Nsuka ya mokili ekómi pene? Emoniseli ezali nini?

Nini eyelaka yo na makanisi ntango oyokaka liloba “Emoniseli”? Mbala mosusu okanisaka ezali likama moko oyo ekoyela mokili mobimba, oyo ekotya nsuka na bomoi awa na mabele. Bato mosusu bandimaka ete likama ya ndenge wana ekokómela mokili, mingimingi ntango batángaka na bazulunalo makambo lokola oyo:

• “Etumba moko ya nikleere. Ekobanda pwasa, kozanga kokana to mpo bato bazali koyokana te.”​—Bulletin of the Atomic Scientists.

• “Na bambula 10 oyo euti koleka, mopɛpɛ makasi, kozika ya zamba, kozanga mbula, kobebisama ya langi ya milona, molunge makasi, mpe mpela ebebisaki bisika mingi na mokili.”​—National Geographic.

• “Esali sikoyo bambula ebele, maboke ya mayoyo oyo ebebisaka milona etondi na Afrika.”​—The Associated Press.

Mabele ekobebisama na Emonaneli? Biblia elobi nini?

Mabele ekobebisama libela?

Te. Biblia, Liloba ya Nzambe, ekitisaka biso motema ete mabele ekotikala libela na libela. (Mosakoli 1:4) Na esika abebisa mabele oyo akelaki, Nzambe ‘akobebisa nde bato oyo bazali kobebisa mabele.’​—Emoniseli 11:18.

Nsuka ya mokili ekómi pene?

Na Biblia, “mokili” oyo ekosuka ezali mokili ya bato oyo batosaka Nzambe te mpe bato yango balukaka matomba na bango moko. Kaka ndenge asalaki na ntango ya Noa, Nzambe akosukisa ‘mokili ya bato oyo bazali kotyola Nzambe.’​—2 Petro 2:5; 3:7.

Ndenge 1 Yoane 2:17 emonisi yango, “mokili ezali koleka ndenge moko mpe mposa na yango.” Vɛrsɛ oyo emonisi ete Nzambe akobebisa, mabele oyo te, kasi nde bato oyo bazali kokoba kosala mabe.

Ntango nini nsuka ekoya?

Biblia eyebisi biso te ntango nini mpenza nsuka ekoya. (Matai 24:36) Kasi, emonisi ete nsuka ekómi mpenza pene. Biblia esakoli makambo lokola:

• Bitumba, kozanga ya bilei, maladi, mpe koningana makasi ya mabele ekosalema “bisika ndenge na ndenge.”​—Matai 24:3, 7, 14; Luka 21:10, 11; Emoniseli 6:1-8.

• Bato mingi bakokóma lisusu koluka matomba na bango moko. Na ndakisa, bakozala “bato balingá mbongo,” “oyo bazangi botɔndi,” mpe “oyo bazangi komipekisa.”​—2 Timote 3:1-5.

Bato mingi bandimi ete kobanda na mobu 1914, makambo ezali kosalema ndenge Biblia esakolaki mpe ete nsuka ekómi pene. Mpo na koyeba makambo mosusu, talá lisolo “Badati ya Biblia emonisi nini mpo na mobu 1914?” mpe “Elembo ya ‘mikolo ya nsuka,’ to ‘ntango ya nsuka’ ezali nini’?”

Na Biblia, liloba “Emoniseli to apocalypse” elimboli nini?

Liloba ya Grɛki oyo ebongolami na “Emoniseli” elimboli “koyebisa makambo oyo ebombamá,” to “kobimisa sɛkɛlɛ.” Mbala mingi liloba yango elimboli kobimisa polele makambo oyo ebombamá. Biblia elobeli mpe “Emoniseli [to, apocalypse] ya Nkolo Yesu,” oyo ekomonana ntango Yesu akomimonisa moto oyo azali na nguya ya kosilisa makambo nyonso ya mabe mpe ya kopesa baoyo basambelaka Nzambe mbano.​—2 Batesaloniki 1:6, 7; 1 Petro 1:7, 13.

Mokanda ya nsuka ya Biblia ebengami A·po·kaʹly·psis, to Emoniseli, mpamba te emonisi makambo oyo ekosalema na mikolo ezali koya. (Emoniseli 1:1) Mokanda yango ezali na nsango malamu mpe nsango moko ya elikya. (Emoniseli 1:3) Emonisi ete Nzambe akolongola makambo nyonso ya kozanga bosembo mpe akokómisa mabele paradiso. Na ntango yango, bato bakomona lisusu te: mpasi, minyoko, to ata mpe liwa.​—Emoniseli 21:3, 4.

Okosepela koyekola lisusu mingi makambo etali bilaka wana ya kitoko ya Biblia? Batatoli ya Yehova bayekolaka na bato Biblia ofele mpe bakoki kosalisa yo. Ekozala malamu oluka moko na bango soki olingi!