Tosaanidde Kutya Nkomerero y’Enteekateeka Eno ey’Ebintu

Mu kiseera ekitali kya wala, obugumiikiriza bwa Yakuwa eri ensi ya Sitaani bujja kukoma. Amadiini ag’obulimba gajja kuzikirizibwa, amawanga gajja kwegatta wamu galumbe abantu ba Katonda, era Yakuwa ajja kuzikiriza abantu ababi ku lutalo Amagedoni. Abakristaayo beesunga nnyo ekiseera ekyo.

Kyo kituufu nti tetumanyidde ddala byonna ebinaabaawo mu kiseera ky’ekibonyoobonyo ekinene. Ng’ekyokulabirako, tetumanyi kiseera kyennyini ekibonyoobonyo ekinene lwe kinaatandika. Tetumanyi nsonga gavumenti kwe zinaasinziira okulumba amadiini. Tetumanyi kiseera amawanga kye ganaamala nga galumbye abantu ba Katonda, era n’ebinaazingirwa mu bulumbaganyi obwo tetubimanyi. Ate era tetumanyidde ddala Yakuwa ky’anaakozesa okuzikiriza abantu ababi ku lutalo Amagedoni.

Kyokka, Ebyawandiikibwa bitubuulira byonna bye twetaaga okumanya okutuyamba obutatya binaabaawo mu biseera eby’omu maaso. Ng’ekyokulabirako, tukimanyi nti tuli mu kiseera ekisembayo ‘eky’ennaku ez’enkomerero.’ (2Ti 3:1) Tukimanyi nti ekiseera ekinaayitawo ng’amadiini galumbiddwa kijja ‘kukendeezebwako,’ eddiini ey’amazima ereme kuzikirizibwa. (Mat 24:22) Tukimanyi nti Yakuwa ajja kununula abantu be. (2Pe 2:9) Ate era, tukimanyi nti oyo Yakuwa gwe yalonda okuzikiriza abantu ababi n’okuwonyaawo ekibiina ekinene ku lutalo Amagedoni, mutuukirivu era wa maanyi.​—Kub 19:11, 15, 16.

Awatali kubuusabuusa, ebyo ebinaabaawo mu biseera eby’omu maaso bijja kuleetera abantu ‘okuzirika olw’okutya.’ Kyokka, bwe tusoma era ne tufumiitiriza ku ngeri Yakuwa gye yawonyaawo abantu be mu biseera eby’edda, era n’ebyo by’atubuulidde ebikwata ku biseera eby’omu maaso, tusobola ‘okuyimirira busimba ne tuyimusa emitwe gyaffe,’ nga tuli bakakafu nti okununulibwa kwaffe kunaatera okutuuka.​—Luk 21:26, 28.