Mudhowenave kala vauxamwali olimba na Yohova vahora inoira nyo mafunji-edho owenjedhela

1-2. (a) Akala munofuna irana mafunji-edho owenjedhela, n’nga munofwanela dhowanave iranan’ni? (b) N’nga dhowa vasogolo voirana’ “vyongo vinoira i-yo unothapulelan’ni”? (Afilipi 3:16)

ENANGO mwaarumiwi a Yohova anosakula irana mafunji-edho owenjedhela tamari-a xikola. Aliwa tanoona ira mafunji-edhwao anodha akami-a ira tafwanye basa loi linodha akami-a vom’labela Yohova. Akala mutosakula irana mafunji-edho owenjedhela, n’nga munaire a-vi ira mudhowenave kala vauxamwali olimba na Yohova? (Yak. 4:8a) Pyo-oira fuka ira va vyawa vyali nyo xikolani ndulimu mwatoogumanana vyowesedha. Va-eeni munofwanela ‘dhowanave dhowa vasogolo voirana’ “vyongo vinoira i-yovyo.” Thapulela ira munofwanela dhowanave m’labela Yohova mororomeleya ninga mwairela nyo vahoriyo.—Muleri Afilipi 3:16.

² Madhu Aigiriki athapuleliwe ira ‘dhowa vasogolo voirana vyevyo,’ hora dhinjinji ano-indi-edhiwa basa voonga vya anyakhondo anoira vyongo movwelana maningi vowenda. Akala mutosakula irana mafunji-edho owenjedhela, munofwanela “wendanga” movwelana na Makristau afwinyu vahora inolabela nyo Yohova malo moira imela vambo-ive venango welela nduli. Muyofunjedha yei, ninotapanya makhundo 4 a Bibilyani enao anaukami-eni irana vyevi. Makhundwee mboi munowaidhiwa. Mwatooroma a-indi-edhavo basa ndulimu thitho munofwanela dhowanave a-indi-edha basa vahora inoira nyo mafunji-edho owenjedhela thitho vasogolo vomari-a mafunji-edho.

MUDHOWENAVE IRANA VYONGO VINALIMBI-E UXAMWALINYU NA YOHOVA

3. N’nga irana mafunji-edho owenjedhela unokhuza a-vi vyongo vinoira nyo vadambo nadambo?

³ Yorucha inokalavo. Mafunji-edho owenjedhela anooda uiri-ani ira mukalenga opingeya thitho vyevi vinooda khuza moda munoirela nyo vyongo dambo nlilothene. Namwasa ofuna pasari xikolani, munooda roma onanga ira m’labela Yohova kai ofuneeleya maningi. Munooda roma pwaza migumano, laleela, leri Bibilya nolobela.—Apok. 2:4.

4. Chini inaukami-eni ira “mukaengana vyoira vinjinji va basa la Mbwiye?” (1 Akoritiyo 15:58)

⁴ Muleri 1 Akoritiyo 15:58. Ira njinga idhowenave wenda, munofwanela dhowanave ponda. Mofwanafwana na vyevi, ira mudhowenave kala vauxamwali olimba na Yohova, munofwanela kaangana “vyoira vinjinji va basa la Mbwiye.” Munofwanela e-langa vyongo vyokhuza lambela valimburo loroma a-kala viiranga mo-okaatheya. Yoroma munofwanela ona ira nyo muli rumiwi wa Yohova thitho yanambili mudhionenga ira munaaira mafunji-edho owenjedhela. (Mat. 22:37) Rongola mwinango dhinalee Samatha aongile ira: “Ndatoolanyedha ira akala mafunji-edhwanga owenjedhela anooda ndidodomi-a vom’labela Yohova, ndinodha i-ya.”

