Mudhowenave samalela “vyorambulela vinyu vyauzimu”

1. N’nga Yohova anipanduchile na vyongo vyofuneeleya vivi? (Mateu 5:3)

YOHOVA atoopanducha atu na vyongo vinango vyofuneeleya. Mwaifwanafwani-o, ira nidhowenave kaana ingumi, ninofuneela yodya, yowara thitho vogona. Na-akaena vinango mwa vyongo vyevi, masiki wahora yoyeva baa-i ingumi inokala yorucha maningi. Wenjedhela vonipanducha na vyofuneya vyaututuni, Yohova atoonipanducha thitho na vyofuneeleya vyauzimu. (Muleri Mateu 5:3.) Ira nikale osangalala mwaimbarimbari, ninofwanela kaana ithuulela rima ya yofuneya yei nodhowanave isamalela.

2. N’nga ndiifwanafwani-o ivi inanikami-e vwechecha thapulela wa “zindiyela vyorambulela” vi-u “vyauzimu”?

² N’nga chini inothapulela “zindiyela vyorambulela vi-u vyauzimu”? Voroma madhu enala, tathapulela mutu osauwa venango ovephavepha mwauzimu. Vyevi vinonikhuza maningi. Nifwanafwani-edhe na mutu ovephavepha utowara masaala, angakaathidhe khundu mwa ndhila, angali ofooka namwasa oi kana yodya. Atu anovira undendai na moda munoneela liye. Nathana, unovi-edhiwa maningi thitho nama-iyu unodidileliwa maningi. Mutu ovephavephuwo unoidhiwa pama ira achinje ingumiyee, unofuuneela kami-iwa na mutu mwinangwee. Molandana na vyevi, atu ‘anozindiyela’ vyorambulela viwa vyauzimu venango ovephavepha mwauzimu tanofwanela kami-iwa ira tasaka-edhe uzimwiwa. Ngumwasiwa liye unofwanela i-ndi-edha basa vyongo vyothene vinovelela Yohova mwauzimu waatu anom’dhiveliwana.

3. N’nga ninotapanyan’ni muyofunjedha yei?

³ Muyofunjedha yei, yoroma ninotapanya vinofuna i-yo funjedhavo wa i-yana wau Fenisiya avephile kami-o wa Yesu. Yoireya yei inoonga vya makalelo mararu oi atu ‘anozindiyela’ vyorambulela viwa vyauzimu anofwanela aliwa kaana. Namala ninotapanya ifwanafwani-o ya rumiwi Pedru, Paulo na mwene Davide alombwana tasamalele vyorambulela viwa vyauzimu.

IFWANAFWANI-O YODHIYEVI-A, THINDHI NA IROROMELO

4. Mwasiwa ngwan’ni i-yana wau Fenisiya atoodhowa wali Yesu?

⁴ Dambo, n’nango i-yana wau Fenisiya atoodhowa wa Yesu. Mwanee wa i-yana atookaana ‘iwanda yam’moni-a nyarwa mwauwalanga.’ (Mat. 15:21-28) I-yanuo atookokora thitho atoom’vepha Yesu ira am’kami-e. Vahora yenʼne i-yan’ne vaonga liye na Yesu atoothonyi-edha makalelo apama maningi. Dhoweni nitapanyeni enango mwamakalelwala.

5. N’nga mbamakalelo avi athonyi-edhe i-yana wau Fenisiya, n’nga Yesu airilen’ni? (Muone thitho iruthiruthi.)

⁵ I-yana wau Fenisiya atoothonyi-edha dhiyevi-a. Mwasiwa ngwan’ni ninoonga vyevyo? Namwasa oi liye kasukwanle na vyaongile Yesu. Yesu atoom’fwanafwani-edha na isimwanambwa venango yali inyama yafuwecha atu anjinji oi katali Ayuda. N’nga aakale ira vyaireile nyo mwaire a-vi? N’nga mwangasukwanle no-iya m’vepha kami-o Yesu? Kai vyevyo vyairile liye. Liye kathonyi-edhe dhiyevi-a baa-i mbwenye atookaana thindhi. Moi ee-no liye atoodhowanave m’vepha Yesu ira am’kami-e. Mwasiwa ngwan’ni? Namwasa oi anoom’roromela Yesu. Moi ee-no Yesu atoodabwa na iroromelo ya i-yanuo thitho atooira yongo yodabwi-a. Yesu atoonga ira: “Miyo kandirumiwile wa mutu uliwethene mbwenye wa mabila odimela a nyumba ya Israeli.” Angalive ee-no, liye atoothuulela yongo yam’vephile i-yanule, nokhumi-a iwanda ya’moni-a nyarwa mwanee wa i-yana. Angalive ira kaali mu Yuda.

