Mayirelo a Arumiwi
27 Nangarumeli-iwile dhowa wu Italiya na barko, Paulo na anyaperezo enango tatooveleliwa mandhani mwa namasogolela waanyakhondo dhinalee Juliyo wa mugulu laanyakhondo a Agustu. 2 Natoogwela barko la Adiramitiyo loi la-adhi vang’ono venyathi ulendo odhowa wu magombe a khundu mwa bara wu provisiya ya Aziya. Nidhamale natoovenyathi vambo-i na Aristarku oi ali wau Masedoniya sidadi la Atezalonika. 3 Bebeinimwee natoofiya wu Sidoni, thitho Juliyo atoom’riyela rima Paulo moi atoom’rumeli-a ira adhowe waafwee ira tamam’samalele.
4 Ningagwenle okoka barko khumela weo, natoowenda khundu mwa isuwa ya Kupuru yeyo yanibarela wu liphevo lelo lakhuma wadhowa i-yo. 5 Natoowenda vabara mowerewera ilambo ya Silisiya na Pafiliya moi natoofiya va gombe la Mula, wu Lisiya. 6 Nidhafiye weo namasogolela waanyakhondo atoofwanya barko lakhumela wu Alexandriya loi ladhowa wu Italiya, thitho atoonigweli-a mwemo. 7 Ee-no natoowenda mwavang’ono vang’ono wa malambo mangaasi nidhamale natoofiya morucheya wu Kinido namwasa wa liphevo ladha sogolo wi-u. I-yo navirilena wu Salimone ira isuwa ya Kereti inibarelenga uliphevolo. 8 Ningawendile morucheya khundu mwa isuwa yei, natoofiya valimburo n’nango loitaniwa Magombe Apama, loi lali vaduzi na sidadi la Laseya.
9 Moi vatoovira malambo manjinji, thitho wenda vabara wali oophi-a namwasa oi hora yosala udya wa dambo loleveleliwa vyodawa, wali ungavirile. Ee-no Paulo atoava-a malangi-o. 10 Liye atoawandela ira: “Miyo ndinoona ira ulendula nauroma va e-ni ninonongi-a vyongo vinjinji. Ninonongi-a mitolo, barko, thangani-avo thitho vingumi vi-u.” 11 Mbwenye namasogolela waanyakhondo atoovwela alimbo wendi-a barko na mwinyaa barkolo malo movwela vyaongile Paulo. 12 Voi gombelo kalali lapama kalavo hora yodidila, atu anjinji tatoovwelana ira takhumevo. Aliwa tafuna ona akala pyoodeya mafiya wu Fenikisi ira tamakale weo vahorila. Fenikisi lali gombe* la Akereti ikhundu ya makhumelo a dhuwa awu norti na ikhundu ya makhumelo adhuwa awu suli.
13 Liphevo lakhumela wu suli lingaromile mwavang’ono navang’ono, aliwa tathuulela ira vyafuna aliwa vinoodeya. Ee-no aliwa tatoogweli-a nangula noroma wenda chereerani mwa isuwa ya Akereti. 14 Mbwenye va-anavire hora liphevo loitaniwa Euriakilo* latooroma vira. 15 Voi barko lanoolimbanana liphevo lakopolo thitho kanaoda lilinyali-a dhowa wakhumela liphevolo, natooimwanana thitho barko latooroma welela nduli. 16 Nidhamale natooroma wenda chereerani mwa isuwa inango ing’ono yoitaniwa Kauda yeyo yanibarela wu liphevo. Mbwenye nanooimwanana chapa barko ling’ono lamburuliwa na barko nlukhululo. 17 Moi e-no tatoogweli-a barko ling’onolo mu barko nlukhululo nolimanga ira lilimbe. Mbwenye voova ira barkolo linooda mbiyela sevani wu Sirti,* aliwa tatoothathula migo-i yamangiwa na nguwo ya barkolo ira lindunyiwenga na liphevo. 18 Mbwenye voi liphevo nlukhulu lanoonindunya mwakopolo, bebeinimwee atu tatooroma ponyedha mitolo mwiko ira barkolo liluluveliwe. 19 Dambo laneraru, tatootatila migo-i yogweli-ana nguo ya barkolo.