5. N’nga munaire a-vi ira muirengana vyongo vinjinji volabela Yohova?

⁵ Vyongo vinaire nyo mwa-anaire mafunji-edho owenjedhela. Muidhiweletu vyongo vinofwanela kala valimburo loroma vaingumiinyu. Mudhifukenga ira, ‘N’nga ndiirile masaka-edho oi a-vi ira hora dhothene ndifwanyeenga vamigumanoni, laleela, thitho leri Bibilya?’ (Yoswa 1:8; Mat. 28:19, 20; Aeb. 10:25) Mwathuulelanga vyongo vyaira nyo mungali xikolani, chini inaukami-eni ira mu-elenga vyongo vyofuneya maningi valimburo loroma? Akala munoona ira vatookala vyongo vinango vyoi mwangaodile viira pama vahoriyo, n’nga munaire a-vi ira muchinje vyongo vinango va-eeni? Mukalenga osikimizela rima ira munodhowanave kaana thindhi vom’labela Yohova vanoira nyo mafunji-edho owenjedhela. Pyaimbarimbari ira munofuna ira mupasari xikolani mbwenye kamunofwanela chinjani-a mafunji-edho owenjedhela nolambela Yohova.a—Mat. 6:24.

6. N’nga munadhifuke yofuka ivi ira muone akala munodhowanave e-la Yohova valimburo loroma? (Muone thitho iruthiruthi.)

⁶ Mwairanga mafunji-edho owenjedhela, hora dhothene mudhisakesakenga vavira mwedi umbo-i venango kwaranya. Mudhifukenga ira, ‘N’nga ndinodhowanave e-la vyongo vyofuneya valimburo loroma? Mukalenga osamala na vyongo vinathonyi-edhe ira mutoroma fooka mwauzimu, ninga ilemeelo yo-ofiya vamigumanoni venango fiyanga modembuwa nothuulelanga vya basa liva-iwile nyo xikolani migumano ingali mwari venango onelanga va vidiyo koferesiya. Mukalenga osamala ira muone akala kamunodhiveliwana lobela, leri Bibilya ninga mwairelanyo walelene venango akala kamuno-elelavo rima vabasa lolaleela thitho munolilaba naifunelo yoi mulimari-e baa-i. Mwaonanga ira vyevi vitoroma uireelani, muirengavo yongo mombaranya. Kamurumeli-e ira mafunji-edhwinyu auimwanani-eni e-la m’labela Yohova valimburo loroma.

“MUBARELENGA DODOLISO LINYU LOTHUULELA”

7. N’nga mafunji-edho owenjedhela anakhuze a-vi moda munothuulela nyo?

⁷ Yorucha inakalevo. Movwelana na mafunji-edho anofunanyo irana, anooda uiri-ani ira mudodomi-iwe na “zelu dhaatu na inyengo yo-okaana basa” vyoi vinothangani-avo a-roromela ira utokala Nlungu thitho ira vyaingumi vyate chinja. (Akol. 2:8) Mafunji-edhwao anooda uiri-ani ira mukaena rima odhinyindela maningi. Bali mwinango wa zombwe atoonga ira: “Kaiira anoonifunji-a ira nikaena dodoliso baa-i mbwenye anoonifunji-a thitho mwemo munathuulelenga i-yo moi mathuulelo enala katinovwelana na moda munoonela Yohova vyongo. Mwaifwanafwani-o, nanoofunji-iwa ira dodoliso li-u ndi linanikami-e ira vyongo viniwendelenga pama vaingumii-u. Mathuulelo enala atoondiiri-a roma ona ira kandinofuneela m’nyindela Yohova ira ndisangalalenga. Vyevi vyatooiiri-a ira vikalenga vyorucha maningi ira ndim’nyindelenga.”

8. Mwasiwa ngwan’ni pyofuneya ira “mubarelenga dodoliso linyu lothuulela?” (Sanganiko 5:1, 2)

⁸ Muleri Sanganiko 5:1, 2. Bibilya linoniwenjeli-a ira ‘nibarelenga dodoliso li-u lothuulela.’ Ninobarela yongo inoona i-yo ira inooda nongiwa venango wakiwa. Ndi mwemo thitho muli aliwa na dodoliso li-u lothuulela. (1 Pe. 5:8) Vyongo vinolimbi-a ilambwila vinooda iri-a ira mukaikelenga vyongo vinororomela nyo vyokhuza makalelo apama, mwemo mwaromele ingumi thitho ira utokala Nlungu. Atu anooda thuulelanga ira mathuulelwiwa “mbavadhulu” mbwenye imbarimbari choi mbo-okaana basa. Thitho “wa Nlungu zelu dhaatu amuilamboi to-okaana basa.”—1 Akor. 3:18-20.

