Vyofuka vyokhumela waalimbo leri

N’nga ndi elini vanofuna aliwa onga milanyu yoi “rendele nobareleya”?

Ninga muoni i-yo chineneeva mu Nsanja ya namaing’anela,a Vamuru oonga ira “Vyofuka vyokhumela walimbo leri” Yohova unodha e-la “mathuulelwee” “mirima ya nyanga 10” (Maguverno othene andale a ilambo yavathi) anodha “thuulela vyovelela kopolo dhiwa wa ilombo yofiila” venango wu Nações Unidas. Ilombwiyo yanooitaniwa ira “ifwanafwani-o ya ilombo.” (Apk. 13:14, 15; 17:3, 16, 17) Ee-no “nyanga 10” na ilombo dhatoowachela kopolo dhonongana mareligiau othene onama availambo yavathi. N’nga ndi e-lini vanofuna aliwa dhaonga milanyu yoi “rendele nobareleya”b? N’nga vyevi vinodhaireya vanduli venango vasogolo voi mareligiao onama tadhamala nongiwa?—1 At. 5:3.

Yowakhula choi kaninoidhiwa mosikimiza hora inofuna aliwa dhaonga milanyu yoi “rendele nobareleya.” Aakale ira ninoidhiwa vyothene, kanafuneelenga kala methove. Mbwenye Yesu anowandela anama-arelee ira “mukale methove.” (Mat. 24:42; 25:13; 26:41) Va-eeni, dhoweni nitapanyeni makhundo anofwanyeya mumaulosi a rumiwi Paulo alembele liye Makristau awu Atezalonika.

Paulo atoonga ira: “Tadhaonga ira ‘Rendele nobareleya!’ hora yeniyene anodha nongiwa morurumucha.” (1 At. 5:2, 3) Ndulimu, mabukwi-u taongecha ira milanyu yoi “rendele nobareleya” inodha ongiwa vanduli voi nyarwa ilukhulu kinarome. Inofuna dharoma ndinongiwa wa Babulo nlukhulu venango ira mareligiau othene onama. Naongecha thitho ira milanyu yen’na inodhakala izindiyelo yoi nyarwa ilukhulu i-adhi vang’ono roma.

Mbwenye ningasakasakile mosamala maningi mwasa wen’na, vinooneya ira vyevi ndi vimbo-i mwa vyongo vinofuna dhaireya. Yongo inango choi, milanyu yoi “rendele nobareleya” inodha ongiwa vasogolo vonongiwa wa mareligiau onama. Mwasiwa ngwan’ni? Dhoweni nione myasa inango.

Mareligiau onama anovolowela khondo. Bibilya linoonga ira: “Mwa liye [“ Puta nlukhulu,” Babulo nlukhulu] mwatoofwanyeya sangiri . . . yaanamaongela, ochena na yaatu othene apiwile vailambo yavathi.” (Apk. 17:1, 5; 18:24) Romela ndulimu, mareligiau onama takadhi tavolowelanga khondo thitho hora dhinjinji takadhi taromi-anga vyauwalanga. Malo modhi-a rendele nobareleya, mareligiau ala anokami-a khondo na vyauwalanga. Vyevi vinodhi-a yofuka yoi: N’nga milanyu yoonga “rendele nobareleya” inodha ireya vasogolo vonongiwa wa Babulo nlukhulu? Mbwenye kaninaonge mosikimiza.

N’nga chini inofuna dhaireya vasogolo va milanyu yoi “rendele nobareleya?” Paulo aongile ira: “Hora yeniyene tanodha nongiwa.” (1 At. 5:3) Madhu athapuleliwile va lemba leli anoonga ira “Paulo athonyi-edha ira vanodha kala hora yoyeva vari va milanyu yoi ‘rendele nobareleya’ nonongiwa waatu anoonga milanywiyo. Nongiwa wiwa unodha kala orurumucha thitho kavali unofuna dhatawa.” Ee-no, vinooneya ira anamasogolela ailambo tanodha onga milanyu yoi “rendele nobareleya” vasogolo vonongiwa wa mareligiau onama thitho vasogolovee tanodha nongiwa morurumucha.

N’nga atu a Yohova tanodha fwanela iran’ni vyongo vyevi vyadhaireyanga? Paulo aongile ira: “Mbwenye nyo abali, kamuli isini ira dambolo lidaururumucheni ninga munorurumuchela mambava undhe wachanga.” (1 At. 5:4) Ee-no, akala milanyu yoi “rendere nobareya” inodha ongiwa vasogolo vonongiwa vamareligiau onama, atu a Yohova tanodha idhiwa ira nongiwa wa maguverno avyandale u-adhi vang’ono ira uireye. Voi maguverno avyandale mbanofuna dhaonga milanyu yoi “rendele nobareleya” aliwa tanodha thuulelanga ira tali obareleya. Mbwenye hora yeniyene nongiwa wiwa unodha fiya morurumucha ninga mbava—afiyanga nama-iyu.

N’nga ninoidhiwan’ni? Ninoidhiwa ira vachineneeva “nyanga 10” inodha va-iwa kopolo na ilombo thitho inodha nonga mareligiau onama. Vyevi vinodha kala roma wa nyarwa ilukhulu. Thitho ninoidhiwa ira vanodhakala milanyu yoi “rendele nobareleya.” N’nga vyevi vinodha ireya e-lini? Nitothapanya makhundo menli. Yoroma choi: Milanyu yoi rendele nobareleya inodha ongiwa mareligiau onama a-ananongiwe. Yanambili choi: Milanywila inodha ongiwa vasogolo vonongiwa wa mareligiau onama. Mulimwethene munofuna aliwa dhakalela, ninofwanela dedi-edha vinofuna dhaireya. Hora dhinango maulosi anjinji a Bibilyani ninoavwechecha pama takwakwaneli-edhiwanga.—Mufwanafwani-edhe na Ju. 12:16.

Va-eni, yofuneya maningi kai milanyu inofuna dhaongiwa yoi “rendele nobareleya,” mbwenye yofuneya maningi ndi dhowanave kala ororomeleya wa Nlungu. Ninofwanela “kala methove nokala othuulela pama” mo-obala moda munofuna dhakwakwaneli-edhiwa maulosi sogolou.—1 At. 5:6.