Kozala na baninga; solisyo mpo na kotika komiyoka yo moko​—Ndenge oyo Biblia ekoki kosalisa yo

Na 2023, minganga mingi na mokili mobimba bamonaki ete bato mingi bakómi na mayoki ete bazali bango moko, yango ezali maladi oyo ezali kobangisa. Mokakatano yango ekosila mpenza?

• “Komiyoka lokola ozali yo moko mpe koboya kozala na bato ezali mayoki oyo ekoki kobebisa sante mpe kimya ya moto. Tozali na likoki ya kosilisa mokakatano yango.” Ndenge nini? “Soki mokolo na mokolo tozali kozwaka ntango ya kokómisa makasi boninga na biso ná basusu.”a (Dr. Vivek Murthy, U.S. surgeon general)

Komiyoka lokola ozali yo moko eyaka kaka te ntango moto azali ye moko. Bato mosusu bamiyokaka bango moko ata ntango bazali na kati ya bato ebele. Ezala likambo nini esalaka ete omiyoka lokola ozali yo moko, Biblia ekoki kosalisa yo. Ezali na batoli ya ntina oyo ekoki kosalisa yo okómisa makasi boninga ná basusu mpo olonga mayoki wana ya mabe.

Mitinda ya Biblia oyo ekoki kosalisa yo

Yebá kosolola na bato. Yango elakisi kaka te koyebisa moto ndenge ozali komiyoka, kasi mpe koyoka malamu moninga. Soki ozali kotyela basusu likebi mingi, boninga na bino mpe ekokóma makasi.

• Etinda ya Biblia: “Bóluka kaka matomba na bino moko te, kasi mpe matomba ya basusu.”​—Bafilipi 2:4.

Fungwamaka. Luká kosala boninga na bato ya ndenge na ndenge; mikóló, baleki, bato ya minɔkɔ mosusu to mpe bikólo mosusu.

• Etinda ya Biblia: “Bófungola mpenza motema.”​—2 Bakorinti 6:13.

Mpo na koyeba makambo mosusu oyo etali ndenge ya kokómisa makasi boninga ná basusu, tángá lisolo “Comment combler notre besoin d’amitié.”