9. N’nga munaire a-vi ira mubarelenga dodoliso linyu lothuulela?

⁹ Vinairenyo mwa-anarome mafunji-edho owenjedhela. Ira mubarele dodoliso linyu lothuulela muonechechenga ira munororomela ira vinofunji-a Bibilya pyaimbrimbari mwa-anarome irana mafunji-edho owenjedhela. Mudhifukenga ira: ‘Mwasiwa ngwan’ni ndinororomela Nlungu? N’nga ndinoidhiwa a-vi ira Bibilya ndi Madhwee? N’nga chini inondiiri-a ira ndiroromelenga ira makhundo a Bibilyani a makalelo apama mbavadhulu kwaranya amuilamboi? Muthuulelenga mwemo mwali aliwa vyongo ndulimu mungali xikolani. Pyo-oira fuka ira mwangaodile dhodhomi-iwa na mathuulelo aatu amuilamboi. N’nga iroromelwinyu yatoofooka namwasa oi atu enango anoororomela ira vyaingumi vyate chinja? N’nga vyanouruchani rambela vyongo vyothakala vyaira afwinyu xikolani? Akala munoona ira vatookala vyongo vinango vyoi mwangaodile viira pama, n’nga munaire a-vi ira mulimbi-e iroromelwinyu va-eeni? Mukalenga osikimizela rima barela dodoliso linyu lothuulela vanoiranyo mafunji-edho owenjedhela.—2 Timo. 2:16-18.b

10. N’nga munaire a-vi ira mudhowenave barela dodoliso linyu lothuulela?

¹⁰ Vanoiranyo mafunji-edho owenjedhela mudhisakesakenga hora dhothene. Mudhifukenga ira: ‘N’nga nditoroma dhodhomi-iwa na vyoira vyaatu enango oi katinom’lambela Yohova? N’nga ndinooda zindiyela ira vyongo vinofunji-iwa miyovi ndi zelu dhaatu dho-okaana basa? N’nga ndinororomela na rima wethene ira ndi Umwene wa Nlungu baa-i unofuna mali-a nyarwa dhaatu?’ Ira mubarele dodoliso linyu lothuulela mudhowenave funjedha Madhu a Nlungu mwathindhi. Funjedha Bibilya nothuulela modi-a vyongo vifunjedhilenyo unodha ukami-ani ira mwa-akaikelenga ira mutofwanya imbarimbari.—1 Timo. 4:15.

MU-INDI-EDHENGA BASA HORINYU MWAZELU

11. Mwasiwa ngwan’ni vinooda kala vyorucha ira mu-indi-edhenga basa pama horinyu simbwasimbwa mwairanga mafunji-edho owenjedhela?

¹¹ Yorucha inakalevo. Mafunji-edho owenjedhela anooda iri-a ira mupingeenga maningi simbwasimbwa akala munokozeela maporova venango akala mutokaana basa loi mulimari-e vahora inangwee. Akala kamuno-indi-edha basa pama horinyu, munooda kalanga okhumbanya thitho ochenyela maningi. Ngumwasee pyofuneeleya ira musamalelenga manungwinyu na mathuulelwinyu.

12. N’nga munofwanela irana vyongo viivi ira “mu-indi-edhenga basa pama horinyu?” (Aefeso 5:15, 16)

¹² Muleri Aefeso 5:15, 16. Hora dhinango vinooda kala vyorucha ira “mu-indi-edhenga basa pama horinyu.” Thitho munofuneela dhi-elela madile. Mwaifwanafwani-o, wenjedhela voirana vyongo vyokhuza xikola, munofuneela thitho fwanyanga hora yoirela vyongo vambo-i na Makristau afwinyu thitho naatu abanjani mwinyu. (Sal. 133:1; Sang. 18:1) Mbwenye yofuneya maningi ndiirana vyongo vyokhuza lambela. (Mat. 6:33) Venango mutokaana izo yosamalela banja linyu thitho muli vabasani. Wenjedhela vevo, munofuneela thitho samalela manungwinyu vokaangana hora yokwakwanela yovuma thitho irana maweredhelo olimbi-a manungo. (Namal. 4:6; 1 Timo. 4:8) Ira vyevi viodeye, munofuneela i-ndi-edha basa pama horinyu.