6. N’nga ninofunjedhavon’ni vaifwanafwani-o ya i-yana wau Fenisiya?

⁶ Ira nisamalele vyorambulela vi-u vyauzimu, ninofwanela ulukhuli-a makalelo enala. Ninofwanela kala odhiyevi-a, athindhi nokaana iroromelo yolimba. Mutu odhiyevi-a unodhowanave vepha kami-o wa Nlungu. Thitho ninofwanela kaana iroromelo yolimba wa Yesu Kristu nonyindela atu anoa-indi-edhela liye basa vosogolela anamafunjedhee. (Mat. 24:45-47) Nathonyi-edhanga makalelo enala, Yohova na Mwanee tanokala osangala nonikami-a vosamalela vyorambulela vi-u vyauzimu. (Mufwanafwani-e na Yakobo 1:5-7.) Va-eeni dhoweni nioneni vyongo vinoniva-a Yohova ira anidyi-e mwauzimu, niwari-a mwauzimu nonibarela mwauzimu. Ifwanafwani-o ya rumiwi Pedru, Paulo, na Mwene Davide, inonikami-a ona vinofuna i-yo irana ira nisamalele vyorambulela vi-u vyauzimu.

MOFWANAFWANA NA PEDRU NIDHOWENAVE UDYA MWAUZIMU

7. N’nga Pedru awachenle izo ivi, n’nga chini yafwanela liye irana? (Aebere 5:14–6:1)

⁷ Muone ifwanafwani-o ya rumiwi Pedru. Liye ali Muyuda oroma m’mwidhiwa Yesu ira ndi Mesiya a-indi-edhiwa basa na Yohova ira adyi-e mbumbee na “madhu okami-a mutu ira adhakaena ingumi yo-omala.” (Ju. 6:66-68) A-anadhowe dhulu, Yesu atoom’mwandela Pedru ira: “Udyi-e anamabilanga.” (Ju. 21:17) Pedru atoosamalela izo yei mororomeleya, thitho Yohova atoo-indi-edha basa ira alembe makarta menli oi vasogolovee atoo-eliwa Bibilyani. Angalive ee-no, Pedru anoofwanela dhidyi-a mwauzimu. Mwaifwanafwani-o, liye anoofunjedha vyamakarta alembile rumiwi Paulo. Pedru atoozindeyela ira vyongo vinango vyalembile Paulo vyali “vyorucha vivwechecha.” (2 Pe. 3:15, 16) Mbwenye liye atookaana thindhi vofunjedha. Liye atookaana iroromelo ira Yohova angam’kami-idhe “thakuna” venango vwechecha no-indi-edha basa “yodya yothakuna” yalembile Paulo makartanimwee moira vudheleliwa.—Muleri Aebere 5:14–6:1.

8. N’nga Pedru airile a-vi angawachenle malangi-o mapya khumela wa ngelo?

⁸ Pedru atoothonyi-edha ira atookaana iroromelo wa Yohova vovwela malangi-o awachela liye. Mwaifwanafwani-o, angali sidadi la Yopa, Pedru atoona masopenya. Mumasopenyao, Ngelo atoom’mwandela Pedru ira aphe noudya vinyama vyoi vyali vyothakali-iwa movwelana nailamulo ya Mose. Wa Ayuda malangi-o enala ali orucha. Maromelo wene, Pedru atoowakhula ira: “Khabe Mbwiye, miyo kandinadyevo yongo yothakali-iwa thitho yonyakavala.” Adhamale ngeluo atoowakhula ira: “Vyongo vimadhi cheni-a Nlungu, u-iye vionga ira pyothakali-iwa.” (May. 10:9-15) Pedru atoovwechecha ifunelo ya Yohova thitho atoochinja mathuulelwee. N’nga ninoidhiwa a-vi vyevi? Vasogolo voona masopenyao, alombwana araru tarumiwile na mutu oi kaali Muyuda dhinalee Korneliyo tatoofiya nom’vepha Pedru ira tadhowe vambo-i nyumbani wa mbwiiwa. Ayuda tanoona ira atu amaziza enango oi katali Ayuda mbothakali-iwa. Moi ee-no aakale ira kaoni masopenyao, kaarumele mavolowa m’mba mwa Korneliyo. (May. 10:28, 29) Pedru mombaranya atoorumela malangi-o am’va-idhe Yohova. (San. 4:18) Liye atoom’laleela Korneliyo, abalee na axamwalee enao tali vandhevee thitho liye atoosangalala voona othene tarumelanga imbarimbari, wachela zimu ochena nobadiziwa.—May. 10:44-48.

