Zalá na mpiko mpe sembo lokola Benaya

Benaya azalaki elombe ya etumba na boyangeli ya Mokonzi Davidi mpe ya Mokonzi Salomo. Atako Benaya azalaki mwana ya nganga-nzambe mpe akokaki te kosimba bibundeli, abundaki bitumba ya Yehova. Amonisaki mpiko mpenza. Na ndakisa, abomaki nkɔsi moko na libulu ya mai mpe alongaki soda moko ya engambe mpenza. Davidi azalaki kotyela Benaya motema mingi, yango wana atyaki ye mokonzi ya basoda oyo bakɛngɛlaka ye.—2 Sa. 23:​20-23.

Benaya atikalaki sembo epai ya Davidi ntango Abisalome ná Adoniya batombokelaki Davidi. (2 Sa. 8:18; 15:18; 1 Bak. 1:8) Ntango Davidi akómaki mobange, Benaya apesaki ye mpe mabɔkɔ mpo Salomo atyama mokonzi. (1 Bak. 1:​32-40) Ya solo, Benaya azalaki sembo epai ya Yehova mpe epai ya baoyo Yehova atyaki mafuta ata na ntango oyo basusu bazalaki sembo te.

Biso mpe tosengeli na mpiko mpo na kobundisa monguna na biso monene, Satana, ná baoyo bapesaka ye mabɔkɔ. Lisusu, tosengeli kozala na ekateli ya kokoba kotosa mibeko ya Nzambe. (Ef. 6:11; 1 Pe. 5:​8, 9) Ata soki basusu baponi kotika Yehova, biso tokotikala sembo epai na ye, mpo toyebi ete akopesa biso mbano.—2 Sa. 22:26.