Yesu Yali Ayogera ku Muliro Ogutazikira?
ABAMU ku bantu abakkiriza nti waliyo omuliro ogutazikira bagamba nti Yesu yagwogerako mu Makko 9:48 oba olunyiriri 44, 46. Yayogera ku nvunyu ezitafa n’omuliro ogutazikizibwa. Omuntu bw’akubuuza ebigambo ebyo kye bitegeeza, oyinza kumuddamu otya?
Omuntu ayinza okukozesa olunyiriri 44, 46, oba 48, kubanga mu nkyusa za Baibuli ezimu ennyiriri ezo zoogera kye kimu.a New World Translation egamba nti: “Singa eriiso lyo likwesittaza, liggyemu; kisingako okuyingira mu Bwakabaka bwa Katonda ng’olina eriiso limu okusinga okubeera n’amaaso abiri n’osuulibwa mu Ggeyeena, awali envunyu ezitafa n’omuliro ogutazikizibwa.”—Mak. 9:47, 48.
Wadde kiri kityo, abamu bagamba nti ebigambo bya Yesu ebyo biraga nti abantu ababi bwe bafa emyoyo gyabwe gibonyaabonyezebwa emirembe n’emirembe. Ng’ekyokulabirako, ekitabo Sagrada Biblia ekya Univasite ya Navarre ey’omu Spain kigamba nti: “Mukama waffe akozesa [ebigambo ebyo] ng’ayogera ku kifo awali omuliro ogutazikira. Bangi bagamba nti ‘envunyu ezitafa’ kabonero akalaga okwejjusa okw’olubeerera okw’abo abali mu kifo ekyo; ate nti ‘omuliro ogutazikira’ bwe bulumi obw’amaanyi bwe bawulira.”
Naye, geraageranya ebigambo bya Yesu ebyo n’olunyiriri olusembayo mu kitabo kya Isaaya.b Kyeyoleka bulungi nti ebigambo ebyo ebiri mu Isaaya essuula 66 Yesu bye yali ajuliza. Kirabika nnabbi ayogera ku kufuluma “Yerusaalemi okugenda mu Kiwonvu kya Kinomu (Ggeyeena) ekyali kyetooloddewo, awaasaddaakirwanga abantu (Yer. 7:31) era oluvannyuma awaafuuka ekifo awasuulibwa ebisasiro ebyaggibwanga mu kibuga.” (The Jerome Biblical Commentary) Ebigambo ebikozesebwa mu Isaaya 66:24 tebyogera ku kubonyaabonyezebwa kw’abantu n’akamu; byogera ku mirambo. Envunyu ze zoogerwako ng’ezitafa, so si bantu abalamu oba emyoyo egitafa. Kati olwo Yesu yali ategeeza ki?
Weetegereze ekitabo ky’Abakatuliki ekiyitibwa El evangelio de Marcos kye kyogera ku Makko 9:48. Análisis lingüístico y comentario exegético, omuzingo II gugamba: “Ebigambo ebyo biggibwa mu Isaaya (66, 24). Mu lunyiriri olwo, nnabbi alaga engeri ebbiri emirambo gye gyazikirizibwangamu: okugireka okuvunda oba okwokebwa . . . Okwogera ku nvunyu n’omuliro mu lunyiriri lwe lumu kiggumiza ensonga y’okuzikiriza eyogerwako. . . . Okuzikiriza okw’emirundi gyombi kwogerwako ng’okw’emirembe n’emirembe (‘teguzikizibwa, terifa’): tewali ngeri yonna ya kukusimattuka. Envunyu n’omuliro bye biwonawo byokka—so si muntu—era byombi bizikiririza buli kantu kebikwatako. N’olwekyo, ekyogerwako wano si kwe kubonyaabonyezebwa okw’olubeerera, wabula okuzikirizibwa okw’emirembe n’emirembe, olw’okuba abo abazikirizibwa mu ngeri eno tebagenda kuzuukizibwa. [Omuliro] kabonero ka kuzikirira.”
Omuntu yenna amanyi nti Katonda ow’amazima wa kwagala era mwenkanya asobola okukiraba nti ago ge mukulu g’ebigambo bya Yesu ebyo amatuufu. Yali ategeeza nti ababi bajja kuzikirizibwa emirembe n’emirembe awatali kuzuukizibwa, so si nti bajja kubonyaabonyezebwa emirembe n’emirembe.
[Obugambo obuli wansi]
a Mu biwandiiko bya Baibuli ebisinga okwesigika, olunyiriri 44 ne 46 teziriimu. Abekenneenya Baibuli bagamba nti kirabika ennyiriri ezo ebbiri zaayongerwamu luvannyuma. Profesa Archibald T. Robertson agamba nti: “Mu biwandiiko ebisingayo obukadde n’okwesigika, ennyiriri ezo ebbiri teziriimu. Zisangibwa mu ttuluba ly’emizingo eriyitibwa Western n’eddala eriyitibwa Syrian (Byzantine). Ziddamu buzzi ebyo ebiri mu lunyiriri 48. N’olwekyo olunyiriri 44 ne 46 tezirina kubeeramu era ffe tetwaziteekamu.”
b “Balifuluma ne batunuulira emirambo gy’abasajja [abanjeemera]: kubanga envunyu yaabwe terifa, so n’omuliro gwabwe tegulizikizibwa: era baliba kyenyinyalwa eri bonna abalina omubiri.”—Is. 66:24.