Basi kati na mokili

NTANGO babalani mibale ya liboso batombokelaki Nzambe, Yehova asakolaki mbuma mabe oyo elingaki kokómela bango mpe bakitani na bango. Yehova alobaki na Eva ete: “Okozala na mposa na mobali na yɔ, mpe ye akozala na bokonzi likolo na yɔ.” (Genese 3:16) Biblia ezali ntango nyonso kolendisa limemya ya mozindo epai na basi, mpe bamilió ya basi bazali na bomoi ya esengo, ya kosepelisa mpamba te bango mpe mabota na bango bazali kotosa mitindá ya Biblia.

Nzokande, engebene lapólo moko ya sika oyo etali ntómo ya bato, kati na mokili mobimba ebele ya basi mosusu bayokisami nsɔ́ni mpe banyokwami. Kolobeláká lapólo yango, zulunalo The International Herald Tribune eyebisi ete: “Na likebi mingi, lapólo ya mikili 193 . . . elobeli mpasi ya koponapona mpe monyoko ya mokolo na mokolo.”

Mwa bandakisa: Na Afrika ya katikati, bana basi mingi nde basalaka eteni monene ya mosala makasi ya bilanga, mpe motuya ya bana mibali oyo bazali kokɔta kelasi eleki mbala misato oyo ya bana basi. Na mboka moko, mibeko mipekisi ekobo epai na basi kasi epai na mibali te. Mibeko ya mboka mosusu ya Afrika milimbisaka mobali oyo abomi mwasi na ye wana akangi ye na ekobo, kasi mobeko mokolimbisaka te mwasi oyo abomi mobali na ye mpo na likambo motindo yango.

Lapólo yango eyebisi ete na bisika mosusu ya Amerika ya súdi, bapolisi bamonisaka motema mawa te epai na basi oyo babɛtami. Mpe mbala mingi basi oyo basalaka basengeli kondima lifuti oyo ezali 30 % kino 40 % na nsé ya lifuti ya mibali.

Na biteni mosusu ya Azia, basi bapusamaka na makasi ete bálongola makoki na bango ya kobota mpe bapusamaka na kosopa zemi. Na mboka moko, motuya ya basi ya pite mozali 500000, oyo mingi kati na bango batekisamaki na baboti na bango oyo bazalaki koluka mosolo ya komisombela ndako ya sika. Na mboka mosusu bapolisi basengeli kotalela “liwa ya mosolo ya libala” oyo epalangani mingi​—mwasi ya libala abomami na mobali na ye to na libota ya mobali na ye mpamba te apesaki mosolo ya libala mokokani te na oyo bazalaki kolikya.

Na ntina na Yesu Klisto, Biblia ezali kopesa biso elikya oyo: “Zambi ye akobikisa mobola oyo akonganga mpe moto na mawa oyo azali na mosungi tɛ. Akoyokela moto na bolɔzi mpe mobola mawa; akobikisa milimo na babola. Akosikola milimo na bango na kati na konyɔkɔla mpe na kongala; makila na bango ekozala na motuya na miso na ye.” (Nzembo 72:12-14) Na yango, tozali na bantina ya kolikya; basi ya mokili mobimba bakoki kozela na esengo makambo kitoko oyo makozala na ntango wana.