9. N’nga ndi myasa minli ivi inoniiri-a kaana ifunelo ya yodya yauzimu?

⁹ Molandana na Pedru, ninofwanela hora dhothene dhidyi-a na imbarimbari venango ukaka wa Madhu a Nlungu. Ninofwanela thitho ulukhuli-a ifunelo youdya yodya yauzimu venango imbarimbari yoi inooda kala yorucha ivwechecha. Ninofwanela kaana hora thitho dhilimbi-edha ira nivwecheche modi-a madhu a Nlungu, dhilimbi-edha weu kokami-a. Mwasiwa ngwan’ni? Va myasa minli: Yoroma ninofunjedha vyongo vyokhuza Yohova vinoiri-a ira nim’dhiveliwengana thitho m’lemeza maningi. Yanambili ninolimbi-eya vowandela atu enango vyokhuza Babi-u wa dhulu odabwi-a. (Aro. 11:33; Apk. 4:11) Ifwanafwani-o ya Pedru inonifunji-a yongo inango: Akala modi-u ovwechecha imbarimbari utochinja, mombaranya ninofwanela chinja mathuulwelwi-u thitho vyoira vi-u. Mwandhila yen’na ninooda dhowanave dhidyi-a mwauzimu thitho kala ofuneya wa Yohova.

MUM’SAZI-EDHENGA PAULO, VODHOWANAVE WARA UMUTU UPYA

10. N’nga wara mwauzimu unothapulelan’ni? (Akolose 3:8-10)

¹⁰ Ira nim’dhiveliwi-e Nlungu, ninofwanela i-ndi-edha basa yongo inango inoniva-a Yohova: wara umutu upya. Moi a-vi? Rumiwi Paulo atoolemba ira ninofwanela “ungula umutu wawale” thitho “nowara umutu upya.” (Muleri Akolose 3:8-10.) Irana vyevi unofuneeleya hora thitho thindhi. Kathuulelani ifwanafwani-o ya Paulo. Angali zombwe, anoodhilimbi-edha ira am’sangalali-e Nlungu. (Agl. 1:14; Afl. 3:4, 5) Ngumwasee, ali osauwa mwauzimu. I-yavo aidhiwa mafunji-edho a Yesu, Paulo thitho ali odhiulukhuli-a. Vyevi vyanom’mwiri-a kala “mutu waiburutu,” na makalelo enango othakala. Paulo ali a-anaware umutu upya.—1 Ti. 1:13.

11. N’nga Paulo alimbanana kalelo livi lothakala? Muongemo.

¹¹ A-anakale Kristau, Paulo anoothakaleliwa mombaranya. Myasa ya bukhu la Mayirelo inothonyi-edha ira Paulo anoothakaleliwa na anamafunjedha a Yesu moi ‘atoodhowanave atucha thitho anoofunechecha apha.’ (May. 9:1) Angakanle Kristau, mo-okaikela Paulo anodhilimbi-edha i-ya umutu wawale. (Aef. 4:22, 31) Angalive e-no liye na Barnaba tatookangana maningi. (May. 15:37-39) Wen’na wali umutu wawale wa Paulo angalive ira atooroma u-iya, mbwenye liye kafookile. Paulo atoodhowanave ‘khoma manungwee,’ thapulela ira anoolimbanana na a-longomanawee, ira asangalali-e Yohova.—1 Ak. 9:27.

12. N’nga chini yakami-idhe Paulo ira achinje umutwee wawale?

¹² Paulo atooda ungula umutwee wawale nowara umuthu upya namwasa oi ali odhiyevi-a thitho kaadhinyindela. (Afl. 4:13) Mofwanafwana na Pedru, Paulo anoonyindela “kopolo inovelela Nlungu.” (1 Pe. 4:11) Masiki vingali ee-no, liye anoodhivwa kala oimwanana. Mbwenye akala osukwala, Paulo anoothuulela vyongo vyapama vyam’mwirele Babee wa dhulu. Vyevi vyatoom’kami-a kala ofunechecha dhowanave chinja ira am’sangalali-e Nlungu.—Aro. 7:21-25.

13. N’nga ninam’sazi-edhe a-vi Paulo?

¹³ I-yo thitho ninooda m’sazi-edha rumiwi Paulo nazindiyela ira angalive ira niromile walelene m’labela Yohova, ninofwanela dhowanave wara umutu upya. Ninga muoni i-yo vyevi vinothangani-avo ungula umutu wawale, nowara umutu upya. Akala nitoroma okoka thonyi-edha makalelo othakala, ninga thakaleliwa venango onga mwaiburutu na mutu mwinango, kaninofwanela thuulelanga ira nitoimwanana. Malomwee ninofwanela dhowanave dhilimbi-edha chinja modi-u othuulela na oirana vyongo. (Aro. 12:1, 2; Aef. 4:24) Mbwenye ninofwanela thuulela yongo inango yofuneya maningi: Mo-iyana na vyowara vyoi vyaulukhula ninodhowana makinani maviweli-a ira niodenga wara pama, i-yo ngunofwanela chinja ira niware umutu upya unoniva-a Yohova. Chinja umutwi-u ira ni-arelenga makhundo a Yohova, ndiyongo yapama maningi.