20 Ningaoni ira dhuwa na nyenyedi kavinooneya wa malambo manjinji thitho dhowanave ndunyiwa na liphevo la kopolo, natooroma kaikela akala ninovulumuwa. 21 Atwao tangamadhi malambo manjinji a-dya yongo, Paulo atooimela variviwa noonga ira: “Nyoo, mwa-avwele vyaonga miyovile i-yo a-khuma wu Keretiule kanaone nyarwa e-ni thitho mitolwi-u kiyanongeye. 22 Mbwenye kamukhumbanye namwasa oi kavali unofuna wukwa, mbwenye barkoli linonongeya. 23 Ma-iyu ngelo wa Nlungu unom’labela miyo urumiwi wavakhundu, atooimela duzi na miyo 24 noonga ira: ‘Kuove Paulo. Unofwanela maoneela wa Kaisara. Thitho uidhiwe ira namwasa wa we, Nlungu unovulumucha atu othene ali vambo-i na we vaulendula.’ 25 Ee-no mulimbe rima, namwasa oi ndinororomela ira Nlungu unokwakwaneli-edha vindiwandenle liye. 26 Mbwenye barko li-uli linonongeya duzi na isuwa inango.”
27 Nama-iyu a dambo la 14, liphevo latooroma nindunyela wu na wu vabara ya Adriya. Moi e-no vari va nama-iyu, alimbo wendi-a barkolo tatooroma thuulela ira tanaakwivela rundani. 28 Ee-no tatooweza di-a wa baramo tongofwanya ira ali mametru 36. Tangawendile vang’ono tatooweza okoka tongofwanya ira ali mametru 27. 29 Mbwenye voova ira ninodima mabwe, tatoothithi-a anangula 4 nduli wa barkolo thitho tanoofunechecha ira undhe ungachide. 30 Ee-no alimbo wendi-a barkolo tanoofuna tawamo. Moi ee-no tatoothithi-a barko ling’ononle kalanga ninga funa tadhowe sogolo mathithi-a anangula. 31 Paulo atoom’mwandela namasogolela wa anyakhondo na anyakhondwao ira: “Atwala takhumamo barkonimuno, kamunovulumuwa.” 32 Adhamale anyakhondwao tatoophadha migo-i ya barko ling’onolo noli-iya ira lidhowenga.
33 Undhe unga-adhi vang’ono ira uche, Paulo atoowandela atu othene ira tadye. Liye aongile ira: “Va e-ni vatovira malambo 14 mudedi-edhanga mungali osukwala thitho kamudyide iliyothene. 34 Va-eni ndinaulimbi-ani ira mudye ira vyongo viuwendeleni pama. Masiki sisi limbo-i la murunimwinyu kalinodha nongeya.”* 35 Angaongile vyevi atootukula pau. Adhamale atoolobela wa Nlungu vari vaatu othene nogawa pawiyo thitho liye atooroma udya. 36 Adhamale, atu othene tatoolimba rima noroma udya. 37 Barkonimo nalimo atu okwakwana 276. 38 Othene tangamadhi udya norumbala, tatootatilela tirigu baramo ira barkolo liluluveliwe.
39 Undhe ungachide, kataidhi wali aliwa, mbwenye tatoona gombe n’nango lauseva thitho tanoofunechecha ira akala pyoodeya tamaimeli-e barko vevo. 40 Ee-no tatoophadha migo-i ya nangula noigwi-edha bara. Tatoothathula thitho migo-i yomangana visimatabwa vyochapana barko. Tangagweli-edhe isinguwo ya sogolo wa barko, tatooroma dhowa gombe. 41 Adhamale tatoofiya va kamba la useva yoi yali mwikomo. Moi sogolo wa barkolo watoombiyela usevanimo thitho mabimbi a kopolo tatooroma dima nduli wa barkolo moi latooroma thweya. 42 Vidhaire e-no anyakhondo tatoothuulela vyopha anyaperezo othene ira va-afwanyeye mutu uliwethene o-ambelelela notawa. 43 Mbwenye namasogolela wa anyakhondo anoofunechecha ira Paulo tama’fiyenee pama, ee-no atoakhondi-a vyafuna aliwa iravyo. Mbwenye atoowandela alimbo idhiwa a-mbelela ira talupele baramo naifunelo yoi takale oroma fiya rundani. 44 Atoowandela thitho atu enango othene ira tairena vimbo-ive, enango tagwele vamatabwani thitho enango tagwele vamapedaso a barkolo. Adhaire e-no othene tatoofiya rundani tangali pama.