MITUNA OYO BILENGE BATUNAKA
Nasala nini mpo natika kozongisaka makambo nsima?
Osilisaka misala ya ndako mpe badevuare na yo ntango nyonso na retare? Olɛmbi nzoto mpo na yango? Osengeli mpenza kosala makasi mpo otika ezaleli yango! Lisolo oyo ekosalisa yo otika kozongisaka makambo nsima, ata ntango
Nsima ya kotánga lisolo oyo, yanolá na mituna etali ezaleli ya kozongisa makambo nsima.
Biblia elobeli makama ya kozongisaka makambo nsima. Elobi boye: “Moto oyo atalatalaka mopɛpɛ akolona mboto te, mpe moto oyo atalaka mapata akobuka mbuma te.”—Mosakoli 11:4.
Talá mwa makambo oyo ekoki kosala ete ozongisaka makambo nsima mpe oyo okoki kosala mpo otika ezaleli yango.
Mosala yango eleki mpasi.
Lokuta mabe, misala mosusu emonanaka mpasi mpo na kosala, mpe okoki kutu koyoka mposa ya kotika yango. Kasi, talá mwa makanisi oyo.
Kabolá yango na biteni ya mikemike. “Ata soki nayebi ete nazali na retare, nasalaka makasi nasala likambo moko nsima ya mosusu.” (Melissa)
Bandá mbala moko. “Soki kaka bapesi yo mosala moko, bandá yango mbala moko. Ata soki esɛngi kaka kokoma yango na liste ya misala oyo ozali na yango, to mpe kozwa mwa makanisi mpo obosana yango te.”—Vera.
Sɛngá básalisa yo. Ekoki kozala ete baboti to balakisi na yo basí basalá mosala ya ndenge wana. Okoki koyekola makambo epai na bango? Bakoki kosalisa yo obongisa makambo mpo oyeba ndenge oyo okoki kobanda mosala yango.
Toli “Salá liste. Ya solo, yango ekosɛnga yo oyeba kobongisa makambo malamu mpe olandela yango malamumalamu, kosala bongo esimbaka—okosilisa makambo nyonso na ntango oyo esengeli.”—Abbey.
Ozali na mposa ya kosala te.
Mbala mingi, misala oyo basɛngi yo osala nde elɛmbisaka yo mingi. Okosala nini soki osepeli te na mosala bapesi yo? Meká makambo oyo elandi.
Kanisá ntina oyo osengeli kosala yango noki. Kanisá esengo okoyoka soki osilisi mosala yango. Elenge mwasi moko na nkombo Amy, alobi boye: “Nasepelaka ndenge oyo namiyokaka ntango nasilisi mosala na ngonga to liboso ya ngonga oyo esengelaki kosila.”
Kanisá makambo oyo yango ekoki kobimisa. Soki ozongisi makambo nsima, yango ekobakisela yo mitungisi, mpe ekosala ete olonga te. Biblia elobi: “Mpo nyonso oyo moto azali kolona, yango nde akobuka.”—Bagalatia 6:7.
Kobosana te dati oyo osengeli kosilisa mosala. Elenge mwasi moko na nkombo Alicia, alobi boye: “Yango esalisaka ngai nayeba ete esengeli kosilisa mosala na mokolo moko to mibale liboso dati yango ekoka, na nsima nakoki kotalela yango lisusu malamumalamu na boumeli ya mokolo moko to mibale.”
Toli “Salelá makoki na yo ya kokanisa. Omindimisa ete okosala oyo esengeli mpe eloko moko te ekopekisa yo. Soki nalobi ete nakosala eloko moko nakosala yango mpenza.”—Alexis
Ozali na makambo mingi ya kosala.
Elenge mobali moko na nkombo Nathan, alobi boye: “Bato balobaka ete nazongisaka makambo nsima, kasi ezali bongo te! Bayebaka te ete nazalaka na makambo mingi ya kosala!” Soki omiyokaka ndenge moko na Nathan, meká kosala makambo oyo elandi.
Bandá na makambo oyo ezali pɛtɛɛ. Elenge mwasi moko na nkombo Amber, alobi boye: “Moto moko ayebisaki ngai ete soki mosala moko ekozwa ngai miniti mitano te, nasengeli kosala yango mbala moko. Na misala yango tokoki kotánga kopɛtola ndako, kotanda bilamba, kosukola basaani, mpe kobenga moto na telefone.”
Tyá makambo ya ntina na esika ya liboso. Biblia elobi: “Bóluka mpenza koyeba makambo oyo eleki ntina.” (Bafilipi 1:10) Ndenge nini okoki kosalela toli yango na bomoi na yo? Elenge mwasi moko na nkombo Anna alobi boye: “Nazalaka na liste moko oyo natyaka makambo nyonso nasengeli kosala mpe ntango oyo nasengeli kosilisa yango. Kasi oyo eleki ntina, nakomaka mokolo oyo nakobanda mpe mokolo oyo nakosilisa yango.”
Omoni ete kosala bongo ezali mpasi? Simbá ete soki osali programɛ, okoyeba kosalela ntango na yo malamu na ndenge oyo ebongi. Mpe yango ekosala ete omitungisa mingi te. Elenge mwasi moko na nkombo Kelly, alobi boye: Kozala na programɛ ya malamu esalisaka ngai nazala motema ya kokita mpe natya makambo na molɔngɔ.
Tyá makanisi na yo na makambo oyo ozali kosala. Jennifer alobi boye: “Nayebisaka moto nyonso na ndako soki nabandi mosala moko. Nasɛngaka bango bayebisa ngai soki nazali na likambo moko oyo bakolinga ngai nasala liboso nafandela makambo na ngai. Nakangaka telefone na ngai mpe sonnerie ya ba-email.”
Toli “Misala nyonso oyo osengeli kosala, ekosila te soki naino osali yango te. Silisá mosala yango, na esika okanisakanisaka. Na ndenge yango okozala na motema ya kokita na boumeli ya mokolo.”—Jordan.