Bamisionere ya Micronésie

ATAKO bakabwani na bitando minene ya Océan Pacifique oyo emonani lokola ezali na ndelo te, bamisionere ya Micronésie bamibongisaka mpo na koyangana mbula na mbula na “likita ya libota.” Bongo epai wapi bapalanganisi nyonso wana ya nsango malamu oyo bauti na bisanga mosika bakutanaka? Na lolenge esengeli, na esika oyo boyangeli ya mboka ebengaki Balabala Jéhovah​—esika ezali biro ya filiale ya Guam oyo ezali kotambwisa mosala na bango.

Na sanza ya Juin 1992, bamisionere 56 bakendeki na filiale mpo na koyangana na assemblée de district “Bamemi na pole.” Koseka mpe masoló ya mɔ́tɔ ezalaki koyokana ntango bakutanaki elongo na baninga na bango ya kala mpe ya sika. Lokola na momeseno, batandanaki likoló na ebuteli ya Salle du Royaume mpo na kokamata foto ya etuluku, mpe na nsima bafandaki zongazonga na bamesa misato ya molai mpo na kosangana na elambo ya ntina ebongisamaka mbula na mbula mpo na bamisionere, oyo epesamelamaki kuna na mbula oyo na boyei ya Albert Schroeder, mosangani ya Collège central.

Mpo na bamisionere mingi, bokutani yango ya mbula na mbula ezali libaku bobele moko bazali na yango mpo na kotika mwa bamboka moke epai bafandi na bisika ya molungé. Bamboka yango ezali solo mike. Ebeye, moko na bisanga Marshall, ezali bobele na bonene ya ba hectares 32. Ndako na bamisionere oyo ezali na Majuro, kati na Marshall mpe oyo ezali na Kiribati, na bisanga Gilbert nyonso mibale etyami na bisanga mike mpe milai ya pauni, oyo bonene na yango ezali na bamɛ́tɛlɛ 800. Yango wana bamisionere basepelaka mingi na mobembo basalaka mpo na kokende na Guam.

Atako likanisi ya kosakola na bisanga mosika ya mikili ya molungé ekoki komonana kitoko mingi, nzokande ezali mpenza ntembe oyo bobele bato moke nde babongisami mpo na kolónga yango. Ezali likambo ya kosepelisa na koyeba ete kati na bamisionere 56 bobele 7 bakotaki na Galaad, Eteyelo ya Biblia ya la Société Watchtower. Mingi kati na bango bautaki na Hawaii mpe na Philippines epai bazalaki kosala lokola ba pionniers mpe bamesanaki na bomoi na mikili ya molungé, mpe batikaki bamboka na bango mpo na kokende kosala lokola bamisionere.

Mpo ete bisanga ya Micronésie bizali penepene na équateur, bamisionere basengeli koyika mpiko na molungé makasi oyo ezali kolembisa mpo na kokoka koyebisa nsango malamu epai na bato na mboka. Kolobana mpe ekoki kozala mikakatano monene. Esanga moko na moko to etuluku moko ya bisanga ezali na monoko na yango​—minoko misusu miyebani mingi te mizali kati na diksionaire moko te—​mpe moto oyo ayei sika akoki kosala bambula mingi liboso na koloba yango malamu. Mpo na kosalisa bafandi na bisanga wana baoyo bazali na lolenge na bomoi ekeseni na kokanga ntina ya Biblia, filiale ya Guam ezali konyata mikanda na minoko 11 oyo kati na yango minoko 9 milobami bobele na Micronésie.

Bisanga bisusu bizali mpenza mosika na motindo boye ete mpo na kokóma kuna esengeli kozwa masuwa. Ndako ya bamisionere ya Tol kati bisanga Chuuk (Truk), ezali na esanga lolenge yango, mpe bamisionere bazali kosalela ba panneaux solaires mpo na kozwa lotiliki, yango na boumeli ya mwa bangonga na mokolo moko.

Bandako nyonso ya bamisionere ezali 14 kati na Micronésie mobimba, oyo esangisi etúka ya bonene lokola Etats-Unis oyo ezali na continent. Kati na bato koleka 400 000 oyo bazali kofanda na etúka wana, basakoli ya Bokonzi bazali 1 000, babongisami na masangá 20 mpe na bituluku 3 oyo etangwi.

Atako bato na Micronésie bazalaka na boboto, mimeseno na bango ya losambo mpe bopusi ya basangani ya libota ezali kolembisa bato mingi na kondima solo ya Bokonzi na Nzambe. Yango wana, atako mosala ya kosakola ezali kokola mingi (basakoli ya Bokonzi 1 000 bazali kotambwisa boyekoli ya Biblia koleka 2 000), ezali na masangá mpe bituluku oyo ezali kotikala bobele moke. Na ndakisa, esanga Tinian ezali bobele na basakoli 3, bobele basakoli 7 na esanga ya Nauru, mpe masangá ya Yap, Kosrae, mpe Rota mazali moko na moko na motango ya basakoli na nse ya 40. Atako bongo, bamisionere mosusu basili koumela na bisika na bango ya mosala koleka mibu 20. Mingi mpenza bamisionere motoba oyo bazali na esanga ya Beula basili kolekisa kuna bango nyonso pene na mibu 12.

Mpo na baoyo bazali koyika mpiko, mbano ezali monene. Kitoko na biloko bizalisami na Jéhovah ezali kopesa mokolo na mokolo mabaku ya kozala na esengo. Bisanga ya zamba monene ya Micronésie bipalangani lokola mabanga ya ntalo na langi ya mai na mpondu kati na Océan Pacifique oyo ezali na langi ya bulé. Bakilomɛ́tɛlɛ ebele ya mabongo ya polele mpe mabanga ya pauni etondi na mbisi ya langi ndenge na ndenge ezali kobenda bato bazindaka na nse ya mai monene mpo na kotala bisika bileki kitoko na mokili mobimba. Mpe na mpokwa nyonso, okoki kosepela na kolala ya moi kitoko likoló na océan.

Nzokande, mbano eleki monene ezali libaku malamu ya kosalela Jéhovah na koyebisa epai na bato bilaka na ye kitoko na ntina na mikolo mizali koya. Mpo ete bamisionere ya Micronésie bazali ntango nyonso koluka libaku wana, bazali komona kokokisama ya maloba oyo ya Yisaya 42:12 ete: “Bakumisa Jéhovah na nkembo, batatola lisanzoli na ye kati na mabongo na mai.”

[Karte/​Elilingi na lokasa 31]

(Mpo na komona yango, talá mokanda)

Barrigada, Guam

Santa Rita, Guam

Koror, Belau

Chuuk (Truk) Islands

Tarawa, Kiribati

Kosrae

Ebeye

Marshall Islands

Majuro

Kolonia, Pohnpei

Songsong, Rota

Saipan

Yap

MICRONESIA

MELANESIA

CAROLINE ISLANDS

PACIFIC OCEAN

PHILIPPINES

NEW GUINEA

EQUATOR

[Elilingi]

Koyanganisama ya bamisionere na Guam, na Juin 1992