The First Letter John Write
5 Anybody who believe da Jesus da the Christ, da person da God child, and anybody who love God, da person also love God children dem. 2 We can show da we love God children dem, when we love God and obey the thing dem he tell us to do. 3 To love God mean to obey his law dem, and his law dem not too hard to obey. 4 Because anybody who God child, da person na win the world. And the thing da help us to win the world, da our faith.
5 Who can win the world? Ehn da the person who get faith da Jesus da God Son? 6 Jesus Christ da the person who came with water and blood. Da not only water he came with, but he came with water and blood. And the spirit talking about this thing dem, because the spirit da the truth. 7 Da three thing dem show the truth about Jesus. 8 Da the spirit, the water and the blood, and the three of them agree with each other.
9 If we accept the thing dem people say, then we mon also accept the thing dem God say, because the thing dem he can say more important. And da because God hisself talk about his Son. 10 The person who get faith in God Son, na accept the thing dem God say with his whole heart. The person who not get faith in God making God to look like liar, because he not get faith in the thing dem God say about his Son. 11 And the thing da God say, da it here, he give us everlasting life and he use his Son to give us da life. 12 The person who united with the Son get this life, but the person who not united with God Son not get this life.
13 I writing this thing dem to yor so da yor can know da yor get everlasting life, yor who put your faith in the name of God Son. 14 And we trust* him da anything we ask him for, so long it in line with what he want, he will hear us. 15 And if we know da he can hear us when we ask him for anything, then we know da we will get the thing dem we ask him for, since da he the one we ask for this thing dem.
16 If anybody see his brother committing sin, and da sin can’t make people to die, he will pray to God for his brother and God will give his brother life. This one talking about the people dem who not committing sin da can make people to die. But they get sin da can make people to die, and I not tell him to pray for anybody who commit da kindna sin. 17 All the thing dem da not right in God eye da sin, but still they get sin da can’t make people to die.
18 We know da anybody who God child can’t continue to sin, but God Son can protect him so da the wicked person* can’t do anything to him. 19 We know da we come from God, but da the wicked person controlling the whole world. 20 But we know da God Son na come, and he na help us to understand so we can know the true God. And we united with the true God because of his Son Jesus Christ. Da the true God who can give everlasting life. 21 My children dem who I really love, yor stay far away from false god dem.*