Butu oyo esengeli kokundolama

NA MOKOLO moko ya ntina mingi, eleki mibu 3 500 sikawa, Yehova Nzambe apesaki etindá na Bayisraele oyo bazalaki na boombo na Ezipito ete baboma mwana na mpate mpe basopa makila na ye likoló na bikuke mpe likoló na minoko na bandako na bango. Na katikati ya butu wana, anzelu ya Nzambe alekaki likoló na bandako oyo etyamaki elembo wana, kasi abomaki bana mibali ya liboso na bandako ya Baezipito nyonso. Bayisraele bazalaki bongo na bonsomi. Na yango, mpo na mokolo na bokundoli likambo yango, Bayuda bakumisaki Pasiká.

Nokinoki na nsima wana Yesu Klisto asilisaki kokumisa Pasiká na ye ya nsuka elongo na bantoma na ye, abandisaki elambo oyo esengelaki kokundola liwa na ye ya mbeka. Apesaki limpa na mabɔkɔ ya bantoma na ye ya sembo mpe alobaki ete: “Bókamata, bólya. Oyo elimboli nzoto na ngai.” Bongo, apesaki bango kɔ́pɔ ya vinyo mpe alobaki ete: “Bómela yango, bino banso; mpo ete oyo elimboli ‘makila na ngai ya kondimana,’ oyo masopami mpo na mingi, mpo na bolimbisi ya masumu.” Yesu alobaki lisusu ete: “Bósalaka yango na bokundoli na ngai.” (Matai 26:26-28, NW; Luka 22:19, 20, NW) Bongo, Yesu apesaki etindá na bayekoli na ye ete bakumisaka elambo yango ya liwa na ye.

Batatoli ya Yehova bazali kobyanga yo na esengo nyonso ete osangana na bango na kokumisama ya Ekaniseli oyo ya liwa ya Yesu. Okoki koyangana na Ndako ya Bokonzi oyo ezali pene na esika yo ofandi. Luká Batatoli ya mboka oyo ofandi mpo na koyeba ntango mpe esika ya sikisiki. Dati mpo na elambo yango mpo na 1994 ezali Mokolo ya Poso, Mársi 26; limpa mpe vinyo ekolekisama na nsima na kolala na moi.