດວຽກແຕ່ຕອນເຊົ້າແລ້ວຕອນສວາຍຂ້ອຍຢູ່ເຮືອນກັບລູກ.”—ນ. ໂຣມິນາ ຈາກປະເທດອີຕາລີ.
ການສັ່ງສອນ
“ພວກເຮົາພົບວ່າບໍ່ມີວິທີສັ່ງສອນວິທີໃດວິທີໜຶ່ງເຊິ່ງໃຊ້ໄດ້ຜົນດີທີ່ສຸດ ທຸກຢ່າງຂຶ້ນກັບສະພາບການ. ບາງຄັ້ງການສັ່ງສອນໝາຍເຖິງການເວົ້າລົມແບບເປີດໃຈຕໍ່ກັນ ແລະບາງຄັ້ງກໍໝາຍເຖິງການຖອນສິດບາງຢ່າງຂອງລູກ.”—ທ. ອ໋ອກປິຕິ ຈາກປະເທດນີເຊເຣຍ.
“ເຮົາບອກໃຫ້ລູກເວົ້າຄືນຄຳສັ່ງເພື່ອຈະແນ່ໃຈວ່າລູກເຂົ້າໃຈແທ້ໆ. ຈາກນັ້ນກໍເຮັດຕາມທີ່ເວົ້າ. ຖ້າຢາກໃຫ້ລູກເຮັດຕາມສິ່ງທີ່ເຮົາບອກ ເຮົາກໍຕ້ອງເຮັດຕາມສິ່ງທີ່ເຮົາເວົ້າເມື່ອລູກບໍ່ເຊື່ອຟັງ.”—ທ. ຄາຍ ຈາກປະເທດອົດສະຕຣາລີ.
“ເມື່ອແກ້ໄຂຕັກເຕືອນລູກ ຂ້ອຍເຫັນວ່າໄດ້ຜົນດີທີ່ຈະຫຍໍ້ໂຕລົງເພື່ອໃຫ້ຢູ່ໃນລະດັບດຽວກັບລູກ. ການເຮັດແນວນັ້ນຊ່ວຍໃຫ້ລູກຕັ້ງໃຈຟັງແລະເຫັນສີໜ້າຂອງຂ້ອຍທີ່ບົ່ງບອກຫຼາຍໆຢ່າງເທົ່າກັບຄຳເວົ້າ.”—ນ. ເຈັນນີເຟີ ຈາກປະເທດອົດສະຕຣາລີ.
“ເຮົາພະຍາຍາມທີ່ຈະບໍ່ເວົ້າວ່າ ‘ລູກບໍ່ເຄີຍຟັງຄວາມ’ ເຖິງແມ່ນເບິ່ງຄືວ່າເປັນແບບນັ້ນແທ້ໆ. ນອກຈາກນັ້ນ ເຮົາຈະບໍ່ຕຳໜິລູກຕໍ່ໜ້າເດັກນ້ອຍຄົນອື່ນ. ເຮົາຈະຊຶ່ມໃສ່ຫູລູກຫຼືພາລູກອອກໄປທາງນອກເພື່ອຈະເວົ້າກັບລູກສອງຕໍ່ສອງ.”—ທ. ຣູດີ ຈາກປະເທດໂມຊຳບິກ.
“ເດັກນ້ອຍໄດ້ຮັບຜົນກະທົບງ່າຍຫຼາຍຈາກສິ່ງອ້ອມຂ້າງ ແລະເຂົາເຈົ້າມັກຮຽນແບບຄົນອື່ນ. ຍ້ອນແນວນັ້ນ ເຮົາຈຶ່ງຕ້ອງແກ້ໄຂອິດທິພົນທີ່ບໍ່ດີຂອງໝູ່ນັກຮຽນ ສື່ຕ່າງໆ ແລະສະພາບສັງຄົມ ແລະຊ່ວຍລູກໃຫ້ມີສິນລະທຳໂດຍອາໄສຫຼັກການທີ່ດີ. ຫຼັກການທີ່ດີນັ້ນຊ່ວຍລູກໃຫ້ປະຕິເສດສິ່ງໃດກໍຕາມທີ່ກໍ່ຜົນເສຍຫາຍ.”—ທ. ເກກົວ ຈາກສາທາລະນະລັດ ປະຊາທິປະໄຕກົງໂກ
“ການສັ່ງສອນຕ້ອງໜັກແໜ້ນ ຍຸຕິທຳ ແລະສະເໝີຕົ້ນສະເໝີປາຍ. ລູກຕ້ອງເຂົ້າໃຈຜົນຂອງການເຮັດຜິດ ແລະຮູ້ວ່າພໍ່ແມ່ເວົ້າແທ້ແລະກໍເຮັດແທ້.”—ທ. ໂອເວັນ ຈາກປະເທດອັງກິດ.
