N’nga munaire a-vi ira mulemeele mwathamela pingo mwinango?

Nicolas na Céline tatoogumanana yorucha ya tundu mwinango. Aliwa tatoorumela ofesi ya tambi yau Fransa ingaavepile ira tathamele mupingo mwinango. Aliwa taongile ira: “Voromavene nanoosangalala maningi, mbwenye vidhamale natooroma sowa afwi-u. Nali na-anarome lemeelana naabali naarongola apingwi-u upyuo.”a Angalive ira vanokala vyorucha, n’nga chini inanikami-e ira nisangalalengave nathamela mupingo m’pya? N’nga atu enango ananikami-e a-vi? N’nga munaire a-vi ira mulimbi-iwenga thitho mulimbi-enga atu enango pingoni mwinyu upyuo?

MAKUNDO 4 ENAO ANAUKAMI-ENI

1. Mum’nyindelenga Yohova. (Sal. 37:5) Rongola Kazumi wau Japao atoothama pingoni mwakala aliwa wavyawa 20 vevo mam’nee vyachinjiwile liye ira amalabenga basa mutatamo n’nango. N’nga liye arile a-vi ira “Yohova am’sogolelenga vandhilee”? Liye aongile ira: “Mowelelawelela ndatoom’mwandela Yohova moda waova miyo, vikumbanyedha wanga thitho ndadhiona ira ndili ndekene. Hora iliyothene ndairana vyevi, Yohova anoondiva-a kopolo dhafuneela miyo.”

N’nga munaire a-vi ira mum’nyindelenga maningi Yohova? Molandana na mbeu dhedho dhinofuneela ma-inje na vyodya vinango vyevyo vinofuneela ira viulukule, iroromelo yi-u inofuneela thitho vyongo vinango ira iulukule. Nicolas, atoona ira thuulela maningi vyaatu ninga Abrahamu, Yesu na Paulo, enao tarumenle i-ya vyongo vinjinji ira tam’labelenga Nlungu, watom’kami-a ira aroromelenga maningi ira Yohova unodha m’kami-a. Funjedha Bibilya hora dhothene unooda ukami-ani ira mulemeele vyongo vyevyo vichinjile thitho ira mufwanye vyongo vinalimbi-ena nyo atu enango pingoni mwinyu upyuo.

2. Murambelenga fwanafwani-edhela. (Nam. 7:10) Jules angathamile kumela wu Benin dhowa wu Estados Unidos, afuneela chinja ira alemeele ikalelo inango. Liye aongile ira: “Ndafuneela wandela mutu uliwethene unam’gumanena miyo fendo yoroma yongo iliyothene yokuza miyo.” Voi kaleloli lali lo-iyana na yalemeele liye, atooroma rambela abali naarongola. Mbwenye angaaidhiwile pama, atoochinja moda mwaaonela liye. Liye aongile ira: “Va-eeni nditoidhiwa ira wu limburo nlilothene vailamboi atu mbolandana. Aliwa anoonga venango irana vyongo vyo-iyana. Ira vyongo naatu movwelana na vyalemeele liye kofuneela maningi.” Ee-no murambelenga fwanafwani-edha pingwinyu wawale na upya. Painiya mwinango dhinalee Anne-Lise aongile ira: “Kandithamile ira ndimafwanye vyolandana na vya-iidhe miyo, mbwenye ira ndimafunjedhe vyongo vipya.”

Andimuwa avapingoni thitho anofwanela kala osamala ira ta-afwanafwani-edhelenga pingwiwa wawale na upya. Akala abali anoira vyongo mundhila dho-iyana mupingo upyuo, kai hora dhothene vinokala aliwa vyodaweya. Ndizelu idhiwa pama mwemo vyongo mukalele aliwa mupingo upyuo mwa-anavelele malangi-o inyu. (Nam. 3:1, 7b) Ifwanafwani-o inyu yapama inooda kami-a atu pingonimo, malo mowakanyi-edhanga ira ta-arelenga mathuulelo inyu.—2 Ak. 1:24.

3. Muirenga vyongo vinjinji vambo-i naaliwa. (Afl. 1:27) Thama kochenyeli-a thitho unofuneela hora injinji. Mbwenye akala pyoodeya, romela vafiile nyo mugumaneyenga vamigumanoni vamethoni na vamethoni. Thitho akala abali apingo upyuo hora dhinjinji katinouonechani, n’nga anaukami-eni a-vi? Lucinda na a-imee ambili aa-iyana enao tathamenle mu sidade nlukulu la Afrika de Sul taongile ira: “Afwanga tatoondiwandela ira ndinofwanela warendhanga maningi naabali naarongola mupingo upyuo, dhowa malaleela vambo-i thitho wakulanga vamigumanoni. Natoowandela abali ira tanooda labi-edhanga basa nyumbi-u voirelamo gumano okozeela urumiwi.”

Dhililmbi-edha irana vyongo vyokuza lambela “movwelana” naabali naarongala apingwinyu upyuo, unodha ukami-ani ira mudhowenave “roromela milanyu yapama.” Anne-Lise, um’mongile i-yo maromelou, atoolimbi-iwa naandimuwa avapingoni ira adhilimbi-edhenga laleela na mutu uli wethene pingonimo. N’nga vyo-arelavovyee vyali vyoi a-vi? Liye aongile ira: “Ndatoozindiyela ira vyevi vyatoondikami-a ira ndilemeele mombaranya.” Thitho vodhivelela laba basa vambo-i naaliwa yosaka-edha Nyumba ya Umwene, unooda thonyi-edha ira va-eeni mutoroma ona ira ween’na ndi pigwinyu. Mwairanga vyongo vambo-i, abali naarongolao anodha roma kala othathuwa na nyo thitho munodha roma ona ira mbaatu abanjani mwinyu lauzimu.

