Tókolisa makoki na biso ya kosakola—Kosalisa bayekoli ya Biblia bákoma na bizaleli malamu ya koyekola

Mpo na nini ezali na ntina: Mpo bayekoli ya Biblia bákɔmɛla na elimo, basengeli kaka te kotondisa makanisi mpe mitema na bango na mateya ya ebandeli ya Liloba ya Nzambe. (Ebr. 5:12–6:1) Koyekola esɛngaka milende. Esɛngaka mpe kokokanisa makambo tozali koyekola na oyo tosí toyebi, mpe koluka koyeba ntina na yango. (Mas. 2:1-6) Koyekola kosala bolukiluki ekosalisa bayekoli báyeba koyanola mituna ya Biblia na lisalisi ya mikanda ya moombo ya sembo. Soki basali mpenza makasi ya kosalela makambo oyo bazali koyekola, bakolonga mikakatano oyo bakristo bakutanaka na yango.—Luka 6:47, 48.

Ndenge ya kosala yango:

Monisá mpenza ntina ya koluka lisalisi ya Yehova na nzela ya libondeli liboso ya boyekoli nyonso.—Yoa. 14:26; 1 Ko. 2:10.
Kobanda ntango obandi koyekola na moto, lendisá ye abongisaka boyekoli na ye liboso. Lakisá ye mokanda na yo ya boyekoli, mpe salisá ye ayeba ndenge ya kotya mokɔlɔtɔ to elembo kaka na maloba to bafraze ya ntina.
Sɛngá ye apesa biyano na maloba na ye moko. Kokómisa boyekoli te lisolo ya mituna mpe biyano oyo moyekoli akobanda kaka kotánga biyano oyo ekomami na buku.
Lendisá moyekoli atángaka Liloba ya Nzambe mokolo na mokolo. Lakisá ye programɛ ya botángi ya Biblia oyo ezali na jw.org, oyo emonisi ndenge akoki kosala yango. Esɛngaka mpenza milende mpo na kokóma na momesano ya kotánga Biblia mokolo na mokolo, kasi komityela mokano ya kosala yango ezali na ntina.—Nz. 1:2, 3.
Lakisá moto oyo oyekolaka na ye Biblia ndenge ya kosalela Watchtower Library to Watchtower MIKANDA OYO EZALI NA INTERNET mpo na koluka biyano na mituna ya Biblia. Salisá ye ayeba bilembo ya bankombo ya mikanda oyo tosalelaka mingi na makita.

Meká kosala boye na boumeli ya sanza:

Na nsuka ya motó ya likambo moke to mokapo moko, tuná moto oyo oyekolaka na ye Biblia aloba na mokuse makambo oyo auti koyekola. Soki ozali na moto ya koyekola na ye Biblia te, meká koloba na mokuse makanisi ya eteni moko ya Biblia, to maloba ya paragrafe moko ya Linɔ́ngi ya Mosɛnzɛli mpo na koluka kokolisa makoki ya kokanga ntina ya makambo oyo otángi.