[ຖ້ອຍຄຳທີ່ຍົກມາໜ້າ 14]
“ຢ່າກະທຳລູກທັງຫຼາຍແຫ່ງຕົນໃຫ້ເຄືອງໃຈຢ້ານວ່າເຂົາຈະເສຍໃຈ.”—ໂກໂລດ 3:21
[ຂອບ/ຮູບພາບໜ້າ 15]
ປະສົບການຂອງຄອບຄົວ
ປະສົບຜົນສຳເລັດໄດ້ໃນຖານະເປັນພໍ່ແມ່ທີ່ຂາດຄູ່
ການສຳພາດນ. ລູຊິນດາ ຟອດສະເຕີ
ເຈົ້າຄຶດວ່າອັນໃດເປັນເລື່ອງຍາກທີ່ສຸດໃນການເປັນແມ່ທີ່ຂາດຄູ່?
ການເປັນແມ່ກໍຍາກພໍແຮງແລ້ວ ແຕ່ການເປັນແມ່ທີ່ຂາດຄູ່ເຮັດໃຫ້ຂ້ອຍເກືອບບໍ່ມີເວລາແລະກຳລັງພຽງພໍເພື່ອຈະເຮັດທຸກສິ່ງທີ່ຕ້ອງເຮັດ. ການສອນຫຼັກການແລະຫຼັກສິນລະທຳໃຫ້ລູກຕ້ອງໄດ້ໃຊ້ເວລາ ແລະຕ້ອງມີເວລາເພື່ອພັກຜ່ອນແລະເພື່ອມ່ວນຊື່ນກັບລູກ. ຂ້ອຍໄດ້ຍາດເອົາເວລາທີ່ຕົນເອງຈະພັກຜ່ອນມາເຮັດວຽກເຮືອນໃຫ້ແລ້ວ.
ເຈົ້າຮັກສາການເວົ້າລົມທີ່ດີກັບລູກໄວ້ແນວໃດ?
ຫຼັງຈາກທີ່ພໍ່ແມ່ຢ່າຮ້າງກັນ ລູກອາດຮູ້ສຶກກັງວົນແລະບໍ່ພໍໃຈ. ເມື່ອມີບັນຫາເກີດຂຶ້ນ ຂ້ອຍເຫັນວ່າຈຳເປັນແທ້ໆທີ່ຕ້ອງເບິ່ງຕາລູກແລະເວົ້າແບບໃຈເຢັນໆ. ຂ້ອຍຖ້າຈົນເຮົາອາລົມເຢັນລົງ ແລ້ວຈຶ່ງເວົ້າເລື່ອງທີ່ເປັນຫ່ວງໂດຍບໍ່ເຮັດໃຫ້ເປັນເລື່ອງໃຫຍ່. ຂ້ອຍຖາມຄວາມຄິດເຫັນຂອງລູກ ແລ້ວກໍຕັ້ງໃຈຟັງ ແລະໃສ່ໃຈຕໍ່ຄວາມຮູ້ສຶກຂອງເຂົາເຈົ້າ. ຂ້ອຍສົນໃຈການຮຽນຂອງລູກແລະຊົມເຊີຍເມື່ອລູກເຮັດໄດ້ດີ. ເຮົາກິນເຂົ້ານຳກັນໃນບັນຍາກາດທີ່ຜ່ອນຄາຍ. ນອກຈາກນັ້ນ ຂ້ອຍບອກລູກສະເໝີວ່າຮັກເຂົາເຈົ້າ.
ເຈົ້າຕີສອນລູກແນວໃດ?
ເດັກນ້ອຍຈຳເປັນຕ້ອງມີກົດລະບຽບທີ່ຈະແຈ້ງແລະສະເໝີຕົ້ນສະເໝີປາຍ. ຂ້ອຍຕັ້ງໃຈທີ່ຈະເປັນແມ່ທີ່ໃຈດີແຕ່ວ່າໜັກແໜ້ນ. ຂ້ອຍຕ້ອງຫາເຫດຜົນກັບລູກແລະອະທິບາຍວ່າເປັນຫຍັງການກະທຳບາງຢ່າງຈຶ່ງຜິດ. ເພື່ອຮູ້ເຫດຜົນໃນການຕີສອນລູກ ຂ້ອຍຕ້ອງຮູ້ກ່ຽວກັບຄວາມຄຶດແລະຄວາມຮູ້ສຶກຂອງລູກກ່ອນ. ຖ້າຂ້ອຍເປັນຝ່າຍຜິດເຊັ່ນ ເຂົ້າໃຈເລື່ອງນັ້ນຜິດ ຂ້ອຍກໍຈະຂໍໂທດລູກ.