MUM’SAZI-EDHENGA DAVIDE VODHOWANAVE BARELIWA MWAUZIMU

14-15. N’nga Yohova unobarela a-vi arumiwe mwauzimu? (Salimo 27:5) (Muone thitho yavakapani.)

¹⁴ Ira nikale osangalala mwaimbarimbari, ninofuneela kaana yodya yauzimu. Thitho wara umutu upya kai vyokwakwanela. Ninofuneela thitho bareliwa mwauzimu. N’nga Yohova unonibarela avi? N’nga ninam’rumeli-e a-vi ira liye airena vyevyo?

¹⁵ Mwene Davide atoonga vyokhuza bareliwa mwauzimu weo Yohova unonibarela liye. (Muleri Salimo 27:5.) Yohova unobarela arumiwee venango mutu unofuna nonga iroromelwi-u wa liye. Liye utolanyedha ira fwaramento iliyothene isaka-edhiwile ira iniphei-e kinodha ganyali. (Sal. 34:7; Esa. 54:17) Angalive ira Satana na viwandavyee takale akopolo, aliwa katinaode niphei-a modhowa nodhowa. Masiki aliwa taniphe Yohova unodha nivenyathi-a. (1 Ak. 15:55-57; Apk. 21:3, 4) Yohova thitho unonibarela vonikami-a limbanana vyokhumbanyi-a vyevyo vinaniimwanani-e m’labela liye. (San. 12:25; Mat. 6:27-29) Thitho Babi-u waudhivela utoniva-a abali na arongola ira tanikami-enga thitho andimuwa avapingoni ira tanisogolelenga. (Esa. 32:1, 2) I-yo nafiya vamigumanoni, ninofunja vyongo vinaire i-yo ira nirumeli-e ira Yohova anikami-e thitho nibarela.—Aeb. 10:24, 25.

16. N’nga Yohova am’barele a-vi mwene Davide?

¹⁶ Davide vyavwela liye Yohova, anoobareleya thitho Yohova anoom’kami-a vosakula vyoira mwazelu vyam’mwiri-a ira akale osangalala. (Muone thitho Sanganiko 5:1, 2.) Ikhundu inango, vahora yapwaza liye makhundo a Yohova, liye kaabareliwa va nyarwa dhagumanana liye namwasa wa vyoiravyee vyothakala. (2 Sa. 12:9, 10) Va vyongo vyothene vyaireya, anoom’mwandelecha Yohova vyokhumbanyi-avyee vyothene. Thitho Yohova anoom’didili-echa Davide, nom’sikimizeli-a ira unom’dhiveliwana maningi thitho unongo m’samalela pama.—Sal. 23:1-6.

17. N’nga ninam’sazi-edhe a-vi mwene Davide?

¹⁷ Ninooda m’sazi-edha Davide na-arelanga malangi-o a Yohova na-anaire vyosakula. Thitho ninovwechecha ira hora dhinango ninogumanechana nyarwa, a-kala namwasa oi Yohova uto-iya nibarela, mbwenye namwasa oi nitosakula vyongo modaweya. (Agl. 6:7, 8) Thitho nagumanangana nyarwa namwasa wa vyoira vyaatu enango, ninom’mwandela Yohova vyarimanimwi-u vyothene, nororomelanga ira liye unodha barela mathuulelwi-u na rimi-u.—Afl. 4:6, 7.

MUDHOWENAVE SAMALELA VYORAMBULELA VINYU VYAUZIMU

18. N’nga ndi vyorucha viivi vinogumanana i-yo, n’nga ninaire a-vi ira nidhowenave samalela vyorambulela vi-u vyauzimu? (Muone thitho viruthiruthi.)

¹⁸ Lemba la yawa ya 2026 linoonga ira: ‘Osangalala mbaatu anozindiyela vyorambulela viwa vyauzimu.’ Malamboano vyevi pyaimbarimbari kwaranya wale lothene. Naing’ana valivothene ninoona atu o-osangalala. Mwasiwa ngwan’ni? Namwasa oi atu anjinji mwaaliwa anokhonda ira atokaana vyorambulela vyauzimu. Atu enango anororomela Nlungu, mbwenye anom’lambela mundhila yodaweya. Thitho atu enango tanonyindela malangi-o aatu. I-yo kanirumeli-e ira makalelo enala tanidodomi-e. N’nga ninaire a-vi ira nidhowenave samalela vyorambulela vi-u vyauzimu? Vo-indi-edha basa yodya yauzimu inoniva-a Yohova, wara umutu upya norumeli-a ira Yohova anibarelenga.