“Ezali mosala ya Yehova”

Oyo ezalaki motó ya lisoló moko oyo ebimaki kati na zulunalo El Norte ya engumba Monterrey, na Mexique. Lisoló yango ezalaki kolobela Ndako ya liyangani ya sika ya Batatoli ya Yehova.

Monterrey ezali engumba oyo ezali na bafandi 2 300 000 (bakisá mpe bamboka mikemike oyo ezali pembeni na yango) na nɔ́rdi ya Mexico, mpe ezali na basakoli ya Bokonzi 19 200. Na boumeli ya mbula soko moko na ndambo, Batatoli basangisaki milende na bango mpo na kotonga Ndako ya Liyangani moko kitoko, ya bifandelo 3 000 ya kitoko mpenza mpe na masini ya kopesa malili. Batatoli ya engumba yango basepelaki mingi na ntango ndeko moko ya Lisangani ya Mikóló-bakambi asalaki lisukúlu ya bofungoli. Kati na molulu yango ya bofungoli, balobelaki mpe lolenge nini mosala ya kosakola mobandaki na Monterrey, mpe batunaki mituna epai na baoyo basanganaki na mosala ya botongi. Na nsima, bato 4 500 oyo bayanganaki na likita yango balandaki lisukúlu ya bofungoli.

Yango ezali Ndako ya Liyangani ya misato oyo euti kotongama na Mexico na lisalisi ya oyo ebéngamaki kampanye mpo na botongi “Bandako ya Bokonzi mpe Bandako ya Mayangani mingi, mpe ya minene mpenza.”

Lokola Mexique ezali na basakoli koleka 443 000, mpe bato 1 492 500 bayanganaki na ekaniseli na 1995, Bandako ya Mayangani ya sika lokola oyo ya Monterrey, na ntembe te, ekokokisa mokano ya Nzambe.