Osimbaka mosala ya Bokonzi na bosembo nyonso?

¹ Kati na masolo na yango ya boyekoli, Linɔ́ngi ya Mosɛnzɛli ya 1 Dɛsɛmbɛ 1994 ekundwelaki biso mikumba na biso na ntina na losambo ya pɛto ya Yehova. Lisolo yango emonisaki ete losambo na Yehova mpe mosala ya Bokonzi esengeli kotyama na esika ya liboso kati na bomoi na biso. Na maloba mosusu, tosengeli kosimba na bosembo nyonso mosala oyo epesamelaki biso elongo na nyonso oyo tozali na yango.

² Ezali na boye nde lisangá ya Yehova awa na mabelé lizali kozwa bibongiseli nyonso ya ntina mpo na kotombola losambo na mabelé mobimba. Na meko nini tosimbaka bibongiseli yango, biso moko to lokola lisangá mobimba? Bandeko ya Filipi batikelaki biso ndakisa moko malamu mpo na komekola. Na yango, ntoma Paulo akumisaki bango mpo na lisungi oyo bapesaki mpo na bokóli ya nsango malamu, mpe akumisaki Nzambe mpo na mosala yango. Basukaki bobele na kosangana bango moko te kati na mosala yango, kasi basungaki Paulo na biloko ya mosuni mpe mbala mosusu baklisto mosusu, kosimbáká na bosembo nyonso mpe na nzela wana lisusu mosala ya kosakola nsango malamu. Tokoloba mpe motindo moko mpo na biso mpe mpo na lisangá na biso?—Filp. 1:3-5; 4:16-18.

³ Kati na teritware na biso, bandeko na biso mibali mpe basi bazali kosala na bosembo nyonso na mosala ya kotonga mpe kobongisa bandako ya filiale. Basusu kati na bango bautaki na bamboka mosika mpo na kopesa mabɔkɔ na mosala yango. Eleki sikawa sanza mibale, Eteyelo mpo na kobongisama ya basungi efungolaki bikuke na yango mpe bandeko 26 ya kelasi ya liboso basili kotindama na bisika na bango ya mosala. Basusu basengeli kobanda mpe bakouta na bitúká mingi bikeseni mpo na kolanda mateya awa na Kinshasa. Yango ezali kosɛnga, lokola tokoki komona yango, misolo mingi mpo na kofutela bana-kelasi mpe balakisi tiké, kolalisa bango mpe koleisa bango.

⁴ Bakomité mpo na boyokani elongo na minganga basili kobongisama mpe sikawa bazali pene mpo na kosalisa biso na ntango tozali kokutana na mokakatano motali kozongisama makila. Mosala yango mpe mosengaka kobimisa mosolo. Mbala mosusu mokɛngɛli na biso ya zongazonga akosɛnga biso ete tófuta mwa misolo misusu oyo bango babimisaki. Ezaleli na biso ekozala motindo nini? Tokoloba ete bazali kosɛnga biso mbongo mingi? To tokondimisama solo kozala na esengo soki tozali mbala na mbala kotya mpembeni ndambo ya biloko na biso ya mosuni kati na mokano ya kosimba losambo ya solo mpe kosalisa baoyo babongi na yango? (Talá 1 Bakolinti 16:1, 2) Bakelasi ya nsuka ya Eteyelo ya mosala ya Bokonzi ezali mpe kosalema mpo na kobongisama ya bankulutu na biso mpe basaleli na misala na biso, baoyo bakozala mpenza na likoki ya kobatela milimo na biso. Tókanisa lisusu mpo na bibongiseli mpe na kosalema ya mayangani na biso ya etúká “Basanzoli na esengo.” Tolingi kosala nyonso mpo na kosimba mayangani wana na kopesáká ntango na biso, makasi na biso mpe bozwi na biso lokola makabo mpo na botamboli malamu na yango.

⁵ Yehova azali ndakisa malamu ya kokaba oyo ebongi, mpamba te apesaki bobele te epai na bato “bomoi mpe mpema mpe biloko nyonso,” (Mis. 17:25, NW) kasi apesaki Mwana na ye bobele moko mpo na bolamu na biso mpe azali kotondisa biso mpo na bokabi ya lolenge nyonso. Lokola azali Mozalisi, Yehova azali na biloko nyonso. Nzokande, ye oyo azali kopesa ye likabo moko ya mosuni mpo na kokólisa losambo ya solo azali bobele kozongisela Nzambe eteni moko kati na oyo azwaki uta epai na ye na ebandeli.—2 Kol. 9:10-15; Nz. 50:10; 1 Nta. 29:14.

⁶Lisungi na biso ya bosembo na mosala ekosuka bobele te na biloko ya mosuni. Tokoki kopesa mwa eleko mosusu ya motuya koleka likabo ya mosuni to mbongo. Tozali komizwela bolamu mingi na kopesáká likabo ya ntango na biso mpe ya makoki na biso mpo na kolendisa bato mosusu ete na makanisi mpe na elimo. Likabo ya monene koleka oyo tokoki kopesa epai na moto moko ezali ya kosalisa na koyeba Liloba ya Nzambe, mpamba te yango ekoki komema ye na bomoi ya seko. Ezali mpo na makambo wana nyonso nde bibongiseli nyonso oyo touti kolobela bisili kokamatama. Tótalelaka mbala na mbala Linɔ́ngi ya Mosɛnzɛli ya 1 Dɛsɛmbɛ 1994 mpe tókanisa na lolenge oyo tokoki biso moko kosalela makambo oyo yango ekundwelaki biso mpo na kosala. Yango ekosalisa biso na kotalela kati na meko nini tozali kosimba mosala ya Bokonzi, ezala kati na lisangá na biso to kati na mokili mobimba.​—Yoane 6:26, 27; 17:3; Mis. 20:35; Emon. 22:17.