13. N’nga munaire a-vi ira mu-indi-edhenga basa pama horinyu?

¹³ Vinairenyo mwa-anarome mafunji-edho owenjedhela. Bibilya linoonga ira thandha pama vyongo unokami-a ira vyongo viwende pama. (Sang. 21:5) Vothuulela vyevi, mwa-anarome mafunji-edho owenjedhela munofuneela kaana thandha oi muu-arelenga. Ira muode irana vyevi, muthuulele vyaira nyo mungali xikolani. N’nga mwaira a-vi ira muodenga i-ndi-edha basa pama horinyu? N’nga vatookala vyongo vinango vinoonanyo ira mwangaodile viira pama vahoriyo? N’nga ndi vyongo vivi vinofwanela nyo chinja va-eeni ira vyongo viuwendelengani pama? Mukalenga osikimizela rima ira nyo ngunofwanela tonganga horinyu a-kala ira horiyo iutongengani.c

14. N’nga munooda dhisakasaka vo-indi-edha basa vyofuka viivi?

¹⁴ Mwairanga mafunji-edho owenjedhela hora dhothene mudhisakesakenga. Mudhifukenga ira: ‘N’nga thandhanga unondirumeli-a ira ndivumenga mokwakwanela noirana mawaredhelo olimbi-a manungo? N’nga ndinokaechana hora yoirela vyongo vambo-i na Makristau afwanga? N’nga ndinoodecha mari-a tepese vahora yapama? Akala ndi ee-no, n’nga ndimwasa oi nditokaana vyoira vinjinji venango ndinoira vyongo movwalavwali-a? N’nga afwanga naatu abanjani mwi-u anoona ira vatokala vyongo vinango vinofwanela miyo chinja? Akala munoona ira munofwanela chinja thandhinyu venango dhilimbi-edha ira muu-arelenga, muirena vyevi mombaranya. Munooda waredhanga naatu oi anooda i-ndi-edha basa pama horiwa ira taukami-eni.—Sang. 11:14.

MUDHOWENAVE ‘WENDA NAATU AZELU’

15. N’nga chorucha ivi inagumanena nyo mwairanga mafunji-edho owenjedhela?

¹⁵ Yorucha inakalevo. Mwairanga mafunji-edho owenjedhela, afwinyu enango anongofuna ira muirelenga vyongo vambo-i vyosangalali-a. Venango munooda funanga ira muirengana vyevyo. Simbwasimbwa akala muli kalasi imbo-ive munooda irelanga vyongo vambo-i. Munooda onanga thitho ira munofwanafwana va vyongo vinjinji na afwinyuao kwaranya abali naarongola. Mbwenye munofwanela ira polepole. Kala kalasi imbo-i na afwinyuao kavinothapulela ira muno-arela makhundo mambo-ive. Thitho mwairangana vyongo vambo-i, paevo vanaudhodhomi-eni aliwa mathuulelwinyu. (1 Akor. 15:33) Michael wenuo afunjedhile vyokhuza inergia wa vyawa 4 atoona ira vyevi pyaimbarimbari. Liye aongile ira: “Sumana nlilothene ndanoolaba wa maora 40 naatu oi katalemeza a-iyana, tanoovuruwana nyumbo dhothakala noruwana. Ee-no vyevi vyatoondiiri-a roma ona ira vyaira aliwa kavyali vyodaweya.”

16. N’nga “wenda naatu azelu” unothapulelan’ni? (Sanganiko 13:20)

¹⁶ Muleri Sanganiko 13:20. Bibilya linoniwenjeli-a ophi-a owaredha naatu amakalelo othakala. Mbwenye linoonga ira, “Mutu owenda naatu azelu unodhakala wazelu.” Veva likhundo toi atu anoawaredhana i-yo anooda niiri-a ira nikaena makalelo apama venango othakala. Ee-no muvwelanenga maningi naatu anom’labela Yohova narimiwa othene ninga munoirela nyo.—Sal. 101:6, 7; 119:63.

