ໂຮເຊອາ
7 “ຕອນທີ່ເຮົາຢາກປົວອິດສະຣາເອນ
ເຮົາພັດເຫັນຄວາມຜິດຂອງເອຟຣາຢິມຫຼາຍຂຶ້ນ+
ແລະເຫັນຄວາມຊົ່ວຂອງຊາມາເຣຍຕື່ມອີກ.+
2 ແຕ່ເຂົາເຈົ້າຄິດໃນໃຈວ່າ ເຮົາຈະບໍ່ຈື່ຄວາມຊົ່ວທີ່ເຂົາເຈົ້າເຮັດ.+
ຕອນນີ້ ແນວຊົ່ວທັງໝົດກັບມາຖືກເຂົາເຈົ້າເອງ.
ເຂົາເຈົ້າເຮັດຊົ່ວແນວໃດ ເຮົາກໍເຫັນໝົດ.
3 ເຂົາເຈົ້າເຮັດຊົ່ວເພື່ອໃຫ້ກະສັດດີໃຈ
ແລະເຂົາເຈົ້າຫຼອກລວງເພື່ອໃຫ້ພວກເຈົ້ານາຍພໍໃຈ.
4 ເຂົາເຈົ້າມັກຫຼິ້ນຊູ້.
ຕັນຫາຂອງເຂົາເຈົ້າຮ້ອນແຮງຄືກັບເຕົາທີ່ຮ້ອນໂດຍບໍ່ຕ້ອງເຂ່ຍຖ່ານ.
ເຕົານັ້ນຮ້ອນຫຼາຍແລະມັນຈະຍັງຮ້ອນຈົນຮອດຕອນທີ່ແປ້ງນວດໄວ້ນັ້ນຟູ.
5 ໃນມື້ທີ່ມີການສະຫຼອງໃຫ້ກະສັດ ພວກເຈົ້ານາຍບໍ່ສະບາຍ.
ເຫຼົ້າແວງເຮັດໃຫ້ເຂົາເຈົ້າໃຈຮ້າຍຫຼາຍ.+
ກະສັດຊວນຄົນທີ່ເຍາະເຍີ້ຍລາວໃຫ້ມາເປັນໝູ່.
6 ໃຈຂອງເຂົາເຈົ້າ*ຮ້ອນຮົນຢາກເຮັດຊົ່ວຄືກັບເຕົາອົບທີ່ຮ້ອນໆ.*
ເຖິງວ່າຄົນທີ່ເຮັດເຂົ້າຈີ່ນອນຫຼັບໝົດຄືນ
ແຕ່ໃນຕອນເຊົ້າໄຟໃນເຕົາອົບພັດລຸກແຮງກວ່າເກົ່າ.
7 ໃຈຂອງເຂົາເຈົ້າຮ້ອນຮົນຄືກັບເຕົາອົບ
ແລະເຂົາເຈົ້າຂ້າຜູ້ທີ່ປົກຄອງ*ເຂົາເຈົ້າ.
8 ເອຟຣາຢິມມັກເປັນໝູ່ກັບຄົນຊາດອື່ນ.+
ເອຟຣາຢິມເປັນຄືກັບເຂົ້າຈີ່ມົນໆທີ່ຖືກອົບແຕ່ເບື້ອງດຽວ.
9 ຄົນຕ່າງຊາດກິນແຮງເຂົາເຈົ້າຈົນໝົດ+ ແຕ່ເຂົາເຈົ້າກໍບໍ່ຮູ້ໂຕ.
ຜົມເຂົາເຈົ້າຫງອກ ແຕ່ເຂົາເຈົ້າກໍບໍ່ເຫັນ.
10 ຄວາມຍິ່ງຂອງອິດສະຣາເອນຢືນຢັນວ່າເຂົາເຈົ້າຊົ່ວ.+
ແຕ່ເຂົາເຈົ້າບໍ່ໄດ້ກັບມາຫາພະເຢໂຫວາພະເຈົ້າຂອງເຂົາເຈົ້າ.+
ເຖິງວ່າຈະເຈິເລື່ອງທັງໝົດນີ້ ແຕ່ເຂົາເຈົ້າກໍບໍ່ໄດ້ຂໍໃຫ້ເພິ່ນຊ່ວຍ.
11 ເອຟຣາຢິມເປັນຄືກັບນົກເຂົາທີ່ໂງ່ແລະບໍ່ຮູ້ຈັກຄິດ.*+
ເຂົາເຈົ້າໄປຂໍໃຫ້ເອຢິບ+ແລະອັດຊີເຣຍຊ່ວຍ.+
12 ເຮົາຈະກາງຕານ່າງຈັບສັດຂອງເຮົາຈັບເຂົາເຈົ້າ.
ເຮົາຈະຈັບເຂົາເຈົ້າຄືກັບຈັບນົກຢູ່ເທິງຟ້າ.
ເຮົາຈະລົງໂທດເຂົາເຈົ້າຕາມທີ່ເຮົາໄດ້ເຕືອນເຂົາເຈົ້າແລ້ວ.+
13 ເຂົາເຈົ້າຈະຈິບຫາຍຍ້ອນໜີຈາກເຮົາ!
ເຂົາເຈົ້າຈະຖືກທຳລາຍຍ້ອນເຮັດຜິດຕໍ່ເຮົາ!
ເຮົາກຳລັງຈະໄຖ່ເຂົາເຈົ້າກັບຄືນມາ ແຕ່ເຂົາເຈົ້າພັດເວົ້າຕົວະເລື່ອງຂອງເຮົາ.+
14 ເຖິງວ່າເຂົາເຈົ້າຈະຮ້ອງຄາງຢູ່ເທິງຕຽງ
ແຕ່ໃນໃຈຂອງເຂົາເຈົ້າກໍບໍ່ຢາກໃຫ້ເຮົາຊ່ວຍ.+
ເຂົາເຈົ້າປາດໂຕເອງເພື່ອຂໍໃຫ້ໄດ້ເຂົ້າກັບເຫຼົ້າແວງໃໝ່
ແລະເຂົາເຈົ້າປະຖິ້ມເຮົາ.
15 ເຖິງວ່າເຮົາໄດ້ສັ່ງສອນເຂົາເຈົ້າແລະຊ່ວຍເຂົາເຈົ້າໃຫ້ມີແຮງ
ແຕ່ເຂົາເຈົ້າພັດຕໍ່ຕ້ານເຮົາແລະວາງແຜນຊົ່ວໃສ່ເຮົາ.
16 ເຂົາເຈົ້າປ່ຽນແປງໂຕເອງ ແຕ່ກໍບໍ່ດີຂຶ້ນ.*
ເຂົາເຈົ້າໄວ້ໃຈບໍ່ໄດ້ຄືກັບທະນູສາຍຍານທີ່ຍິງບໍ່ຖືກເປົ້າ.+
ພວກເຈົ້ານາຍຂອງເຂົາເຈົ້າຖືກຂ້າດ້ວຍດາບຍ້ອນເຂົາເຈົ້າສາບແຊ່ງເຮົາ.
ຍ້ອນແນວນີ້ ເຂົາເຈົ້າຈະຖືກເຍາະເຍີ້ຍຢູ່ເອຢິບ.”+