ເຈົ້າສອນລູກແນວໃດໃຫ້ນັບຖືຄົນອື່ນ?
ຂ້ອຍໃຫ້ລູກຄຶດເຖິງຄຳສອນຂອງພະເຍຊູທີ່ວ່າ ໃຫ້ປະຕິບັດກັບຄົນອື່ນແບບດຽວກັບທີ່ເຮົາຢາກໃຫ້ເຂົາເຈົ້າປະຕິບັດຕໍ່ເຮົາ. (ລືກາ 6:31) ຂ້ອຍແນະນຳລູກໃຫ້ແກ້ໄຂຄວາມຂັດແຍ່ງລະຫວ່າງເຂົາເຈົ້າດ້ວຍຕົວເອງເທົ່າທີ່ຈະເຮັດໄດ້ ແລະສອນລູກໃຫ້ມີທ່າທີທີ່ອ່ອນໂຍນແລະກະລຸນາເຖິງວ່າກຳລັງໃຈຮ້າຍ.
ເຈົ້າເຮັດຫຍັງເພື່ອພັກຜ່ອນ?
ບາງຄັ້ງເຮົາມີເງິນບໍ່ພໍທີ່ຈະໄປທ່ຽວໄກໆ ດັ່ງນັ້ນເຮົາຈຶ່ງເບິ່ງໃນໜັງສືພິມວ່າມີກິດຈະກຳອັນໃດແດ່ທີ່ມີຄ່າໃຊ້ຈ່າຍບໍ່ແພງ. ມີບາງເທື່ອເຮົາເອົາເຂົ້າໄປກິນຢູ່ສວນສາທາລະນະແລະໄປຍ່າງຫຼິ້ນຢູ່ສວນກ້າເບ້ຍໄມ້ນຳກັນ. ເຮົາພາກັນເຮັດສວນຄົວແລະມ່ວນກັບການເກັບຜັກມາແຕ່ງກິນ. ການພັກຜ່ອນເປັນເລື່ອງສຳຄັນ ເຖິງວ່າຈະພຽງແຕ່ຍ່າງຫຼິ້ນຢູ່ສວນສາທາລະນະໃກ້ເຮືອນກໍຕາມ.
ເຈົ້າໄດ້ຮັບຄວາມຍິນດີແລະບຳເໜັດແນວໃດ?
ການເປັນຄອບຄົວເຊິ່ງມີແມ່ທີ່ຂາດຄູ່ບໍ່ແມ່ນເລື່ອງງ່າຍສຳລັບເຮົາ ແຕ່ເຮົາໃກ້ຊິດກັນຫຼາຍ ແລະເຮົາຮູ້ສຶກຂອບໃຈພະເຈົ້າໃນສິ່ງດີຕ່າງໆທີ່ເຮົາໄດ້ຮັບ. ຂ້ອຍມີຄວາມສຸກທີ່ເຫັນລູກແຕ່ລະຄົນເຕີບໃຫຍ່ຈົນມີບຸກຄະລິກເປັນຂອງຕົວເອງ. ຕອນອາຍຸສ່ຳນີ້ ລູກມັກຢູ່ກັບຂ້ອຍແລະຂ້ອຍດີໃຈຫຼາຍທີ່ມີເຂົາເຈົ້າເປັນໝູ່. ລູກສັງເກດເຫັນອາລົມຂອງຂ້ອຍແລະບາງຄັ້ງກໍມາກອດເພື່ອໃຫ້ກຳລັງໃຈ. ການສະແດງຄວາມຮັກຂອງລູກເຮັດໃຫ້ຂ້ອຍມີຄວາມສຸກຫຼາຍ. ສຳຄັນທີ່ສຸດ ເຮົາຮູ້ສຶກເຖິງຄວາມຮັກຂອງຜູ້ສ້າງທີ່ປ່ຽມດ້ວຍຄວາມຫ່ວງໃຍ ເຊິ່ງຊ່ວຍເຮົາໃຫ້ຜ່ານພົ້ນສະພາບການຕ່າງໆທີ່ຍາກລຳບາກຫຼາຍຄັ້ງແລ້ວ. ຄຳພີໄບເບິນຊ່ວຍຂ້ອຍໃຫ້ມີກຳລັງທີ່ຈະເປັນແມ່ທີ່ດີຕໍ່ໆໄປ.—ເອຊາອີ 41:13
[ຮູບພາບ]
ນາງ ລູຊິນດາກັບລູກສາວຊື່ນາງ ບຣີແລະນາງ ເຊ