17. N’nga munaire a-vi ira mwa-avwelanenga naatu amakalelo othakala?

¹⁷ Vinairenyo mwa-anarome mafunji-edho owenjedhela. Musakuleletu injiva wahora inofuna nyo dhawaredhanga na afwinyu a xikolani. Wamboni mwinango dhinalee Trenton aongile ira: “Ndinoirana vyongo moriya rima na afwanga asalani imbo-ive mbwenye naweruwa kandinoirela vyongo vambo-i naaliwa. Ndinoaona ira mbaafwanga asalani baa-i a-kala afwanga avarimani.” N’nga munodhi-elela madile oi a-vi vamwasula? Ira muwakule yofuka yei, muthuulele vyairecha nyo mungali xikolani, n’nga mwadhi-elele madile oi a-vi? N’nga vatookala vyongo vinango vinoonanyo ira mwangaodile viira pama vahoriyo? N’nga ndi vyongo vivi vinofwanela nyo chinja va-eeni? Mukale osikimizela rima ‘wenda naatu azelu’ norambelanga irana vyongo naatu oi katinom’dhiveliwana Yohova.d

18. N’nga ndi vyofuka viivi vinofwanela nyo dhifuka? (Muone thitho iruthiruthi.)

¹⁸ Hora dhothene mudhisakesakenga nodhifukanga ira: ‘N’nga nditoroma irela vyongo vambo-i naafwanga asalani imbo-ive? N’nga nditoroma landela makalelwiwa, moda munoongela aliwa na munoirela aliwa vyongo? N’nga Yohova unooda rumelela vyofuka viwakunle miyovi? (Sal. 1:1) Akala munoona ira munofuneela chinja, muirena vyevyo mombaranya. Muonechechenga ira munovwelana maningi naatu anom’dhiveliwana Yohova ninga munoirela nyo. Thitho kamuvwalavwali-enga laleela afwinyu axikolani. Nyo muli valimburo lapama loi munooda akami-a idhiwa imbarimbari.

MUVAELETU KOZEELA

19. N’nga munakozeele a-vi limbanana vyongo vinadhodhomi-e uxamwalinyu na Yohova vahora inoira nyo mafunji-edho owenjedhela? Muonge ifwanafwani-o.

¹⁹ Mutu wazelu afunanga gwela mwangoni, unoroma kozeela a-anarome ulendwee. Angalive ira kanaidhiweletu nyarwa dhinagumanena liye, unokala angamadhi kozeela pama, wara vyowara vyofwanelela thitho unoidhiwa unodhowa liye. Nyo thitho munooda irana vyevi mwakozeelanga irana mafunji-edho owenjedhela. Mudhowenave kaana iroromelo yolimba, muwarenga “ mafaramento othene akhondo okhumela wa Nlungu.” Muthuulelenga ira ifunelwinyu ndi lemeza iliyothene inoira nyo a-kala ira mufwanye kobiri dhinjinji venango kala mutu ovweya muilambwila.—Aef. 6:11-13; 1 Akor. 9:26, 27; 10:31.

20. N’nga munaire a-vi ira mudhowenave dhisakasaka ira mudhione akala mutokaana iroromelo yolimba?

²⁰ Bibilya linonilimbi-a ira: “Mudhowenave dhisakasaka ira muone akala mutokaana iroromelo. Mudhowenave dhisakasaka ira muidhiwe ira muli mutu oi a-vi.” (2 Akor. 13:5) Munooda irana vyevi vanoira nyo mafunji-edho owenjedhela. Hora dhothene mudhisakesakenga vo-indi-edha basa vikhundu vyo-iyana-iyana vitapanyile i-yo muyofunjedha yei. N’nga munodhowanave irana vyongo vyokhuza lambela? N’nga munobarela mathuulelwinyu wu zelu dhailambwila? N’nga muno-indi-edha basa horinyu mwazelu? N’nga munovwelana na Makristau afwinyu norambela waredha naatu amakalelo othakala? Vyevi ndi vyofuka vinofwanela nyo viwakhula akala muli xikolani, basani venango limburo nlilothene. Mukalenga osikimizela rima dhowanave kaana iroromelo yolimba va nyarwa iliyothene inagumanena nyo. Kamukaikelenga ira Yohova unodha uraeli-ani mwadhilimbi-edhanga irana vyevi.—Sang. 3:5, 6.