Baguvɛrnema ya mokili mobimba ebimisi dolare koleka miliare 2 000 mpo na kosomba bibundeli​—Biblia elobi nini?

Na boumeli ya mobu 2022, baguvernɛma ya mokili mobimba ebimisaki dolare miliare 2 240, mbongo ebele mpenza koleka ndenge ebimisaki liboso mpo na kosomba bibundeli. Ebimisaki mosolo yango mingimingi ntango Russie ekendaki kobundisa Ukraine. Na sanza ya 04/2023, ebongiseli moko na nkombo Institut international de recherche sur la paix de Stockholm (SIPRI) ebimisaki lapolo moko ya makambo oyo esalemaki na boumeli ya mobu 2022.

• Mbongo oyo bikólo ya Mpoto ebimisaki na likambo yango elekaki mosika mpenza (13%) mbongo oyo ebimisaki kobanda na mobu 1991 ntango kowelana oyo ezalaki kati na bikólo ya ɛsti na oyo ya wɛsti ya Mpoto ekómaki na nsuka.

• Mbongo oyo ekólo Russie ebimisi na kosomba bibundeli emati mpenza (9.2%). Elongwe ekólo ya mitano mpe ekómi ekólo ya misato na mokili mobimba oyo ebimisaka mbongo mingi mpo na kosomba bibundeli.”

• Etats-Unis nde ekólo ya liboso na mokili mobimba na likambo yango, mpo ebimisaki 39% ya mbongo oyo eleki mbongo nyonso oyo bikólo ya mokili mobimba ebimisaka mpo na kosomba bibundeli.

Nan Tian, moto moko ya mayele na makambo etali nkita, oyo azali mpe moko ya bato oyo bakomaki lapolo ya SIPRI alobi boye: “Komona ete na bambula eleki, baguvernɛma ekobaki kobimisa mosolo mingi mpo na kosomba bibundeli emonisi ete tozali kobika na mokili moko oyo ezangi mpenza libateli.

Biblia esakolaki ete baguvernɛma ya nguya ekowelana mpe ekozala na matata na kati na yango, eyebisi biso mpe eloko kaka moko oyo ekomema kimya ya solosolo.

Biblia esakolaki ndenge mampinga ekowelana

• Biblia ebengi mikolo oyo tozali kobika“ntango oyo etyamá ya nsuka.”​—Danyele 8:19.

• Mokanda ya Danyele esakolaki ete na boumeli ya ntango yango, bikólo ya nguya ekotindikana. Bikólo yango ekobunda mpo na koleka mosusu na nguya. Bitumba kati na bikólo yango ekosala ete ebimisa “misolo ya wolo mpe ya palata oyo ebombamá.”​—Danyele 11:40, 42, 43.

Mpo na koyeba makambo mosusu mpo na esakweli yango ya kokamwa, talá video Esakweli moko ezali kokokisama​—Danyele mokapo 11.

Ndenge oyo kimya ya solosolo ekozongisama

• Biblia emonisi ete Nzambe akolongola baguvernɛma ya bato. “Akotya bokonzi moko oyo ekobebisama te. Mpe bokonzi yango ekoleka na ekólo mosusu te. Ekotuta mpe ekosukisa makonzi oyo nyonso, mpe ekotikala seko.”​—Danyele 2:44.

• Mosika te, Yehovaa Nzambe akosala likambo moko oyo bato bazali na likoki ya kosala yango te: akotya kimya ya solosolo mpe oyo ekoumela mpo na libela. Ndenge nini akosala yango? Guvernema na ye oyo ezali na likoló ekobebisa bibundeli nyonso mpe ekosilisa mobulu.​—Nzembo 46:8, 9.

Mpo na koyeba makambo mosusu oyo Bokonzi ya Nzambe ekosala, tánga lisolo ““Na Bokonzi ya Nzambe kimya ekokóma mingi.”