4. Mufwanyenga afwinyu achineneeva. (2 Ak. 6:11-13) Kaana ifunelo naatu enango unooda ukami-ani ira mufwanye afwinyu achineneeva. Ee-no mukaengana hora migumano ya-anarome venango yamala yoi muwaredhenga naatu enango naifunelo yoi mwaaidhiwe pama. Muvilimbi-edhenga idhiwa madhiniwa. Thuulela madhina aatu thitho kala owaredha, unooda kami-a ira atu enango tafunenga waredha na nyo thitho vyevi vinodha ukami-ani ira mufwanye afwinyu anjinji apama.

Malo modhikumbanyedhanga noiranga vyongo vinango vyavakundu naifunelo yoi atu taudhiveliwenganani, murumelenga ira abali naarongola taidhiwe mwemo mukalele nyo. Muirenga vyevyo Lucinda vyaongile liye. Liye aongile ira: “Va-eeni nitokaana afwi-u anjinji apama namwasa oi aromile ngu i-yo aitanela nyumbani wi-u.”

“MUWACHELENGANA”

Atu enango anoova tavolowa nyumbani ya Umwene yodhala naatu enao ta-aaidhi aliwa. N’nga munaire a-vi ira mukami-e atu athamenle pingoni mwinyu? Rumiwi Paulo atoonga ira: “Muwachelengana. Ninga mwemo Kristu mwaniwachelele liye.” (Aro. 15:7) Vo-arela Kristu, andimuwa avapingoni anooda kami-a atu athamenle wene pingoni mwiwa ira tadhivwenga ira tatowacheliwa. (Muone kwadru lamuru oi “N’nga munaire a-vi ira thama wa-akale orucha?”) Mbwenye atu othene pingonimo, thangani-avo a-ima, anooda kami-a atu enao tadhidhe pingoni mwiwa fwanya afwiwa achineneeva.

Wachela atu enango unothangani-vo aitanela nyumbani wi-u thitho akami-a va vyongo vyo-iyana-iyana. Mwaifwanafwani-o, rongola mwinango atoofwanya hora yodhowa sidade na rongola wenuo athamenle wene pingoni mwiwa. Ira amam’moni-e mamburo thitho parajini. Vyairile liyevyo vyatoom’kami-a fweuo ira alemeele mombaranya.

VINONIVA-A NGARI YOULUKULA MWAUZIMU

Dhombe laulukulanga, linosuruwa fendo dhingaasi ira mapepelwee takale pama noroma purumuwa. Molandana na vyevi, nyo thitho munofwanela kalanga ninga mutosuruwa vorambela yongo iliyothene inauimwanani-eni m’labela Yohova mothathuwa. Nicolas na Céline taongile ira: “Thama unonifunji-a vyongo vinjinji. Ninofuneela makalelo mapya ira nilemeelane naatu thitho mamburo mapya.” Jean-Charles, wenuo umuongile i-yo maromelou atoonga mwemo thama mwakami-idhe aliwa banjalee. Liye aongile ira: “Thama utokami-a ira a-imi-u tairenga pama vyongo pingoni. Vangavirile myedi yoyeva, mwani-u wa-iyana atooroma onga myasa yavamigumanoni yavari vasumana thitho mwani-u walombwana atookala namalaleya o-obadiziwa.”

N’nga a-vi akala kamunaode thamela unango ninga dhowa malaba unofuneela anamalaleela anjinji? Munooda ira pama a-rela malangi-o atapanyileni i-yo mumwasula mungali pingoni mwinyu. Mum’nyindelenga Yohova thitho muirenga vyongo vinjinji pingoni voira masaka-edho oi mulaleelenga naatu enango, saka axamwali achineneeva thitho dhowanave vwelana naafwinyu awale. Munooda kami-a thitho atu adhidhewene venango orambulela vowava-a vyongo vinofuneela aliwa. Voi udhivela ndikalelo linoidhiwi-a Makristau aimbarimbari, irana vyevi unodha ukami-ani ira mulimbi-e uxamwalinyu na Yohova. (Ju. 13:35) Munooda kala osikimiza ira “Nulungu unosangalala na sembe dhoi e-no.”—Aeb. 13:16.

Angalive ira vanokalecha vyorucha vinango, Makristau anjinji vyongo vinowawendela pama tathamela mu pungo unango. Thitho nyo vinodha uwendelani pama. Anne-Lise aongile ira: “Thamela pingo unango, watoondikami-a ira ndiidhiwane naatu annjinji.” Kazumi atoonga mosikimiza ira “wathamela pingo unango unoona Yohova aukami-anga mundhila yeniyo ya-anaithuulelevowee.” Jules aongile ira: “Afwanga aafwaidhe miyo, atondikami-a ira nda-akalenga ninga lendo. Va-eeni ndinoona ira ndili wapingonimo, thitho vinodha ndirucha ira ndikumemo.”