Kobɛta bato masasi na biteyelo​—Biblia elobi nini mpo na makambo ya boye?

Na mokolo ya 24/05/2022, likambo moko ya nsɔmɔ esalemaki na mwa mboka moko na etúká ya Texas, na États-Unis. Zulunalo moko (The New York Times) elobaki ete “moto moko oyo azalaki na mondɔki abomaki bana 19 ná balakisi mibale . . . na eteyelo Robb Elementary School.”

Likambo ya mawa, makambo ya ndenge wana ezali kosalema mingi. Zulunalo mosusu (USA Today) elobaki ete na États-Unis mpamba, “babɛtaki masasi na biteyelo mbala 249 na mbula oyo eleki, nzokande esalemá naino bongo te kobanda 1970.”

Mpo na nini makambo ya nsɔmɔ boye ezali kosalema? Tokoki kosala nini mpo na makambo yango ya mabe? Tokoki kozala na elikya ete makambo ya mobulu ekosila? Biblia epesi biyano.

Mpo na nini mokili ezali kotonda na mobulu?

•  Biblia elobi ete tozali na “mikolo ya nsuka,” eleko oyo bato mingi “balinganaka te na libota” mpe bazali “bato ya nko,” oyo basalaka makambo ya mobulu mpe ya nsɔmɔ mpenza. Bato yango “bakosala lisusu mabe koleka.” (2 Timote 3:1-5, 13) Mpo na koyeba makambo mosusu, tángá lisolo “Biblia esakolaki makambo oyo bato bazali kokanisa mpe kosala lelo oyo?”

Bato mingi bazali komituna, ‘Mpo na nini Nzambe azali kotika ete makambo lokola kobɛta bato masasi na biteyelo esalema?’ Mpo omona eyano ya Biblia, tángá lisolo “Mpo na nini makambo mabe ekómelaka bato malamu?”

Tokoki kosala nini mpo na makambo yango ya mabe?

•  “Makambo nyonso oyo ekomamaki kala ekomamaki mpo eteya biso, mpo, . . . na libɔndisi oyo euti na Makomami, tózala na elikya.”​—Baroma 15:4.

Batoli ya Biblia ekoki kosalisa yo omitungisa mingi te mpo na mobulu oyo etondi na mokili. Mpo na koyeba makambo mosusu, tálá Réveillez-vous! oyo elobi La violence cessera-t-elle un jour?

Baboti, mpo na koyeba ndenge ya kosalisa bana na bino na ntango ya bansango ya kobangisa, bótánga lisolo Enfants et actualités troublantes.

Mobulu ekosila mokolo mosusu?

•  “Akosikola molimo na bango na monyoko mpe na mobulu.”​—Nzembo 72:14.

•  “Bakotula mipanga na bango ete ekóma bitimweli ya mabele mpe makɔnga na bango ete ekóma makwangola ya kokata matiti. Bakotombola mopanga te, ekólo moko mpo na kobunda na ekólo mosusu, mpe bakoyekola etumba lisusu te.”​—Mika 4:3.

Nzambe akosala likambo oyo bato bazali kokoka kosala te. Bokonzi na ye, guvɛrnema oyo ezali na likoló, ekobebisa bibundeli nyonso mpe ekosukisa mobulu. Mpo na koyeba makambo mosusu oyo Bokonzi ya Nzambe ekosala, tángá lisolo “Na Bokonzi ya Nzambe ‘kimya ekokóma mingi.’”