Tángáká elongo na bana na yo

Zulunalo Veja ya ekólo Brésil eyebisi ete baboti oyo batángaka mingi, bakolisaka epai ya bana na bango mposa makasi ya kotánga mikanda koleka bana oyo baboti na bango batángaka te. Martha Hoppe, nganga-mayele moko oyo ayekolaka ndenge oyo bana bakolaka, alobi ete: “Kotánga elongo na bana ekolisaka boyokani ya baboti na bana mpe epesaka mwana likoki ya kosimba malamu makambo oyo ekomami na mikanda.”

Kotángela bana na mongongo makasi epesaka libaku ya koyanola na mituna na bango. Bokoki kolobela bililingi nyonso oyo ezali na mokanda. Hoppe alobi ete, “Ntango mwana azali koyeba makambo oyo ekomami na mikanda, akozala mpe na mposa makasi ya kotánga mikanda mpo na koluka koyeba makambo mosusu.”

Batatoli ya Yehova mingi oyo bazali na bana basepelaka kotánga na bana na bango elongo. Batángaka mikanda lokola Mokanda mpo na masolo ya Biblia, Boyoka Moteyi Monene, mpe Moto oyo alekaki bato nyonso kino lelo.a Mikanda ya ndenge oyo wana esalisaka bana na kokóma batángi malamu mpe esalaka ete básepela mingi lisusu na buku oyo eleki babuku nyonso: Biblia Mosantu. Yango wana, soki ozali na bana, zalá moto oyo alingaka mpenza kotánga Liloba ya Nzambe mpo opesa bana na yo ndakisa. (Yosua 1:7, 8) Mpe salá makasi mpo na kozwa ntango ya kotángela bango!

[Maloba na nse ya lokasa]