Nasengeli kozwa batisimo?—Eteni 2: Ndenge ya komibongisa mpo na batisimo

Soki otosaka mibeko ya Biblia mpe ozali kokómisa makasi boninga na yo na Nzambe, boye ozali kokanisa kozwa batisimo. Ndenge nini okoyeba soki obongi mpo na kozwa batisimo?a

Na lisolo oyo

• Nasengeli kozala na boyebi ya ndenge nini?

• Nini nasengeli kosala sikoyo?

• Makambo bilenge mosusu balobi

Nasengeli kozala na boyebi ya ndenge nini?

Ndenge ya komibongisa mpo na batisimo esɛngi te moto akanga makambo nyonso na motó lokola moto oyo azali kobongisa ekzamɛ moko ya kelasi. Atako bongo, ekosɛnga yo osalela ‘makoki na yo ya kokanisa’ mpo omindimisa mpenza ete makambo oyo Biblia eteyaka ezali solo. (Baroma 12:1) Na ndakisa:

• Ondimaka mpenza ete Nzambe azalaka mpe ete ebongi osambelaka ye?

  Biblia elobi: “Moto oyo azali kopusana epai ya Nzambe asengeli kondima ete ye azali mpe akómaka moto oyo apesaka mbano na baoyo bazali koluka ye na mposa makasi.”​—Baebre 11:6.

  Omituna boye: ‘Mpo na nini nandimaka ete Nzambe azalaka?’ (Baebre 3:4) ‘Mpo na nini nasambelaka ye?’​—Emoniseli 4:11.

  Ozali na mposa ya lisalisi? Talá lisolo “Bomoi ekelamá to ebimá yango moko?​—Eteni 1: Mpo na nini kondima ete Nzambe azali?”

• Ondimaka ete Nzambe nde akomisá makambo oyo ezali na Biblia?

  Biblia elobi: “Makomami nyonso ekomami na litambwisi ya elimo ya Nzambe. Ezali na litomba mpo na koteya, kopamela, kosembola makambo, mpo na kopesa disiplini na bosembo.”​—2 Timote 3:16.

  Omituna boye: ‘Nini endimisaka ngai ete Biblia ezali te buku moko oyo moto akomi makanisi na ye moko na kati?’​—Yisaya 46:10; 1 Batesaloniki 2:13.

  Ozali na mposa ya lisalisi? Talá lisolo “Ndenge nini Biblia ekoki kosalisa ngai?​—Eteni 1: Luká koyeba Biblia na yo.”

• Ondimi mpenza ete Yehova asalelaka lisangá ya bokristo mpo na kokokisa mokano na ye?

  Biblia elobi: “Nkembo ezala na [Nzambe] na nzela ya lisangá mpe na nzela ya Kristo Yesu mpo na mabota nyonso libela na libela.”​—Baefese 3:21.

  Omituna boye: ‘Namonaka ete makambo nayekolaka na Biblia na makita ya bokristo lokola eutaka epai ya bato to eutaka na Yehova?’ (Matai 24:45) ‘Nakendaka na makita ya lisangá ata soki baboti na ngai bakokende te (soki bapesi yo ndingisa)?’​—Baebre 10:24, 25.

  Ozali na mposa ya lisalisi? Talá lisolo “Mpo na nini toyanganaka na makita na Ndako ya Bokonzi?”

Nini nasengeli kosala sikoyo?

Esengeli kaka te ozala moto ya kokoka mpo ozwa batisimo. Atako bongo, osengeli mpenza komonisa ete olingi ‘kotika oyo ezali mabe, mpe kosala oyo ezali malamu.’ (Nzembo 34:14) Na ndakisa:

• Osalelaka mitinda ya Yehova na bomoi na yo?

  Biblia elobi: “Bóbatela lisosoli ya malamu.”​—1 Petro 3:16.

  Omituna boye: ‘Namonisaka ete “makoki na ngai ya kososola ... emesaná kokesenisa ná mabe ná malamu”?’ (Baebre 5:14) ‘Nakoki kokanisa na mabaku oyo nalongaki mpenza mbamba ya baninga na ngai mpo na kosala oyo ezali mabe? Nazali na baninga oyo balendisaka ngai mpo nasala oyo ezali malamu?’​—Masese 13:20.

  Ozali na mposa ya lisalisi? Talá lisolo “Ndenge nini nakoki koteya lisosoli na ngai?”

• Oyebi ete okozongisa monɔkɔ epai ya Yehova mpo na makambo nyonso oyo osalaka?

  Biblia elobi: “Mokomoko na biso akozongisa monɔkɔ epai ya Nzambe mpo na ye moko.”​—Baroma 14:12.

  Omituna boye: ‘Namidimisi ete nazali na lisosoli ya sembo mpe nazalaka sembo na basusu?’ (Baebre 13:18) ‘Nandimaka mabunga na ngai to nalukaka kobomba yango to kopamela basusu mpo na yango?’​—Masese 28:13.

  Ozali na mposa ya lisalisi? Talá lisolo “Nasengeli kosala nini soki nasali libunga?”

• Ozali kobatela boninga malamu na Yehova?

  Biblia elobi: “Bópusana penepene na Nzambe, mpe ye akopusana penepene na bino.”​—Yakobo 4:8.

  Omituna boye: ‘Makambo nini nasalaka oyo ekómisaka boninga na ngai na Yehova makasi?’ Na ndakisa, ‘Mbala boni natángaka Biblia?’ (Nzembo 1:1, 2) ‘Mbala boni nabondelaka?’ (1 Batesaloniki 5:17) ‘Mabondeli na ngai ezalaka mpenza ya sikisiki? Baninga na ngai bazalaka mpe baninga ya Yehova?’​—Nzembo 15:1, 4.

  Ozali na mposa ya lisalisi? Talá lisolo “Ndenge nini Biblia ekoki kosalisa ngai?​​—Eteni 2: Ndenge ya kosala mpo osepela na botángi ya Biblia” mpe “Mpo na nini nasengeli kobondela?”

TOLI: Mpo na kosalisa yo omibongisa mpo na batisimo, tángá mokapo 37 ya buku Mituna oyo bilenge batunaka​—Biyano oyo ebongi, Volimi 2. Tyá mingimingi likebi na etanda na lokasa 308, 309.